2010–2019
Nyob ntawm Nov Ua Hauj Lwm rau Kev Ncaj Ncees
October 2015


Nyob ntawm Nov Ua Hauj Lwm rau Kev Ncaj Ncees

Peb yeej xaiv tau los sawv cev rau tus Tswv Yexus Khetos los pab rau txoj kev ncaj ncees.

Kuv zoo siab uas peb tuaj koom ua ke nrog rau cov poj niam muaj siab ntseeg, xws li Lisa—tus viv ncaus nyob hauv daim video—uas muaj lub siab dawb, uas hlub tus Tswv thiab ua hauj lwm rau Nws, txawm hais tias nyias muaj nyias kev nyuaj siab. Lisa zaj dab neeg ua rau kuv nco tau hais tias peb ib leeg yuav tsum hlub ib leeg thiab yuav tsum pom tej kev zoo ntawm lub siab. Tus Cawm Seej qhia hais tias neeg tej ntsuj plig muaj nqi heev rau Vajtswv.1 Txawm hais tias peb muaj 8 xyoo los sis 108 xyoo, peb txhua tus yeej muaj nqi rau Nws.2 Nws hlub peb. Peb yog Vajtswv cov ntxhais. Peb yog cov viv ncaus nyob hauv Xi-oos. Peb muaj cwj pwm los saum ntuj los, thiab peb txhua tus muaj hauj lwm zoo ua.

Lub sij hawm sov no kuv mus ntsib ib leej niam uas muaj ib co ntxhais. Nws qhia rau kuv hais tias nws xav tias cov ntxhais hluas yuav tsum muaj ib lub hom phiaj, ib qho uas ua rau lawv xav tias lawv muaj nqi. Nws paub hais tias peb yuav pom tau tias peb zoo li cas thiab txoj kev tsim nyog uas nyob mus ib txhis yog tias peb ua raws li lub ntsiab los saum ntuj los hauv lub ntiaj teb no. Hmo no, pawg hu nkauj no nyuam qhuav hu zaj nkauj qhia txog peb lub ntsiab. Txawm hais tias muaj kev sim siab thiab kev nyuaj siab, muaj kev ntshai thiab kev poob siab, los peb muaj tej siab loj. Peb yeej yuav ua peb txoj hauj lwm. Peb nyob ntawm nov ua hauj lwm rau kev ncaj ncees.3 Cov viv ncaus, nyob hauv lub hom phiaj no peb muaj nqi. Nws xav tau peb txhua tus.

Txoj hauj lwm ncaj ncees uas peb ua yog txoj ntawm Khetos. Nov yog txoj hauj lwm cawm seej4 Tus Tswv qhia hais tias nov yog Nws txoj hauj lwm thiab Nws lub yeeb koob—ua kom tib neeg tsis txawj tuag thiab tau txoj sia nyob mus ib txhis.5 Peb twb yog txoj hauj lwm uas Yexus Khetos tau raug tsim txom, ntshav ntws ntawm txhua lub qhov hws los, thiab Nws txoj kev hlub peb es Nws thiaj li tuag rau peb. Nws txoj hauj lwm yog txoj moo zoo, tsab xov xwm zoo, uas nws los rau hauv lub ntiaj teb, Yexus, los raug ntsia saum ntoo khaub lig, thiab los nyiaj lub ntiaj teb tej kev txhaum, thiab los ntxuav lub ntiaj teb kom huv, thiab ntxhuav tej kev tsis ncaj ncees; kom nws cawm tau txhua tus.6 Peb tus Cawm Seej twb “ua yam ntxwv kom coj peb mus.”7 Kuv hais lus tim khawv hais tias thaum peb ua raws li Nws tus yam ntxwv, hlub Vajtswv, thiab ua siab zoo siab sib pab thiab muaj kev khuv leej, ces peb yuav ua neej dawb huv, “tsis muaj kev txhaum rau ntawm Vajtswv thaum hnub kawg.”8 Peb xaiv los ua tus Tswv txoj hauj lwm ncaj ncees kom peb thiaj li koom ib lub siab nrog Leej Txiv thiab Leej Tub.9

Tus yaj saub Maumoos tau hais tias, “Vim peb muaj ib txoj hauj lwm ua thaum tseem nyob hauv lub cev av no, xwv kom peb yuav kov yeej tus yeeb ncuab ntawm tag nrho tej kev ncaj ncees, thiab cia peb tej ntsuj plig so nyob hauv Vajtswv lub nceeg vaj.”10 Cov thawj coj hauv lub Koom Txoos thaum ub thiab cov neeg pioneer yeej rau siab ntso ua siab loj thiab muaj siab ntseeg kom lawv thiaj li muaj txoj moo zoo uas txum txim rov qab los thiab txim tsa tej tuam tsev kom thiaj li ua tau tej kab ke tsa nto. Cov pioneer tam sim no, uas yog nej thiab kuv, peb yuav tsum rau siab ntseeg, “los mus ua hauj lwm hauv [tus Tswv] lub vaj kom los cawm tib neeg.”11 Thiab ua li Thawj Tswj Hwm Gordon B. Hinckley tau qhia, “Yuav zoo heev thaum tus Tswv pom tias Nws txoj hauj lwm zoo no … twb muaj cov neeg siab zoo, uas hlub tus Txhiv Dim twb ua lawm.”12 Peb koom nrog cov viv ncaus uas muaj siab ntseeg thaum ub, tam sim no thiab yav tom ntej kom los ua txoj hauj lwm ntawm kev cawm seej!

Ua ntej peb yug los, peb twb txais Leej Txiv Saum Ntuj Ceeb Tsheej txoj hau kev uas qhia tias “Nws cov me nyuam yuav tau ib lub cev nqaij daim tawv thiab ua neej nyob hauv lub ntiaj teb kom peb yuav vam meej mus txog thaum peb zoo tag nrho thiab peb txais txoj sia nyob mus ib txhis.”13 Txwj Laug John A. Widtsoe piav txog qhov no hais tias: “Peb twb yeem tam sim ntawd, thiab hais tias peb yuav tsis cawm peb tus kheej xwb tab sis … cawm tag nrho tib neeg. Peb twb sib koom tes nrog tus Tswv. Txoj hauj lwm no tsis yog Leej Txiv Saum Ntuj Ceeb Tsheej, thiab tus Cawm Seej txoj xwb tab sis yog peb txoj thiab. Peb cov tsawg, cov txo hwj chim twb nrog tus Tswv sib koom tes kom ncav tau lub ntsiab ntawm txoj kev cawm seej nyob mus ib txhis.”14

Nyob hauv peb lub neej txawj tuag no peb twb rov qab cog lus dua hais tias peb yuav ua hauj lwm pab tus Cawm Seej ntawm txoj kev cawm seej. Thaum peb ua tej kab ke dawb huv ntawm lub pov thawj hwj, ces peb twb cog lus hais tias peb mam li ua Vajtswv tej hauj lwm tag siab tag ntsws, tag lub zog.15 Peb tau txais tus Vaj Ntsuj Pliag Dawb Huv thiab xav kom Nws pab coj peb kev. Lub ntiaj teb yeej yuav pom kev ncaj ncees thaum peb to taub tias Vajtswv yuav kom peb ua dab tsi ces peb cia li ua xwb.

Kuv paub ib tug me nyuam yaus uas hais rau nws tus phooj ywg ntawm qhov chaw tos npav tias, “ Koj cia li nrog kuv mus tshawj thiab kawm txog Yexus los mas!”

Kuv pom ib co ntxhais hluas sib tuav tes thiab cog lus hais tias lawv yuav rau siab ib leeg pab ib leeg ces lawv npaj ib txoj kev pab ib tug ntxhais hluas uas muaj yees ub no.

Kuv pom cov niam hluas heev muab tag nrho lawv lub sij hawm, lawv txoj kev txawj ntse, thiab lawv lub dag zog los qhia thiab ua yam ntxwv txog txoj moo zoo kom lawv cov me nyuam, thiaj zoo li Hilamas cov tub, kom thiaj li ua siab loj thiab muaj kev ntseeg thaum muaj kev nyuaj siab, kev haub ntxias, thiab kev cov nyom.

Tej zaum qhov kuv nyiam heev yog ib tug viv ncaus uas tsis tau yuav txiv hais lus tim khawv hais tias txoj hauj lwm tseem ceeb tshaj plaws yog peb yuav tsum npaj los sib yuav thiab muaj ib tse neeg. Txawm hais tias nws tsis tau muaj ib tsev neeg, los nws yeej paub hais tias tsev neeg yog qhov tseem ceeb heev ntawm txoj hauj lwm ntawm kev cawm seej. “Txoj kev zoo siab los saum ntuj los ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa.”16 Peb hawm Leej Txiv txoj hau kev thiab muab yeeb koob rau Vajtswv thaum peb ntxiv dag zog rau tej txoj kev sib yuav uas nyob mus ib txhis. Peb ua neej nyob dawb huv thiab tsim txiaj kom thaum muaj cib fim, ces peb twb npaj lawm los khi lus hauv tus Tswv lub tsev thiab ua raws li kev khi lus ntawd mus ib txhis.

Peb nyias yeej muaj nyias ib lub sij hawm hauv lub neej. Tab sis txawm hais tias peb kawm ntawv, ua hauj lwm, nyob hauv zos, thiab hauv tsev, los peb yog tus Tswv cov tub txib thiab peb khiav hauj lwm rau Nws.

Nyob hauv txoj hauj lwm cawm seej, tsis muaj sij hawm los sib piv, sib cav, los sis sib rau txim. Tsis yog hais txog saib laus los hluas, leej txawj ntse tshaj, los sis yuav tau koob tau npe. Txoj hauj lwm dawb huv no yog hais kom peb muaj lub siab mob, siab xav ua zoo, thiab kam siv peb tej kev txawj ntse los saum ntuj los ua tus Tswv txoj hauj lwm li Nws lub siab nyiam. Yog qhov uas peb yuav txo hwj chim thiab txhos caug thiab hais tias, “Kuv Txiv, … tsis txhob ua li kuv xav, tab sis ua li koj xav.”17

Los ntawm tus Tswv lub zog peb “ua tau txhua yam.”18 Peb rau siab nrhiav Nws txoj kev coj thaum peb thov Vajtswv, nyeem vaj lug kub, thiab mloog cov lus ntxhi ntawm tus Vaj Ntuj Plig Dawb Huv. Ib tug viv ncaus, uas nyuaj siab heev txog ib txoj hauj lwm tau sau hais tias, “Qee zaum kuv xav tias xyov cov viv ncaus thaum ub puas ua li peb tam sim no es, pw rau lub tog hauv ncoo hmo ntuj thiab thov Vajtswv tias, ‘Txawm tias tag kis muaj li cas los, Koj puas kam pab kuv kom dhau?’” Ces nws sau ntxiv tias, “Muaj hmoov kawg, uas peb ib leej muaj ib leeg thiab peb sawv daws nyob no ua ke!”19 Txawm hais tias peb muaj dab tsi, nyob qhov twg ntawm txoj kev cawm seej, los peb sib koom siab cog lus rau tus Cawm Seej. Peb ib leeg txhawb nqa ib leeg hauv Nws txoj kev sib pab.

Daim Duab
Ella Hoskins ua nws qhov Personal Progress tag

Tej zaum tsis ntev tas los no, nej tau nyeem txog tus Viv Ncaus Ella Hoskins, ua thaum nws muaj 100 xyoo lawv hu nws los pab cov ntxhais hluas hauv nws pawg ntseeg ua Personal Progress.20 Ob xyoo tos qab, nws muaj 102 xyoos, Viv Ncaus Hoskins tau txais lub Koom Haum Ntxhais Hluas txoj hlua caj dab. Cov ntxhais hluas, hauv pawg ntseeg thiab cov Ntxhais Hluas hauv ceg txheem ntseeg thiab cov tuam thawj tswj hwm hauv Koom Haum Niam Tsev, thiab tsev neeg tuaj sib koom ua kev pab nws ua kev zoo siab rau qhov nws ncav tau lub hom phiaj no. Txawm hais tias laus los hluas, ua hauj lwm hauv lub koom haum twg, muaj txiv los tsis tau muaj, yeej tsis tseem ceeb thaum rau siab ntseeg ua hauj lwm pab lwm tus. Cov ntxhais hluas ua Viv ncaus Hoskins tsaug, rau nws tej kev qhia thiab rau nws tus yam ntxwv ncaj ncees. Lawv xav coj kom tau zoo li nws. Tom qab ntawm, kuv nug Viv ncaus Hoskins tias, “Koj ua li cas thiaj li ua tau?”

Nws teb hais tias, “Kuv hloov siab lees txim txhua hnub.”

Tus poj niam uas coj tu tu, es muaj tus Tswv tus Ntsuj Plig ci ntsa iab, ua rau nco tau hais tias kom yuav ci tau ntsa iab, sawv tau nrog tus Cawm Seej thiab foom tau koob hmoov rau lwm tus, peb yuav tsum ua neeg dawb huv. Kev dawb huv yog los ntawm Khetos txoj kev ua siab zoo thaum peb xyeej tej yam phem es xaiv los hlub Vajtswv tag siab tag ntsws, thiab tag lub zog.21 Tus Thwj Tim Pov Lauj tau qhia tias, “Tsis txhob ua siab heev … li cov hluas ib txwm ua: … ua neeg ncaj ncees, muab siab rau ntseeg, hlub lwm tus, muaj kev thaj yeeb li cov neeg uas ua haum tus Tswv siab.”22 Peb yeej tsis muaj ib tug uas zoo tag nrho li. Peb sawv daws tau ua txhaum. Tab sis peb hloov siab lees txim kom peb zoo dua thiab “muaj lub npe [ntawm Khetos] sau rau hauv [peb] tej siab”23 Thaum peb ua siab dawb siab zoo ua hauj lwm rau tus Tswv ces ua rau lwm tus neeg pom tau tus Cawm Seej txoj kev hlub thiab pom tau ntuj ceeb ib pliag.

Peb yeej xaiv tau los sawv cev rau tus Tswv Yexus Khetos los pab rau txoj kev ncaj ncees. Cia peb los sawv ua ke thiab “muaj siab zoo mus rau yam tom ntej, ua neej raws li txoj moo zoo, hlub tus Tswv, thiab txim tsa [Nws] lub nceeg vaj.”24 Kuv hais lus tim khawv hais tias nyob hauv txoj hauj lwm zoo heev no, peb yuav los paub txog Vajtswv txoj kev hlub dawb paug. Xav kom peb tau txoj kev xyiv fab thiab tau tag nrho tej yam zoo heev hauv txoj sia nyob mus ib txhis. Los ntawm Yexus Khetos lub npe dawb ceev, amees.