2010–2019
I ô nei no te tavini maite i te opuaraa parau ti’a
Atopa 2015


I ô nei no te tavini maite i te opuaraa parau ti’a

A ma’iti na tatou i te tavini maite i te opuaraa parau ti’a ei ti’a itoito no to tatou Fatu ra o Iesu Mesia.

Te oaoa nei au ua amui tatou te mau vahine faaroo, mai ia Lisa atoa—te tuahine i roto i te video—e aau mâ, o te here nei i te Fatu e o te tavini nei Ia’na, noa’tu â ta tatou mau tamataraa. Te faahaamana’o nei te aamu o Lisa ia’u nei e, e ti’a ia tatou ia here te tahi i te tahi e ia hi’o i roto i te tahi e te tahi i te nehenehe o te varua. Ua haapii te Faaora e, « A haamana’o na e e faufaa rahi to te mau varua taata i to te Atua hi’oraa mai ».1 E 8 e aore râ e 108 anei to tatou matahiti, e mea « here [tatou tata’itahi] i mua [ia’na] ».2 Ua here Oia ia tatou. E mau tamahine tatou na te Atua. E mau tuahine tatou no Ziona. E huru hanahana to tatou e e ohipa hanahana e ti’a ia tatou ia rave.

I te tau ve’ave’a i ma’iri ua hahaere au i te hoê metua vahine iti e ta’na mau tamahine. Ua parau mai oia ia’u i to’na mana’o e, titauhia te tahi opuaraa, te tahi mea no te tauturu ia ratou ia putapû i to ratou faufaa. Ua ite oia e, e ti’a ia tatou ia ite mai i to tatou iho faufaa mure ore na roto i te haaraa ia au i ta tatou fâ hanahana i te tahuti nei. I teie pô, ua himene mai teie pupu himene nehenehe e te faahiahia i te mau parau e haapii nei i ta tatou fâ. I roto i te hi’opo’araa e te tamataraa, i roto atoa i te mata’u e te taiâ, e mau aau itoito tatou. Ua ineine roa tatou no te raveraa i ta tatou tuhaa. Tei ô nei tatou no te tavini maite i te [opuaraa parau ti’a].3 E te mau tuahine, teie te opuaraa e faufaa ai tatou paatoa. Tatou paatoa tei titauhia.

Teie opuaraa parau ti’a ta tatou e tavini nei, o te opuaraa ïa a te Mesia. O te opuaraa no te faaoraraa.4 Ua haapii te Fatu e, « O teie ho’i ta’u ohipa e to’u hanahana hoi, ia faatupu i te tahuti ore e te ora mure ore o te taata nei ».5 O tatou te tumu i mamae ai Iesu, e i tahe ai to’na toto i roto i te mau poa atoa, e ua horo’a ho’i i To’na ora ma te here rahi mau. O te parau apî maitai Ta’na opuaraa, « te parau oaoa… ua haere mai oia i te ao nei, oia o Iesu, ia faasataurohia no te ao nei, e ia hopoi i te mau hara no te ao nei, e ia haamo’a i te ao nei, e ia tamâ atu i te reira i te parau ti’a ore atoa ra ; ia ora na roto ia’na o ratou atoa ».6 Ua « arata’i mai [te Faaora] ia tatou, Oia to tatou avei’a ».7 Te faaite papû nei au e, ia pee tatou i To’na hi’oraa, ma te here i te Atua e ma te tavini te tahi i te tahi ma te maitai e te aroha aumihi (compassion), e ti’a mâ tatou ma te « parau ti’a… i mua i te aro o te Atua ia tae i te mahana hopea ra ».8 Te ma’iti nei tatou ia tavini i te Fatu i roto i Ta’na opuaraa parau ti’a no te riro hoê e te Metua e e te Tamaiti.9

Ua faaite afaro mai te peropheta Moromona e, « E ohipa ho’i ta tâua e rave a parahi ai tâua i roto i te ti’ahapa araea nei, oia ïa, ia vî te enemi i te mau parau ti’a atoa ia tâua, e ia roaa te faaearaa no to tâua varua i te basileia o te Atua ra ».10 E mau aito mau te mau feia faatere matamua no te Ekalesia e te mau pionie i te haere-itoito-raa i mua, ma te haapa’o maitai e te papû, no te haamauraa i te evanelia tei faaho’i-faahou-hia mai e no te paturaa i te mau hiero tei reira te mau oro’a no te faateiteiraa e ravehia ai. E na reira atoa te mau pionie o teie anotau, oia ho’i outou e o vau nei, i te haereraa i mua ma te faaroo, « no te rave i te ohipa [a te Fatu] i roto i Ta’na ra ô vine no te faaoraraa i te mau varua o te taata nei ».11 E mai ta te peresideni Gordon B. Hinckley i parau, « Auê ïa te faahiahia o te tau no ananahi ia faatere atu te Mana Hope i Ta’na ohipa hanahana… na roto i te [taviniraa] pipiri ore o ratou tei î te aau i te here no te Taraehara o te ao ».12 Ua amui tatou i te mau tuahine haapa’o maitai no tahito ra, no teie anotau, e no te u’i e ti’a mai nei, i te taime e amui tatou i roto i te ohipa no te faaoraraa !

Hou to tatou fanauraa, ua farii tatou i te faanahonaraa a to tatou Metua i te ao ra « na roto ho’i i te reira e ti’a ai [ia tatou] ia farii i te hoê tino tahuti e ia noaa te iteraa tahuti nei no te haere i mua e tae atu ai i te maitai roa ra, e i te pae hopea, e faatupu i to [tatou] haerea hanahana ei mau fatu ai’a no te ora mure ore ».13 No ni’a i te reira fafauraa hou i te tahuti nei, ua parau Elder John A. Widtsoe e : « I farii iho na tatou i reira e, eita tatou e riro noa ei mau faaora no tatou iho… ei mau faaora atoa râ no te utuafare taata paatoa. I riro iho na tatou ei apiti no te Fatu. E ere atura te ohiparaa i roto i teie faanahoraa ei ohipa noa na te Metua e na te Faaora, e ohipa atoa râ na tatou. Te iti roa i rotopu ia tatou, te haehaa roa, e apiti ïa oia no te Mana Hope i roto i te rave-faaoti-raa i te opuaraa no te faanahoraa mure ore no te faaoraraa.14

I ô nei i te tahuti nei, ua fafau faahou tatou ia tavini i te Faaora i roto i te ohipa no te faaoraraa. Na roto i te raveraa i te mau oro’a mo’a, te fafau nei tatou e, e haamata tatou i te rave i te ohipa a te Atua ma to tatou aau atoa e te puai e te mana’o e te itoito.15 E farii tatou i te Varua Maitai e e imi tatou i To’na mau muhumuhuraa no te arata’i i ta tatou tautooraa. E anaana atu te parau ti’a i roto i te ao i te taime e maramarama tatou e aha ta te Atua e hinaaro ra ia tatou ia rave e a rave atu ai i te reira.

Ua mâtau vau i te hoê tamarii Paraimere tei parau i to’na hoa i te vahi tia’iraa pereoo mataeinaa e, « Hey, haere mai i te pureraa na muri ia’u no te haapii no ni’a ia Iesu ! »

Ua ite au i te tahi mau feia apî tamahine i roto i te hoê piha haapiiraa tei nati i te rima ma te fafau i te tahi e te tahi e, e tavini ratou ia ratou ma te faanaho roa i te tahi opuaraa e haere e tavini i te tahi tamahine e fifi ra i te hiaai faatîtî (dépendance).

Ua ite au i te tahi mau metua vahine apî tei horo’a i to ratou taime atoa, te taleni e te ito no te haapiiraa e no te faaiteraa i te hi’oraa o te mau parau tumu o te evanelia, ia ti’a itoito atu ta ratou mau tamarii mai te mau tamaiti a Helamana ra, ma te haapa’o maitai i roto i te tamataraa, te faahemaraa e te ati.

Peneia’e te ohipa faatupu haehaa roa a’e râ no’u, o te faarooraa ïa i te hoê tuahine otahi i te parauraa i te auahi ura o to’na iteraa papû tafetafeta ore e, te ohipa faufaa roa a’e ta tatou e nehenehe e rave, o te faaineineraa ïa no te faaipoiporaa e te utuafare. Noa’tu â aita oia i tapae i reira, ua ite râ oia e, o te utuafare te tumu rahi o te ohipa no te faaoraraa. « E faati’a te faanahoraa hanahana no te oaoa i te mau aufetiiraa ia vai tamau noa i muri a’e i te pohe ».16 E faatura tatou i te faanahoraa a te Metua ma te faahanahana i te Atua i te taime tatou e haapuai ai e e faahuiarii ho’i i teie mau taamuraa no te fafauraa apî e te mure ore. E ma’iti tatou i te ora i te oraraa mâ e te viivii ore, e ia tae i te taime e horo’ahia mai ai te rave’a, ua ineine tatou no te rave i te reira fafauraa mo’a i roto i te fare o te Fatu e ia haapa’o i te reira e a muri noa’tu.

E mau taime e e mau tau ta tatou e ratere nei i roto i te oraraa. Teie râ, ti’a noa’tu tatou i te haapiiraa, i te ohipa, i rotopû i te huiraatira e i te fare ihoa râ, ua riro tatou ei mau ti’a mana no te Fatu i te raveraa i Ta’na ohipa.

I roto i te ohipa no te faaoraraa, aita e vahi no te hi’o-faahemo-raa i te tahi, te faainoraa e te faahaparaa. Eiaha te hi’oraa i te matahiti, te ite e aore râ te haapopouraa o te taata. Tei ni’a teie ohipa mo’a i te faatupuraa i te aau tatarahapa, te varua haehaa e te hinaaro ia faaohipa i ta tatou mau horo’a hanahana e te mau taleni taa ê mau no te raveraa i te ohipa a te Fatu mai te au i Ta’na faanahoraa. O te roaaraa te haehaa no te tuu i te turi avae i raro a parau ai e, « E tau Metua e… ia tupu… to oe hinaaro, eiaha to’u ».17

Na roto i te puai o te Fatu « e ti’a ia’u te rave i te mau mea atoa ».18 E tamau noa tatou i te imi i Ta’na arata’iraa na roto i te pure, te mau papa’iraa mo’a e te mau muhumuhu a te Varua Maitai. Ua papa’i te hoê vahine tei tonohia no te tahi ohipa huru teimaha, « I te tahi mau taime, e uiui au, aita anei te mau tuahine matamua o te aamu o te Ekalesia i topa atoa te upoo i ni’a i te tûru’a i te pô ma te pure e, ‘Noa’tu â te ohipa ananahi, e tauturu mai na Oe ?’ » E ua papa’i a’era oia e, « Hoê o ta tatou haamaitairaa [oia ho’i], tei ô nei tatou tata’itahi e tatou paatoa tei amui i roto i te reira ! »19 Noa’tu te huru o to tatou oraraa, noa’tu te vahi tei reira tatou i ni’a i te e’a no te faaoraraa, e amui tahoê tatou i roto i ta tatou fafauraa i mua i te Faaora. E turu tatou te tahi i te tahi i roto i te taviniraa Ia’na.

Hōho’a
Ua rave faaoti Ella Hoskins i te faanahoraa Faahaereraa ia’u iho i mua

Aita i maoro a’enei, ua tai’o paha outou i te aamu no te tuahine Ella Hoskins, i te 100raa o to’na matahiti ua piihia oia no te tauturu i te feia apî tamahine e ta ratou Faahaereraa ia’u i mua.20 E piti matahiti i muri iho, i te 102raa o to’na matahiti, ua haafeti’ahia oia i te Feti’a no te tamahine haapa’o. Ua tairuru mai te mau feia apî tamahine, te mau peresedeniraa Feia Apî Tamahine e Sotaiete Tauturu o te paroisa e te titi, na reira atoa te utuafare no te faahanahana i te ohipa ta’na i rave. Ua mo’e roa te mau oti’a no te faito matahiti, te faanahoraa e te ti’araa taata faaipoipo i roto i te taviniraa faaroo rahi. Ua faaite te mau feia apî tamahine i to ratou mauruuru i te tuahine Hoskins, no ta’na mau haapiiraa e to’na hi’oraa parau ti’a. Ua hinaaro ratou ia riro mai ia’na ra te huru. I muri iho ua ani atura vau i te tuahine Hoskins e, « Nahea oia i te raveraa i te reira ? »

Pahono oioi mai nei oia e, « E tatarahapa vau pauroa te mahana »

I roto i teie vahine marû, tei î roa i te Varua o te Fatu, e tei anapanapa i te maramarama anaana, ua haaamana’o a’era vau e, no te anaana nehenehe mai, no te ti’a e te Fatu ra, e no te haamaitai ia vetahi ê, titauhia ia vai mâ. E mâ tatou na roto i te maitai rahi o te Mesia ia pato’i tatou i te mea paieti ore ra e ia ma’iti tatou ia here i te Atua ma to tatou aau atoa, mana’o e puai.21 Ua haapii te aposetolo Paulo e, « E maue ê… i te mau hinaaro o te apîraa ra… e tapi râ i te parau ti’a, e te faaroo, e te aroha, e te hau, o oe e te feia’toa e haamori i te Fatu ma te aau mau ra ».22 Aita hoê o tatou i te mea maitai roa. Ua hape a’enei tatou paatoa. E tatarahapa râ tatou ia maitai mai tatou e « ia tamau i te i’oa [o te Mesia] i te papa’i-mau-hia i roto i to [tatou] ra aau ».23 I te taime e tavini ai tatou na roto i te i’oa o te Fatu, ma te aau mâ, e anapanapa tatou i te here o te Faaora ma te horo’a atoa ia vetahi ê i te tahi hi’oraa poto o te ra’i.

A ma’iti na tatou i te tavini maite i te opuaraa parau ti’a ei ti’a itoito no to tatou Fatu ra o Iesu Mesia. E ti’a amui ana’e tatou e « ma te reo himene i to tatou aau, haere ana’e i mua ma te ora i te evanelia e ma te here i te Fatu e ma te patu i [To’na] basileia ».24 Te faaite papû nei au e, i roto i teie ohipa hanahana tatou e ite ai i te here mau o te Atua. E riro tatou i te farii i te oaoa mau e te mau hanahana atoa o te mure ore. Na roto i te i’oa mo’a o Iesu Mesia ra, amene.