ຈົ່ງຍຶດໝັ້ນຢູ່ໃນທາງຂອງເຈົ້າ
ໂດຍ ແອວເດີ ໂກອີຈີ ອາໂອຢາກີ
ອະດີດສາວົກເຈັດສິບ
ຈົ່ງໃຫ້ພຣະເຈົ້າມີຄວາມສຳຄັນກວ່າທຸກສິ່ງ, ບໍ່ວ່າທ່ານຈະປະເຊີນກັບການທົດລອງໃດໆ. ຈົ່ງຮັກພຣະເຈົ້າ. ຈົ່ງມີສັດທາໃນພຣະຄຣິດ, ແລະ ຝາກຝັງຕົວທ່ານໄວ້ກັບພຣະອົງໃນທຸກສິ່ງ.
ໃນວັນທີ 11 ເດືອນມິນາ ປີ 2011, ຂ້າພະເຈົ້າໄດ້ຢືນຢູ່ສະຖານີລົດໄຟ ໃນໂຕກຽວ ຊີນາກາວາ ເພື່ອໄປຢ້ຽມຢາມເຂດເຜີຍແຜ່ ຍີ່ປຸ່ນ ໂຄບີ. ປະມານ 2:46 ຕອນບ່າຍ, ແຜ່ນດິນໄຫວແຮງເຖິງ 9.0 ໄດ້ເກີດຂຶ້ນ. ຂ້າພະເຈົ້າບໍ່ສາມາດຢືນຈັ້ງຢູ່ ເພາະມັນໄຫວແຮງຂະໜາດ, ແລະ ຂ້າພະເຈົ້າໄດ້ຈ່ອງຮາວຂັ້ນໄດໄວ້. ດອກໄຟຟ້າທີ່ຢູ່ເພດານໃກ້ໆ ກໍໄດ້ຕົກລົງໃສ່ພື້ນ. ທຸກຄົນໃນເມືອງໂຕກຽວ ມີຄວາມຢ້ານກົວຫລາຍ.
ໂຊກດີທີ່ຂ້າພະເຈົ້າບໍ່ໄດ້ຮັບບາດເຈັບ, ແລະ ສີ່ຊົ່ວໂມງຈາກນັ້ນ, ຂ້າພະເຈົ້າໄດ້ຮູ້ສຶກສະບາຍໃຈ ທີ່ໄດ້ຍິນວ່າ ທຸກຄົນໃນຄອບຄົວຂອງຂ້າພະເຈົ້າປອດໄພດີ.
ໂທລະພາບກໍມີຮູບພາບທີ່ໜ້າຢ້ານກົວຫລາຍ. ມີລົມພະຍຸຮ້າຍເກີດຂຶ້ນໃນເຂດເຜີຍແຜ່ ເຊັນໄດ—ນ້ຳໄດ້ກວາດລ້າງທຸກສິ່ງທີ່ຢູ່ໃນເສັ້ນທາງຂອງມັນ: ລົດ, ເຮືອນຊານ, ຕຶກໂຮງງານ, ແລະ ທົ່ງໄຮ່ທົງນາ. ຂ້າພະເຈົ້າຕົກຕະລຶງກັບພາບທີ່ຮ້າຍກາດນັ້ນ, ແລະ ຂ້າພະເຈົ້າໄດ້ຮ້ອງໄຫ້. ແລະ ຂ້າພະເຈົ້າໄດ້ອະທິຖານຢ່າງແຮງກ້າ ຂໍໃຫ້ພຣະບິດາເທິງສະຫວັນປົກປັກຮັກສາ ແລະ ຊ່ອຍເຫລືອຜູ້ຄົນທີ່ອາໄສຢູ່ໃນຂົງເຂດນີ້ ທີ່ຂ້າພະເຈົ້າຮັກແພງຫລາຍທີ່ສຸດ.
ຕໍ່ມາ, ຂ້າພະເຈົ້າໄດ້ຍິນວ່າ ຜູ້ສອນສາດສະໜາ ແລະ ສະມາຊິກຂອງສາດສະໜາຈັກ ປອດໄພດີ. ເຖິງຢ່າງໃດກໍຕາມ, ສະມາຊິກຫລາຍຄົນໄດ້ຮັບການກະທົບກະເທືອນ, ໄດ້ສູນເສຍຄົນໃນຄອບຄົວ, ບ້ານເຮືອນ, ແລະ ຊັບສິນ. ຫລາຍກວ່າ 20,000 ຄົນ ໄດ້ເສຍຊີວິດໄປ, ຊຸມຊົນຖືກທຳລາຍ, ແລະ ຫລາຍຄົນໄດ້ຖືກບັງຄັບໃຫ້ໜີຈາກບ້ານເຮືອນ ເພາະເຫດການທີ່ເກີດຂຶ້ນຢູ່ໂຮງງານພະລັງປະລະມະນູ.
ໄພທຳມະຊາດເຊັ່ນນັ້ນ ໄດ້ສ້າງຄວາມເສຍຫາຍອັນໃຫຍ່ຫລວງ ໃນຫລາຍພາກສ່ວນຂອງໂລກ ໃນເວລານີ້, ເຮັດໃຫ້ຫລາຍຄົນຕ້ອງເສຍຊີວິດໄປ. ເຮົາໄດ້ຖືກເຕືອນເລື່ອງໄພທຳມະຊາດ, ສົງຄາມ, ແລະ ຄວາມຫຍຸ້ງຍາກຈົນນັບບໍ່ຖ້ວນ ທີ່ຈະເກີດຂຶ້ນຢູ່ໃນໂລກ.
ເມື່ອການທົດລອງເຊັ່ນນັ້ນມາສູ່ເຮົາໃນທັນທີທັນໃດ, ເຮົາອາດຖາມວ່າ, “ເປັນຫຍັງສິ່ງເຫລົ່ານີ້ ຈຶ່ງເກີດຂຶ້ນກັບເຮົາ?” ຫລື “ເປັນຫຍັງເຮົາຕ້ອງຮັບທຸກທໍລະມານ?”
ເປັນໄລຍະດົນນານ, ຫລັງຈາກຂ້າພະເຈົ້າໄດ້ປ່ຽນໃຈເຫລື້ອມໃສພຣະກິດຕິຄຸນ, ຂ້າພະເຈົ້າບໍ່ໄດ້ຮັບຄຳຕອບທີ່ແຈ່ມແຈ້ງຕໍ່ຄຳຖາມທີ່ວ່າ “ເປັນຫຍັງຂ້າພະເຈົ້າຈຶ່ງຖືກທົດລອງ?” ຂ້າພະເຈົ້າເຂົ້າໃຈເຖິງພາກສ່ວນໃນແຜນແຫ່ງຄວາມລອດ ວ່າເຮົາຈະຖືກທົດສອບ. ເຖິງຢ່າງໃດກໍຕາມ, ໃນຄວາມເປັນຈິງ, ກ່ຽວກັບຄຳຖາມຂໍ້ນີ້, ຂ້າພະເຈົ້າບໍ່ມີຄວາມໝັ້ນໃຈພໍ ທີ່ຈະຕອບໄດ້. ແຕ່ໄດ້ມີເວລາໜຶ່ງໃນຊີວິດຂອງຂ້າພະເຈົ້າ ເມື່ອຂ້າພະເຈົ້າໄດ້ປະເຊີນກັບການທົດລອງອັນໃຫຍ່ຫລວງເຊັ່ນນີ້.
ຕອນຂ້າພະເຈົ້າມີອາຍຸໄດ້ 30 ປີ, ຂ້າພະເຈົ້າໄດ້ໄປຢ້ຽມຢາມເຂດເຜີຍແຜ່ ນາໂກຢາ ຊຶ່ງເປັນພາກສ່ວນໜຶ່ງຂອງວຽກງານຂອງຂ້າພະເຈົ້າ. ຫລັງຈາກການປະຊຸມ, ປະທານເຜີຍແຜ່ທີ່ມີເມດຕາ ໄດ້ມອບໝາຍຜູ້ສອນສາດສະໜາ ໃຫ້ຂັບລົດໄປສົ່ງຂ້າພະເຈົ້າຢູ່ເດີ່ນບິນ. ເຖິງຢ່າງໃດກໍຕາມ, ເມື່ອລົດແລ່ນລົງຄ້ອຍໄກເຕີບ ໄປເຖິງໄຟແດງ, ລົດບັນທຸກໃຫຍ່ຄັນໜຶ່ງໄດ້ແລ່ນລົງມາຢ່າງໄວ. ມັນໄດ້ຕຳກົ້ນລົດຂອງພວກເຮົາ ແລະ ເຄື່ອນລົດຂອງພວກເຮົາໄປຂ້າງໜ້າເຖິງ 20 ແມັດ. ສິ່ງທີ່ໜ້າຢ້ານກົວຫລາຍທີ່ສຸດກໍຄື ລົດບັນທຸກຄັນນັ້ນ ບໍ່ມີຄົນຂັບ. ກົ້ນລົດຂອງພວກເຮົາໄດ້ຫຍໍ້ເຂົ້າເຖິງເຄິ່ງລົດ. ໂຊກດີທີ່ແອວເດີສອງຄົນນັ້ນ ກັບຂ້າພະເຈົ້າລອດຊີວິດມາໄດ້.
ເຖິງຢ່າງໃດກໍຕາມ, ໃນມື້ຕໍ່ມາ, ຂ້າພະເຈົ້າຮູ້ສຶກເຈັບປວດຢູ່ຄໍ ແລະ ບ່າໄຫລ່ ທັງເຈັບຫົວຫລາຍທີ່ສຸດ. ນັບຈາກມື້ນັ້ນມາ, ຂ້າພະເຈົ້ານອນບໍ່ໄດ້, ແລະ ຂ້າພະເຈົ້າໄດ້ທົນກັບຊີວິດທີ່ເຕັມໄປດ້ວຍຄວາມເຈັບປວດ ທັງທາງຮ່າງກາຍ ແລະ ຈິດໃຈ. ຂ້າພະເຈົ້າໄດ້ອະທິຖານຂໍໃຫ້ພຣະເຈົ້າປິ່ນປົວຂ້າພະເຈົ້າ, ແຕ່ອາການເຈັບປວດນັ້ນ ມີຢູ່ຕໍ່ໄປ ເປັນເວລາ 10 ປີ.
ໃນເວລານັ້ນ, ຄວາມຮູ້ສຶກສົງໄສ ໄດ້ເລີ່ມຕົ້ນເຂົ້າມາສູ່ຈິດໃຈຂອງຂ້າພະເຈົ້າ, ແລະ ຂ້າພະເຈົ້າໄດ້ຖາມວ່າ, “ເປັນຫຍັງຂ້າພະເຈົ້າຈຶ່ງຕ້ອງທົນກັບຄວາມເຈັບປວດຫລາຍແທ້?” ເຖິງຢ່າງໃດກໍຕາມ, ເຖິງແມ່ນວ່າຂ້າພະເຈົ້າບໍ່ໄດ້ຮັບການປິ່ນປົວທີ່ຂ້າພະເຈົ້າໄດ້ສະແຫວງຫາ, ຂ້າພະເຈົ້າຍັງພະຍາຍາມ ຊື່ສັດໃນການເຊື່ອຟັງຕໍ່ພຣະບັນຍັດຂອງພຣະເຈົ້າຢູ່. ຂ້າພະເຈົ້າໄດ້ສືບຕໍ່ອະທິຖານ ເພື່ອຢາກຮູ້ຄຳຕອບຕໍ່ຄຳອະທິຖານ ທີ່ຂ້າພະເຈົ້າມີກ່ຽວກັບການທົດລອງຂອງຂ້າພະເຈົ້າ.
ມີເວລາໜຶ່ງທີ່ຂ້າພະເຈົ້າໄດ້ພົບເຫັນຕົວເອງດີ້ນລົນກັບບັນຫາສ່ວນຕົວເພີ່ມເຕີມ, ແລະ ຂ້າພະເຈົ້າມີຄວາມປັ່ນປ່ວນ ເພາະວ່າຂ້າພະເຈົ້າບໍ່ຮູ້ຈັກວິທີທີ່ຈະປະເຊີນກັບການທົດລອງອັນໃໝ່ນີ້. ຂ້າພະເຈົ້າໄດ້ອະທິຖານຂໍຄຳຕອບ. ແຕ່ຂ້າພະເຈົ້າບໍ່ໄດ້ຮັບຄຳຕອບໃນທັນທີທັນໃດ. ສະນັ້ນ ຂ້າພະເຈົ້າຈຶ່ງໄດ້ໄປເວົ້າລົມນຳຜູ້ນຳຂອງສາດສະໜາຈັກຄົນໜຶ່ງ ທີ່ຂ້າພະເຈົ້າໄວ້ໃຈ.
ໃນຂະນະທີ່ພວກເຮົາກຳລັງເວົ້າລົມກັນຢູ່ນັ້ນ, ດ້ວຍນ້ຳສຽງທີ່ຮັກແພງຂອງເພິ່ນ, ເພິ່ນໄດ້ເວົ້າວ່າ, “ບຣາເດີ ອາໂອຢາກີ, ຈຸດປະສົງຂອງການມາຢູ່ໃນໂລກນີ້ຂອງທ່ານ ບໍ່ແມ່ນເພື່ອມາປະສົບການກັບການທົດລອງອັນນີ້ບໍ? ຍັງບໍ່ພໍໃຈບໍ ກັບການຮັບເອົາການທົດລອງທຸກຢ່າງຢູ່ໃນຊີວິດນີ້ ຕາມທີ່ມັນເປັນ ແລະ ປະສ່ວນທີ່ເຫລືອໃຫ້ພຣະຜູ້ເປັນເຈົ້າ? ທ່ານບໍ່ຄິດບໍວ່າ ບັນຫານີ້ຈະຖືກແກ້ໄຂ ເມື່ອເຮົາຟື້ນຄືນຊີວິດ?”
ເມື່ອຂ້າພະເຈົ້າໄດ້ຍິນຖ້ອຍຄຳເຫລົ່ານັ້ນ, ຂ້າພະເຈົ້າໄດ້ຮູ້ສຶກເຖິງພຣະວິນຍານຂອງພຣະຜູ້ເປັນເຈົ້າ ຢ່າງແຮງກ້າ. ຂ້າພະເຈົ້າໄດ້ຍິນຄຳສອນນີ້ຫລາຍເທື່ອຈົນນັບບໍ່ຖ້ວນ, ແຕ່ຕາແຫ່ງຄວາມເຂົ້າໃຈຂອງຂ້າພະເຈົ້າບໍ່ໄດ້ເປີດເທົ່າກັບເວລານັ້ນ. ຂ້າພະເຈົ້າເຂົ້າໃຈວ່າ ນີ້ຄືຄຳຕອບທີ່ຂ້າພະເຈົ້າຢາກຮູ້ຈາກພຣະຜູ້ເປັນເຈົ້າ. ຂ້າພະເຈົ້າຈຶ່ງເຂົ້າໃຈຢ່າງແຈ່ມແຈ້ງເຖິງແຜນແຫ່ງຄວາມລອດຂອງພຣະບິດາເທິງສະຫວັນ ແລະ ເຂົ້າໃຈຕື່ມອີກເຖິງຄວາມສຳຄັນຂອງຫລັກທຳນີ້.
ໃນໜັງສືອັບຣາຮາມ, ອົງພຣະຜູ້ເປັນເຈົ້າ ໄດ້ປະກາດວ່າ ພວກພຣະອົງຈະພິສູດພວກເຮົາໂດຍວິທີນີ້, ເພື່ອເບິ່ງວ່າພວກເຮົາຈະເຮັດທຸກສິ່ງທັງປວງ ສິ່ງໃດກໍຕາມທີ່ພຣະຜູ້ເປັນເຈົ້າອົງເປັນພຣະເຈົ້າຂອງພວກເຮົາຈະບັນຊາພວກເຮົາຫລືບໍ່.”1
ເປັນເພາະວ່າ ພຣະເຈົ້າຜູ້ໄດ້ສ້າງຟ້າສະຫວັນ ແລະ ແຜ່ນດິນໂລກ ຮູ້ຈັກແບບແຜນການສ້າງຂອງໂລກນີ້, ພຣະອົງຈຶ່ງມີອຳນາດເໜືອທຸກສິ່ງ ໃນຟ້າສະຫວັນ ແລະ ເທິງແຜ່ນດິນໂລກ, ແລະ ວ່າກ່ອນແຜນແຫ່ງຄວາມລອດຈະບັນລຸຄວາມສຳເລັດໄດ້ນັ້ນ, ພຣະອົງຕ້ອງໃຫ້ເຮົາໄດ້ປະສົບການກັບຫລາຍສິ່ງ—ເຊັ່ນ ການທົດລອງ—ໃນໄລຍະທີ່ເຮົາຢູ່ໃນໂລກນີ້.
ແລະ ພຣະຜູ້ເປັນເຈົ້າໄດ້ກ່າວກັບໂຈເຊັບ ສະມິດ ດັ່ງນີ້:
ເຈົ້າຈົ່ງຮູ້ໄວ້ເຖີດ, ລູກຂອງພໍ່, ວ່າສິ່ງທັງໝົດເຫລົ່ານີ້ ຈະເປັນປະສົບການໃຫ້ແກ່ເຈົ້າ, ແລະ ຈະເກີດຂຶ້ນເພື່ອຄວາມດີຂອງເຈົ້າ. …
ສະນັ້ນ, ຈົ່ງຍຶດໝັ້ນຢູ່ໃນທາງຂອງເຈົ້າ ..., ເພາະພຣະເຈົ້າຈະຢູ່ກັບເຈົ້າຕະຫລອດການ ແລະ ຕະຫລອດໄປ.”2
ການທົດລອງຂອງໂລກນີ້—ຮ່ວມທັງຄວາມເຈັບປ່ວຍ ແລະ ຄວາມຕາຍ—ເປັນພາກສ່ວນໜຶ່ງໃນແຜນແຫ່ງຄວາມລອດ ແລະ ເປັນປະສົບການທີ່ຫລີກລ້ຽງບໍ່ໄດ້. ມັນຈຳເປັນສຳລັບເຮົາ ທີ່ຈະ “ຍຶດໝັ້ນຢູ່ໃນທາງຂອງເຮົາ” ແລະ ຮັບເອົາການທົດລອງຂອງເຮົາດ້ວຍສັດທາ.
ເຖິງຢ່າງໃດກໍຕາມ, ຈຸດປະສົງຂອງຊີວິດຂອງເຮົາ ບໍ່ແມ່ນພຽງແຕ່ຕ້ອງອົດທົນກັບການທົດລອງເທົ່ານັ້ນ. ພຣະບິດາເທິງສະຫວັນໄດ້ສົ່ງພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ມາເປັນພຣະຜູ້ຊ່ອຍໃຫ້ລອດ ແລະ ເປັນພຣະຜູ້ໄຖ່ຂອງເຮົາ, ເພື່ອວ່າເຮົາຈະສາມາດເອົາຊະນະການທົດລອງ ທີ່ເຮົາປະເຊີນຢູ່ໃນໂລກນີ້; ອີກຄຳໜຶ່ງ, ພຣະອົງຈະເຮັດໃຫ້ສິ່ງທີ່ອ່ອນແອຂອງເຮົາກັບມາເຂັ້ມແຂງ,3 ພຣະອົງຈະຊົດໃຊ້ແທນບາບ ແລະ ຄວາມຂາດຕົກບົກພ່ອງຂອງເຮົາ, ແລະ ພຣະອົງໄດ້ເຮັດໃຫ້ເປັນໄປໄດ້ ສຳລັບເຮົາທີ່ຈະໄດ້ຮັບຊີວິດອະມະຕະ ແລະ ນິລັນດອນ.
ປະທານເຮັນຣີ ບີ ໄອຣິງ ໄດ້ກ່າວວ່າ: “ແຕ່ການທົດສອບຂອງພຣະເຈົ້າທີ່ຊົງຮັກ ທີ່ຢູ່ຕໍ່ໜ້າເຮົາ ບໍ່ແມ່ນເພື່ອເບິ່ງວ່າ ເຮົາສາມາດອົດທົນກັບຄວາມຫຍຸ້ງຍາກໄດ້ຫລືບໍ່. ແມ່ນເພື່ອເບິ່ງວ່າ ເຮົາສາມາດອົດທົນກັບມັນໄດ້ດີຊ່ຳໃດ. ເຮົາຜ່ານການທົດສອບ ໂດຍການສະແດງວ່າ ເຮົາຈື່ຈຳພຣະອົງ ແລະ ພຣະບັນຍັດທີ່ພຣະອົງໄດ້ປະທານໃຫ້ເຮົາ.”4
“ຈົ່ງຍຶດໝັ້ນໃນທາງຂອງເຈົ້າ” ເປັນການເລືອກທີ່ສຳຄັນ ໃນໄລຍະທີ່ຖືກທົດລອງ. ເຮົາຕ້ອງຫັນໄປຫາພຣະເຈົ້າ, ໂດຍສະເພາະ ຕອນເຮົາປະເຊີນກັບການທົດລອງ. ໃຫ້ເຊື່ອຟັງຕໍ່ພຣະບັນຍັດຂອງພຣະເຈົ້າ ດ້ວຍຄວາມຖ່ອມຕົນ. ສະແດງສັດທາໃນຄວາມປາດຖະໜາ ດ້ວຍພຣະປະສົງຂອງພຣະເຈົ້າ.
ໃຫ້ເຮົາມາພິຈາລະນາໃໝ່ ເລື່ອງລົດແລ່ນມາຊົນກົ້ນລົດ ໃນເມືອງ ນາໂກຢາ. ຂ້າພະເຈົ້າອາດຕາຍໄດ້ ໃນອຸປະຕິເຫດນັ້ນ. ເຖິງຢ່າງໃດກໍຕາມ, ຜ່ານພຣະຄຸນຂອງພຣະຜູ້ເປັນເຈົ້າ, ຂ້າພະເຈົ້າລອດຊີວິດຢ່າງປະຕິຫານ. ແລະ ຂ້າພະເຈົ້າຮູ້ວ່າ ຄວາມທຸກທໍລະມານຂອງຂ້າພະເຈົ້າແມ່ນສຳລັບການຮຽນຮູ້ ແລະ ສຳລັບການເຕີບໂຕຂອງຂ້າພະເຈົ້າ.5 ພຣະບິດາເທິງສະຫວັນໄດ້ສິດສອນຂ້າພະເຈົ້າ ໃຫ້ມີຄວາມອົດທົນຫລາຍຂຶ້ນກວ່າເກົ່າ, ເພື່ອຈະໄດ້ເຂົ້າໃຈຄວາມຮູ້ສຶກຂອງຄົນອື່ນ, ແລະ ເພື່ອຈະໄດ້ປອບໂຍນຄົນທີ່ຮັບທຸກທໍລະມານ. ເມື່ອຮັບຮູ້ສິ່ງນີ້, ໃຈຂອງຂ້າພະເຈົ້າຈຶ່ງເຕັມໄປດ້ວຍຄວາມຮູ້ສຶກຂອບພຣະໄທຕໍ່ພຣະບິດາເທິງສະຫວັນ ສຳລັບການທົດລອງນີ້.
ຈົ່ງໃຫ້ພຣະເຈົ້າມີຄວາມສຳຄັນກວ່າທຸກສິ່ງ, ບໍ່ວ່າທ່ານຈະປະເຊີນກັບການທົດລອງໃດໆ. ຈົ່ງຮັກພຣະເຈົ້າ. ຈົ່ງມີສັດທາໃນພຣະຄຣິດ, ແລະ ຝາກຝັງຕົວທ່ານໄວ້ກັບພຣະອົງໃນທຸກສິ່ງ. ໂມໂຣໄນ ໄດ້ສັນຍາກັບຜູ້ຄົນດັ່ງຕໍ່ໄປນີ້: “ຖ້າຫາກທ່ານປະຕິເສດຕົນຈາກຄວາມບໍ່ເປັນເໝືອນດັ່ງພຣະເຈົ້າທຸກຢ່າງ, ແລະ ຮັກພຣະເຈົ້າດ້ວຍສຸດພະລັງ, ຈິດໃຈ, ແລະ ກຳລັງຂອງທ່ານ, ເມື່ອນັ້ນພຣະຄຸນຂອງພຣະອົງຈຶ່ງພຽງພໍສຳລັບທ່ານ, ເພື່ອໂດຍພຣະຄຸນຂອງພຣະອົງ, ທ່ານຈະດີພ້ອມໃນພຣະຄຣິດ.”6
ຂ້າພະເຈົ້າຂໍເປັນພະຍານຢ່າງໜັກແໜ້ນວ່າ ພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ຊົງພຣະຊົນຢູ່ ແລະ ວ່າຄຳສັນຍາຂອງພຣະເຈົ້າຕໍ່ຄົນທີ່ “ຍຶດໝັ້ນໃນທາງຂອງເຂົາເຈົ້າ” ແລະ ຮັກພຣະອົງ ຈະບັນລຸຜົນສຳເລັດ ແມ່ນແຕ່ໃນທ່າມກາງການທົດລອງຂອງເຂົາເຈົ້າ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.