Kuv Zoo Siab Yexus Hlub Kuv

Kuv cov kwv tij thiab cov muam thoob plaws ntiaj teb uas kuv hlub, kuv muaj kev ris txiaj rau Thawj Pawg Thawj Tswj Hwm vim lawv caw kuv los hais kuv zaj lus tim khawv thaum Hnub Caiv no. Cov lus hauv ib zaj nkauj uas ib Tsoom Haiv Neeg Ntseeg hauv Hnub Nyoog Kawg hu yeej qhia txog kuv tej kev xav:

Ob peb hnub tas los lawm kuv muaj cib fim ntsib Thawj Pawg Thawj Tswj Hwm thiab txais txoj hauj lwm uas peb tus yaj saub, Thawj Tswj Hwm Thomas S. Monson. Kuv xav hais lus tim khawv rau nej sawv daws hais tias Thawj Tswj Hwm Monson muaj zog thiab kev hlub ntau heev thaum nws hais rau kuv tias, “Txoj kev hu no yeej los ntawm tus Tswv Yexus Khetos los.”

Kuv xav tsis thoob kiag li thiab yeej ua rau kuv tshee hnyo thaum kuv xav txog cov lus tseem ceeb uas peb tus yaj saub hais rau kuv. Thawj Tswj Hwm Monson, Thawj Tswj Hwm Eyring, Thawj Tswj Hwm Uchtdorf, kuv hlub nej thiab yuav ua hauj lwm rau tus Tswv kawg siab kawg ntsws kawg plab kawg plawv.

Au, kuv yeej hlub Thawj Tswj Hwm Boyd K. Packer thiab Txwj Laug L. Tom Perry thiab Richard G. Scott. Kuv nco lawv heev. Kuv muaj hmoov vim kuv tau cov Kwv Tij no tej kev qhuab qhia thiab tau kawm los ntawm lawv. Kuv twb tsis tsim nyog rau lawv nkawm khau li, tiam sis kuv zoo siab los sawv ntawm lawv xwb pwg thiab coj tus Tswv txoj hauj lwm mus lawm tom ntej.

Thaum kuv xav txog cov neeg ua tau pab kuv los lawm, kuv xub xav txog kuv tus khub nyob mus ib txhis uas ua siab zoo, Melanie. Tau ntau xyoo, nws tau pab kho kuv zoo li tus kws txawj puab av kom kuv ua Yexus Khetos ib tug Thwj Tim zoo dua. Nws txoj kev hlub thiab kev txhawb pab, thiab wb 5 tug me nyuam, lawv cov khub, thiab wb 24 tus me nyuam xeeb ntxwv, yeej txhawb nqa kuv. Xav hais rau kuv tsev neeg tias, kuv hlub nej.

Zoo li Nifais puag thaum ub, kuv los muaj niam txiv zoo hauv txoj moo zoo thiab lawv cov poj koob yawm txwv mus txog rau tiam neeg. Kuv cov poj koob yawm txwv uas los zwm rau lub Koom Txoos tuaj tim Akiv thiab Denmark teb tuaj. Cov neeg pioneer no tau muab txhua yam tsav kom lawv thiaj ua tau raws li Yexus Khetos txoj moo zoo thiab tseg lawv zaj keeb kwm rau lawv cov xeeb leej xeeb ntxwv tau raws qab. Kuv zoo siab rau ib tse neeg uas muaj ntau tiam neeg hauv ib Tsoom Haiv Neeg Ntseeg hauv Hnub Nyoog Kawg, thiab kuv paub hais tias qhov no yog ib lub hom phiaj zoo rau sawv daws cuab rau peb lub neej.

Muaj coob leej ntxiv uas tau pab npaj kuv rau txoj hauj lwm tshiab no. Muaj kuv cov phooj ywg thiab tsev neeg thaum kuv ua me nyuam yaus, cov thawj coj, cov xib hwb, thiab cov yam ntxwv hauv kuv lub neej. Kuv yuav tsum suav cov neeg ntawm kuv txoj kev mus ua tub txib rau tej Xeev Tim Sab Hnub Tuaj thiab peb cov tub txib uas peb hlub hauv Qhov Chaw Tshaj Tawm Txoj Moo Zoo New York New York North. Rau neeg coob uas tau pab thiab pauv kuv lub neej, rau nej txhua tus kuv xav ua nej tsaug.

Kuv yeej nyiam ua hauj lwm nrog kuv cov Kwv Tij hauv Pawg Xya Caum. Tau 15 xyoos kuv tau nyob hauv ib pawg pov thawj hwj thiab kev ua kwv ua tij zoo tshaj plaws hauv lub Koom Txoos. Ua nej tsaug, nej cov uas ua tub qhe nrog kuv. Nim no kuv zoo siab yuav los nyob hauv ib pawg tshiab. Thawj Tswj Hwm Russell M. Nelson, kuv hlub koj thiab txhua tus neeg hauv Pawg Kaum Ob tug Thwj Tim heev.

Muam Rasband wb muaj hmoov mus xyuas coob tug mej zeej thaum mus ua tej hauj lwm thiab xyuas tej qhov chaw tshaj tawm txoj moo zoo thoob plaws ntiaj teb no. Wb hlub ib Tsoom Haiv Neeg Ntseeg hauv Hnub Nyoog Kawg nyob qhov txhia qhov chaw! Nej txoj kev ntseeg tau ntxiv zog rau wb txoj kev ntseeg; nej zaj lus tim khawv tau ntxiv zog rau wb zaj lus tim khawv.

Hnub no yog kuv qhia tau ib zaj xov me me, ces yuav yog li no: tus Tswv hais tias, “Nej ib leeg yuav tsum hlub ib leeg ib yam li kuv hlub nej.”² Kuv paub tseeb hais tias tsis muaj kev xaiv, kev txhaum, los sis txoj kev ua yuam kev uas koj los sis leej twg ua, uas yuav pauv Nws txoj kev hlub rau koj los sis rau lawv. Qhov ntawd tsis txhais hais tias nws pom zoo los sis zoo siab rau tej kev txhaum—kuv paub tias Nws tsis ua li ntawd—tiam sis peb yuav tsum muaj kev hlub ncav tes mus rau tib neeg kom caw, yaum, pab, thiab cawm lawv dim. Yexus Khetos tsis xaiv tib neeg ntsej muag vim yog lawv haiv neeg, ua hauj lwm dab tsi, thiab yog neeg muaj los sis pluag thaum nws qhia lawv txog qhov kev tseeb no.

Muaj ntau zaus uas tib neeg nug kuv seb kuv tau kuv zaj lus tim khawv thaum twg.

Kuv tsis nco qab ib lub sij hawm uas kuv tsis tau ntseeg Leej Txiv Saum Ntuj Ceeb Tsheej thiab Yexus Khetos. Kuv tau hlub Nkawd txij li kuv kawm txog Nkawd thaum kuv nyob ntawm kuv niam xub ntiag, uas nyeem vaj lug kub thiab txoj moo zoo tej dab neeg rau kuv. Txoj kev ntseeg thaum puag ntxov li no tau loj hlob uas qhov kev paub thiab ib qho tim khawv txog Leej Txiv Saum Ntuj Ceeb Tsheej uas hlub peb, nws yeej hnov thiab teb peb cov lus thov. Kuv zaj lus tim khawv txog Yexus Khetos tau loj hlob tuaj vim muaj ntau yam tshwj xeeb thaum kuv kawm paub txog Nws txoj kev hlub rau peb txhua tus.

Kuv muaj kev ris txiaj rau peb tus Cawm Seej txoj Kev Theej Txhoj thiab zoo li Amas xav qw nrov nrov zoo li Vajtswv ib tshuab raj.³ Kuv paub hais tias Yauxej Xamiv yog Vajtswv tus yaj saub rau txoj Kev Muab Txum Tim Rov Qab Los thiab tias Phau Ntawv Maumoos yog Vajtswv txoj lus. Thiab kuv paub tias Thawj Tswj Hwm Thomas S. Monson yog Vajtswv tus tub qhe thiab tus yaj saub tseeb uas nyob hauv ntiaj teb niaj hnub nim no.

Thaum peb raws peb tus yaj saub qab, kuv thov kom peb yuav muaj kev siab hlub hauv peb siab ntsws rau lwm cov neeg thiab tias peb yuav ua neeg tim khawv thiab yuav “zoo siab vim Yexus hlub kuv thiab foom koob hmoov rau [peb].” Au, thov kom yuav ”zoo siab kawg nkaus, zoo siab kawg nkaus rau [nej thiab] kuv.” Los ntawm Yexus Khetos lub npe, amees.