Sachso ninkana

Ex was wiitzin chiru chixjunil li ruchich’och’ raarookex inb’aan, k’a’jo’ inb’antioxihom re li Xb’eenil Awa’b’ejil naq xine’xkanab’ chixwotzb’al lix nawom inch’ool sa’ li hilob’aal kutan a’in. Naru ninye k’a’ru naweek’a rik’in li aatin sa’ jun li b’ich:

Wiib’ oxib’ kutan chaq, xin’usilaak chi wank rik’in li Xb’eenil Awa’b’ejil, re xk’ulb’al lin b’oqb’al a’in rik’in li qaprofeet, li Awa’b’ej Thomas S. Monson. Nawaj xch’olob’ankil cheru chejunilex, lix kawilal ut lix rahom li Awa’b’ej Monson naq xye we, “Li b’oqok a’in rik’in li Qaawa’ Jesukristo nachal.”

Laa’in nanujak ut nachiiq’an li waam sa’ xk’oxlankil xnimal ru ut xyaalalil li aatin a’an, yeeb’il rik’in q’unal xb’aan li qaprofeet aj rahonel. Awa’b’ej Monson, Awa’b’ej Eyring, Awa’b’ej Uchtdorf, nekexinra, ut tink’anjelak chiru li Qaawa’ ut cheru laa’ex chi anchal inch’ool, li waam, ink’a’uxl, ut inmetz’ew.

Maak’a’jo’ naq xinra li Awa’b’ej Boyd K. Packer, ut eb’ li Elder L. Tom Perry ut aj Richard G. Scott. Naraho’ inch’ool rik’in xkamikeb’. Xin’osob’tesiik chi b’eresiik ut chi tzole’k sa’ roqeb’ li chaab’il winq a’an. Maajun wa tinruuq chixb’aanunkil jo’ xe’xb’aanu, a’ut k’eeb’il we li chaab’ilal re xaqliik sa’ xb’eeneb’ xtel ut xk’amb’al chi ub’ej lix k’anjel li Qaawa’.

Naq nink’oxlaheb’ li ani xe’tenq’ank we chi wank jo’ chanru ninwan, xb’een wa nink’oxla lin chaab’il ixaqil, xMelanie. Chiru naab’al chihab’, a’an xtenq’an chinpak’b’al jo’ seb’ re naq k’a’jo’ wi’chik tinwanq choq’ xtzolom li Jesukristo. Waklesinb’ilin xb’aan lix rahom ut lix tenq’ahom, jo’ ajwi’ li oob’eb’ li qalal qak’ajol, eb’ lix sum, ut li kaahib’ xkak’al li wimam. Ex injunkab’al, nekexinra.

Jo’ laj Nefi najter, xinyo’la rik’in na’b’ej yuwa’b’ej li chaab’ileb’ sa’ li evangelio, ut xna’ xyuwa’eb’ a’an chiru waqib’ tasal tenamit. Eb’ lin xe’toon li xe’ok sa’ li Iglees a’aneb’ aj Iglaterra ut aj Dinamarka. Eb’ aj tehol b’e a’in xe’xk’e x’anchalileb’ li raam re lix evangelio li Jesukristo ut xkanab’ankil li chaab’il na’leb’ rik’ineb’ li ralal xk’ajol. Ninb’antioxi lin junkab’al li wanjenaq chiru k’iila tasal tenamit aj Santil Paab’anel ut ninnaw naq a’in jun chaab’il qayalihom taqasik’ chiqajunil.

Wankeb’ chik naab’al li xe’tenq’an chinkawresinkil choq’ re li ak’ b’oqb’al a’in. Sa’ xyanqeb’ a’an wankeb’ li wamiiw ut lin komon re inka’ch’inal, eb’ laj k’amol b’e, laj tzolonel, ut xkomoneb’ chik li xe’xk’e inna’leb’. Wankeb’ ajwi’ li xe’wan sa’ inmision sa’ Estados Unidos Este, ut eb’ li qamisioneer sa’ li mision Nueva York Norte. Re chixjunileb’ li xe’xjal ut xe’xyiib’ lin yu’am, ninye b’antiox eere.

K’a’jo’ naq xinra k’anjelak rik’ineb’ lin komon aj Setenta. Chiru o’laju chihab’ wanjenaqin sa’ jun reheb’ li molom jwal nim ru ut aj rahonel sa’ li Iglees. B’antiox eere, ex wech aj k’anjel. Chalen anajwan nawoyb’eni wank sa’ jun ak’ molam. Awa’b’ej Russell M. Nelson, k’a’jo’ naq nakatinra laa’at ut eb’ chik li komon sa’ lix Molameb’ li Kab’laju chi Apostol.

Li Hermana Rasband ut laa’in xoo’osob’tesiik chi wulak rik’ineb’ li komon sa’ k’iila ch’utam ut mision sa’ chixjunil li ruchich’och’. Naqaraheb’ laj Santil Paab’anel sa’ Roso’jikeb’ li Kutan yalaq b’ar wankeb’. Lee paab’aal naxnimob’resi li qaapaab’aal, ut lix nawom eech’ool xnimob’resi xnawom li qach’ool laa’o.

Anajwan wi tinruuq chixkanab’ankil jun ch’ina esil eerik’in anajwan, a’an a’in: li Qaawa’ xye, “Chera eerib’ cherib’il eerib’, jo’ naq xexinra laa’in.”² Laa’in ninpaab’ naq maak’a’ junaq maak malaj majelal naru naxb’aanu anihaq li tixjal lix rahom A’an choq’ eere ut choq’ reheb’. A’in ink’a’ naraj naxye naq sa naril li maak—ninnaw naq moko yaal ta a’an—naraj naxye b’an naq laa’o tento taqasik’eb’ li qas qiitz’in rik’in rahok, re xb’oqb’aleb’, xq’unb’esinkileb’ xch’ool, k’anjelak chiruheb’ ut xkolb’aleb’. Li Jesukristo ink’a’ kixk’oxla b’ar xtenamit junaq, malaj k’a’ru xwankilal ut chanru li wan wi’, naq kixk’ut chiruheb’ li nimla yaal a’in.

Naab’al sut xpatz’man we jo’q’e xink’ul lix nawom inch’ool.

Nink’oxla naq maajun wa ink’a’ xinpaab’ lin Choxahil Yuwa’ ut li Jesukristo. Ninraheb’ chalen chaq naq xwab’i resileb’ sa’ roq lin chaab’il na’, naq a’an xyaab’asi we eb’ li loq’laj hu ut li esil chirix li evangelio. Li paab’aal li xwan wik’in sa’ inka’ch’inal xniman toj reetal naq ninnaw ut ninch’olob’ xyaalal jun inChoxahil Yuwa’ aj rahonel, li narab’i ut naxsume li qatij. Lix nawom inch’ool chirix li Jesukristo xintaw rik’in xk’ihal li k’a’ru xink’ul, rik’in li xink’e wi’ reetal lix nimal xrahom choq qe chiqajunjunqal.

Ninb’antioxi lix tojb’al rix li maak xb’aan li Kolonel, ut jo’ laj Alma, tinwaj raj xch’olob’ankil rik’in xyaab’ xkux li Dios.³ Ninnaw naq laj Jose Smith a’an lix profeet li Dios re xk’ojob’ankil wi’chik li evangelio, ut naq lix Hu laj Mormon a’an raatin li Dios. Ut ninnaw naq li Awa’b’ej Thomas S. Monson a’an lix tz’aqal moos ut xprofeet li Dios sa’ li ruchich’och’ anajwan.

Naq naqataaqe li qaprofeet, nintz’aama naq chiwanq xrahom li qach’ool choq’ re li qas qiitz’in, ut naq toowanq choq’ yo’yookil aj yehol nawom, ut naq chookanaaq chi sachso “xb’aan xrahom li Jesus choq’ qe.” Chisachq qach’ool rik’in li xb’aanu choq’ qe. Sa’ xk’ab’a’ li Jesukristo, Amen.