“Yog Nej Hlub Kuv, Ua Raws Li Kuv tej Lus Txib”

Thaum wb tus ntxhais, Jen, coj nws tus mos liab thib peb tim hoob maum los tsev, kuv mus pab tom nws tsev. Tom qab nws tus ntxhais hlob mus kawm ntawv lawm, wb txiav txim tias Jen xav so. Ces qhov zoo tshaj plaws yog cia kuv coj nws tus ntxhais Chloe nrog kuv mus tsev es nws thiab tus mos liab thiaj li tau so.

Kuv muab txoj siv los khi Chloe, khi kuv txoj thiab ces, kuv thaub qab ntawd. Tiam sis, ua ntej wb txog kev kawg, ua cas Chloe tseem siv daws tau nws txoj siv thiab sawv ntawm kuv ib sab, nrog kuv sib tham lawm! Kuv mus nres tom ntug kev, tawm lub tsheb, thiab muab txoj siv rov qab khi cia.

Wb rov qab pib dua, tiam sis tsis ntev ces nws twb rov qab tawm ntawm lub rooj zaum lawm. Ces kuv rov qab ua li qub dua, tiam sis kuv twb tsis tau zaum es nws twb rov qab hle tau, Chloe txawm siv sawv ntawd dua!

Ces kuv zaum twj ywm hauv lub tsheb nres tau tom ntug kev cas nrog ib tug me nyuam uas muaj peb xyoo sib cav. Thiab zoo li nws yeej lawm!

Kuv sim txhua lub tswv yim ntxias kom nws kam sia siv tiam sis nws tsis kam li. Nws tsis tseev li! Ces kuv txiav txim ntxias hais tias yog nws kam no ces kuv mam li ua ib yam dab tsi uas nws nyiam ua.

Kuv hais tias, “Chloe, yog koj sia koj txoj siv twj ywm, ces niam tais mam li puab av nrog koj thaum wb txog tom niam tais lub tsev.”

Nws tsis teb li.

“Chloe, yog koj sia koj txoj siv twj ywm, ces wb mam li ua khob cij thaum wb mus txog niam tais tsev.”

Nws tsis teb li.

Kuv sim dua. “Chloe, yog koj sia koj txoj siv twj ywm, ces wb mam li mus taj laj yuav ib qho khoom qab zib!”

Tom qab sim peb zaug, ces kuv pom tias nws tsis kam li. Nws yeej tsis kam, thiab txawm hais yog uas li no ces yuav ua li no ntau npaum li cas los nws tsis kam zaum sia nws txoj siv twj ywm.

Wb yeej zaum tom ntug kev ib hnub tsis tau, tiam sis kuv kuj xav ua raws kev cai thiab yeej tsis puaj phais yog Chloe sawv thaum kuv tsav tsheb. Kuv ua twj ywm thov Vajtswv, ces kuv hnov tus Ntsuj Plig ntxhi hais tias, “Qhia nws.”

Kuv txawm tig kom nws pom kuv thiab rub kom nws pom kuv txoj siv los sia. Ces kuv hais tias, “Chloe, kuv sia kuv txoj siv vim txoj siv yuav pov hwm kuv. Tiam sis koj tsis kam sia koj txoj siv ces, yuav tsis puaj phais rau koj. Ces kuv yuav tu siab heev yog koj raug mob.”

Nws ntsia kuv; kuv pom tias nws lub me paj hlwb pib xav thaum kuv tos nws teb. Ces thaum kawg, nws rua qhov muag thiab hais tias, “Niam tais, koj xav kom kuv sia siv vim koj hlub kuv!”

Tus Ntsuj Plig nyob puv nkaus lub tsheb thaum kuv piav kuv txoj kev hlub rau nws. Kuv tsis xav xiam qhov ntawd, tiam sis kuv paub tias no yog kuv lub cib fim mus muab nws sia siv, ces kuv tau ua li ntawd. Ces kuv noog nws, “Chloe, koj puas kam zaum twj ywm hauv koj lub rooj zaum?” Thiab nws zaum twj ywm—los mus txog rau thaum wb mus yuav khoom qab zib hauv taj laj! Thiab mus txog tom kuv tsev uas wb ua khob cij thiab puab av ua si, Chloe yeej nco qab ntsoov qhov ntawd!

Thaum kuv tsav tsheb taug kev hnub ntawd, kuv xav txog nqe vaj lug kub uas hais tias: “Yog nej hlub kuv, cia li coj kuv tej lus txib.”¹ Peb muaj tej lus txib pab pov hwm peb cov me nyuam. Vim li cas? Vim peb hlub lawv heev. Tiam sis ua ntej Chloe to taub tias tos kuv xav kom nws sia siv los vim kuv hlub nws thiab txhawj txog nws txoj kev puaj phais, nws tsis kam ua vim nws xav tias yog kuv txhob txwm xav khi nws xwb. Nws xav tias txoj siv tsis pub nws ua ywj siab.

Ib yam li Chloe, peb muaj cai xav tias tej lus txib yog tiv thaiv peb xwb. Tej lub sij hawm peb xav hais tias Vajtswv tej lus txib tsis pub peb ywj siab, tshem peb tej kev xaiv, thiab tiv thaiv peb txoj kev loj hlob. Tiam sis yog peb sim to taub thiab cia peb Leej Txiv qhia peb, peb yuav pib pom hais tias Nws tej kev cai qhia tias Nws hlub peb, thiab txoj kev ua raws li Nws tej kev cai yog peb qhia tias peb los hlub Nws thiab.

Ib yam li uas yog nej pom nej tus kheej nres tsheb rau tom ib sab kev, cia kuv qhia ob peb txoj ntsiab cai uas yog tias nej ua raws, ces nej yuav rov qab taug ”txoj kev ntseeg thiab kev mloog lus”?²

Ntsiab cai thib ib, cia siab rau Vajtswv. Ntseeg Nws txoj kev nyob mus ib txhis rau nej. Peb sawv daws yog “ib tug ntsuj plig tub los sis ntxhais ntawm ib khub niam txiv saum ntuj ceeb tsheej.” Nkawd txoj kev hlub nyob hauv cov lus txib. Tej lus txib yog tej kev qhia tseem ceeb uas qhia, coj, thiab pov hwm peb “kom peb loj hlob tau hauv ntiaj teb no.”³

Hauv “lub neej ua ntej yug los” peb siv peb txoj kev xaiv txais yuav Vajtswv txoj kev nyob mus ib txhis,⁴ thiab peb to taub tias yuav tsum ua raws li Nws txoj cai nyob mus ib txhis es thiaj yuav vam meej. Cov vaj lug kub qhia tias muaj ib txoj kev cai, tau tshaj tawm nyob saum ntuj ceeb tsheej ua ntej lub ntuj no tsim teb raug uas hloov tsis tau, uas yog tag nrho tej koob hmoov lub hauv paus hauv ntsis.⁵ Yog peb ua raws li txoj kev cai ces, peb tau koob hmoov.

Txawm tias muaj kev txhaum, kev fab ntxeev, thiab kev kawm hauv peb lub neej, Vajtswv yeej pom ntsoov peb tej peev xwm nyob mus ib txhis, txawm peb tsis nco qab pom. Peb ntseeg tau Nws “vim Vajtswv xav tau Nws cov me nyuam rov qab.”⁶ Thiab muaj ib txoj hau kev uas yog Yexus Khetos, Nws tus Tub txoj Kev Theej Txhoj. Kev Theej Txhoj “yog qhov tseem ceeb tshaj ntawm txoj kev cawm seej.”⁷

Ntsiab cai thib ob, ntseeg Yexus. Txoj kev mloog lus thiab hlub yog Yexus Khetos txoj Kev Theej Txhoj. Nws tau ua raws li Leej Txiv lub siab nyiam, Nws thiaj tau txo Nws txoj sia rau peb. Nws hais tias, “Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.”⁸

Yexus kuj qhia hais tias:

“Hlub tus Tswv nej tus Vajtswv kawg siab kawg ntsws, kawg plab kawg plawv.

“Nqe no thiaj yog lus txib uas tseem ceeb dua ntais.

“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.”⁹

Txhua Hnub Caiv peb muaj cib fim nco txog peb tus Cawm Seej txoj kev hlub dawb huv thaum peb noj lub cim nco txog ntawm Nws txoj Kev Theej Txhoj. Thaum noj lub cim nco txog, kuv saib ntsoov cov tes thiab caj npab uas faib cov khob cij thiab cov dej. Thiab kuv zoo siab hlo ncav tes muab noj, kuv thiaj cog lus tias kuv yuav ris Nws lub npe, nco ntsoov Nws, thiab ua raws li Nws cov lus txib. Thiab Nws cog lus ”tias [peb] yuav muaj Nws tus ntsuj plig nrog [peb] nyob txhua lub sij hawm.”¹⁰

Ntsiab cai thib peb, ntseeg tus Ntsuj Plig tej lus ntxhi. Puas nco qab thaum kuv tsis paub pab Chloe es kuv hnov tus Ntsuj Plig ntxhi ib nqe vaj lug kub rau kuv? Hauv Yauhas 14:15: “Yog nej hlub kuv, cia li coj kuv tej lus txib.” Thiab tej nqe tseem ceeb tom qab ntawd hais tias:

“Kuv yuav thov Leej Txiv, thiab nws yuav txib dua ib tug Nplij Siab los, tus ntawd yuav nrog nej nyob mus ib txhis.

“Nws yog Vaj Ntsuj Plig, nws yuav qhia Vajtswv zaj uas yog qhov tseeb rau nej. Neeg ntiaj teb tsis lees yuav nws, rau qhov lawv tsis pom nws los sis tsis paub nws. Tiam sis nej paub nws, rau qhov nws nrog nej nyob thiab nws yuav nyob hauv nej lub siab.”¹¹

Txhua tus mej zeej hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj txoj cai tau tus Vaj Ntsuj Plig Dawb Huv ua lawv tus khub. Txoj kev yoo mov, thov Vajtswv, kawm vaj lug kub, thiab mloog lus yeej pab yus hnov thiab to taub tus Ntsuj Plig tej kev tshoov siab.

Thaum nej tsis ntseeg thiab paub tsis meej, Leej Txiv thiab tus Tub yuav xa tus Vaj Ntsuj Plig Dawb Huv los ceeb toom nej thiab coj nej kev mus dhau tej kev xwm txheej hauv lub neej no. Nws yuav pab nej nco qab, nplij nej siab, thiab pab nej “muaj kev cia siab thiab kev hlub dawb pawg.”¹²

Ntsiab cai thib plaub, ntseeg cov yaj saub uas muaj sia nyob tej lus qhuab qhia. Peb Leej Txiv muaj ib txoj kev rau peb hnov Nws tej lus thiab paub Nws tej kev cai uas yog los ntawm Nws cov yaj saub los. Tus Tswv tshaj tawm hais tias Nws txoj lus yuav … muaj tiav los, txawm yog los ntawm Nws lub suab los yog los ntawm Nws cov tub qhe lub suab los yog, ob yam zoo tib yam nkaus.¹³

Tsis ntev tas los no, cov yaj saub uas muaj sia nyob tau ntuas peb kom “nco ntsoov Hnub Caiv, thiab hwm kom dawb huv,”¹⁴ thiab ua raws li txoj kev cai yoo mov. Txoj kev mloog cov yaj saub lus pab tau peb mloog Vajtswv lo lus txib kom hlub Nws thiab peb cov neeg zej zog thaum peb haj yam ntseeg Yexus Khetos thiab ncav tes hlub thiab tu lwm tus neeg.¹⁵

Muaj kev puaj phais thaum ua raws li tus Tswv cov lus uas los dhau ntawm Nws cov yaj saub. Vajtswv tau hu Thawj Tswj Hwm Thomas S. Monson, cov pab cuam hauv Thawj Pawg Thawj Tswj Hwm thiab Pawg Kaum Ob tug Thwj Tim los ua cov yaj saub, cov pom tau thiab cov txais kev tshwm sim. Hauv ntiaj teb uas muaj kev ntshai, kev ntxhov siab, kev tawm tsam, thiab kev chim siab peb muaj cai ntsia lawm kom saib seb Yexus Khetos cov thwj tim—uas muaj kev siab hlub—zoo li cas, nrov thiab hais li cas thaum muaj teeb meem uas sib faib tib neeg. Lawv hais lus tim khawv txog Yexus Khetos thiab muaj kev siab hlub, uas yog Yexus Khetos txoj kev hlub dawb paug.

Tom qab muaj qhov no nrog Chloe, kuv tau nrhiav cov vaj lug kub rau tej nqe uas qhia txog cov lus txib thiab kev hlub. Kuv nrhiav ntau. Txhua nqe no qhia peb tias Nws cov lus txib qhia tias Nws hlub peb thiab txoj kev ua raws li Nws tej kev cai yog peb qhia tias peb los hlub Nws thiab.

Kuv hais lus tim khawv tias yam li thaum peb ntseeg Vajtswv, peb Leej Txiv uas Nyob Mus Ib Txhis; ntseeg Nws tus Tub, Yexus Khetos thiab Nws txoj Kev Theej Txhoj; ntseeg tus Ntsuj Plig cov lus ntxhi; thiab cov yaj saub niaj hnub nim no, peb yuav nrhiav tau kev thiab tawm ntawm txoj kev nres tom ntug kev thiab pheej taug kev tsis muaj xwm txheej—tsis yog nyiaj mus xwb tiam sis yuav muaj kev zoo siab thaum peb taug kev rov qab mus tsev. Los ntawm Yexus Khetos lub npe, amees.