“Wi nikineera, teepaab’ lin chaq’rab’ ”

Naq li asb’ej reheb’ li qako’, xJen, xk’am chaq li rox xk’uula’al sa’ rochoch chirix naq x’el sa’ li b’anleb’aal, xinwulak sa’ rochoch re xtenq’ankil. Chirix naq lix ko’ asb’ej xko’o sa’ li tzo’leb’aal, xqak’oxla naq aajel chik ru li hilank choq’ re li xJen. Jo’kan naq li tenq’al q’axal nim tink’e raj re a’an xk’amb’al lix ch’ina ko’ jun, lix Chloe, sa’ li wochoch re naq lix na’ ut li k’uula’al te’wanq xhoonal chi hilank.

Xinb’ak’ xChloe sa’ xchunleb’aal sa’ inb’eleb’aal ch’iich’, xinb’ak’ ajwi’ wib’ chi sa’, ut xin’ok chixch’e’b’al inb’eleb’aal ch’iich’. A’b’an, naq toj maji’ nokowulak sa’ xraqik li nimb’e a’an, xChloe ak x’achab’ rib’ chiru li chunleb’aal ut xaxqo chik, yoo chi ilok sa’ xb’een lin telb’, ut yoo chiwaatinakil! Xinxaqab’ li b’eleb’aal ch’iich’ chire li b’e, xin’el, ut xinb’ak’ wi’chik sa’ lix chunleb’aal.

Xoo’ok chi xik w’ichik, a’b’an naq ak xoob’eek chik b’ayaq a’an achab’anb’il wi’chik chiru lix chunleb’aal. Xinb’aanu wi’chik li ak xinb’aanu chaq, a’b’an li sut a’in naq toj maji’ naru nin’ok sa’ li b’eeleb’al ch’iich’ re xb’akb’al wib’, xChloe ak xaqxo wi’chik!

Jo’kan b’i wankin chi chunchu sa li b’eleb’aal ch’iich’, xaqxooko chixk’atq li b’e, wankin sa’ ch’a’ajkilal rik’in jun ch’ina ixqa’al oxib’ chihab’ wan re. Ut a’an yoo chi elk chi ub’ej!

Xwoksi yalaq k’a’ru xinru chixk’oxlankil re xq’unb’esinkil re naq tixk’e reetal naq chaab’il li wank chi chunchu sa’ lix chunleb’aal. Moko xinxpaab’ ta! Sa’ xraqik xinyal xyeech’inkil k’a’ruhaq re wi tinxpaab’.

Xinye: “Chloe, wi ta nakatkana chi b’ak’b’o sa’ laa chunleb’aal, naq toowulaq sa’ rochoch li na’chinb’ej, tooruuq raj chi b’atz’unk rik’in li b’atz’uul q’em”.

Maak’a’ xsumenkil.

“Chloe, wi ta nakatkana chi b’ak’b’o sa’ laa chunleb’aal, tooruuq raj chixyiib’ankil kaxlan wa naq toowulaq sa’ rochoch li na’chinb’ej”.

Maak’a’ xsumenkil.

Xinyal wi’chik. “Chloe, wi ta nakatkana chi b’ak’b’o sa’ laa chunleb’aal, tooxaqliiq sa’ li k’ayib’aal re xloq’b’al junaq laa kab’!”

Chirix oxib’ sut xyalb’al rix, xink’e reetal naq ink’a’ naru. K’eek’o xch’ool a’an, ut maak’a’aq li naru tinyeechi’i re tixq’unb’esi raj chi kanaak chi b’ak’b’o sa’ lix chunleb’aal.

Moko taaruuq ta taqanumsi li kutan chi xaqxooko chire li b’e, a’b’an xwaj raj xpaab’ankil li chaq’rab’, ut moko chaab’il ta naq tinxik naq xaqxooq xChloe. Xinye jun tij sa’ ch’anch’o ut xwab’i naq li musiq’ej xhasb’ak we: “K’ut chiru”.

Xinb’alq’usi wib’ chiru rilob’aal ut xweek’asi xk’aamal lin chunleb’aal najt chiru lin junxaqalil re naq taaruuq chirilb’al. Xinye re, “Chloe, yookin chixk’amb’al li k’aam a’in xb’aan naq tixkol wix. A’b’anan ink’a’ yookat chixk’amb’al laa we, ut moko kolb’ilaq ta aawix. Rahaq inch’ool wi tattoch’e’q.

Xinxka’ya; tz’aqal xwil lix k’a’uxl chi k’anjelak re xtawb’al ru li xinye re ut yookin chiroyb’eninkil li tixsume. Sa’ xraqik, xlemtz’un lix naq’ ru jwal rax ut a’an xye, “Na’chin, taawaj naq b’ak’b’ilaqin rik’in li k’aam xb’aan naq nikinaara!”

Xnujob’resiik li b’eleb’aal ch’iich’ rik’in li Musiq’ej naq xinye lin rahom choq’ re li chaq’al ru ixqa’al a’in. Ink’a’ xwaj xsachb’al li eek’ahom a’an, a’b’an xwan lin hoonal, jo’kan b’i xin’el ut xinb’ak’ sa’ li chunleb’aal. Toja’ naq xinpatz’ re, “Chloe, ma tatkanaaq sa’ laa chunleb’aal?” Ut jo’kan xb’aanu—chiru chixjunil li b’e re wulak sa li k’ayib’aal re xloq’b’al jun xkab’! Ut a’an xkana chi b’ak’b’o sa’ chixjunil li b’e chalen li k’ayib’aal toj sa li wochoch, b’ar wi’ xqayiib’ li kaxlan wa ut xoob’aatz’un rik’in li b’atz’uul q’em xb’aan naq xChloe moko xsach ta sa’ xch’ool!

Naq yooko chaq chi sutq’iik sa’ kutan a’an, xchal jun li raqal re li loq’laj hu sa’ lin k’a’uxl: “Wi nikineera, teepaab’ lin chaq’rab’ ”.¹ Wankeb’ qachaq’rab’ re xtzolb’al, xb’eresinkil, ut xkolb’aleb’ rix li kok’al. K’a’ut? Xb’aan li qanimla rahom choq’ reheb’. A’ut, toj reetal naq xChloe xtaw ru naq li nawaj choq’ re naq b’ak’b’o’ sa’ xchunleb’aal, a’an xb’aan lin rahom choq’ re, a’an ink’a’ xraj xb’aanunkil xb’aan naq xk’oxla naq yookin chixramb’al. Xreek’a naq li k’aam xramok re lix wanjik chi achab’anb’il.

Jo’ li xChloe, naru taqasik’ ru rilb’aleb’ lix taqlahom li Qaawa’ jo’ li naramok. Wan tana’ naq naqeek’a naq lix taqlahom li Dios neke’xram li qach’ab’ankil, narisi xtaql li qach’ool, ut naxram li qak’iijik. A’b’an naq naqasik’ xnimal xtawb’al ru, naq naqakanab’ naq li qaYuwa’ toxtzol, too’ok chirilb’al naq lix chaq’rab’, a’aneb’ xk’utb’esinb’il lix rahom choq’ qe ut li ab’ink chiruheb’ lix chaq’rab’ a’an xk’utb’esinkil li qarahom choq’ re.

Wi nekereek’a naq chanchan naq xaqxookex chire b’e, ma naru tinye eere junjunq li na’leb’ li, wi neke’taaqeman, te’tenqa’nq eere chi sutq’iik sa’ “xb’ehil li paab’aal ut li ab’ink”?²

Xb’een, chekanab’ eerib’ chiru li Dios. Chiwanq lee paab’aal sa’ xk’anjel maak’a roso’jik choq’ eere. Chiqajunjunqal laa’o jun “[raab’il] musiq’ejil alalb’ej malaj rab’inb’ej chiru choxahil na’b’ej yuwa’b’ej”. Lix rahom choq’ qe k’utb’esinb’il sa’eb’ taqlahom. Aajeleb’ ru li taqlahom re qatzolb’al, qab’eresinkil, ut xkolb’al qix rik’in “li [taqak’ul] sa’ li ruchich’och”,³

Naq toj maji’ xook’ulun sa’ ruchich’och’, kiqak’anjela xtaql li qach’ool re xk’ulub’ankil lix k’uub’anb’il na’leb’ li Dios,⁴ ut kiqatzol naq li ab’ink chiru lix junelikil chaq’rab’ li Dios aajel ru re tooxik chi ub’ej sa’ lix k’uub’anb’il na’leb’. Li loq’laj hu neke’xk’ut, “Wan jun li chaqʼrabʼ, li taqlanbʼil chaq chi yeemank saʼ choxa chi inkʼaʼ naru xjalbʼal, rubʼelaj chaq lix kʼojlajik li ruchichʼochʼ aʼin, li nakʼeeman wiʼ chixjunil li osobʼtesink”.⁵ Wi noko’ab’in chiru li chaq’rab’, naqak’ul li osob’tesink.

Us ta chixjunileb’ li paaltil, li xka’pak’alil chixjunil li k’a’aq re ru, ut li tzolok nokoxtaaqe sa’ li qayu’am sa’ ruchich’och’, li Dios ink’a’ nasach ta sa’ xch’ool li qajunelikil eechanihom, us ta nasach sa’ qach’ool laa’o. Tooruuq chixkanab’ankil qib’ chiru A’an “xb’aan naq li Dios naraj te’sutq’iiq wi’chik rik’in li ralal xk’ajol”.⁶ Ut A’an kixk’e chaq jun li b’e sa’ xk’ab’a’ lix Tojb’al rix li Maak xb’aan li Ralal, li Jesukristo. Lix Tojb’al rix li Maak “a’an xb’een xb’een sa’ li k’uub’anb’il na’leb’ re li kolb’a-ib’ ”.⁷

Xkab’, chekanab’ eerib’ chiru li Jesus. Li xnimal ru k’utb’esihom re li ab’ink ut li rahok a’an lix Tojb’al rix li Maak kixb’aanu li Jesukristo. Rik’in xkanab’ankil rib’ chiru li rajom li Yuw’a’b’ej, a’an kixk’e lix yu’am choq’ qe. A’an kixye, “Wi nekepaab’ lin chaq’rab’, texkanaaq sa’ lin rahom jo’ naq laa’in xinpaab’ xchaq’rab’ lin Yuwa’ ut ninkanaak sa’ lix rahom”.⁸

Li Jesus kixk’ut ajwi’:

“Taara li Qaawa’ laa Dios chi anchal laa ch’ool, chi anchal laa waam ut chi anchal laa k’a’uxl.

“A’an li xb’een ut ximal ru chaq’rab’.

“Li xkab’ chanchan ajwi’ a’an: Taara laa was aawiitz’in jo’ naq nakara aawib’ laa’at”.⁹

Rajlal domingo wan qahuonal re xtz’ilb’al rix sa’ qak’a’uxl lix saq ruhil rahom laj Kolol qe naq nokotz’aqon sa’ xk’ulb’al li reetalil li junelikil Xtojb’al rix li Maak kixb’aanu. Chiru li loq’laj wa’ak, nawil naq li uq’ej neke’ye’e’ re xnumsinkil li kaxlan wa ut li ha’. Naq ninye’ li wuq’ re tz’aqonk, nin’ok sa’ sumwank naq wan inch’ool re xk’ulb’al sa’ inb’een lix k’ab’a’, re junelik xjultikankil A’an, ut re ab’ink chiru lix taqlahom. Ut A’an naxyeechi’i naq “taaruuq taawanq junelik lix Musiq’ [qik’in]”.¹⁰

Rox, chekanab’ eerib’ chiru lix hasb’ li Musiq’ej. Ma najultiko’ eere naq sa’ li hoonal xinwan rik’in xChloe, li Musiq’ej kixhasb’ we jun li raqal sa’ li loq’laj hu? Natawman sa’ Jwan 14:15: “Wi nikineera, teepaab’ lin chaq’rab’ ”. Ut neke’taaqen re li aajel ru raqal a’in:

“Ut laa’in tintz’aamanq tin’elajinq chiru li Yuwa’b’ej, ut a’an tixtaqla chaq jun chik aj K’ojob’anel ch’ool re naq taawanq eerik’in chi junelik:

“A’ li Musiq’ej re li yaal, li ink’a’ naru taak’ule’q xb’aan li ruchich’och’ xb’aan naq ink’a’ na’ile’k chi moko nanawe’k ru xb’aan. A’ut laa’ex nekenaw ru xb’aan naq wank sa’ eeyanq ut taawanq eerik’in”.¹¹

Li junjunq li komon okenaqeb’ sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan wan xk’ulub’ re xk’ulb’al li rochb’eenihom li Santil Musiq’ej. Li kuyuk sa’, li tijok, li xtzolb’al li loq’laj hu, ut li ab’ink chiru neke’xnimob’resi li qaseeb’al chirab’inkil ut chireek’ankil lix musiq’anb’il na’leb’ li Musiq’ej.

Naq nujob’resinb’il lee k’a’uxl rik’in li wiib’ank ch’oolej ut li sachk ch’oolej, li Yuwa’b’ej ut li Alalb’ej te’xtaqla li Santil Musiq’ej re eetijb’al ut eeb’eresinkil chi kolb’ilaqex chiru li xiwxiw re li yu’am a’in. A’an texxtenq’a chi jultiko’k, tixk’ojob’ eech’ool, ut texxnujob’resi “rik’in yo’onink ut tz’aqal rahok”.¹²

Xkaa, chekanab’ eerib’ chiru li raatineb’ li yo’yookil profeet. Li qaYuwa’ kixk’e chaq jun b’e re taqab’i li raatin ut taqanaw lix chaq’rab’ sa’ xtz’uumaleb’ re lix profeet. Li Qaawa’ kixye, “Li waatin … taatz’aqloq b’an ru chixjunil, ma rik’in tz’aqal xyaab’ inkux malaj rik’in xyaab’ xkuxeb’ inmoos, juntaq’eet na’el”.¹³

Toje’, li yo’yookil profeet kexk’e qana’leb’ naq “jultikaq [qe] li [hilob’aal kutan] re naq [taqasantob’resi]”,¹⁴ ut naq taqayu’ami li chaq’rab’ re li kuyuk sa’. Li ab’ink chiru li profeetil aatin a’in naxk’e qe jun b’e re ab’ink chiru lix taqlahom li Dios naq taqara A’an ut li qas qiitz’in naq naqanimob’resi li qapaab’aal chirix li Jesukristo ut naqaye’ li quq’ sa’ rahok ut naqach’olaniheb’ li qas qiitz’in.¹⁵

Wan qakolb’al sa’ xtaaqenkil li raatin li Qaawa’ sa’ xtz’uumaleb’ re lix profeet. Li Dios kixb’oq li Awa’b’ej Thomas S. Monson, li tenq’ aj k’ehol na’leb’ sa’ li Xb’eenil Awa’b’ejil, ut li komon sa’ lix Molameb’ li Kab’laju chi Apostol choq’ profeet, aj ilol na’leb’ ut aj k’utb’esinel. Sa’ jun ruchich’och’ nanumta wi’ li xiwak, li jalb’ehink, li ch’a’ajkilal, ut li josq’il, naru too’iloq reheb’ re rilb’al chanru—chi nujob’resinb’il rik’in tz’aqal rahok—lix tzolom li Jesukristo neke’k’utun, neke’aatinak, ut neke’xk’ul li na’leb’ re jachok. Neke’xch’olob’ xyaalal li Jesukristo ut neke’k’anjelak rik’in li tz’aqal rahok, li saq ruhil rahok naraho’ wi’ li Jesukristo, ut a’aneb’ aj yehol nawom A’an.

Chirix li k’a’ru xink’ul rik’in li xChloe, xinsik’ sa’ li loq’laj hu re xtawb’al li raqal li neke’xye resil li taqlahom ut li rahok. Naab’aleb’ xintaw. Li junjunq li raqal a’in nokohe’xjultika naq lix taqlahom neke’xk’utb’esi lix rahom choq’ qe, ut li ab’ink chiru lix taqlahom, a’an naxk’utb’esi li qarahom choq’ re A’an.

Ninch’olob’ xyaalal naq sa’ li hoonal naq naqakanab’ qib’ chiru li Dios, li qajunelikil Yuwa’; naqakanab’ qib’ chiru li Ralal, li Jesukristo, ut naqak’anjela qapaab’aal chirix lix Tojb’al rix li maak kixb’aanu; naqakanab’ qib’ chiru lix hasb’ li Musiq’ej; ut naqakanab’ qib’ chiru li raatineb’ li yo’yookil profeet, taqataw xyihil li qab’e ut tooxik chi ub’ej sa’ tiikilal—moko ka’aj ta wi’ xyalb’al qaq’e, a’b’an xtawb’al xsahil li qach’ool sa’ li qaxikik sa’ ochoch. Sa’ xk’ab’a’ li Jesukristo, amen.