2010-2019
Matahom ini nga Nagapakamaayo!
October 2015


Matahom ini nga Nagapakamaayo!

Ginapangamuyo ko nga kita magtumod sa “kahaposan nga ara kay Cristo” kag tugotan ang Iya grasya nga magtib-ong kag magdala sa aton.

Pinalangga kong mga kautoran kag mga abyan, malipayon gid ako nga kaupod kamo karon nga adlaw. Masubo lantawon ang tatlo ka bakante nga mga lugar diri sa entablado. Ginakasubo namon nga wala na sanday President Packer, Elder Perry, kag Elder Scott. Palangga namon sila, kag kami nagapangamuyo para sa kaayohan sang ila mga pamilya.

Sa sining konperensya, pribilihiyo naton ang magsakdag sa tatlo nga gintawag sang Ginuo nga magbulos sa ila lugar sa Korum sang Napulogduha ka Mga Apostoles.

Ang mga pangamuyo naton para sa ila magapabakod sa ila samtang sila nagadala sang sagradong awtoridad sang pagka-apostoles.

Nagapakamaayo bala ang Ebanghelyo sa Inyo?

Sang wala pa lang madugay nakit-an ko ang isa ka halambalanon nga nagpabinagbinag sa akon. Ang siling kasubong sini: “Hambali ang isa ka tawo nga trilyones ang mga bituon sa langit, kag siya magapati sa imo. Hambali siya nga basa ang pintora sa dingding, kag tandogon niya ini para lang makasigurado.”

Indi bala nga pareho kita sini kon kaisa? Bag-o lang ako ginbulong, kag ang maayo ko nga mga doktor nagpaathag kon ano ang dapat ko buhaton agud mag-ayo sing husto. Apang una ko nga natun-an liwat ang parte sa akon nga nabal-an ko sa madugay na nga panahon: bilang pasyente, kulang ako sa pasensya.

Gani sa tuyo ko nga mag-ayo sing madasig, ako nagpangita sa Internet. Naglaum ako nga makatukib sang paagi nga wala mabal-an sang akon mga doktor ukon nabal-an nila apang wala ginhambal sa akon.

Medyo madugay antes ko natalupangdan ang pagkawalay kapuslanan sang akon ginahimo. Matuod, indi malain nga ideya ang magpangita para sa aton kaugalingon. Apang ginbaliwala ko ang kamatuoran nga akon masaligan kag nabuyok ako sa masami di-matuod nga mga inpormasyon sa Internet.

Kon kaisa ang kamatuoran daw sa tuman ka diretso, tuman ka maathag, kag tuman ka simple para sa aton nga indi lubos makita ang dakung importansya sini. Gani ginabaliwala naton ang aton nabal-an nga matuod sa pagpangita sang mas misteryoso ukon kumplikado nga inpormasyon. Basi sa ulihi matun-an naton nga kon anino lamang ang aton ginalagas, kita nagapangita sang mga butang nga diutay ang kahulogan kag importansya.

Kon parte sa espirituhanon nga kamatuoran, paano naton mabal-an nga kita ara sa husto nga banas?

Isa ka paagi amo ang magpamangkot sang nagakaigo nga mga pamangkot—ang sahi nga nagapabinagbinag sa aton parte sa aton pag-uswag kag pagtulotimbang kon paano ang mga bagay nagapakamaayo sa aton. Mga pamangkot kasubong sang:

“May kahulogan bala ang akon kabuhi?”

“Nagapati bala ako sa Dios?”

“Nagapati bala ako nga kilala kag palangga ako sang Dios?”

“Nagapati bala ako nga ang Dios makabati kag nagasabat sa akon mga pangamuyo?”

“Tunay bala nga malipayon ako?”

“Ang mga pagtinguha ko bala nagapadulong sa pinakamataas kag espirituhanon nga mga kalab-uton kag mga talaksan sa kabuhi?”

Ang makahulogan nga mga pamangkot parte sa katuyoan sang kabuhi nagtuytoy sa kadam-an kag mga pamilya sa bug-os nga kalibutan nga magpangita sa kamatuoran. Masami inang pagpangita nagpadulong sa ila sa Ang Simbahan ni JesuCristo sang Mga Santos sa Ulihing Mga Adlaw kag sa ginpanumbalik nga ebanghelyo.

Nagapamangkot ako kon kita bilang mga miyembro sang Simbahan sarang man makabenepisyo paagi sa pagpamangkot sa aton mga kaugalingon paliwatliwat: “Ang panahon ko bala sa Simbahan nagapakamaayo sa akon? Nagapahilapit bala ini sa akon kay Cristo? Nagabugay bala ini sa akon kag sa akon pamilya sang paghidaet kag kasadya nga ginpromisa sa ebanghelyo?”

Si Alma nagpamangkot man sang kasubong nga mga pamangkot sa mga miyembro sang Simbahan sa Zarahemla sang siya nagsiling: “Naagyan bala ninyo ining daku nga pagbag-o sa inyo mga tagipusuon? … [Kag] sarang [ninyo] mabatyagan bala [ini] karon?”1 Ang amo nga pagbinagbinag makabulig sa aton agud magtumod liwat ukon magpadapat sang aton matag-adlaw nga mga pagtinguha sa diosnon nga plano sang kaluwasan.

Madamo nga mga miyembro ang masadya nga magasabat nga ang panahon nila bilang katapo sang Simbahan nagapakamaayo gid sa ila. Magapamatuod sila nga sa mga tion sang kaimolon ukon pagkahamungaya, kon ang mga bagay masulhay ukon masakit, makasapo sila sang dakung kahulogan, paghidaet, kag kasadya bangud sang ila panaad sa Ginuo kag dedikadong pag-alagad sa Simbahan. Kada adlaw masugata ko ang mga miyembro nga napuno sang makalalaton nga kasadya kag nagapakita sa pulong kag binuhatan nga ang ila mga kabuhi tuman gid nga ginpakamaayo sang ginpanumbalik nga ebanghelyo nis JesuCristo.

Apang nabal-an ko man nga may ara sang pila nga wala sang katumanan nga inagihan—nagabatyag nga ila pagkamiyembro sa Simbahan indi amo ang ila ginlauman.

Nasuboan ako sini bangud nabal-an ko mismo kon paano ang ebanghelyo makapapagsik kag makapabag-o sang kabuhi—kon paano ini makapuno sang aton mga tagipusuon sang paglaum, kag sang aton mga hunahuna sang kapawa. Nabal-an ko mismo kon paano ang mga bunga sang ebanghelyo ni JesuCristo makapabag-o sang mga kabuhi halin sa ordinaryo kag masubo padulong sa pinasahi kag mahimayaon.

Apang ngaa nga ini daw sa mas nagapakamaayo sa pila sangsa iban? Ano ang pagkatuhay sa tunga sang yadtong mga miyembro nga ang panahon nila sa Simbahan nagahatag sa ila mga kalag sang mga musika sang nagatubos nga pagpalangga2 kag sa yadtong mga nagabatyag sang walay katumanan?

Samtang ginabinagbinag ko ining mga pamangkot, madamo nga ideya ang nagsulod sa kon hunahuna. Karon nga adlaw, luyag ko ipaambit ang duha.

Pahaposa

Una: ginahimo bala naton ang aton pagkadisipulo nga tuman ka kumplikado?

Ining matahom nga ebanghelyo tuman ka simple nga mahangpan ini sang isa ka bata, apang tuman ka madalom kag malapad nga ini nagakinahanglan sang bug-os nga kabuhi—bisan sang walay katubtuban—sang pagtuon kag pagtukib agud lubos nga mahangpan ini.

Apang kon kaisa ginakuha naton ang matahom nga bulak sang kamatuoran sang Dios kag ginadekorahan sang madamo nga mga maayong ideya sang tawo, mga programa, kag mga ginapaabot. Ang kada isa, sa kaugalingon sini, sarang magbulig kag nagakadapat sa isa ka panahon kag kahimtangan, apang kon sila magdamo, ang mga ini sarang mangin bukid sang nagtulumpok nga mga bagay nga makatabon sa bilidhon nga bulak nga aton ginpalangga gid sang una.

Busa, bilang mga lider dapat naton amligan sing husto ang Simbahan kag ang ebanghelyo sa pagkaputli sini kag pagkaathag kag ipaiway ang paghatag sang di-kinahanglan nga mga palas-anon sa aton mga miyembro.

Kag tanan kita bilang mga miyembro sang Simbahan, kita kinahanglan nga maghimo sang dalayon nga pagtinguha agud maghatag sang aton kusog kag panahon sa mga butang nga tunay nga importante, samtang ginatib-ong naton ang aton isigkatawo kag ginatukod ang ginharian sang Dios.

May isa ka sister, manunudlo sa Relief Society, kilala sa paghanda sang mga leksyon nga wala sang sayup. Sang kaisa, siya nagdesisyon nga maghimo sang isa ka matahom nga kubrekama bilang perpekto nga telon sa tema sang iya leksyon. Apang ang kabuhi nagpatunga—may kabataan nga dapat hapiton sa eskwelahan, isa ka kasilingan nga kinahanglan buligan sa pagsaylo, ang bana nga may hilanat, kag may isa ka abyan nga nasuboan. Ang adlaw sang leksyon nagahilapit, kag ang kubrekama wala mahuman. Sang ulihi, sa gab-i antes sang leksyon, ginpulawan niya bilog nga gab-i agud tapuson ang kubrekama.

Sa dason nga adlaw siya lapyo gid kag daw indi niya ma-organisar ang iya mga ideya, apang maisog siya nga nagtindog sa klase kag naghatag sang iya leksyon.

Ang kubrekama tuman gid sa katahom—ang mga tahi perpekto, ang mga duag masiri, kag ang desinyo detalyado. Kag sa tunga sining kubrekama nakaburda ang isa ka tinaga nga nagpahayag sing madinalag-on sa tema sang iya leksyon: “Pahaposa.”

Mga kautoran, ang pagtuman sang ebanghelyo indi dapat mangin kumplikado.

Ini matuod nga wala sang pagpalikoliko. Ini sarang mailaragway subong sini:

  • Ang pagpamati sa pulong sang Dios nga may maukod nga tuyo nagapadulong sa aton nga magpati sa Dios kag magsalig sa Iya mga promisa.3

  • Kon mas nagasalig kita sa Dios, ang mga tagipusuon naton mas mapuno sang pagpalangga sa Iya kag sa kada isa.

  • Bangud sang aton pagpalangga sa Dios, luyag naton nga sundon Siya kag mangabuhi nga suno sa Iya pulong.

  • Bangud palangga naton ang Dios, luyag naton nga mag-alagad sa Iya; luyag naton nga bugayan ang mga kabuhi sang iban kag magtabang sa imol kag nagakinahanglan.

  • Kon kita mas nagapangabuhi sa banas sining pagkadisipulo, mas luyag naton ang magtuon sa pulong sang Dios.

Gani ini nagapadayon, ang kada tikang nagapadulong sa masunod kag nagahatag sa aton sang nagadugang sing padayon nga pagtuo, paglaum, kag pagpalangga ni Cristo.

Ini matahom nga simple, kag ini nagapakamaayo nga may katahom.

Mga kautoran, kon nagahunahuna kamo nga ang ebanghelyo wala gid nagapakamaayo sa inyo, ginadapit ko kamo nga magtuon sang inyo kabuhi halin sa mas mataas nga andana, kag pahaposon ang inyo pagtuman sa pagkasumulunod. Magtumod sa naunang mga doktrina, mga prinsipyo, kag mga pagpadapat sang ebanghelyo. Ginasaad ko nga ang Dios magagiya kag magabugay sa inyo sa banas sang kabuhing may katumanan, kag ang ebanghelyo pat-od nga magpakamaayo sa inyo sang mas maayo.

Magsugod Sa Kon Diin Man Kamo

Ang ikaduha ko nga panugyan amo ini: magsugod sa kon diin man kamo.

Kon kaisa nadulaan kita sang kaisog bangud kita indi “mas labi.” sa isa ka bagay — mas labi nga diosnon, talahuron, maalam, maayo sang lawas, manggaranon, mainabyanon, ukon makasarang. Huo, indi malain ang may luyag nga magdelanto. Ang Dios nagtuga sa aton agud maglambo kag mag-uswag. Apang dumdoma, ang mga kahuyangan sarang nga magbulig sa aton nga mangin mas mapainuboson kag magpadangop sa aton kay Cristo, nga “magahimo sa mahuyang nga mga butang nga mangin mabakod.”4 Si Satanas, sa pihak nga bahin, nagagamit sa aton mga kahuyangan sa punto nga wala na kita sang kaisog nga bisan magtinguha lang.

Natun-an ko sa akon kabuhi nga kita indi kinahanglan nga “mas labi” sa bisan ano nga butang agud magsugod nga mangin tawo nga luyag sang Dios nga kita magmangin.

Kuhaon ka sang Dios kon ano ka man sining higayon gid kag magsugod sa pagpakamaayo sa imo. Kinahanglan mo lamang ang maluyagon nga tagipusuon, handom nga magpati, kag pagsalig sa Ginuo.

Si Gideon nagkabig sa iya kaugalingon bilang isa ka imol nga mangunguma, pinakakubos sa pamilya sang iya amay. Apang ang Dios nagkabig sa iya nga isa ka isganan nga hangaway.5

Sang ginpili ni Samuel si Saul nga mangin hari, si Saul nagtinguha sa pagbaylo sang iya isip parte sini. Si Saul naghalin sa pinakadiutay nga tribu sa balay ni Israel. Paano siya nga mangin hari?6 Apang ang Dios nagkabig sa iya bilang isa ka “hamili nga batan-on.”7

Bisan ang bantog nga propetang si Moses natam-an kag nadulaan sang paglaum nga sa isa ka higayon luyag na lang niya nga mag-untat kag mapatay.8 Apang ang Dios wala nagbiya kay Moses.

Palangga kong mga kautoran, kon kita nagalantaw lamang sa aton mga kaugalingon paagi sa aton mortal nga mga mata, basi kita magkabig sa aton mga kaugalingon nga di-makasarang. Apang ang aton Langitnon nga Amay tunay nga nakakilala kon sin-o kita kag ano kita sarang nga magmangin. Makita niya Kita bilang mga anak Niya, bilang mga tinuga sang kasanag nga walay katapusan nga may ikasarang sa walay katubtuban kag may langitnon nga kapalaran.9

Ang sakripisyo sang Manluluwas nagbukas sa ganhaan sang kaluwasan para sa tanan agud makabalik sa Dios. Ang Iya “grasya nagakaigo para sa tanan [nga] nagapakubos sa atubang sang [Dios].”10 Ang grasya Niya amo ang makapasarang nga gahum nga nagatugot sa pagsulod sa mga ginharian sang kaluwasan sang Dios. Bangud sang Iya grasya, tanan kita mabanhaw kag maluwas sa ginharian sang himaya.

Bisan ang pinakanubo nga ginharian sang himaya— ang ginharian telestiyal, “nagalampuwas sa tanan nga paghangop,”11 kag di-maisip nga katawhan ang magapanubli sining kaluwasan.12

Apang ang grasya sang Manluluwas makahimo sang mas kapin para sa aton. Bilang mga miyembro sang Ang Simbahan ni JesuCristo sang Mga Santos sa Ulihing Mga Adlaw, kita nagahandom sang mas daku nga di-matungkad. Ini amo ang eksaltasyon sa ginharian selestiyal. Ini amo ang kabuhing walay katapusan sa atubang sang aton Amay sa Langit. Ini amo ang pinakadakung dulot sang Dios.13 Sa ginharian selestiyal, mabaton naton ang “Iya kabug-osan, kag ang Iya himaya.”14 Sa katunayan, ang tanan nga ginaangkon sang Amay igahatag sa aton.15

Eksaltasyon amo ang aton kalab-uton; ang pagkadisipulo amo ang aton pagpanakayon.

Samtang kamo nagahanas sa diutay nga pagtuo kag nagasugod sa paglakat bilang mahidaeton nga sumulunod sang Ginuong JesuCristo, ang inyo tagipusuon magabag-o.16 Ang bilog nga pagkatawo ninyo mapuno sang kapawa.17

Ang Dios magabulig sa inyo nga mangin mas daku sangsa ano man nga inyo ginlauman nga posible. Kag matukiban ninyo nga ang ebanghelyo ni JesuCristo tunay nga nagapakamaayo sa inyo kabuhi. Nagapakamaayo ini.

Nagapakamaayo Ini!

Mga kautoran, kag palangga nga mga abyan, ginapangamuyo ko nga magtumod kita sa “pagkasimple nga ara kay Cristo”18 kag magtugot sa Iya grasya nag magtib-ong kag magsustener sa aton, sa aton pagpanakayon halin sa kon diin kita karon padulong sa mahimayaon naton nga padulongan sa atubang sang aton Amay.

Samtang ginahimo naton, kag kon may magpamangkot sa aton, “Paano ang pagkamiyembro mo sa Ang Simbahan ni JesuCristo sang Mga Santos sa Ulihing Mga Adlaw nagapakamaayo sa imo?” sarang naton masabat nga may pagpabugal kag may dakung kasadya, “Ini nagapakamaayo gid sang matahom! Salamat sa imo pagpamangkot! Luyag mo bala nga makabalo sang dugang?”

Ini ang paglaum ko, ang pangamuyo ko, ang akon pagpamatuod, kag ang akon pagpakamaayo sa ngalan ni JesuCristo, amen.