2010–2019
Chaab’il nak’anjelak!
October 2015


Chaab’il nak’anjelak!

Nintz’aama naq tookanaaq sa’ “li yaal li wan sa’ li Kristo” ut naq taqakanab’ li rusilal chiqawaklesinkil ut chiqak’amb’al.

Ex was wiitz’in, ex raarookil wochb’een, nasaho’ inch’ool chek’ulb’al anajwan. Naraho’ qach’ool rik’in li oxib’eb’ chi chunleb’aal li yamyookeb’ anajwan. Naqapatz’ li Awa’b’ej Packer, li Elder Perry, ut li Elder Scott. Naqaraheb’, ut nokotijok choq’ re xchaab’ilaleb’ lix junkab’al.

Sa’ li ch’utub’aj-ib’ a’in, taqaxaqab’ oxib’eb’ li xe’b’oqe’ xb’aan li Qaawa’ jo’ reeqajeb’ a’an sa’ lix Molameb’ li Kab’laju chi Apostol.

Li qatij choq’ reheb’ tixkawresiheb’ naq neke’xk’am li santil b’atb’al re wank choq’ apostol.

Ma yoo chi k’anjelak li evangelio choq’ aawe?

Moko najt ta chaq anajwan, xwil jun li aatin li xinxk’e chi k’oxlak. Chan li aatin a’an: “Wi taaye re jun li winq naq k’iila millon chi chahim wan, tixpaab’. Wi taaye re naq toj taqtaq li b’on chiru tz’ak, toj tixch’e’ re tixnaw ma yaal.”

Ma ink’a’ tab’i’ naqab’aanu chi jo’kan? Chirix jun li b’anok xink’ul, eb’ laj b’anonel ke’xye we k’a’ru tento tinb’aanu re tinkiraaq chi us. A’b’anan xb’eenil xintzol xkab’ sutil jun li na’leb’ li ak xinnaw raj chiwix—Yal ka’ch’in inkuyum sa’ li b’ane’k.

Jo’kan naq xinyal xseeb’ankil li k’iraak rik’in xtzolb’al li na’leb’ sa’ Internet. Maare xink’oxla naq tintaw li k’a’ru yaal li moko neke’xnaw ta laj b’anonel malaj li ke’xyal xmuqb’al chiwu.

Xinb’ay junjunq kutan toj reetal naq xink’e reetal k’a’ru yookin chixb’aanunkil. Yaal, us ajwi’ naq taqatz’il rix qajunes li tzolb’il na’leb’. A’b’anan laa’in yookin chixkanab’ankil li k’a’ru yaal li xinru raj chixpaab’ankil, ut sa’ xna’aj a’an, xink’ame’ sa’ xna’leb’il li Internet.

Wan naq li k’a’ru yaal nak’utun chi moko chaq’al ta ru malaj chi ink’a’ utz’u’ujinb’il, ut ink’a’ naqak’e reetal xchaab’ilal. Jo’kan naq naqakanab’ li k’a’ru ak xqak’ul ut xqanaw re naq taqasik’ li k’a’ru ch’a’aj xtawb’al ru. Toj chiqak’e raj reetal naq sa’ xtaaqenkil li k’a’ru yal mu li ru, yooko chixtaaqenkil li k’a’ru yal ka’ch’in okenaq wi’.

Sa’ li yaal re li musiq’ej, chan ru taqanaw naq wanko sa’ li chaab’il b’e?

Naru rik’in roksinkileb’ li chaab’il patz’om—a’aneb’ li nokohe’xtenq’a chixtz’ilb’al rix b’ar wanko ut lix k’anjel li k’a’aq re ru choq’ qe. Naru taqapatz’:

“Ma wan xyaalalil lin yu’am?”

“Ma wan xyaalalil lin yu’am?”

“Ma ninpaab’ naq li Dios naxnaw li wu ut nikinixra?”

“Ma ninpaab’ naq li Dios narab’i ut naxsume lin tij?”

“Ma sa sa’ lin ch’ool chi yaal?”

“Ma yookeb’ lin k’anjel chink’amb’al sa’ li k’a’ru jwal aajel ru choq’ we?”

Li chaab’il patz’om chirix li rajom li yu’am a’in ak xe’xk’am k’iila kristiaan sa’ chixjunil li ruchich’och’ chixsik’b’al li yaal. K’iila sut li sik’ok a’an naxk’ameb’ toj sa’ Lix Paab’al li Jesukristo reheb’ laj Santil Paab’anel sa’ Roso’jikeb’ li Kutan.

Nink’oxla naq maare laa’o jo’ komon re li Iglees tooruuq ajwi’ chixk’ulb’al qatenq’ankil rik’in xpatz’b’al: “Ma yoo chi k’anjelak choq’ we lin hoonal sa’ li Iglees? Ma nikinixjilosi rik’in li Kristo? Ma yoo chirosob’tesinkil lin junkab’al rik’in li tuqtuukilal yeechi’inb’il sa’ li evangelio?”

Laj Alma kixyeheb’ li patz’om chanchan a’an reheb’ li komon sa’ Tzarahemla: “Ma xeyal li nimla jalaak a’in sa’ lee ch’ool? ... [Ut] ma jo’kan nekexru chireek’ankil anajwan?”1 Xk’oxlankil a’an naru tooxtenq’a chijayalinkil wi’chik li qak’anjel wulaj wulaj rik’in li na’leb’ re li kolb’a-ib’.

Naab’aleb’ li komon te’xye chi saheb’ xch’ool naq lix hoonal jo’ komon sa’ li Iglees yoo chi k’anjelak chi us choq’ reheb’. Te’xch’olob’ xyaalal naq sa’ neb’a’il malaj sa’ b’ihomal, ma sa’ sahilal malaj rahilal, neke’xtaw nimla xyaalalil, xtuqtuukilal, ut xsahilal xb’aan xq’axtesinkil rib’ choq’ re li Qaawa’ ut xb’aan xk’anjel sa’ li Iglees. Wulaj wulaj nink’uleb’ li komon re li Iglees li nujenaqeb’ chi sahilal ut neke’xk’ut sa’ raatin ut sa’ xb’aanuhom naq neke’chaab’ilo’k chi us lix yu’ameb’ sa’ lix evangelio li Jesukristo.

A’b’an nink’e reetal naq wankeb’ ajwi’ li ink’a’ neke’xk’ul chi jo’kan—li neke’reek’a naq lix hoonal jo’ komon sa’ li Iglees ink’a’ junelik naxk’e li k’a’ru royb’enihomeb’ chaq.

A’in naxk’e xrahil inch’ool, xb’aan naq ninnaw chi us chanru naq li evangelio naru chixwaklesinkil xmusiq’ junaq—chanru naru chiqanujob’resinkil rik’in li saqen. Ninnaw injunes wib’ chanru naq li ruuchinihom lix evangelio li Jesukristo naru chixjalb’al li yu’amej li q’ojyin ru rik’in li yu’amej chaq’al ru.

K’a’ut b’i’ naq anchal nak’anjelak chi us wi’chik choq’eb’ re jalan? K’a’ru jalaneb’ wi’ li ani sa’ li Iglees li neke’nujak li raam rik’in li b’ich re rahok li natojok ix2 ut li ani neke’reek’a naq wan k’a’ru maji’ neke’xk’ul?

Naq xink’oxlaheb’ li patz’om a’in, xb’utir li na’leb’ sa’ lin k’a’uxl. Anajwan, tinwotz wiib’eb’.

K’os li ru

Xb’een: ma yooko chixtamresinkil ru qak’anjel jo’ tzolom?

Li chaq’al ru evangelio a’in q’axal saqen ru re naq naru taaxoke’q xb’aan jun li kok’al, a’b’an jwal cham ut nim lix na’leb’il toj taa’ajmanq chixjunil qayu’am—jo’ ajwi’ li junelik q’e kutan—re taqataw ru chi tz’aqal.

A’b’anan wan naq naqachap li chaab’il utz’u’uj re lix yaal li Dios ut naqamuq li ru rik’in k’iila xtasalil lix na’leb’, lix k’anjel, ut li rajomeb’ li winq. Li junjunq xjunes naru toxtenq’a chi chaab’il sa’ junaq li kutan wanqo ta wi’, a’ut wi neke’tam li jun sa’ xb’een li jun chik, naru te’ok choq’ jun nimla tzuul li naniman ut na’aalo’ toj reetal naq maare anchal taqasach rilb’al li chaab’il utz’u’uj li xqara chaq junxil.

Jo’kan naq laa’o jo’ aj jolominel tento taqakol rix li Iglees ut li evangelio sa’ xsaqalil ru ut ink’a’ taqak’e li iiq’ moko aajel ta ru sa’ xb’eeneb’ li komon.

Ut chiqajunilo jo’ komon sa’ li Iglees, laa’o tento taqayal qaq’e chixq’axtesinkil qametz’ew ut qahoonal choq’ re li k’a’ru jwal aajel ru naq yooko ajwi’ chixkawresinkil qib’ chiqib’il qib’ ut chixwaklesinkil lix awa’b’ejihom li Dios.

Kiwan jun li komon ixq aj k’utunel li na’no ru xb’aan naq tz’aqal tz’aqal naxkawresi li tzolok. Sa’ jun kutan, kixye naq tixyiib’ jun li is li tixt’uy chiru li tz’ak sa’ tzoleb’aal re taareetali chi chaab’il li na’leb’ tixk’ut. A’ut xlaatz’o’ li ru—wankeb’ xkok’al tixxok sa’ tzoleb’aal, jun rech kab’lal kiraj xtenq’ankil, lix b’eelom xyajer, ut jun li ramiiw xkana xjunes. Xchal xkutankil li tzolok, ut maji’ naxchoy xyiib’ankil li is. Sa’ li q’ojyin rub’elaj xkutankil li tzolok, ink’a’ mas kiwar naq xkana chixyiib’ankil li is chixjunil li q’ojyin.

Naq ki’ok kutan ak lub’lu chi us, ut elajik naru xtuqub’ankil xk’a’uxl, a’b’an chi kaw xch’ool kixaqli ut kixb’aanu li k’utuk.

Ut ch’ina-us ajwi’ li is—chaab’il lix k’amal, chaq’al ru xb’onol, ut naxchap rib’ chi us li ru. Ut sa’ xyi chixjunil kiwan jun ajwi’ li aatin li naxyaab’asi sa’ nimajwalil lix jolomil na’leb’ li tzolok: “K’os li ru.”

Ex was wiitz’in, ink’a’ na’ajman naq ch’a’aj li evangelio.

Relik chi yaal, saqen li ru. Naru xch’olob’ankil chi jo’ka’in:

  • Rab’inkil raatin li Dios chi anchal qach’ool nokoxb’eresi chixpaab’ankil li Dios ut lix yeechi’ihom.3

  • Naq naqakanab’ qib’ sa’ ruq’ li Dios, nanujak li qach’ool rik’in rahok choq’ re a’an ut choq’ re jalan.

  • Sa’ xk’ab’a’ li qarahom choq’ re li Dios, naqaj xtaaqenkil a’an ut naqajunaji li qab’aanuhom rik’in li raatin.

  • Xb’aan naq naqara li Dios, naqaj k’anjelak chiru, ut naqaj rosob’tesinkileb’ jalan ut xtenq’ankileb’ li neb’a’.

  • Naq nokob’eek sa’ li b’e a’in re wank choq’ tzolom, naniman li qajom re xtzolb’al li raatin li Dios.

Ut toj naxik chi jo’kan, jun li yokb’ nak’amok sa’ li jun chik, ut naniman qapaab’aal, qoyb’enihom, ut qarahom.

Chaq’al ru, moko ch’a’aj ta, ut chaab’il nak’anjelak.

Ex was wiitz’in, wi nekek’oxla naq li evangelio ink’a’ yoo chi k’anjelak choq’ eere, nekexinb’oq chixxaqb’al eerib’, chixtz’ilb’al rix lee yu’am, ut chixk’osb’al ru li nekeb’aanu. K’oxlahomaq ka’a’jwi’ li xb’eenileb’ xtzol’leb’ ut xna’leb’ li evangelio. Ninyeechi’i naq li Dios texrosob’tesi re texwulaq jo’ tzolom li sa xch’ool, ut li evangelio taak’anjelaq chi jwal us wi’chik choq’ eere.

Tikib’ sa’ li ak wankat wi’

Xkab’il li na’leb’ tinwotz: tikib’ sa’ li ak wankat wi’.

Wan naq nakub’e qach’ool xb’aan naq ink’a’ “jwalo.” Jwal musiq’anb’ilo, oxloq’inb’ilo, b’ihomo, kawo, aj rahonelo, malaj seeb’o. Maak’a’ li maak sa’ rajb’al xchaab’ilob’resinkil qib’. Li Dios koxyo’ob’tesi re naq toonimanq ut took’iiq. A’ut chijultiko’q eere naq li qamajelal naru toxtenq’a chixtuulanob’resinkil qib’ ut chixsik’b’al li Kristo, li naru chixk’eeb’al “li k’a’ru q’un xmetz’ew choq’ kawilal.”4 Laj Satanas b’an naxnima li qamajelal toj reetal naq ink’a’ ajwi’ taqaj yal xyalb’al.

Xintzol sa’ lin yu’am naq ink’a’ na’ajman naq “jwalaqo” sa’ yalaq li k’a’aq re ru re too’ok sa’ li naraj li Dios choq’ qe.

Li Dios tatxxok sa’ li ak wankat wi’ anajwan ut taak’anjelaq aawik’in. Ka’ajwi’ na’ajman naq anchal aach’ool, taawaj paab’ank, ut taakanab’ aawib’ sa’ ruq’.

Laj Jedehon yal neb’a’ aj k’aleb’aal naq xk’oxla, li q’axal kub’enaq sa’ rochoch xyuwa’. Li Dios b’an kiril jo’ winq nim xwankil ut kaw xch’ool.5

Naq laj Samuel kixsik’ ru laj Saul jo’ rey, laj Saul kixyal xjalb’al xk’a’uxl laj Samuel. Laj Saul a’an xkomon jun teep aj Israel jwal ka’ch’in. Chan ta wi’ ru naq a’an junaq li rey?6 Li Dios b’an kiril a’an jo’ “jun li saaj sik’b’il ru.”7

Li nimla profeet aj Moises, a’an ajwi’ kikub’e xch’ool toj reetal naq kiraj xkanab’ankil xk’anjel ut xk’ulb’al li kamk.8 A’b’an li Dios ink’a’ kixkanab’ laj Moises.

Ex was wiitz’in, wi naqil qib’ yal sa’ li qilob’aal re li ruchich’och’ a’in, maare ink’a’ taqak’oxla naq tz’aqal chaab’il wanko. Li qaChoxahil Yuwa’ b’an nokoril jo’ wanko chi yaal. Nokoril jo’ ralal xk’ajol, jo’ winq ut ixq re saqen, maak’a’ xmaaril qawankil, ut toj sa’ choxa taawulaq qab’e.9

Lix mayej li Kolonel kixte rokeb’aal li kolb’a-ib’ re naq chiqajunilo toosutq’iiq rik’in li Dios. “Tz’aqal li [rusilal] choq’ re chixjunileb’ li ... neke’xtuulanob’resi rib’ [chiru li Dios].”10 A’an li wankilal li noko’ok wi’ sa’eb’ lix awab’ejihom li Dios re qakolb’al. Xb’aan li rusilal, chiqajunilo toowakliiq chi yo’yo sa’ jun awa’b’ejihom re loq’alil.

Li awa’b’ejihom kub’enaq xloq’al, li teleestil awa’b’ejihom, a’an ajwi’ “naq’axok ru chixjunil li natawman ru,”11 ut maak’a’ rajlankileb’ li te’reechani li kolb’a-ib’ a’in.12

A’b’an li rusilal li Kolonol naab’al wi’chik naxk’e qe. Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, nim wi’chik li naqoyb’eni. A’an xtaqsinkil qaloq’al sa’ li choxahil awa’b’ejihom. A’an li junelik yu’am rik’in li qaChoxahil Yuwa’. A’an lix maatan li Dios q’axal nim.13 Sa’ li choxahil awa’b’ejihom, naqak’ul “xkomon lix tz’aqalil ru, ut xkomon lix loq’al.”14 Chi yaal, chixjunil li k’a’ru re li Yuwa’b’ej taak’eemanq qe.15

Li taqenaqil loq’al, a’an li qajayalihom; li wank choq’ tzolom, a’an li qab’e.

Naq nakak’enjala b’ayaq li paab’al ut nakatikib’ laa b’e chixtaaqenkil li Kristo sa’ tuqtuukilal, taajale’q aach’ool.16 Taanujaq chi saqen chixjunil laa xaqalil.17

Li Dios tatxtenq’a chi wulak jo’ maajun wa xak’oxla chaq choq’ aawe aajunes. Ut taanaw naq lix evangelio li Jesukristo yoo chi k’anjelak sa’ laa yu’am chi yaal.

Nak’anjelak!

Ex was wiitz’in, inraarookil wochb’een, nintz’aama naq tookanaaq sa’ “li yaal li wan sa’ li Kristo”18 ut naq taqakanab’ li rusilal chiqaxokb’al sa’ qab’eenik chalen chaq li ak wanko wi’ anajwan toj sa’ li qachoxahil na’aj rik’in li qaYuwa’.

Naq naqab’aanu, ut wan ani tixpatz’, “chan ru nak’anjelak choq’ aawe li wank sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan?” tooruuq chixyeeb’al rik’in xtuqtuukilal qach’ool ut li sahil ch’oolejil, “Chaab’il nak’anjelak! B’antiox aawe nakapatz’! Ma taawaj xnawb’al xkomon chik?”

A’an a’in li wajom, lin tz’aam, ut lix nawom lin ch’ool sa’ xk’a’b’a’ li Jesukristo, amen.