Wosasuc uh Orekma!

Pacl fototo somlah ah nga liyacack sie pohloh kahs oruh ngan tui ac motko. Ritiyuck ohinge: “Fahk nuh sin sie mukul lah oasr itu triliacn lucng inkuhsrao, ac el fah luhlahlfongi kom. Fahk nuh sel lah sroal pihsinkac uh sroksrok, ac el fah kahlyac in liye lah pwacye.”

Yac kuht nohfohn tiac oacna inge? Tukun sie mukwikwi in ono pacl na tari ah, taktuh na suhmaht se luhk ah ahkuhtweyac ma nga enenuh in oruh in kwelac wo. Tuhsruhk met likina nga enenuh in sifilpacna lotwelah sie ma keik sifacna ma nga enenuh in etuh ke pacl loes: oacna sie mwet ono, nga tiacna arlac muhtweng.

Ke srihpac sacn nga sulaclah in ahksaye ohiyacn kwelac uh ke nga sifacna suk ke Internet. Sahp nga muh ngwac sokwack ma pwacye ma taktuh luhk uh ac tiac etuh kuh ac srihke in okanlah nuh sihk.

Ma ingacn eis kihtin pacl kuhtuh met liki nga akihlwacnwack tahfuhnkahsiyacn ma nga oruh an. Pwacyena, kuht in sifacna suk ma uh tiac nuhnak koluk se. Tuhsruhk nga ngwetngwet lucngi ma pwacye nga kuh in luhlahlfongi ac sahyacna sifacna sukyucyak lohacng nuh ke koanon ma sukokyak ke Internet uh ma weacng ma ma fwack ma kwacna tiac pwacye.

Kuhtuh pacl uh, ma pwacye uh ac luhman fakfuck, kalwem laclac, ac fihsrwacsr laclac nuh sesr in luhngkihn nohfohn ma yohk srihpac kac uh. Oruh kuht ngwetngwet lucngi ma kuht puhlakihn uh ac etuh lah pwacye in suk ohiyac lukmac kuh tiac arlac kahlwem uh. Sahflahiyac uh kuht kuh in lotwelah lah ke kuht suk top nuh kac uh, kuht ukwe ohiyac ma srihk koano ac yohk kalmeyac.

Ke ma pwacye luhn nguhnnguhn tuhkuh uh, kuht ac etuh lah kuht oasr ke inkacnek pwacye uh fuhkah?

Sie inkacnek an pa ke siyuck kihsen siyuck suwohs uh—kain ma ac kahsrwe kuht motko oraclah wo lasr ac nuhnkwaclah wo ohiyac ma ma uh ac oreklac nuh sesr uh. Kihsensiyuck ma oacna:

“Yac moul luhk uh oasr kalmeyac?”

“Yac nga luhlahlfongi ke God?”

“Yac nga luhlahlfongi lah God El etweyuc ac luhngse nga?”

“Yac nga luhlahlfongi lah God El lohng ac topuk pruhe luhk?”

“Yac nga engan na pwacye?”

“Yac kuhiyuck kolyuc nuh ke finsrak fuhlwact ke nguhn ac ma yohk srihpac ke moul uh?”

Kihsen siyuck upac ke srihpac luhn moul uh kohllah kais sie mwet puhs ac sucu fin facluh nohfohn uh in suk ke ma pwacye. Kwacna suk ingacn kohlohloslac nuh ke Alu luhn Jisus Kraist luhn Mwet Luhlahlfongi ke Lwen-sahflah ac nuh ke wosasuc fohlohkyak uh.

Nga nuhnkuh fin kuht ke mempucr ke Alu uh kuh in oacyacpac eis ma wo ke sifacna siyuck sesr kais sie pacl: “Yac puhlakihn luhk ke Alu uh orekma nuh sihk? Yac ma inge ahkfototoyeyuc nuh sin Kraist? Yac ma inge ahkinsewowoyeyuc ac sucu luhk uh ke mihs ac engan oacna ma uliyucklac ke wosasuc uh?”

Alma el siyuck kihsen siyuck fihsrwacsr uh sin mempucr ke Alu uh fin acn Zarahemla ke el siyuck: “Yac kowos puhlakihn eklac na yohk se inge ke insiyowos? … [Ac] yac [kowos] kuh in puhla [kihn] ingena?”¹ Kain motko yohk uh kuh in kahsrwe kuht in sifil lohacng kuh sifil ekuhllah kuhiyen mukwikwi lwen nuh kwewa lasr ke plwacn wolacna ke molwelah uh.

Mempucr pucspucs fah engan in topuk lah puhla lalos oacna sie mempucr ke Alu uh orekma wo na pwacye nuh selos. Elos fah fahkwack luhlahlfongi lah finne ke pacl in suhkahsruhp kuh kahsruhp, finne ma uh wo kuh sesseslah ke ngal, elos ac sokwack kalmeyac yohk, mihs, ac engan ke srihpen olweacng lalos nuh sin Leum ac kuhlwacnsap kihsackuhnlah lalos ke Alu uh. Lwen nuh kwewa nga ohsun yurin mempucr ke Alu uh suc sesseslah ke engan yohk ac suc ahkkahlwemye ke kahs ac mukwikwi lah moul lalos uh ahkinsewowoyeyuck na pwacye ke wosasuc fohlohkyak luhn Jisus Kraist uh.

Tuhsruhk nga oacyacpac akihlen lah oasr kuhtuh mwet suc tiacna puhlakihn nohfohn—suc puhla lah mempucr lalos ke Alu uh kuhtuh pacl uh tiacna ma elos finsrak kac.

Ma inge ahksuhpwacryeyuc, ke srihpen nga etuh na pwacye ohiyac ma wosasuc uh kuh in ahkfokokoye ac ahksasucye nguhn luhn sie mwet—ohiyac ma ac kuh in nwacklah insiyacsr ke finsrak ac nuhnak lasr ke kahlwem. Nga etuh sihk sifacna ohiyac ma fahko ke wosasuc luhn Jisus Kraist kuh in ekuhllah moul uh liki ma fal ac lohsrlohsr nuh ke ma usrnguck ac wolacna.

Tuhsruhk efuh oacna in orekma wo nuh sin kuhtuh likina mwet sahyac uh? Meac sielacna inmahsrlon mwet ma puhlakihn la ke Alu uh nwacklah insiyaclos ke on ke luhngse molwelah² ac mwet suc puhla lah oasr ma wacngihn?

Ke nga motko kihsen siyuck inge, nuhnak puhkantwen tuhkuh nuh inmahngok. Mihsenge, nga ke akacsruhi luo.

Ma se met: yac kuht oruh mwet tuhma lutlut lasr uh arlac upac?

Wosasuc kahto se inge arlac fihsrwacsr sie tuhlihk in kuh in sruokyac, tuh oacyacpac upac ac yohk oruh ac fah eis sie pacl loeloes—finne ma pahtpaht—ke lutlut ac sokwack in kahlwem na pwacye kac.

Tuhsruhk kuhtuh pacl uh kuht eis ma pwacye kahto luhn God uh ac nokomlah ke fihl nuh ke fihl ke nuhnak wowo, prokracm, ac ma oreklac sin mwet uh. Kais sie ma inge, kac sifacna, kuh in kahsruh ac fal ke kais sie pacl ac ohiyac, tuhsruhk ke elos ac fihliyucki fin sie sin sie uh, elos kuh in oraclah sie yol in fohkfohk ma eklac arlac mahtoltol ac toasr ma kuht sruhnga sislah ros na sacohk se ma kuht tuh luhngse na pwacye sie pacl ah.

Ohinge, ke mwet kol uh kuht enenuh in karihngihn na pwacye Alu uh ac wosasuc uh ke nwacsnwacsiyac ac kahlwemiyac ac kahingkihn ma toasr suhfal ke mempucr lasr uh.

Ac kuht nuh kwewa, ke mempucr ke Alu uh, kuht enenuh in oraclah sie kuh na suwohs in sang kuh ac pacl lasr nuh ke ma ma yohk srihpac na pwacye uh, ke sruhk sie sin sie ac muhsahi tohkohsrahi luhn God.

Sie tahmtahel, sie mwet luti luhn Rilif Sosaiti, etweyuck ke ahkoeyacn lesin na wowo uh. Sie pacl ah, el sulaclah in oraclah sie kahot na kahto ma ac oreklac in sie petsac na wowo nuh ke sifen lesin lal ah. Tuhsruhk puhslac ma sikyak—oasr tuhlihk in sruhkyuckyak ke lutlut ah, sie mwet tuhlan suc enenuh kahsruh ke som nuh sahyac, sie mukul tuhma suc mas, ac sie kawuck suc puhla muhkahimtacl. Lwen luhn lesin acn tuhkuh, ac kahot sac soenna sahflah. Sahflahiyac ah, fong met liki lesin lal an, el tiacna arlac mutul ke el orekma fong na fohn se ke kahot sacn.

Lwen tohkoh ah el ullac na upac ac tiacna kuh oracni nuhnak lal uh, tuhsruhk el puhlaik na in tu ac lotweacng lesin lal an.

Ac kahot sac sun na pwacye—tuhta kac ah suwohs, tuhn kac ah kahto, ac pactuhn kac uh puhkantwen. Tuhtwacni infulwacn kahot sacn pa sie kahs ma ahkkahlwemye sie pohloh kahs na kahto ke lesin lal ah: “Ahkfihsracsrye.”

Tamuhlwel ac tahmtahel, moulkihn wosasuc uh tiacna enenuh in tiac arlac kahlwem.

Arlac suwohs na pwacye. Kuh in ahkuhtweyucki ohinge:

• In lohng kahs luhn God ke oaru ac kol kuht in luhlahlfongi ke God ac in luhlahlfongi olwelah Lal uh.³

• Ke yohk luhlahlfongi lasr in God uh, insiyacsr ac sesseslah ke luhngse nuh Sel ac nuh sin kais sie sahyac.

• Ke srihpen luhngse lasr nuh sin God, kuht kena in Ukwacl ac oruh ma ac wi kahs Lal uh.

• Ke srihpen kuht luhngse God, kuht kena in Kuhlwacnsuhpwacl; kuht kena in ahkinsewowoye moul luhn mwet sahyac uh ac kahsruh mwet suhkahsruhp ac enenuh.

• Ke kuht ac fahsr na ke inkacnek soko luhn mwet tuhma lutlut inge, ac yohk kena lasr in lutlut ke kahs luhn God.

Na ac oruh ac som, kais sie step kol nuh ke ma se tohkoh an ac nwekkuhtlac ke luhlahlfongi, finsrak, ac luhngse muhtahl yohkwelihk ne tok.

Ma inge fihsrwacsr na pwacye, ac orekma arlac kahto.

Tamuhlwel ac tahmtahel, kom fin tuh nuhnkuh lah wosasuc uh tiacna orekma arlac wo nuh sum, nga suli kom in fohlohki, liyaclah moul lom an, ac ahkfihsracsryelah inkacnek lom nuh ke mwet tuhma lutlut an. Lohacng na nuh ke mwe luti, ip yohk, ac kunohkohn fihsrwacsr ke wosasuc uh. Nga olwelah nuh sum lah God El fah kol ac ahkinsewowoye kom ke inkacnek lom nuh ke sie moul fohnlah, wosasuc uh fah orekma wo likina met ah nuh sum.

Fahk ahkluo luhk uh pa: muhtwacwacack acn kom oasr we an.

Kuhtuh pacl uh kuht puhla sepuhlaik ke srihpen wacngihn ma “yohk” kacsr ke ma--yohk nguhn la, ahkfuhlwactyeyuck, lahlmwetmwet, kuh in mahno, kahsruhp, kawuck, kuh kuh in oruh ma. Inkaiyacn pacl uh wacngihn ma koluk ke in kena oraclah wo. God El orwekuhtlac in kapwack ac oraclah wo. Tuhsruhk esam, mwe muhnahs lasr uh kuh in kahsrwe kuht in inse puhsisacllac ac ngwet nuh sin Kraist, suc fah “oruh ma muhnahs uh in ma fokoko.”⁴ Setuhn, ke lwacyacn sahyac an, orekmakihn ma muhnahs lasr uh nuh ke pacl se kuht sepuhlaiklac finne liki srihke uh.

Nga lotwelah ke moul luhk uh ma kuht tiac enenuh in “yohk” ke kuhtwena ma in muhtwacwacack in eklac mwet se God El kena kuht in eklac nuh kac.

God El fah us kom oacna inge ke pacl se inge ac muhtwacwacack in orekma yurum. Ma kom enenuh muhkwena pa sie inse ahkolah, sie kena in luhlahlfongi, ac luhlahlfongi in Leum.

Gideon el liyacl sifacna oacna sie mwet imac suhkahsruhp, ma srihk emet in lohm sin pahpah tuhmwacl ah. Tuhsruhk God El liyacl oacna sie mukul puhlaik fokoko.⁵

Ke Samuel el sulacllah Saul elan tohkohsrah lac ah, Saul el srihke in tulohkohnohl. Saul el ma ke sie sruf srihsrihk luhn mwet Israel. El ac tohkohsrah fuhkah?⁶ Tuhsruhk God El liyacl oacna “sie mukul fuhsr sollac.”⁷

Finne mwet pahluh wowo Moses el puhla oelac ac sepuhlaik ke sie pacl ah oruh el kena in fuhlweack ac misac.⁸ Tuhsruhk God El tiacna fuhlweack sel Moses.

Tamuhlwel ac tahmtahel sacohk wiyuck, kuht fin liye kuht muhkwena ke ahtron muhta lasr facluh uh, kuht ac koflah liye kuht in wo fal. Tuhsruhk Pahpah tuhmasr Lucng El liye lah suc kuht na pwacye uh. El liye kuht oacna wen ac acn Nahtuhl, oacna mwet ke kahlwem ma pahtpaht ke kuh ne tok ac ke sie fuhfahsryucsr wolacna.⁹

Kihsaclah luhn Mwet Lahngo ikucslah sruhnguhl luhn molwelah nuh sin mwet nuh kwewa in fohlohk nuh yurin God. Luhng kuhlwacng Lal fal nuh sin mwet nuh kwewa [suc] ahkinsepuhsisaclyaclos sifacna ye [Muhtahl].”¹⁰ Luhng kuhlwacng Lal pa kuh ma lwelah utyak nuh ke tohkohsrahi luhn God ke molwelah. Ke srihpen luhng kuhlwacng Lal, kuht nuh kwewa fah sifil moulyak ac moullac lun sie tohkohsrahi ke wolacna.

Finne tohkohsrahi se e ten ke wolacna uh, tohkohsrahi telestial, “ahluhkwelah etuh nuh kwewa,”¹¹ ac mwet pucspucs fah usrui molwelah se inge.¹²

Tuhsruhk luhng kuhlwacng luhn Mwet Lahngo kuh in oruh yohk likina nuh sesr. Ke mempucr ke Alu luhn Jisus Kraist luhn Mwet Luhlahlfongi ke Lwen-sahflah, kuht kena oraclah sie ma yohk na upac. Pa ma pahtpaht lun tohkohsrahi celestial. Pa moul ma pahtpaht ye muhtuhn Pahpah tuhmasr Lucng. Pa mwe sang yohk se emet luhn God.¹³ Ke tohkohsrahi luhn Celestial, kuht eis fohnlah Lal, ac ke wolacna Lal.”¹⁴ Pwacyena, ma nuh kwewa luhn Pahpah fah utuckuh nuh sesr.¹⁵

Ma pahtpaht pa finsrak lasr uh; in mwet tuhma lutlut pa fuhfahsryucsr lasr.

Ke kom ahkfokokoye kihtin luhlahlfongi ac muhtwacwacack fahsr lom oacna sie mwet orek mihs fahsr tukun Leum lasr Jisus Kraist, insiyom fah eklac.¹⁶ Monum nohfohn ac sesseslah ke kahlwem.¹⁷

God El fah kahsrwe kom in eklac sie ma wo na pwacye liki ma kom kuh in nuhnkuh uh. Ac kom fah sokwack lah wosasuc luhn Jisus Kraist pwacyena orekma ke moul lom an.

Tamuhlwel ac tahmtahel, kawuck sacohk, nga pruhe tuh kuht fah lohacng ke “ma fihsrwacsr ma oasr in Kraist uh”¹⁸ ac lwelah luhng kuhlwacng Lal in sruhk ac us kuht ke fuhfahsryucsr lasr ke acn ma kuht oasr we ingena nuh ke fuhfahsryucsr wolacna ye muhtuhn Pahpah tuhmasr.

Ke kuht oruh oacna ac sie mwet ac siyuck sesr, “In sie mempucr ke Alu luhn Jisus Kraist luhn Mwet Luhlahlfongi ke Lwen-sahflah orekma fuhkah nuh sum?” kuht fah kuh in fahk ke puhlaik ac engan yohk, “Orekma wo na pwacye. Kuloh ke siyuck an. Yac kom ke etuh yohk kac pac?”

Pa inge finsrak luhk, pruhe luhk, fahkwack luhlahlfongi luhk, ac mwe insewowo luhk ke inen Jisus Kraist, amen.