E ta Funshoná Maraviosamente!

No hopi tempu pasá, mi a mira un sita ku a pone mi para i pensa. E tabata bisa asina aki: “Bisa un hende ku tin miar di strea den e universo, i e lo kere bo. Bis’é ku tin fèrf ku no a seka na muraya, e lo bai mishi ku n’e djis pa ta sigur.”

Nos tur no ta un tiki manera esaki? Despues di un prosedimentu médiko, mi dòkternan hopi kapas a splika kiko lo mi mester hasi pa kura di un manera apropiá. Pero promé mi mester a siña algu di mi mes atrobe, ku mi mester tabata sa pa hopi tempu: komo pashènt mi no tin hopi pasenshi.

Konsekuentemente mi a disidí di aselerá e proseso di sanamentu dor di hasi mi propio búskeda riba Internet. Mi a suponé di diskubrí e bèrdat di kual mi dòkternan no tabata sa òf a trata di skondé pa mi.

A tuma mi un tiki tempu pa realisá e ironia di loke mi tabata hasi. Klaro ku, investigando kos pa nos mes no ta un mal idea. Pero mi no tabata teniendo kuenta ku e bèrdat ku mi por konfia i na lugá di esaki mi a haña mi mes atraé pa informashon riba Internet ku ta inkluí informashonnan ku hopi biaha no ta bèrdat.

Tin biaha, e bèrdat por parse demasiado stret, demasiado kla (i raspá), i demasiado simpel pa nos por apresiá su gran balor kompletamente. E ora ei nos ta pone un banda loke nos a eksperenshá i sa ku ta bèrdat pa bai buska un informashon mas misterioso i kompliká. Mara nos lo por siña ku ora nos persiguí sombra, nos ta buskando asuntunan ku tin poko supstansha i balor.

Ora ta trata di bèrdatnan spiritual, kon nos por sa si nos ta riba e kaminda korekto?

Un manera ta pa hasi e preguntanan korekto---e tipo ku ta yuda nos reflekshoná riba nos progreso i evaluá kon kos ta funshoná pa nos: Preguntanan manera:

“Mi bida tin sentido?”

“Mi ta kere den Dios?”

“Mi ta kere ku Dios konosé i stima mi?”

“Mi ta kere ku Dios ta skucha i kontesta mi orashonnan?”

“Mi ta felis di bèrdat?”

“Mi esfuersonan ta kondusí mi na e metanan i balornan spiritualmente mas elevá den bida?”

Preguntanan profundo konserniente e propósito di bida a hiba hopi persona i nan famianan rònt mundu pa e buska bèrdat. Hopi biaha e búskeda a kondusí nan na e Iglesia di JesuCristu di e Santunan di e Delaster Dianan i na e evangelio restourá.

Mi ta puntra mi mes ku si nos komo miembro di e Iglesia, tambe por benefisiá puntrando nos mes de bes en kuando: “Mi eksperensha den Iglesia ta funshonando pa mi? E ta hiba mi mas serka di Cristu? E ta bendishonando ami i mi famia ku pas i goso manera primintí den e Evangelio?

Alma a plantia preguntanan similar na e miembronan di Iglesia den Zarahemla ora el a puntra: “Bosonan a eksperenshá e gran kambio aki den boso kurason?... [i] boso por sinti [esei] awor aki?” ?”¹ Kontemplashon asina por yuda nos re enfoká òf re alinia nos esfuersonan diario ku e plan divino di salbashon.

Hopi miembro lo kontestá ku gran alegria ku nan eksperensha komo miembro di Iglesia ta trahando perfektamente bon pa nan. Nan lo testifiká ku sea den tempu di pobresa òf den prosperidat, sea kosnan ta plasentero òf doloroso, nan ta haña nifikashon, pas i goso dor di nan kompromiso na Señor i nan servisio dediká den Iglesia. Kada dia mi ta topa miembronan di Iglesia ku ta yená ku goso radiante i ku ta demonstrá ku palabra i hecho ku nan bidanan ta enormemente enrikesé dor di e evangelio restourá di JesuCristu.

Pero tambe mi ta atmití ku tin algun ku tin eksperensha ménos satisfaktorio---- ku ta sinti ku nan miembresia den Iglesia tin biaha no ta eksaktamente loke nan a spera.

Esaki ta hasi mi tristu pasó mi sa di mi mes kon e Evangelio por fortalesé nos i renobá e spiritu--- kon e por yena nos kurason ku speransa i nos mente ku lus. Mi sa pa mi mes kon e frutanan di e evangelio di JesuCristu por transformá bidanan di ordinario i tristu den ekstraordinario i sublime.

Pero di kon e ta parse di ta traha mihó pa algun ku pa otro? Kiko ta e diferensha den esnan kende nan eksperensha den Iglesia ta yena nan alma ku kantikanan di amor ku ta redimí² i esnan ku ta sinti ku falta algu?

Segun mi tabata reflekshoná riba e preguntanan aki, un fluho di pensamentu a dal den mi mente. Awe mi ker a kompartí dos.

Promé: nos ta hasiendo nos disipulado demasiado kompliká? Simplifiká

E Evangelio bunita aki ta asina simpel ku un mucha por gar’é, i tòg e ta asina profundo i kompleho ku e ta tuma hinter un bida--- asta un eternidat--- di estudio i deskubrimentu pa komprond’é kompletamente.

Pero tin biaha nos ta kue e leli bunita di Dios su bèrdat i dòrn’é ku kapa riba kapa artifisial di ideanan, programanan i ekspektativa. Kada unu, riba nan mes, por ta di ayudo i apropiá pa sierto tempu i sirkunstansia, pero ora nan wòrdu poné riba otro, nan por kreá un seru di sustansha ku ta bira asina diki i pisá ku nos ta kore rísiko di pèrdè for di bista e flor presioso ku nos a yega di stima asina tantu.

P’esei, komo lidernan nos mester protehá e Iglesia i e evangelio estriktamente den su puresa i simplesa i evitá di pone pesonan innesesario riba nos miembronan.

I nos tur komo miembronan di e Iglesia nos mester hasi un esfuerso konsiensudo pa dediká nos energia i tempu pa e kosnan ku di bèrdat ta importante miéntras nos ta lanta nos semehante i ta konstruyendo e Reino di Dios.

Un hermana, un instruktor di Sosiedat di Sokoro, tabata konosí pa prepará lèsnan perfektamente. Un biaha, el a disidí pa krea un sprei bunita ku lo sirbi komo backround pa e tema di su lès. Pero bida a intervení--- mester a buska e muchanan for di skol, un bisiña, ku ta tin mester di ayudo pa muda, un kasá ku tabatin keintura, i un amigu ku tabata sinti su mes su so. E dia di e lès a yega i e sprei ainda no tabata kla. Finalmente, e anochi promé ku su lès, e no a drumi muchu pa e por a kaba di traha riba e sprei.

E dia siguiente e tabata kansá i meramente por a organisá su pensamentunan, pero ku balor el a para i a duna su lès.

I e sprei tabata maravioso –e kosé tabata perfekto, e kolónan vibrante, i e diseño kompliká. I meimei di dje un simpel palabra ku triunfantemente tabata resoná e tema di su lès: “Simplifiká.”

Rumannan, biba e evangelio no mester ta kompliká.

E ta realmente simpel. E por wòrdu deskribí di e siguiente manera:

• Tende e palabra di Dios ku e deseo sinsero lo kondusí nos pa kere den Dios i pa konfia Su promesanan.³

• Mas nos konfia Dios, mas nos kurason ta yena ku amor pa E i pa otro.

• Pa motibu di nos amor pa Dios, nos ta deseá pa siguié i nos ta alinia nos akshonnan ku Su palabra.

• Pasobra nos ta stima Dios, nos ke bendishoná e bida di otronan i yuda e pober i esnan den nesesidat.

• Mas nos kana den e kaminda aki di disipulado, mas nos ta deseá pa siña e palabra di Dios.

I asina e ta bai, kada paso kondusiendo na e siguiente i yenando nos ku fe, speransa, i karidat ku ta sigui krese kada bes mas.

E ta simplemente bunita, i e ta funshoná masha bon.

Rumannan, si boso ta pensa ku e evangelio no ta funshonando asina bon pa boso, mi ta invitá boso pa dal un paso atras, wak boso bida for di un nivel mas haltu, i simplifiká bo aserkamentu na disipulado. Enfoká riba doktrina, prinsipionan, i aplikashonnan di e Evangelio básiko. Mi ta primintí boso ku Dios lo guia i bendishoná boso riba boso kaminda pa un bida satisfaktorio, i e evangelio seguramente lo funshoná mihó pa boso.

Mi di dos sugerensha ta: kuminsá kaminda boso ta.

Tin biaha nos ta sinti nos mes deskurashá pasó nos no ta “mas” di algu--- mas spiritual, respetá, inteligente, salú, riku. amigabel, òf kapas. Naturalmente, no tin nada malu den ke mehorá. Dios a krea nos pa [nos] krese i progresá. Pero kòrda, nos debilidatnan por yuda nos pa ta humilde i bolbe nos na Cristu, ku lo “laga kosnan suak bira fuerte.”⁴ Satanas di otro banda, ta usa nos debilidat te na e punto ku nos ta deskurashá pa asta sigui purba.

Mi a siña den mi bida ku nos no mester ta “mas” di nada pa kuminsá bira e persona ku Dios a intenshoná nos pa bira.

Dios lo aseptá boso manera boso ta awor aki i kuminsá traha ku boso. Tur loke boso tin mester di dje ta un kurason disponibel, un deseo pa kere, i konfiansa den e Señor.

Gideon tabata mira su mes komo un bon kunukero pober, esun di ménos di e kas di su tata. Pero Dios a mir’é komo un hòmber poderoso di balor.⁵

Ora Samuel a skohe Saul pa bira rei, Saul a trata di konvensé di lo kontrario. Saul tabata di un di e tribunan mas chikitu di e kas di Israel. Kon e por bira e rei?⁶ Pero Dios a mir’é komo “yòn i apuesto.”⁷

Asta e gran profeta Moises a sinti su mes dominá i deskurashá na sierto momento ku e ker a entregá i muri⁸ Pero Dios no a entregá.

Mi rumannan stimá, si nos wak nos mes solamente dor di nos wowonan mortal, nos lo no mira nos mes komo sufisiente bon. Pero nos Tata Selestial ta mira nos manera nos ta di bèrdat i ken nos por bira. E ta mira nos komo Su yunan, ku nos ta di lus eterno ku potensial eterno i ku un destino divino.⁹

E Salbador Su sakrifisio a habri porta di salbashon pa tur [por] regresá serka Dios. Su “grasia” ta sufisiente pa tur [ku]humiá nan mes dilanti di [Dios].”¹⁰ Su grasia ta e poder kapasitadó ku ta permití akseso den Dios Su reinonan di salbashon. Dor di su grasia, nos tur lo resusitá i salbá den e reino di gloria.

Asta e reino mas abou di gloria, e reino telestial, “ta surpasá nos entendimentu,”¹¹ i un kantidat inkontabel lo heredá e salbashon aki.¹²

Pero e Salbador Su grasia por hasi hopi mas pa nos. Komo miembro di E Iglesia di JesuCristu di e Santunan di e Delaster Dianan, nos ta aspirá na algu mas grandi ku por imaginá. Esaki ta eksaltashon den e reino selestial. Ta bida eterno den e presensha di nos Tata Selestial. Ta e don di mas grandi di Dios.¹³ Den e reino selestial, nos ta risibí “di Su plenitut, i di Su gloria.”¹⁴ Di bèrdat, tur loke e Tata tin lo wòrdu duná na nos.¹⁵

Eksaltashon ta nos meta; disipulado ta nos kaminda

Segun bo ta ehersé un tiki fe i kuminsá boso kaminda manera un siguidó pasífiko di nos Señor JesuCristu, boso kurason lo kambia.¹⁶ Hinter boso ser lo wòrdu yená ku lus.¹⁷

Dios lo yuda boso bira algu mas grandi ku boso a kere ta posibel. I boso lo deskubrí ku e evangelio di JesuCristu enbèrdat ta trahando den boso bida. E ta funshoná.

Rumannan, kerido amigunan, Mi ta pidi ku nos por enfoká riba “e simplisidat ku ta den Cristu”¹⁸ i permití Su grasia pa lanta i karga nos durante nos biahe di unda nos ta awor pa e destino glorioso den presensha di nos Tata.

Segun nos ta hasi esaki, i un hende puntra nos, “Kon siendo un miembro di E Iglesia di JesuCristu di e Santunan di e Delaster Dianan ta funshonando pa bo?” nos lo por ta kapas pa bisa ku orguyo den tur humildat, i gran goso, “E ta funshonando maraviosamente. Danki pa puntra! Lo bo ke sa mas?”

Esaki ta mi speransa, mi orashon, mi testimonio i mi bendishon den e nòmber di JesuCristu, amèn