2010–2019
E Aoga!
Oketopa 2015


E Aoga!

Ou te tatalo o le a tatou taulai atu i le “[faigofie] tonu ia Keriso” ma faatagaina Lona alofa tunoa ia siitia ma tauave i tatou.

Ou uso e ma tuafafine pele, a’u uo pele, o se fiafiaga le faatasi ai ma outou i le asō. Ua tatou faanoanoa i le vaaia o nofoa e tolu o loo avanoa i luga nei i le tulaga. Ua tatou misia Peresitene Packer ma Elder Perry, ma Elder Scott. Tatou te alolofa ia i latou, ma tatou tatalo mo le manuia o o latou aiga.

I lenei konafesi i le faaiuga o le vaiaso, o le a faamanuiaina ai i tatou e lagolagoina le toatolu o e ua valaauina e le Alii ia tauaveina o latou tulaga i le Korama a Aposetolo e Toasefululua.

O a tatou tatalo mo i latou o le a faamalosia ai i latou a o latou tauaveina le valaauga paia o le avea ma aposetolo.

Pe o Aoga ea le Talalelei ia te Oe?

E lei leva atu na ou vaaia ai se upusii na ala ai ona ou tu ma mafaufau. E faapenei: “A ta’u atu i se tagata e faitau miliona fetu i le vanimonimo, o le a ia talitonu ia te oe. A ta’u atu ia te ia o loo susu le vali o le puipui, o le a ia pa’i atu i ai ina ia mautinoa ai.”

Pe tatou te le o maua uma teisi ea i lea tulaga? Ina ua mavae se faagasologa faafomai talu ai nei, sa faamalamalama mai e a’u fomai atamamai mea e manaomia ona ou faia ina ia faamaloloina lelei ai. Ae o le mea muamua sa ao ona ou toe aoaoina se mea e uiga ia te au lea sa tatau ona leva ona ou iloaina: i le avea ma se tagata ma’i, e le lava so’u onosai.

Ona o lo’u le onosai, sa tonu ai ia te au ia faatelevave le faagasologa o le faamaloloina e ala i le faatinoina o la’u lava sailiiliga i le Initoneti. Sa ou manatu sa ou faamoemoeina ia iloaina le mea moni e le o iloaina e a’u fomai pe o latou taumafai foi e nana mai ia te au.

Sa umi se taimi ae faatoa ou iloaina le faatauemu o le mea sa ou faia. Ioe, o le sailia o mea mo i tatou lava e le o se manatu leaga lea. Ae sa ou lafoaia le mea moni sa mafai ona ou faalagolago i ai ma ou iloaina ai e au lava ia ua taaina atu i faamatalaga mai le Initoneti ia e tele lava na i ai ni tautinoga le moni.

O nisi taimi, o le mea moni e na ona foliga mai e tuusao, manino tele, ma faigofie tele mo i tatou e talisapaia atoatoa ai lona taua tele. O lea tatou te faataatia ese ai mea ua tatou tofo i ai ma iloaina e moni i le sailiga o ni faamatalaga faalilolilo pe faigata. E faamoemoe o le a tatou aoaoina lena mea pe a tatou sailia ni tali e faavae i mea le moni, ma tatou tulitulimatagauina ai mea e itiiti le anoa ma taua.

A oo mai i le upumoni faaleagaga, e mafai faapefea ona tatou iloa o loo tatou i ai i luga o le ala sa’o?

O se tasi o auala o le faia o fesili sa’o—o ituaiga fesili e fesoasoani ia i tatou e mafaufau loloto ai i lo tatou alualu i luma ma iloilo pe o faapefea ona aoga ni mea ia i tatou. Fesili e pei o le:

“E i ai ea se uiga o lo’u olaga?”

“O ou talitonu ea i le Atua?”

“O ou talitonu ea o loo silafia e le Atua au ma alofa ia te au?”

“O ou talitonu ea e faafofoga ma tali mai le Atua i au tatalo?”

“O ou fiafia moni ea?”

“Pe o taitai atu ea e a’u taumafaiga a’u i sini maualuluga faaleagaga ma tulaga faatauaina i le olaga?”

O fesili loloto e faatatau i le faamoemoega o le olaga ua taitai atu ai le toatele o tagata ma aiga i le lalolagi atoa i le sailiga o le upumoni. E tele lava ina taitai atu e lena sailiga i latou i Le Ekalesia a Iesu Keriso o le Au Paia o Aso e Gata Ai ma, i le talalelei toefuataiina.

Ou te mafaufau lava ia i tatou i le avea ai ma tagata o le Ekalesia, pe o tatou manuia foi mai le fesili ifo ia i tatou lava mai lea taimi i lea taimi. “Pe o aoga lo’u aafiaga i le Ekalesia mo au? Pe o ou latalata atili atu ai ia Keriso? Pe o faamanuiaina ai au ma lou aiga i le filemu ma le olioli e pei ona folafola mai i le talalelei?”

Na fai atu e Alema ni fesili faapenei i tagata o le Ekalesia i Saraemila ina ua ia fesili atu: “Ua oo ea lenei liuga tele i o outou loto? … [Ma] e mafai ea ona outou lagonaina nei?”1 O ia manatunatuga e mafai ona fesoasoani ia i tatou ia toefaataulai atu pe toefaaogatusa a tatou taumafaiga i aso taitasi ma le fuafuaga paia o le faaolataga.

E toatele tagata o le a tali mai ma le fiafia e faapea o o latou aafiaga i le avea ai ma se tagata o le Ekalesia o loo matua tulagaese le aoga mo i latou. O le a latou molimau e faapea pe o taimi o le mativa po o le mauoa, pe o mea e fiafia ai pe tiga ai, latou te maua lava le uiga anoa tele, filemu, ma le olioli ona o lo latou tautinoga i le Alii ma la latou auaunaga tuuto i le Ekalesia. O aso uma ou te feiloai ai i tagata o le Ekalesia o e ua faatumulia i se olioli manino ma o e ua faaalia i upu ma galuega o latou olaga ua lemafuatia le faamauoaina i le talalelei toefuataiina a Iesu Keriso.

Ae ou te iloaina foi o loo i ai nisi e le o faamalieina tele lo latou aafiaga—o e lagonaina o lo latou auai ai i le Ekalesia i nisi taimi e le o le mea tonu lea sa latou faamoemoe i ai.

Ou te faanoanoa ai i lea mea, ona ua ou iloaina e au lava ia le auala e mafai ai e le talalelei ona faamalosia ma faafouina le agaga o se tasi—le auala e mafai ai ona ia faatumuina o tatou loto i le faamoemoe ma o tatou mafaufau i le malamalama. Ua ou iloaina mo au lava e mafai e fua o le talalelei a Iesu Keriso ona liua olaga mai le olaga masani ma le faanoanoa i se olaga tulagaese ma faagaeetia.

Ae aisea e foliga mai ai e aoga atu i isi nai lo isi? O le a le eseesega i le va o i latou o loo i ai se aafiaga i le Ekalesia o loo faatumuina o latou agaga i pese o le alofa togiola2 ma i latou o loo lagonaina e i ai le mea o loo misi?

A o ou mafaufau loloto i nei fesili, sa fetuleni mai le mau manatu i lou mafaufau. O le asō, ou te fia faasoa atu ai ni mea se lua.

Faafaigofie

Muamua: o tatou faafaigataina ea le avea o i tatou ma soo?

O lenei talalelei matagofie e matua faigofie lava lea e mafai e se tamaitiiti ona malamalama ai, ae e matua loloto foi ma lavelave lea e alu ai le olaga atoa—e oo lava i le faavavau—e suesue ma sailiili ai ia malamalama atoatoa i ai.

Ae o nisi taimi tatou te ave ai le lili matagofie o upumoni a le Atua ma ufitai i lea paēga ma lea paēga o manatu lelei o tagata, polokalama ma faamoemoega. O ia mea taitasi, pe a faia taitasi, atonu e aoga ma talafeagai mo se taimi patino ma tulaga, ae a faataatia le tasi i luga o le isi, e mafai ona tupu mai ai se faaputugā mauga e ono mafiafia ma mamafa lea e lamatia ai tatou i le le vaaia o lena fugalaau taua sa tatou matua alolofa faapelepele muamua i ai.

O le mea lea, i le avea ai ma taitai e tatau ona tatou matua puipuia mausali le Ekalesia ma le talalelei i lona mama ma le manino ma aloese mai le tuuina o avega le talafeagai i luga o o tatou tagata.

Ma o i tatou uma, i le avea ai ma tagata o le Ekalesia tatou te manaomia ona faia se taumafaiga magafagafa lelei e tuuto atu lo tatou malosi ma le taimi i mea e taua moni lava, a o siitiaina o tatou uso a tagata ma fausia ai le malo o le Atua.

Sa i ai se tasi tuafafine, o se faiaoga o le Aualofa, sa lauiloa i le sauniaina atoatoa o lesona. I se tasi taimi, sa tonu ai ia te ia e fai se ie soosoo matagofie e fai ma vaega atoa e taulai i ai le autu o lana lesona. Ae sa i ai mea faalavefau o le olaga—sa i ai le fanau e piki mai le a’oga, o se tuaoi sa manaomia ona fesoasoani i ai e masii ese, o se tane sa fiva, ma se uo sa lagonaina le tuuatoatasi. Sa latalata mai le aso o le lesona, ae sa lei maea le ie soosoo. Mulimuli ane, o le po a o lumanai ai lana lesona, sa lei tele sana moe ona sa galue i le po atoa i le ie soosoo.

O le aso na sosoo ai sa matua vaivai lava ma tau le mafai ona faatulaga ona mafaufauga, ae sa ia tulai i luga ma le lototoa ma fai lana lesona.

Ma sa mata’ina le ie soosoo—sa atoatoa le su’iina, sa malolosi ia lanu, ma sa anagatā ia mamanu. Ma i le ogatotonu o ia mamanu uma sa su’i ai le upu e tasi na tumatilatila mai ai le autu o lana lesona: “Faafaigofie.”

Uso e ma tuafafine, o le ola i le talalelei e le manaomia ona faafaigata.

E tuusao moni lava. E mafai ona faamatalaina faapenei:

  • O le faalogo i le afioga a le Atua ma le faamoemoega naunautai e taitai atu ai i tatou e talitonu i le Atua ma faatuatuaina Ana folafolaga.3

  • O le faatele o lo tatou faatuatuaina o le Atua, o le faatele foi lea o le faatumulia o o tatou loto i le alofa mo Ia ma mo le tasi ma le isi.

  • Ona o lo tatou alofa mo le Atua, ua tatou mananao ai e mulimuli ia te Ia ma tatou faaogatusaina ai a tatou amioga ma Lana afioga.

  • Ona tatou te alolofa i le Atua, ua tatou mananao ai e auauna atu ia te Ia; tatou te mananao ia faamanuia olaga o isi ma fesoasoani atu i e matitiva ma lē tagolima.

  • O le faatele ona tatou savavali i lenei ala o le avea ma soo, o le faatele foi lena o lo tatou mananao ia aoao i le afioga a le Atua.

Ma faapena ai lava, i laasaga taitasi e taitai atu i le isi laasaga ma faatumulia ai i tatou i le faatuatua, faamoemoe ma le alofa mama ua faateleina naua.

E matagofie le faigofie, ma e maeu le aoga.

Uso e ma tuafafine, afai o loo e manatu e le o matua aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala e faamalieina ai le olaga, ma o le a mautinoa lava le aoga atili o le talalelei mo outou.

Amata i le Mea o E I Ai

O la’u fautuaga lona lua e faapea: amata i le mea o e i ai.

O nisi taimi tatou te lagonaina le faalotovaivaia ona tatou te le o “maoae” i se mea—maoae le faaleagaga, faaaloalogia, atamai, soifua maloloina, mauoa, faauo, pe gafatia. O le mea masani, e leai ma se mea e leaga ai le manao ia faaleleia. Na foafoaina i tatou e le Atua ia tuputupu ae ma alualu i luma. Ae ia manatua, e mafai ona fesoasoani o tatou vaivaiga ia i tatou ia lotomaualalo ma liliu atu i tatou ia Keriso, o lē o le a “faia o mea vaivai ia avea ma mea malolosi.”4 O Satani i le tasi itu, na te faaaogaina o tatou vaivaiga seia oo lava i le tulaga e faalotovaivaia ai i tatou mai le taumafai.

Sa ou aoaoina i lo’u olaga: e le tau manaomia ona tatou “maoae” i se mea ina ia amata ona avea ai ma tagata ua faamoemoe le Atua tatou te avea ai.

O le a ave oe e le Atua i le tulaga o e i ai i lenei lava taimi ma amata ona galueaiina oe. Pau lava le mea e te manaomiaina o se loto naunau, o se manao ia talitonu, ma le faalagolago i le Alii.

Sa vaai Kitiona ia te ia o se faifaatoaga mativa, o sē aupito faatauvaa i le fale o lona tama. Ae sa silasila atu le Atua ia te ia o se tagata malosi o le lototoa.5

Ina ua filifilia e Samuelu ia Saulo e fai ma tupu, sa taumafai Saulo e teena. O Saulo e sau mai se tasi o ituaiga aupito itiiti o le aiga o Isaraelu. E faapefea ona avea o ia ma tupu?6 Ae sa silasila atu le Atua ia te ia o “se taulealea … lelei.”7

Na oo foi lava i le perofeta maoae o Mose sa lagonaina le matua lofituina ma le lotovaivai i se tasi taimi lea na ia manao ai e faavaivai ma oti.8 Ae sa lei faavaivai le Atua ia Mose.

Ou uso e ma tuafafine pele, afai e na o mata faaletino tatou te tilotilo ai ia i tatou, atonu o le a tatou le vaaia la i tatou lava o ni tagata ua lava le lelei. Ae o loo silasila mai lo tatou Tama Faalelagi ia i tatou i tagata moni e pei ona tatou i ai ma tagata e mafai ona tatou avea ai. E silasila mai o Ia ia i tatou o Ona atalii ma afafine, o tagata o le malamalama e faavavau faatasi ai ma gafatia e faavavau atoa ai ma se taunuuga paia.9

O le taulaga a le Faaola ua matala ai le faitotoa o le faaolataga mo tagata uma ia toefoi atu ai i le Atua. “Ua lava [Lona] alofa tunoa mo tagata uma o e e faalotomaualaloina i latou lava i luma [o le Atua].”10 O Lona alofa tunoa o le mana gafatia lea e mafai ai ona ulufale atu i malo o le faaolataga a le Atua. Ona o Lona alofa tunoa, o le a tatou toetutu uma ai ma faaolaina i se malo o le mamalu.

E oo foi i le malo o le mamalu aupito maualalo—, le malo telesitila, “ua sili mamao atu i malamalamaaga uma,”11 ma e le mafaitaulia le anoanoai o tagata o le a mauaina lenei faaolataga.12

Ae o le alofa tunoa o le Faaola e mafai ona faia le tele o mea mo i tatou. I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou mananao ai i se mea le mafaamatalaina lona maoae atu. O le faaeaga lea i le malo selesitila. O le ola e faavavau lea i le afioaga o lo tatou Tama i le Lagi. O le meaalofa aupito silisili lea a le Atua.13 I le malo selesitila, tatou te maua ai “lona atoatoa, ma lona mamalu.”14 O le mea moni, o mea uma o loo i ai i le Tama o le a foaiina mai ia i tatou.15

O le faaeaga o le tatou sini lea; o le avea ma soo o le tatou faigamalaga lea.

A e faatinoina sina faatuatua itiiti ma amata lau savaliga o se soo filemu a lo tatou Alii o Iesu Keriso, o le a suia lou loto.16 O le a faatumulia lou tagata atoa i le malamalama.17

O le a fesoasoani le Atua ia te oe ia avea o se tagata sili atu i lo le tagata ua e manatu e mafai ona e avea ai. Ma o le a e iloaina ai o le talalelei a Iesu Keriso, e moni lava e aoga i lou olaga.

E Aoga!

Uso e ma tuafafine, uo pele, ou te tatalo o le a tatou taulai atu i le “[faigofie] tonu ia Keriso”18 ma faatagaina Lona alofa tunoa ia siitia ma tauave i tatou i taimi o la tatou malaga mai le mea o tatou i ai nei e tau atu i lo tatou taunuuga mamalu i le afioaga o lo tatou Tama.

A tatou faia lea mea, ma a fesili mai se tasi, “O a mai le avea ai o oe ma tagata o Le Ekalesia a Iesu Keriso o le Au Paia o Aso e Gata Ai? o le a mafai ona tatou faapea atu ma le mitamita ma le olioli tele, “E ofoofogia le aoga! Faafetai mo le fesili! E te fia iloa atili?”

O lo’u faamoemoe lea, o la’u tatalo, o la’u molimau, ma la’u faamanuiaga i le suafa o Iesu Keriso, amene.