Kabhi Bahut Jald aur Kabhi Bahut Der Nahin Hota

Bhaaiyon aur bahanon, hum duniya ke saath ek yudh mein hai. Purane samay mein, duniya hamare bachchon ka furtilapan aur samay chahata tha. Aaj, woh unki pehchaan aur mann par prabhaao daalta hai. Kayi unche swar aur logpriye awaazein hai jo hamare bachchon ko unki pehchaan aur unhe kya vishwaas karna batlaate hai. Hum apne parivaar ko is samaaj se prabhaawit hone nahin de sakte. Hamein yeh yudh jeetna hai. Sab kuch ispar nirbhar hai.

Girjaghar mein bachche ek geet gaate hai jo unhe unke sahi pehchaan ko batlaata hai: “Mai Parmeshwar ka bachcha hoon. … Usne mujhe yahan bejha hai, mujhe dharti par ghar aur maata-pita diye hai.” Phir, bachcha humse kehta hai: “Aage chal, raah dikha, mere saath me chal. … Unke shabd mujhe samjhaaye kahin der na ho jaaye.”¹

Pradhaan Russell M. Nelson ne hamare pichle maha sammelan mein sikhlaya ki, ab se, hamein “soch-samajh kar maa baap ka farz” ada karna hai.² Yeh khatarnaak samay hai. Magar achchi khabar yeh hai ki Parmeshwar jaanta tha ki aysa hoga, aur Unhonne hamare liye dharamshaastra mein hamein salaah di ki kaise hum apne bachchon aur apne naati/poton ko madad karein.

Tasveer

Uddhaarkarta Mormon Dharamshaastra ke samay ke bachchon ke saath

Mormon Dharamshaastra mein, Uddharkarta Nephitiyon ke paas gaya. Usne unke chote bachchon ko Apne paas bulaya. Usne unhein ashirvaad diya, unke liye prarthna ki, aur unke liye roya.³ Phir Usne maata-pitaaon se kaha, “Apne chote bachchon ko dekho.”⁴

Behold shabd ka matlab hai dekhna aur gaur karna. Ishu ne maata-pitaaon ko bachchon mein kya dekhne ko kaha tha? Kya woh chahata tha ki woh apne bachchon ke divye sambhavna ko pehchaane?

Jab hum aaj apne bachchon aur apne naati-poton ko dekhte hai, Uddhaarkarta kya chahata ki hum unmein dekhein? Kya hum jaante hai ki hamare bachche Girjaghar ke jaanchkartaoon ka sabse bada dal hai? Hamein kya karna chahiye taaki woh anantta tak parivartit rahein?

Matthew ki pustak mein, Uddhaarkarta hamein anant parivartan ki shiksha deta hai. Logon ka ek bhaari bheed ikattha hua tha Galilee ke Samudra ke paas Unhe sunne ke liye.

Is pal mein, Ishu ne beej bone ki kahani batlaayi—beej bonewaale ka nitikatha.⁵ Ise apne chelon se batlaate samay, aur phir hamein, Usne kaha, “Jab koi raajye ka baat sun le, aur samjhe nahin tab aata hai dusht praani, aur le jaata hai woh jo unke hriday mein boya gaya tha.”⁶ Maata-pitaaon ke liye sandesh spasht hai:sunne aur samajhne mein antar hai. Agar hamare bachchein sirf susamachaar ko sunein par samajh nahin paaye, tab Shaetaan ke liye darwaaza khula hai in sachchaaiyon ko unke dilon se nikalne ke liye.

Haalaanki, agar hum unmein gehre parivartan ke jad ugaae, tab din ki garmi mein, jab jiwan kathin ho jaaye—-aur aysa zaroor hoga—Ishu Maseeh ka susamachaar unke andar kuch aysa dega jo baahar se nahin mil sakta hai. Hum kaise yeh jaan sakte hai ki yeh shaktishaali sachaaiyaan unhe samajh mein aayi hai? Shabd sunna hi kaafi nahin hoga.

Hum sab jaante hai ki shabd badalte hai. Kabhi kabhi hum apne shabd bolte, aur woh kuch aur sunte hai. Tum shaayad apne chote bachchon se kahoge, “Tum ek bhaje huwe record ki tarah ho.” Unka jawaab hoga, “Pitaji, record kya hai?”

Hamare Swarg ke Pita chahate hai ki hum safalta paaye kyunki, ant mein, woh Unke bachche pehle the baad mein hamare huwe. Zion mein maata-pita hone ke, tumne Pavitra Aatma ka uphaar paaya hai. Jab tum maargdarshan ke liye prarthna karoge, “woh tumhe sab baate dikhaaegi jo tumhe karni chahiye”⁷ apne bachchon ko sikhlane ke liye. Jab tum seekhne ka kriya mein shuru hoge, “Pavitra Aatma ise maanav santaan ke hridayon tak pahunchati hai.”⁸

Helen Keller ki kahani ek achcha uddharan hai kisi ko samajhne mein madad karne ke baare mein. Woh andhi aur behri thi apni andhere aur shaant duniya mein. Anne Sullivan naamak ek shikshak ne uski madad ki. Aap kaise ek bachche ko padhaenge jo aapko dekh ya sunn nahin sakta?

Tasveer

Helen Keller aur Anne Sullivan

Kaafi dinon tak, Anne Helen se sampark nahin kar paa rahi thi. Ek din dopahar ke samay, usne use paani waale pump ke paas le gayi. Usne Helen ka haath nal ke niche rakha aur paani pump karne lagi. Anne ne W-A-T-E-R(paani) spell kiya Helen ke haath par. Kuch nahin hua. Usne phir se koshish kiya. W-A-T-E-R. Helen ne Anne ka haath dabaya kyunki woh samajhne lagi thi. Raat hone tak, woh 30 shabd seekh gayi thi. Kuch hi mahino mein, usne 600 shabd seekh liye the aur Braille padhne lagi thi. Helen Keller ne baad mein college degree haasil ki aur andhe aur behre logon ki duniya usne badal di.⁹ Yeh to chamatkaar tha, aur uski shikshak ne yeh sambhav kiya tha.jis tarah tum, maata/pita banoge.

Maine BYU-Idaho ke avivaahit baaligon ke stake ke pradhaan mein ek aur mahaan shikshak ko dekha. Us anubhav ne mera jiwan badal diya. Ek khaas Mangalwaar ki shaam ko, maine Mexico Shahar ke ek jawaan purush se vaartalaabh kiya, jo mission par jaane waala tha. Maine usse uske gawahi aur sewa karne ki ichcha ke baare mein pucha. Usne mere sawaal ke jawaab achchi tarah diye. Phir maine uske yogyata ke baare mein pucha. Woh jawaab bhi ek dam theek the. Vaastav mein, itne achche, ki mujhe laga, “Shaayad usne mera sawaal nahin samjha.” Tab maine sawaal ko phir se khul kar pucha aur chaaha ki woh sahi arth samajh jaaye aur sachchaai se jawaab de.

Mai is jawaan purush se itna kush tha ki maine usse pucha, “Pablo, woh kaun hai jisne tumhe jiwan mein Prabhu ke saamne itni sidhe maarg par khada kiya?”

Usne kaha, “Mere pita.”

Maine kaha, “Pablo, mujhe apni kahani batao.”

Pablo ne kaha: “Jab mai nao varsh ka tha, mere pita mujhe alag le gaye aur kaha, ‘Pablo, mai bhi ek baar nao varsh ka tha. Yeh hai kuch baatein jiska tumhe saamna karna padega. Tum logon ko paathshaala mein dhoka karte dekhoge. Tum gaali dene waalo ko sunoge. Tum kabhi girja jaana nahin chahoge. Dekho, jab yeh sab hone lage—ya koi aur baat tumhe takleef de—mai chahata hoon ki tum aakar mujhse baat karo, aur mai tumhari madad karunga. Aur phir mai tumhe bataunga aage kya hoga.’”

“Tab, Pablo, usne tumhe 10 varsh par kya bataya?”

“Ji, usne ashleel chitra aur gande mazaak par chetaoni di.”

“Kya hua jab tum 11 varsh ke huwe?” maine pucha.

“Usne mujhe latt padne waale cheezon ke baare mein bataya mujhe meri chunne ki shakti istemaal karne ke baare mein batlaaya.”

Yeh tha ek pita, har varsh, “niyam par niyam; thoda yahan, aur thoda wahan,”¹⁰ jo apne bete ki madad karta sirf sunne mein nahin par samajhne mein bhi. Pablo ka pita jaanta tha ki hamare bachche tab hi seekhte hai jab woh tayyaar rehte hai, na ki jab hum unhe sikhana chaahe. Mujhe us raat Pablo ka prachaarak naama bharte huwe bahut garv mehsoos hua, magar main Pablo ke pita ke liye aur gaurav mehsoos karta tha.

Us raat ghar jaate samay, maine khud se pucha, “Pablo kaisa pita hoga?” Aur jawaab bilkul bahut aasaan tha: woh bilkul apne pita jaisa hoga. Ishu ne kaha, “Putra khud kuch nahin kar sakta, par jo woh Pita ko karte dekhta hai.”¹¹ Yahi tarika Swarg ka Pita istemaal karta hai Apne bachchon ko har peedhi mein ashirvaad dene ke liye.

Pablo ke saath ke anubhav ki sochte sochte, mujhe dukh mehsoos hua kyunki mere chaar betiyaan ab badi ho gayi thi aur nao naati kahi paas mein nahi rehte the. Phir maine socha, “Kaise mai Pablo ke pita ke jaisa inhe tayyaar kar sakta hoon? Kya bahut samay beet gaya tha?” Jab maine apne dil mein ek prarthna kiya, Aatma ne mujhe yeh sachchaai batlaai: “Kabhi bahut jald aur kabhi bahut der nahin hota is zaroori kaarye ko shuru karne ke liye.” Mai turant is baat ka arth jaan gaya. Mai ghar pahunchne ke liye intazaar nahin kar paa raha tha. Maine apne patni, Sharol, se kaha, ki woh hamare bachchon se sampark karein aur unhe bataye ki humein unse bhent karna hai; mujhe unse kuch zaroori baat karni hai. Mere jaldbaazi ne unhe chaukaaya

Humne apne sabse badi beti aur uske pati se shuruaat ki, maine kaha: “Tumhari maa aur mai yeh batlana chahate hai ki hum kabhi tumhare umra ke the. Hum 31 varsh ke the, ek chote parivaar ke saath. Humare paas ek vichaar hai jo tumhare liye raye dega ki tum shaayad kya anubhav karoge. Shaayad woh dhan sanbandhi ya swaasth ki chunaoti ho. Shayaad vishwaas ka imithian hoga.Tum jiwan se shayad thak jaaoge. Jab aisi baate ho, hum chahate hain tum aakar aur humse baat karo. Hum isse chutkaara paane mein tumhari madad karenge. Hum har dam tumhare jiwan mein nahin dakhal denge, magar hum tumhe yaad dilana chahate hai ki hum tumhara saath denge. Aur kyunki hum saath hai, mai tumhe Pablo, naam ke jawaan ladke ki interview ki kahani batana chahata hoon.

Kahani ke baad, maine kaha, “Hum nahin chahate ki tum apne bachchon aur hamare naatiyon ko in sachchaaiyon ko batane ka mauka kho do.”

Bhaaiyon aur bahanon, ab maine ek arthpurn tarike se samjha Prabhu kya chahata hai mujhse ek pita aur ek nana ke rup mein taaki mai apne parivaar ko na sirf sunaaun par samjhaaun bhi.

Jaise mai budha hota hoon, mai khud ko in shabdon par sochta rehta hoon:

Mai jaanta hoon ki mai samay ko piche nahin kar sakta, par mai yeh ab jaanta hoon—ki kabhi bahut jald aur kabhi bahut der nahin hota netritav karne, raah dikhane, aur hamare bachchon ke saath chalne ke liye, kyunki parivaar sada ke liye hai.

Yeh meri gawahi hai ki hamare Swarg ke Pita ne humse itna prem kiya ki Usne Apna Iklauta Putra bheja ek manushye ka jiwan jeene ke liye taaki Ishu humse keh sake, “Mai wahan tha jahan tum ho, mai jaanta hoon aage kya hoga, aur mai tumhe usmein madad karunga.” Mai jaanta hoon Woh madad karega. Ishu Maseeh ke naam se, amen.