2010–2019
E Sohte Mwadangala oh E Saikinte Pwandala
October 2015


E Sohte Mwadangala oh E Saikinte Pwandala

E sohte kin mwadangala de pil kin pwandala kitail en kahluwa, kaweid oh alu limwahn neitail serihkan, pwe peneinei wia mehkoat potopot.

Riei souleng ko, kitail miher nan mahwin ehu me wiewiawi ieng sampah. Mahs, sampah kin siaiki en neitail seri kan arail kehlail oh arail ansou. Rahnwet e kin nantieng en wekidala ihs irail oh arail madamadau. Dir en ngihl laud oh dehde me kin songosong en wekidala ihs neitail seri kan oh dahme re konehng kamehlele. Kitail sohte kak mweidehng atail peneinei kan en idawehnla koasondi kan en sampa. Kitail anahne kalewehdi mwekid wet pwe soahng koaros pahsoanda sang powe.

Serihn nan Mwomwohdiso wet kin koulki koul me padahkieng irial duwen ihs udahn irail: “Ngehi seri en Koht….E kadariedo wasaht, kieng ie ai wasahn kouson rehn papah nohno.” Eri seri kan apw kin peki rehtail: “Kaweidih ie, padahkieng ie, kahluhwai ie....Sewesei ie pwe ien wewehki ah mahsen kan mwohn eh pahn pwandala.”1

Presiden Russell M. Nelson padahkieng kitail nan kapokon samwalahro me sang rahnwet kohla, kitail en nantieng kanaieng duwen atail kin apwali neitail seri kan.2 Ansou apwal met akan. Ahpw paiamwau pwe Koht mwahngih me mepwukat pahn wiawi oh E kaweid kin kitailehr nan pwuhk sarawi kitail en ese ia mwomwen atail pahn sewese neitail serih kan oh nein neitail seri serihn mwuhr akan.

Kilel
Sounkomour oh Serihkan en Pwuken Mormon

Nan Pwuhken Mormon, Sounkomouro pwarehng mehn Nephite kan. E kapilkipene Ih neirail seri kan. E kapai irailda, kapakap kin irail, oh sengiseng loalkin irail.3 E apw masanieng pahpa nohno kan ren tehk neirail seri tikitik kan.4

Lepin kosoi tehk wewehki ken kilang oh kadehde. Dahme Sises mwauki pahpa nohno kan en kilang rehn neirail seri tikitik kan? E kupwurki irail en wewehkihla duwen en neirail seri wiewia mwau kan?

Ni aitail kin kilang neitail seri kan oh nein neitail seri kan rahnwet, dahme atail Sounkomouro kupwurki kitail en kin kilang rehrail? Kitail ese me neitail serih kan me wia pwihn keieu tohto nan Mwomwohdiso wet me kin tetehk dahme kin wiewiawi? Dahme kitail anahne wia pwehn kahrehda arail weliakapw potopot?

Nan pwuhken Madiu, Sounkomouro padakieng kitail duwen weliakapw potopot. Pokon lap ehu apw pokonpene limwahn Lehn Kalili pwehn rong Ah padahk.

Ih ansou me Sises mahsaniada soi en padokedi wahntuhke—soi en soun kamwareko.5 E kawewehieng Sapwellime tohnpadahk ko oh mehlel ong kitail, E mahsani, “Ni ansou me emenemen rongehr mahsen en wehio, oh sohte wewehki, eri me suedo apw pahn pwarada, oh adiasang dahme podidier nan ah mohngiong.6 Mahsen wet ong pahpa nohno me sansal: mie wekpeseng en rong oh wewehki. Ma neitail serih kan kin rongete apw sohte wewehki duwen rongomwahu wet, eri e mweimweiengehr Sedan en adiasang nan arail mohngiong kan padahk mehlel en rongomwau wet.

Ahpw, ma kitail kak sewesei irail en kekeirda ni arail weliakapwalahr, pwe ni ansou me apwal pahn lel irail, ansou me mour wet pahn apwala, oh ihme pahn wiawi, rongomwau en Sises Krais kak kieng irial mehkot me pahn sohte kak kawe iraila. Ia mwomwen atail pahn kak tehk mwau pwe manaman en rongomwau wet en dehr te wia mehkot me re rong ah irail ahpw sohte wewehki de alehda?

Kitail koaros ese me kosoi kin wekwekdekla. Ekei pak kitail kin kosoia kosoi me kitail te kin wewehki oh irail kin rong oh kawehwe ehu soahng. Kumwail mweihn kak indahng noumwail seri tikitik kan, “Kumwail ngilen deiprekord me olahr.” Irail pahn kakete sapeng oh nda, “Pahpa, dahkot deiprekord?”

Samatail Nanleng kupwurki kitail en pweida pwehki ni mehlelo, irail wia Sapwellime seri kei mwohn arail wia neitail. Nan atail pwukoahn pahpa/nohno en Zion, kitail alehier kisakis en Ngehn Sarawi. Ni ansou me kitail kin peki kaweid sang Kauno, Ngehn Sarawi pahn kasalehieng kitail soahng koaros me kitail pahn wia7 pwehn kaskuhlihki noumwail seri kan. Ni amwail pahn kapwaiada wiepen kaskuhl pwukat, a manaman en Ngehn Sarawi pahn doadaohk nan mohngiong en seri kan.8

I sohte kak medewe ehu karasaras en sewese emen en ahniki marain me duwehte soi en Hellen Keller. Seri menet mas kun oh sohte kak rong wasa oh kin mih wasa ehu me rotorot oh meleilei. Sounpadahk men adaniki Ann Sullivan me kohdo oh sewese. Ia mwomwen amw pahn kaskuhli seri men me sohte kak kilang oh rong uhk?

Kilel
Helen Keller oh Anne Sullivan

Ansou reirei, Ann apwalki mwomwen ah pahn kin kosoieng Helen. Ehu rahno ni souwas, e ahpw wahla ih ni wasahn pwomwiada pihl. E kieng ehu pehn Helen o ni ewen pipe en pihl o oh tapiada pwomw pihlo pwe Ann en sipehlihda lepin kosoi P-I-H-Lpohn elep pehn Helen o. Sohte mehkot wiawi. Eri ih pil pwurehng wia. P-I-H-L. Helen eri padikpene pehn Ann o pwe e tepier wewehki. Mwohn e pahn ni soutikdiero, e esehla lepin kosoi 30 [silihsek]. Nan ereihn sounpwung kei, e esehla lepin kosoi 600 [wenepwiki] oh kakehr wadek pwuken kaskuhl en wadawad ong irail me mas kun oh sohte rong wasa. Helen Keller doula oh kanekehla skuhl laud oh alehdi nah dikrih oh sewese wekidala mour en irail kan me sohte kak kilang oh rong.9 E wia mwekid kepwuriamwei ehu, oh sang doadoahk en ah sounpadahk me elehda manaman kepwuriamwei wet ah pweida duwehte kumwail pahpa/nohno kan.

I pil kilang pweidahn doadoahk mwau en sounpadahk men ni ansou me ih wia presiden en me pwulopwul kan BYU-Idaho stake. Dahme I kilang o wekidala ai mour. Ansou kis ni soutik en Ni Are, I kapeidek pwutak pwulopwul men adaniki Pablo, sang Mexico City, me men iang wia doadoahk en kalohk. I idek reh duwen ah kadehde oh ah ineng en papah Kauno. Ah pasapeng kan ong ai peidek kan udahn mwau oh unsek. Ngei eri idek ma e warehng papah Kauno. Ah pasapeng me inen. Ni mehlel, udahn e mwau, ihte I mwur peikasalki me, “Mweihn e sohte wewehki dahme ih songosong idek reh.” Eri ni ei wekid ngoaren peidengko oh tehkada me ih ah wewehkier dahme ih songosong idek reh, e ahpw kosoi mehlel.

Udahn wen ei kapinga pwutak pwulopwul menet I peideklahng reh, “Pablo, ihs me kaweidkin uhk ken kak lelehng songen irair wet nan amw mour kenuhkida mehlel koaros mwohn Kauno?”

E sapeng, “ Ei papahu.”

Iapw ndahng, “Pablo, kosoiang ie duwen amw mour.”

Pablo apw doula oh kosoi: “Ni ansou me I sounpar duwau, ai papah indahng ie, ‘Pablo, I pil iangehr sounpar duwau. Iet soang kan me ke pahn pil lelehng. Ke pahn kin kilang aramas me pahn mesen pirap nan skuhl. Ke pahn mweihn kin mih seli limwahn aramas me kin pereniki peined. E pahn kin mie ansou kan me ke sohte pahn kin men kohla iang sarawi. Eri ansou wet, ma mepwukat pahn kin wiawi—de sohte lipilipil mehkot me pahn kin kedirepwei iuk—I mwauki ken kin kohdo kosoieng ie, oh I pahn sewesei iuk ken kak powehdi. Oh iapw pahn indawei dahme pahn uhd wiawi mwuhr.’”

“Eri, Pablo, dahme e indahwei ni ansou me ke sounpar 10 [eisek] o?”

“Ihmwo, e kehkehlingki ieng ie duwen kilel/kasdo suwed kan oh kosoi sued akan.”

I pil idek reh, “A ansou me ke sounpar 11[eisek ehu] o?”

“E kaparkin ie duwen soahng kan me pahn kahpwal en uhdisang oh kataman kin ie mwomwen ai pahn doadoahngki ai saledek en pilipil.”

Iet papah men, nan sounpar koaros, “kin kihda lepin kaweid kan, ekis met oh ekis mwo,”10 ih me sewese nah pwutak kaidente en rong apw en wewehkihla. En Pablo papahu ese me seri kin tepda skuhl ni ansou me re onopehngehr ren skuhl, kaidehn ansou me kitail onopadahr en kaskuhli irail. Udahn I kapaia Pablo ansou me se kadar nah kisin likou en pekpek en iang misin pwohngo ahpw ei kaping me inenen laud ong en Pablo papaho.

Ni ahi pwurala nihmweio, I pein peidek rei, “Songen pahpa dahmen me Pablo pahn wiahla?” Oh pasapeng pen ai peidek me inenen sansal mehlel: e pahn udahn duwehte ah papahu. Sises masanih, “Sapwellime Pwutako sohte kak wia mehkot, ihte ma e kilang en ah Papaho wiewia.11 Iei met mwomwen me Samatail Nanleng kapaiahki Sapwelime seri kan sang nan ehu ehu mweih ohng ehu.

Ni ahi wie medemedewe en ngehi oh Pablo koskosoipeneo, I sohte peren pwehki nei serepein pahmeno laudlahr oh neirail seri duwemen sohte kin kouson karanih ie. Ngei eri medewehla, “Ia mwomwen ei pahn kak sewese irail duwehte en Pablo papahu ah sewese naho? E sou pwandalahr?” Ansou me I wie kapakap nan ai mongiong, Ngehno pa mwengininginkihdo kosoi pwung mehlel wet: “E sohte mwadangala oh e saikinte pwandala pwe ken tapiada doadoahk kesemwpwal wet.” I pitipite ese ia wewehn kosoi pwot et. I solahr kak awi ien lela ni ihmweio. I indahng ai pwoudo Sharol en eker nait seri koaros oh indahng irail me se anahne tuwong irail; mie mehkot me inenen kesemwpwal ih pahn ndahng irail. . Irail pwuriamweikihla ahi ngilen karuaruo.

Se tepkihda nait serepein me keieu laud oh ah pwoud oh iahpw ndahng ira: “Ngei oh amwail nohno mwauki kumwa en ese me se pil daulihier sounpar me kumwa mihmi loalehn. Ni aht sounpar 31 [silihsek ehu] mie aht kisin peneinei tikitik. Se ese dahme kumwa pahn lelehng nan ansou me kokohdo kan. Kumwa pahn kak peikasalkihda amwa pwoson. Kumwa kak toutoukihla amwa momour en ansou wet. Met, se sohte men kediropwa amwa mour ansou koaros, apw se men kumwa en ese me ansou koaros se pahn utung kumwa. Isaniki atail mihmi peneh, I men ndahng kumwa duwen pwutak pwulopwul men ede Pablo me I tuwong mwohn ah pahn kohla wia ah misin.

Mwurin soi o, iapw ndahng ira, “Se sohte mwauki kumwa en manokehla padahkieng noumwa serih kan oh neihn naitail serih kan en wewehkihla kesemwpwal en padahk mehlel pwukat.”

Riei souleng ko, met I esehier duen kesemwpwal en kawewehkan me Koht kupwurki ien pwukoahki duwen ei wia pahpa men oh papah kahlap men ni ei pahn kawada oh idawehn kaweid me pahn sewese ai peneinei kaidente ren rong apw ren wewehkihla.

Ni ahi wie mahmahla, I kin kalap medmedewe lepin kosoi pwukat:

Ni ansouo, ni ansouo, pwuralahng mahs nan ansouo,

Oh mweidehng irail en pwuralahng ni arail tikitik ongete pwohng ehu!12

I ese me I sohte kak kapwurehdo ansou me nei seri kan tikitik, apw I esehier met—me e sohte mwadangala oh e saikinte pwandala ien kaweid, padahkiong, oh kahluwa neitail serih kan pwehki peneinei kesemwpwal oh potopot.

I kadehde me Samatail Koht Nanleng pakoahng kitail ni mehlel me E kadarkihdo Sapwellime Ieros en iang ieiaski mour en sampah pwe Sises en kak masanieng kitial me, “I iangehr kehn mwomwen amwail mour, I ese dahme pahn wiawi mwuhr, oh I pahn sewesei kumwail en powehdi.” I ese me E pahn ketin sewesei kitail. Ni mwaren Sises Krais, amen.

Ireh kan

  1. “I Am a Child of God,” Hymns, no. 301.

  2. Tehk Russell M. Nelson, “The Sabbath Is a Delight,” Liahona, Mei 2015, 131.

  3. Tehk 3 Nephi 17:21.

  4. 3 Nephi 17:23.

  5. Tehk Madiu 13:1–13.

  6. Madiu 13:19; lihpw tohrohr kapatpateng.

  7. 2 Nephi 32:5.

  8. 2 Nephi 33:1.

  9. Tehk“Anne Sullivan,” biography.com/people/anne-sullivan-9498826; “Helen Keller,” biography.com/people/helen-keller-9361967.

  10. Aiseia 28:10.

  11. Sohn 5:19.

  12. Alahlda sang Elizabeth Akers Allen’s poem “Rock Me to Sleep,” in William Cullen Bryant, ed., The Family Library of Poetry andSong (1870), 222–23.