Karona nai Vunau

Kemuni na Veitacini lomani, dua na ka taleitaki niu tiko rawa vata tale kei kemuni. Eda sa vakauqeti ena vosa eda sa rogoca. Au sa masulaka talega meu na tuberi ena vosa meu tauca.

Na noqu itukutuku vei kemuni edaidai sa na vakadodonu sara ga. Sa ikoya oqo: karona nai vunau.

Na ivunau ni Kalou e sega ni soli me vakadaroya se me tarova na noda na bulamarau. Na kena veibasai ga. O Koya, ni buli keda ka kilai keda vakavinaka e kila na ivakarau ni noda na mai bula me rawa ni da na rawata na bulamarau ena kena veta sara e cake. Sa vakarautaka tu o Koya na idusidusi, ni kevaka meda na vakamuria, ena kauti keda yani vakavinaka ena bula oqo. Eda nanuma na qaqa ni sere kilai levu o ya: “Karona nai vunau! Na bula vakacegu; bula dei.”¹

Lomani keda vinaka tu na Tamada Vakalomalagi me kaya kina: Mo kakua ni lasu; kakua ni butako; kakua ni ia na veibutakoci; lomana na kainomu me vaka ko sa lomani iko; kei na so tale.² Eda sa kila tu na ivunau. Kila tu o Koya ni da sa vakamuria na ivunau eda na bula marau kina, ena vakaibalebale ka sega soti na lomaocaoca. Ena rawarawa na iwali ni bolebole, vakakina na sotavi ni noda leqa ka da na ciqoma na nona veivakalougatataki sa yalataki tu. Ia, ni sa solia mai na lawa kei na ivunau, e solia talega na galala meda vakamuria se meda beca. Na noda vakatulewa ena ka vakaoqo ena vakatulewataka na vanua eda na laki cava kina.

Au sa vakadeitaka ni o keda kece eda sa vakatututaka ni da na sasagataka meda na laki bulavata kei na Tamada Vakalomalagi kei na Luvena o Jisu Karisito. Sa dodonu kina, vei keda kece sara, meda digidigi ena noda bula me na kauti keda yani kina. Eda kila ni o vuni ca ena sasagataka me vakadaroya na inaki o ya. O koya kei ira na nona mataivalu era sasaga sara tiko vagumatua mera vakadaroya na noda sasaga ni buladodonu. Era saga tiko mera vakadaroya na noda sasaga meda na laki bulatawamudu ena kena valuti na inaki eda sa tuva oti tu mai. Sa veivakasalataki kina o iApositolo Pita ka kaya, “Dou yalomatua, dou vakatawa, sa veilakoyaki voli na nomudou meca na tevoro me vaka na laioni sa tagi a sa vakasaqara e so me tiloma.”³

Dina ga ni sega tu na gauna eda na sega kina ni temaki. O kemuni na cauravou, o ni sa tiko ena itabayabaki ko ni na rawai kina vakarawarawa. Na yabaki ni itabagone sa dau yabaki tu ni lecaika, ka vakila ni vaka mo sega ni tudonu, ena nomu via veiriti kei ira na nomu icaba kei na sasaga mo wili vaka dua vei ira. Ko ni na temaki kina mo ni tosoya sobu na nomuni ivakatagedegede ka vakamuri ira na kena vo me rawa kina ni ko na vakadonui kina vei ira nomu itokani. Ni yalovinaka ka vakaukauwa, ni tuvakarau mo ni valuta na cava ga ena vakuwai iko mai na kalougata ni bulatawamudu. Na digidigi ko cakava eke nikua sa na ka bibi sara ena bula sa bera mai.

Eda wilika ena 1 Korinica: “E dina beka ni sa vuqa na domo sa duidui e vuravura.”⁴ Eda sa vakavolivoliti ena vosa e veirawai, vosa vakailasu, vosa ni veibeci, vosa vakaiukuuku, kei na vosa veivakasesei. Au na kuria ni o ira oqo era domo rogo levu sara. Au vakasalataki kemuni ka kaya mo ni tosoya sobu na kena rorogo ka mo ni na vakarorogo ga kina domo malumu ka lailai ka na tuberi kemuni yani kina veimaroroi. Nanuma tiko ni dua e tiko vua na dodonu sa kotora na ligana e ulumu ni ko a sa papitaiso oti ka vakadeitaki iko mo sa lewena na Lotu ka kaya, “Ciqoma na Yalo Tabu.”⁵ Dolava na yalomu, na lomamu sara ga kina rorogo ni domo ko ya ka na vakadinadinataka na dina. Me vaka na parofisai ni parofita o Aisea, “Dou na qai rogoca e dua na vosa … , ka vaka, oqo na sala, dou mai lako tu ga kina.”⁶ Meda sa na tikoga, meda rawa ni rogoca na vosa veivakacegui vaka o ya ni na maroroi keda.

Na kena sega ni muri na ivunau sa na dolava na gaunisala ni ka au na vakatoka me mate ca sara ni noda gauna. Era wili kina na mate ca sara ni vakadonui koya vakaikoya, na mate ca sara ni iyaloyalo vakasisila, na mate ca sara ni wainimate gaga ni veivakamatenitaki, na mate ca sara ni veimoceri vakaveitalia, kei na mate ca sara ni vakalutu gone meu tukuna ga e vica. Tukuna vei keda na ivolanikalou ni “vu ni ca sa vakavuna na ka ca kecega.”⁷ Eda kila ni o koya “na vu ni veika lasu kecega, a sa vakaisini ira na tamata ka vakamatabokotaki ira.”⁸

Au sa vakamasuti kemuni mo ni drotaka na veika ena kauta laivi na nomuni bulamarau ena bula oqo kei na bula sa bera mai. Na nona ilawaki kei na lasu na vu ni ca ena kauti iko sobu ena dua na baba sisisi kina nomuni vakarusai kevaka mo ni vakatarai koya kina. Kona rairai sa tiko beka oqo ena baba sisisi oqori ka ko sega tiko ni kidava ni sa sega ni rawa mo ni na tarova. Ko sa rogoca oti na itukutuku ni vu ni ca. E vakalecaleca nona kaci toka mai: Vakadua ga ena sega ni dua na ka; tamata kece e cakava tiko; kakua ena itovo makawa; na gauna sa veisau; ena sega ni vakamavoataka e dua; na nomu bula e nomu mo bulataka. Kilai keda tu na vu ni ca ka kila na ivadi ni veitemaki ka na dredre vei keda meda sabaya. Sa ka bibi meda sa na yadrava vinaka sara toka ga me rawa ni da na drotaka na rawai ena lasu kei na veitemaki vaka oqori.

Ena vinakati na yalo dei ni da sa vakadeitaki ena vakabauta ka dina ena gauna dredre ka veilecayaki ka sa vakavolivoliti keda tu e daidai ni sa veisautaka na dina, vorolaka na ka vinaka kei na veika rakorako, ka sasagataka me vakaisosomitaka na vuku ni tamata e vuravura. Kevaka me a vola na tamata na ivakaro, ka qai veisautaka ena lewa vakatamata ena vakatulewa vakalawa se dua tale na sala sa na lewa ga vakatamata. Na ivunau, e ka va-Kalou. Ni vakayagataki na noda galala ni digidigi ena rawa nida vakatikitikitaka. Ia, ena sega ni rawa, meda veisautaki ira, ni da na sega ni rawa ni veisautaka na kena revurevu ka na lako mai ena kena sega ni vakamuri ka vakacacana.

Meda na kidava ni noda marau levu ena bula oqo ena yaco mai ni da sa vakamuria na ivunau ni Kalou ka talairawarawa kina Nona lawa! Au taleitaka na vosa e kune ena Aisea wase 32, tikina e 17: “Ia, mai na cakacaka dodonu ena tubu na sautu ia na cakacaka dodonu ena vakatubura na vakacegu ka na tiko dei ka sega ni mudu.” Na vakacegu vakaoqori na veivakadeitaki ena rawa walega ena buladodonu.

Meda na kakua ni vakatara na vaqitora na ivalavala ca. Meda kakua ni vakatara meda vakabauta ni da rawa ni da vaqitora walega “vakalailai” ena sega ni vakamuri na ivunau ni Kalou, ni ivalavala ca ena rawa ni tauri keda ena ligana kaukamea ka sa na bau ka mosimosi sara ga kevaka meda saga me da vakabulai keda mai kina. Na veivakabobulataki ena yaco mai vata kei na waigaga ni veivakamatenitaki, yaqona ni vavalagi, iyaloyalo vakasisila, kei na veimoceri vakaveitalia sa ka dina sara ka sa na ka dredre toka meda vagalalataka ni sa bau ka mosimosi sara toka ga.

Kevaka me so vei kemuni sa bale ena nona ilakolako au vakadeitaka vei kemuni ni tiko na sala ni lesu. Na yacana na veivutuni. Dina ga ni sala dredre, na nomu bula tawamudu ena vakatau kina. Na cava tale ena gadreva na nomu sasaga? Au kerei kemuni mo ni sa tekivu sara ga oqo, ka tekivu taura na ikalawa kina veivutuni. Na kena totolo ga ni caka, na kena totolo ni nomu na sotava na vakacegu kei na vakanomodi ka tukuna tiko o Aisea.

Dua na gauna lekaleka sa oti au rogoca kina na ivakadinadina ni dua na yalewa, ka rau sa lutu laivi mai kei watina ena sala ni veimaroroi, voroki na ivunau kei na kena sa voleka sara ni vakarusa na nodrau matavuvale. Ni rau sa raica ruarua na kabukabua ni veika sa mai vesuka tu na nodrau bula ni sa sega na bulamarau, kei na nodrau sa vakamosia tu na yalodra na nodrau daulomani, e rau sa qai tekivu veisau. Na sala ni veivutuni e berabera ka so na gauna e mosimosi toka ia ena nodra veivuke na iliuliu ni matabete kei na veituberi mai na matavuvale kei ira na itokani yalodina erau sa qai suka lesu mai.

Meu wasea mada vei kemuni e dua na tiki ni nona ivakadinadina na yalewa o ya ena veivakacegui ni veivutuni: “E lesu vakacava mai e dua mai na itutu ni sipi lako sese ka vesuki ena [ivalavala ca] kina vakacegu kei na marau keirau sa vakila tu oqo? E yaco vakacava? Na kena isau … baleta ga e dua na kosipeli sa vinaka sara, dua na Luvena sa vinaka sara, kei na Nona vakacacabo baleti au … na vanua e a tu kina na butobuto, sa rarama mai oqo. Na vanua ni tu vakaca kei na mosi, sa tiko kina na vakanuinui kei na reki. Keirau sa vakalougatataki sara ga ena veisau ka na lako walega mai ena veivutuni ka na rawa ena Veisorovaki i Jisu Karisito.”

Ea mate na iVakabula me vakarautaki kina vei iko kei au na isolisoli o ya. Dina ga ni dredre na ilakolako o ya. Na yalayala sa ka dina sara. Kaya na Turaga vei ira sa veivutuni:

“Ke sa vaka na ka kulakula, na nomudou ivalavala ca sa na vulavula me vaka na uca vulavula.”⁹

“Koi au na Turaga au na [sega tale] ni nanuma.”¹⁰

Meda na tutuvaka na noda ivakadinadina me kaukauwa ena noda bula taucoko, ena wiliki ni ivolanikalou kei na masumasu kei na vakananumi titobu ni veika dina ni kosipeli i Jisu Karisito. Ni sa teivaki ka kadre, na noda ivakadinadina ni kosipeli, ni iVakabula, kei na Tamada Vakalomalagi ena tara na veika kece eda cakava.

Au vakadinadinataka ni o keda kece eda luvena na Tamada Vakalomalagi, ka da vakau mai ki vuravura ena gauna oqo ena dua na inaki, ka sa soli mai vei keda na matabete ni Kalou me rawa ni qaravi ira na tani, ka cakava na cakacaka ni Kalou ena vuravura oqo. Eda sa vakaroti meda bulataka na bula me na rawa kina vei keda me da buladodonu me na tiko ga kei keda na matabete.

Kemuni na veitacini, meda sa maroroya na ivakaro! Levu na veika vivinaka ka lagilagi sa waraki keda kevaka meda cakava vakakina. Me na noda na veivakalougataki o ya, sa noqu masu, ena yaca i Jisu Karisito, emeni.