Magtuman sang Mga Sugo

Pinalangga nga mga kautoran, daw ano ka maayo nga makaupod kamo liwat. Ginhatagan kita sang inspirasyon sining gab-i paagi sa mga pulong nga aton nabatian. Nagapangamuyo ako nga ako man magiyahan sa akon pagpamulong.

Ang mensahi ko sa inyo karon nga gab-i wala sang pagpalikoliko. Ini amo: magtuman sang mga sugo.

Ang mga sugo sang Dios wala ginhatag agud pabudlayan kita ukon mangin kasablagan sa aton kalipayan. Ang suli amo ang matuod. Siya nga nagtuga sa aton kag himpit nga nagapalangga sa aton nakabalo gid kon paano kita mangabuhi agud maangkon ang pinakadakung kalipay nga sarang naton maangkon. Siya naghatag sa aton sang mga sulundon nga, kon aton sundon, magaluwas sa aton agi sa sining masami matiplangon nga pagpanglakaton sa sining kabuhi. Madumdoman naton ang naandan nga himno: “Magtuman sa mga sugo! Sa sini may kaluwasan; sa sini may paghidaet.”¹

Ang aton Langitnon nga Amay nagapalangga sa aton sang nagakaigo nga Siya nagasiling: Indi ka magbinutig; indi ka mangawat; indi ka magpanginbabayi ukon magpanginlalaki; palanggaon mo ang imo kasilingan subong sa imo pagpalangga sa kaugalingon; kag dugang pa.² Nabal-an naton ang mga sugo. Nahangpan Niya nga kon kita magtuman sa mga sugo, ang aton mga kabuhi mas malipayon, mas may katumanan, kag mas mahapos. Ang aton mga pagtilaw kag mga problema mas mahapos dalhon, kag mabaton naton ang ginpromisa Niya nga mga bugay. Apang sa paghatag Niya sang mga Layi kag mga sugo, Siya nagatugot man sa aton nga magpili sa pagbaton ukon sa pagsikway sang mga ini. Ang aton desisyon parte sini ang magapat-od sang aton kapalaran.

May kumpiyansa ako nga ang kada isa sa aton nagahandom bilang pinakaulihing kalab-uton amo ang kabuhing walay katapusan sa atubang sang Langitnon nga Amay kag sang Iya Anak, si JesuCristo. Gani, kinahanglan gid nga kita maghimo sang mga pagpili sa bug-os naton nga kabuhi nga magapadulong sa aton sa sining dakung kalab-uton. Apang, nabal-an man naton nga ang kaaway determinado agud kita malugaw-an. Siya kag ang iya mga alagad wala nagapahuway sa ila mga pagtinguha nga paslawon ang aton matarong nga mga handom. Sila nagarepresentar bilang daku kag padayon nga katalagman sa aton kaluwasan sa walay katubtoban luwas lamang kon kita wala man sang pagpahuway sa aton determinasyon kag mga pagtinguha nga matuman ang aton kalab-uton. Ang Apostoles nga si Peter nagpaandam sa aton, “Mangin mabinantayon; bangud ang imo kaaway ang yawa, subong sa isa ka nagangurob nga leon, nagalibot-libot, kag nagapangita sang tulukbon.”³

Bisan nga wala sang tion sa aton kabuhi nga kita wala sa idalom sang pagsulay, kamo batan-on nga mga lalaki ara sa edad nga kamo pinasahing may kahuyangan. Ang mga tinuig sang pagka-tinedyer masami mga tuig sang di-pagkasigurado, sang balatyagon nga kamo may kakulangan, nagatinguha nga masapwan ang inyo lugar sa mga kaupod, kag nagatinguha nga mabaton. Sarang kamo sulayon nga ipakubos ang inyo mga talaksan kag magsunod sa kadamoan agud mabaton sang mga yadtong ginahandom ninyo nga mangin mga abyan. Palihog nga mangin mabakod, kag magbantay sa bisan ano man nga magkawat sang inyo mga bugay sa walay katubtoban. Ang mga pagpili ninyo diri kag karon nagapadayon nga importante.

Mabasa naton sa 1 Corinthians: “May ara … sang tuman kadamo nga sahi sang mga tingog sa kalibutan.”⁴ Ginapalibutan kita sang makagalanyat nga mga tingog, matiplangon nga mga tingog, mahikayon nga mga tingog, maalam nga mga tingog, kag nagasalangisag nga mga tingog. Kag sarang ko idugang nga ang mga ini matunog nga mga tingog. Ginalaygayan ko kamo nga pahinayon ang katunog kag sa luyo sini batyagon ang impluwensya sang matinong kag diutay nga tingog nga magagiya sa inyo sa kaluwasan. Dumdoma nga may isa ka tawo nga may awtoridad nga nagtangdo sang iya mga kamot sa inyo ulo pagkatapos sang inyo bunyag, nagkumpirma sa inyo bilang miyembro sang Simbahan kag nagsiling, “Batuna ang Balaan nga Espiritu.”⁵ Buksi ang inyo mga tagipusuon, bisan ang inyo mga kalag, sa pinasahing tingog nga nagasaksi sang kamatuoran. Subong sa ginpromisa sang propetang si Isaiah, “Ang imo mga dalunggan makabati sang isa ka pulong … , nga nagasiling, Amo ini ang banas, maglakat kamo sa sulod sini.”⁶ Kabay nga kita dalayon nga handa, agud mabatian naton ining nagapasulhay, nagagiya nga tingog nga magapabilin sa aton nga luwas.

Ang pagbaliwala sa mga sugo amo ang nagbukas sa alagyan para sa mga ginakabig ko nga mga pesti sang aton panahon. Ang mga ini nagalakip sang pagkawalay talaksan, pesti sang pornograpiya, pesti sang druga, pesti sang imoralidad, kag pesti sang pagpahulog, sa paghinambit sang pila. Ang mga kasulatan nagasiling sa aton nga ang kaaway amo “ang [manugpasad] sining tanan nga butang.”⁷ Nabal-an naton nga siya ang “amay sang tanan nga butig, agud magtiplang kag magbulag sa tawo.”⁸

Nagapangabay ako sa inyo nga maglikaw sa ano man nga magkuha sang inyo kalipay diri sa mortalidad kag sang inyo kabuhing walay katapusan sa kalibutan nga maabot. Paagi sa iya mga paniplang kag mga butig, ang kaaway magatuytoy sa inyo padulhog sa madanlog nga banglid padulong sa inyo kalaglagan kon tugotan ninyo siya nga maghimo sini. Basi kamo ara sa sinang madanlog nga dulhogon antes ninyo matalupangdan nga wala sang makapauntat sa inyo pagkahulog. Nabatian ninyo ang mga mensahi sang kaaway. Maalam siya nga nagapawag: Himoaa ini sang kaisa kag ini ok lang; ginahimo ini sang tanan; indi mangin dumaan kag wala nagasunod sa panahon; ang mga panahon nagbag-o; indi ini makahalit bisan kay sin-o; ang imo kabuhi imo. Kilala kita sang kaaway, kag nabal-an niya ang mga pagsulay nga mabudlay naton likawan. Daw ano ka importante nga kita padayon nga nagabantay agud malikawan nga mangin biktima sining mga butig kag mga pagsulay.

Dakung kaisog ang kinahanglan samtang nagapabilin kita nga himpit kag matuod sa tunga sang padayon-nagadugang nga mga pagpamilit kag malain nga mga impluwensya nga nagapalibot sa aton kag nagabaylo sang kamatuoran, nagaguba sang maayo kag desente, kag nagatinguha nga baylohan sang tawhanon nga mga pilosopiya sang kalibutan. Kon ang mga sugo ginsulat sang tawo, ang pagbaylo sa mga ini paagi sa huyog ukon layi mangin kinamatarong sang tawo. Apang, ang mga sugo ginhatag sang Dios. Sarang naton baliwalaon ang mga ini bangud sang aton pagpili. Apang indi naton sarang nga bag-ohon ang mga ini, subong nga indi naton sarang bag-ohon ang mga bunga nga nagaabot halin sa di-pagtuman kag paglapas sang mga ini.

Kabay nga mabal-an naton nga aton pinakadakung kalipay sa sining kabuhi magaabot samtang kita nagasunod sa mga sugo sang Dios kag sa Iya mga layi! Naluyagan ko gid ang mga pulong nga ara sa Isaiah chapter 32, verse 17: “Ang buhat sang pagkamatarong amo ang paghidaet; kag ang bunga sang pagkamatarong amo ang kalinong kag pagpasalig nga padayon.” Ang amo nga paghidaet, ang amo nga pagpasalig nagaabot lamang paagi sa pagkamatarong.

Indi naton sarang pagtugotan ang aton mga kaugalingon nga maghatag sang bisan diutay nga lugar sa pag-atubang sa sala. Indi naton sarang nga tugotan ang aton mga kaugalingon sa pagpati nga kita sarang magpartisipar sing “diutay lamang” sa paglapas sa mga sugo sang Dios, bangud ang sala sarang nga magbuklas sa aton nga may kamot nga salsalon kon sa diin tuman ka masakit ang maghilway sang aton mga kaugalingon. Ang mga adiksyon nga sarang mag-abot halin sa druga, alcohol, pornograpiya, kag imoralidad tunay kag halos imposible nga matapna nga wala sang dakung kabudlay kag sang madamo nga bulig.

Kon may ara sa inyo nga nadagpa sa sining pagpanglakaton, ginapasalig ko kamo nga may ara sang alagyan pabalik. Ang proseso ginatawag nga paghinulsol. Bisan nga ang banas mabudlay, ang inyo kaluwasan sa walay katubtoban nagasalig diri. Ano pa ang mas takos sa inyo mga pagtinguha? Ginapangabay ko kamo nga magpat-od diri kag karon nga magkuha sa mga tikang agud maghinulsol sang lubos. Sa mas madali ninyo nga paghimo, mas madali man ninyo maagihan ang paghidaet kag kalinong kag pagpasalig nga ginhambal ni Isaiah.

Wala pa gid lang madugay, nabatian ko ang pagpamatuod sang isa ka babayi nga, upod sa iya bana, nagtalang halin sa banas sang kaluwasan, naglapas sa mga sugo kag, sa kadugayan, halos nagguba sang ila pamilya. Sang ang kada isa sa ila sang ulihi nakamarasmas sa madamol nga aso sang adiksyon kag nakatalupangod kon daw ano ka nangin miserable sang ila mga kabuhi, kag kon paano nila ginpasakitan ang ila mga palangga, sila nagsugod sa pagbag-o. Ang proseso sang paghinulsol mahinay kag sa pila ka tion masakit, apang sa bulig sang mga lider sa priesthood, upod ang bulig sang pamilya kag mainunungon nga mga abyan, sila nakabalik.

Ipaambit ko ang bahin sang pagpamatuod sinang sister parte sa nagapaayo nga gahum sang paghinulsol: “Paano ang isa ka tawo nagabaylo halin sa isa ka nadula nga karnero kag ginbihag sang [sala], padulong sa paghidaet kag kalipay nga amon karon nabatyagan? Paano ina natabo? Ang sabat … amo bangud sang isa ka himpit nga ebanghelyo, isa ka himpit nga Anak kag sang Iya sakripisyo para sa akon. … Kon diin may kadulom sang una, karon may kasanag. Kon diin may kawalay paglaum kag kasakit sang una, karon may kasadya kag paglaum. Kami ginbugayan nga walay dulonan paagi sa pagbag-o nga nagahalin lamang sa paghinulsol nga ginhimo nga posible sang Pagpasag-uli ni JesuCristo.”

Ang aton Manluluwas napatay agud maghatag sa inyo kag sa akon sinang bulahan nga dulot. Wala sapayan sa kamtuoran nga ang banas mabudlay, ang promisa matuod. Siling sang Ginuo sa yadtong nagahinulsol:

“Bisan ang inyo mga sala mapula, ang mga ini mangin maputi kasubong sang niyebe.”⁹

“Kag ako malimot sa [mga ini].”¹⁰

Sa bug-os naton nga kabuhi kinahanglan naton ang magtukod sang mabakod nga mga pagpamatuod paagi sa pagtuon sang mga kasulatan kag paagi sa pagpangamuyo kag sa pagbinagbinag sang mga kamatuoran sang ebanghelyo ni JesuCristo. Kon malig-on nga natukod, ang aton mga pagpamatuod parte sa ebanghelyo sang Manluluwas, kag sang aton Langitnon nga Amay, ini magaimpluwensya sang aton tanan ginabuhat.

Nagasaksi ako nga kita tanan pinalangga nga mga anak sang aton Amay sa Langit, ginpadala sa kalibutan sini nga adlaw kag tion nga may katuyoan, kag ginhatagan sang priesthood sang Dios agud kita makaalagad sa iban kag magbuhat sa buluhaton sang Dios diri sa kalibutan. Ginmandoan kita nga mangabuhi sang aton mga kabuhi sa sahi nga kita magpabilin nga takos para sa sinang priesthood.

Mga kautoran, kabay nga tumanon naton ang mga sugo! Matahom kag mahimayaon ang mga padya nga nagahulat sa aton kon himuon naton ini. Kabay nga ini ang aton mangin bugay, ginapangamuyo ko sa ngalan ni JesuCristo, ang aton Manluluwas kag ang aton Manunubos, amen.