Coj Raws Li cov Lus Txib

Kuv cov kwv tij, kuv zoo siab rov qab koom nrog nej ib zaug dua ntxiv. Hmo no peb tau txais kev tshoov siab los ntawm tej lus uas peb tau mloog. Kuv thov kom tus Vaj Ntsuj Plig Dawb Huv yuav coj kuv hais thiab.

Kuv zaj lus hmo no rau nej, kuv hais ncaj qha. Kuv zaj lus yog li no: Cia li ua raws li cov lus txib.

Vajtswv tsis txib peb kom peb nyuaj siab los sis kom tab kaum peb txoj kev zoo siab. Yeej tsis yog li ntawd. Tus uas tsim peb thiab hlub peb paub zoo tias peb yuav tsum ua neej zoo li cas kom peb txais tau kev zoo siab loj tshaj plaws. Yog peb ua raws li tej kev cai uas Nws tau muab rau peb, ces tej kev cai ntawd yuav pab peb muaj kev nyab xeeb mus kom dhau lub neej no. Peb nco txog tej lus los ntawm zaj nkauj qhuas Vajtswv uas peb txhua tus paub: “Mloog Vajtswv txoj lus! Ua li ntawd thiaj thaj yeeb; li ntawd thiaj nyab xeeb.”¹

Peb Leej Txiv Saum Ntuj Ceeb Tsheej hlub peb heev Nws thiaj hais tias: Tsis txhob dag; tsis txhob ua tub sab; tsis txhob deev luag poj luag txiv; hlub nej tej kwv tij zej zog ib yam li nej hlub nej [tus kheej]; thiab li ntawd.² Peb paub tej lus txib ntawd. Nws to taub hais tias thaum peb ua raws li tej lus txib, peb lub neej yuav muaj kev zoo siab, kev vam meej, thiab yuav tsis muaj teeb meem ntau. Yuav yooj yim dua rau peb kov yeej peb tej teeb meem, thiab peb yuav tau txais Nws cov koob hmoov uas Nws cog lus rau peb. Tiam sis txawm Nws muab kev cai thiab tej lus txib rau peb, Nws cia peb xaiv seb peb puas ua raws li tej ntawd los sis xyeej tej ntawd. Tej yam uas peb xaiv ua li no yuav txiav txim seb peb lub neej tom ntej zoo li cas.

Kuv paub tias peb txhua tus muaj lub hom phiaj kom rov qab mus nrog peb Leej Txiv Saum Ntuj Ceeb Tsheej thiab Nws Leej Tub, Yexus Khetos nyob. Yog li ntawd, peb yuav tsum xaiv tej yam zoo tas peb lub neej kom pab peb ua raws li lub hom phiaj zoo no. Tiam sis peb paub hais tias, tus yeeb ncuab rau siab kom peb poob. Nws thiab nws cov tub rog yeej rau siab ntso tab kaum peb tej kev xav ua ncaj ncees. Lawv yog cov uas ua phem kom txwv tsis pub peb txais txoj siab nyob mus ib txhis tsuas yog peb kuj rau siab ntso siv zog ua raws li peb lub hom phiaj. Tus Thwj Tim Petus ceeb toom peb hais tias, “Nej yuav tsum ceev faj zov zoo tsis txhob nkees, rau qhov Dab Ntxwg Nyoog tus uas yog nej tus yeeb ncuab, nws mus mus los los ib yam li tus tsov ntxhuav uas quaj nrhiav tom tsiaj noj.”³

Txawm tsis muaj ib lub sij hawm nyob hauv peb lub neej thaum peb tsis raug kev ntxias, nej cov tub hluas muaj hnub nyoog uas yooj yim rau nej raug kev ntxias. Thaum lub sij hawm uas nej yog tub hluas, nej tsis tshua paub tseeb, nej xav tias nej zoo tsis txaus, nej xav ntaus phooj ywg zoo, thiab ua raws li lwm tus ua. Tej zaum nej yuav raug ntxias kom tso nej tej kev cai tseg thiab ua raws li neeg feem coob kom cov uas nej xav ua nej cov phooj ywg yuav lees txais nej. Thov cia li nyob khov kho, thiab ceev faj thaum muaj ib yam dab tsi uas yuav ua rau nej txais tsis tau cov koob hmoov uas nyob mus ib txhis. Tej yam uas nej xaiv tam sim no yeej tseem ceeb nyob tas mus li.

Peb nyeem hauv 1 Kauleethaus hais tias: “Txhua yam lus uas neeg ntiaj teb hais puav leej muab lub ntsiab.”⁴ Nyob ib puag ncig muaj tej lus yaum peb, tej lus ntxias, tej lus thuam, tej lus nyuaj heev, thiab tej lus uas tsis meej. Tej lus no yeej yog tej lus uas nrov heev. Kuv ntuas nej tso lub suab nrov kom yaus me ntsis thiab cia lub suab yau tshoov nej lub siab kom coj nej mus rau qhov chaw nyab xeeb. Cia li nco ntsoov tias ib tug uas muaj txoj cai tau tso tes saum nej lub taub haus tom qab nej ua kev cai raus dej, pom zoo rau nej ua ib tug mej zeej ntawm lub Koom Txoos thiab hais tias, “Cia li txais tus Vaj Ntsuj Plig Dawb Huv.”⁵ Qhib tag nrho nej lub siab, kom mloog tau lub suab tshwj xeeb uas ua tim khawv txog qhov tseeb. Raws li tus yaj saub Yaxayas cog lus, “Nej yuav hnov nws lub suab hu tuaj hais tias, Txoj kev tseeb yog txoj no. Cia li taug txoj no ntag.”⁶ Thov kom peb yuav mloog zoo, peb thiaj yuav hnov tau lub suab uas nplij peb lub siab thiab coj peb kom peb muaj kev nyab xeeb.

Kev tso tej lus txib tseg twb qhib kev rau tej yam uas kuv hu ua tej kab mob phem loj ntawm peb lub caij nyoog. Ob peb kab mob phem no yog tej yam xws li kev tso cai rau txhua yam, kev saib duab liab qab, kev haus tshuaj phem, kev coj tsis dawb huv, thiab kev rho me nyuam. Cov vaj lug kub qhia peb hais tias tus yeeb ncuab yog “[lub hauv paus] ntawm tej no huv tib si.”⁷ Peb paub hais tias nws yog “leej txiv ntawm tag nrho cov lus dag, kom ntxias thiab ua rau tib neeg dig muag.”⁸

Kuv thov kom nej tsis txhob ua ib yam dab tsi uas yuav ua rau nej txais tsis tau kev zoo siab nyob hauv lub neej no thiab kev nyob mus ib txhis hauv lub neej tom ntej. Dhau ntawm nws tej kev haub kev ntxias, tus yeeb ncuab yuav coj nej poob mus kom nej raug kev puas tsuaj yog nej cia nws ua li ntawd. Nyaj nej yuav pib poob ua ntej nej paub tias tsis muaj kev tsum tau. Nej twb tau hnov tus yeeb ncuab tej lus ntxias. Nws cia li hais tias: Ua ib zaug xwb tsis ua li cas; txhua tus ua li ntawd; tsis txhob ua li neeg laus; lub caij no twb hloov lawm; yuav tsis ua rau leej twg mob; yog nej lub neej. Tus yeeb ncuab paub peb, thiab nws paub tej kev ntxias twg yuav nyuaj rau peb tso tseg. Peb yuav tsum ceev faj txhua lub sij hawm kom tsis txhob raug kev dag thiab kev ntxias.

Peb yuav tsum ua siab loj rau siab ntseeg thiab ua qhov yog thaum muaj tib neeg xav yuam peb thiab ntxias peb nyob ib puag ncig uas xav ntxeev qhov tseeb, rhuav tej yam uas zoo thiab tsim nyog, thiab muab txoj moo zoo pauv rau neeg ntiaj teb tej lub tswv yim. Yog tias tib neeg tau sau cov lus txib, ces tib neeg yeej yuav muaj cai hloov cov lus txib ntawd nyob ntawm seb lawv xav hloov los yog siv kev cai lij choj los sis lwm txoj kev. Tiam sis Vajtswv yog tus uas muab cov lus txib rau peb. Peb muaj kev ywj siab xaiv tso cov lus txib tseg. Txawm li ntawd los, peb hloov tsis tau cov lus txib, ib yam li peb hloov tsis tau tej yam uas peb yuav raug yog peb tsis mloog lus thiab tsis ua raws li cov lus txib ntawd.

Thov kom peb yuav paub tias peb txoj kev zoo siab nyob hauv lub neej no los muaj thaum peb ua raws li Vajtswv cov lus txib thiab thaum peb ua raws li Nws tej kev cai! Kuv nyiam cov lus nyob hauv Yaxayas tshooj 32, nqe 17 : “Thaum ntawd txhua tus yuav ua ncaj ua ncees, yuav muaj kev thaj yeeb thiab nyob kaj siab lug mus ib txhis” Yuav muaj kev thaj yeeb thiab nyob kaj siab lug tsuas thaum peb ua ncaj ncees xwb.

Tsis tsim nyog uas peb zam txim rau peb tus kheej kom cia peb ua txhaum me ntsis xwb. Peb yuav tsum tsis txhob ntseeg tias peb muaj cai tsis ua raws li Vajtswv cov lus txib “me ntsis xwb,” vim kev txhaum yeej zoo li ib txhais tes uas tuav nkaus peb khov kho uas nyuaj rau peb dim tau. Tej kev muaj yees yeej los ntawm kev haus tshuaj phem, kev haus cawv, kev saib duab liab qab, thiab kev coj tsis dawb huv thiab yuav tsum siv zog ntau thiab txais kev pab ntau kom txiav tau tej ntawd.

Yog nej leej twg ua yuam kev, kuv qhia rau nej tias muaj ib txoj kev rov qab los. Kev txheej txheem no hu ua kev hloov siab lees txim. Txawm txoj kev hloov siab lees txim yog ib txoj kev nyuaj, nej txoj kev cawm seej nyob mus ib txhis nyob ntawm seb nej puas ua. Puas muaj dab tsi ntxiv uas tsim nyog nej ua? Kuv thov kom nej txiav txim siab tam sim no hais tias nej yuav ua txhua yam nej yuav tsum ua kom hloov siab lees txim tag nrho. Yim sai nej yim yuav muaj kev kaj siab lug thiab kev thaj yeeb zoo li Yaxayas hais.

Tsis ntev tas los kuv hnov ib tug poj niam ua tim khawv. Nws thiab nws tus txiv tau ncaim txoj kev nyab xeeb, vim nkawd tau ua txhaum tej lus txib thiab ua rau nkawd tsev neeg yuav luag puas tsuaj tas. Thaum nkawd pom dhau cov huab iab oo ntawm nkawd txoj kev muaj yees, nkawd pom tias nkawd tsis zoo siab hlo li, thiab pom qhov uas nkawd ua rau cov uas nkawd hlub lub siab mob, ces nkawd pib hloov. Tus txheej txheem hloov siab lees txim twb maj mam mus thiab, tej lub sij hawm, yog ib qho nyuaj, tiam sis dhau los ntawm cov thawj coj pov thawj hwj txoj kev pab, thiab nkawd tsev neeg thiab cov phooj ywg txoj kev pab, nkawd tau rov qab los.

Kuv xav qhia ib feem los ntawm tus muam zaj lus tim khawv txog lub hwj chim kho kev txhaum ntawm kev hloov siab lees txim: “Yuav ua li cas kom ib tug uas yog tus yaj uas poob zoov lawm thiab mag [kev txhaum] hloov kom muaj kev kaj siab lug thiab kev zoo siab uas wb muaj tam sim no? Vim li cas ho muaj tau li no? Lo lus teb … yog vim muaj txoj moo zoo uas zoo tag nrho, ib Leej Tub uas zoo tag nrho thiab Nws txoj kev theej kuv lub txhoj. … Qhov uas muaj kev tsaus ntuj nti dhau los, muaj qhov kaj lawm. Qhov uas muaj kev nyuaj siab thiab kev mob, muaj kev xyiv fab thiab kev cia siab lawm. Peb tau txais koob hmoov ntau kawg dhau los ntawm kev hloov siab lees txim uas yus ua tsis tau tsuas yog muaj Yexus Khetos txoj Kev Theej Txhoj.”

Peb tus Cawm Seej tuag kom nej thiab kuv txais tau lub txiaj ntsim zoo no. Txawm taug txoj kev nyuaj heev los, cov lus cog tseg yeej muaj tseeb. Tus Tswv hais rau cov uas hloov siab lees txim hais tias:

“Txawm yog nej tej kev txhaum yuav liab cuag ntshav los kuv yuav ua kom dawb paug li daus.”⁹

”Thiab kuv yuav tsis nco ntsoov txog tej ntawd ntxiv lawm.”¹⁰

Nyob hauv peb lub neej peb yuav tsum txhawb nqa peb zaj lus tim khawv thaum peb kawm vaj lug kub thiab thov Vajtswv thiab xav txog kev tseeb ntawm Yexus Khetos txoj moo zoo. Thaum peb zaj lus tim khawv txog txoj moo zoo, tus Cawm Seej, thiab Leej Txiv Saum Ntuj Ceeb Tsheej ruaj khov kho, ces peb zaj lus tim khawv yuav pab peb thaum peb ua txhua yam.

Kuv ua tim khawv hais tias peb txhua tus yog peb Leej Txiv Saum Ntuj Ceeb Tsheej cov tub uas Nws hlub, uas Nws txib los rau hauv lub ntiaj teb nyob hauv lub caij nyoog no kom ua raws li Nws lub hom phiej, thiab muab lub pov thawj hwj rau peb kom peb yuav pab lwm tus thiab ua Vajtswv txoj hauj lwm nyob hauv lub ntiaj teb no. Nws txib peb kom peb ua neej tsim nyog tuav lub pov thawj hwj ntawd.

Kuv cov kwv tij, thov kom peb yuav ua raws li cov lus txib! Peb yuav tau koob hmoov zoo kawg nkaus yog peb yuav ua li ntawd. Thov kom peb txhua tus yuav tau koob hmoov li no, kuv thov los ntawm Yexus Khetos lub npe, peb tus Cawm Seej thiab peb tus Txhiv Dim, amees.