2010–2019
Kōjparok Kien ko
Oktoba 2015


Kōjparok Kien ko

E eo ekar kōm̧anm̧an kōj im E eo elukkuun jeļā ekōjkan ad aikuj in mouri mour ko ad bwe jen maron̄ in bōk m̧ōņōņō eļap.

Em̧m̧aan ro aō rejitōn bōro, elukkuun em̧m̧an bwe imaron̄ bar pād ippāmi. Jaar maron̄ bōk im̧we jotenin jān naan ko jekar ron̄jaki. Ij jar bwe in barāinwōt im̧we kōn tōl jān ta ko ij ba.

Ennaan eo aō n̄an kom̧ jotenin ealikkar. En̄in ej: kōjparoki kien ko.

Kien ko an Anij rekar jab itok n̄an aer rupe būruwōd ak n̄an aer erom mennin bōbrae ko n̄an m̧ōņōņō eo ad. Oktak eo em̧ool. Anij eo ekar kōm̧anm̧an kōj im E eo ewāppen an iakwe kōj ejeļā ekōjkan ad aikuj in mouri mour ko ad bwe jen maron̄ bōk m̧ōņōņō eo eļap. E ekar letok n̄an kōj unin tōl ko, ko bwe eļan̄n̄e jej ļoori, jenaaj lo kōjparok jān iaļ in ito itak in ekauwōtata ilo mour in. Jej keememej naan ko ilo al in jejeļā: “Keep the commandments! Ilo menin ewōr lo̧mo̧o̧r; ilo menin ewōr aenōm̧m̧an.”1

Jemedwōj Ilan̄ eļap An iakwe kōj n̄an ba: Kwōn jab kōnnaan naan in riab; kwōn jab ko̧o̧t; kwon jab aņokņak lio pāleen ri turum̧; kwōn iakwe ri turum̧ im āinwōt kwe; im āindein m̧aanļo̧k wōt.2 Jejeļā kien ko. E emeļeļe bwe n̄e jej kōjparok kien ko, mour ko ad renaaj m̧ōņōņō ļo̧k, ļapļo̧k aer eddōkļo̧k, im dikļo̧k aer poktak. Apan̄ ko ad im inepata ko renaaj pidodo ļo̧k ad ņamejļāer, im jenaaj bōk kōjeraam̧m̧an ko An kar kallim̧ur kaki. Ak ilo iien in Ej letok n̄an kōj kakien ko im kien ko, E ej barāinwōt kōtļo̧k ad kālet men̄e jej būki ak n̄e jej m̧akoko in būki. Kālet ko ad ilo wāween in enaaj ņamejļan mejān kajjik eo ad.

Ewōr aō leke bwe kōj wōj kajjojo ewōr ippād kōttōbar in eļap mour indeeo im̧aan mejān Jemedwōj Ilan̄ im Nejin, Jisōs Kraist. Elukkuun aorōk, kōn menin, n̄an ad kōm̧m̧ani kālet ko ilo aolepān mour ko ad bwe kālet kein ren tōlļo̧k kōj n̄an kōttōbar in. Jejeļā, ijoke, rikapo eo ej kallim̧ur bwen kalikjab kōj. E im wōj eo an rej jab bōjrak ilo kijejeto ko aer n̄an aer kakkure kōņaan ko ad n̄an wāppen. Rej jerbal n̄an lukkuun kakkure lo̧mo̧o̧r eo ad indeeo im rejjab bōjrak m̧ae iien jej barāinwōt jab bōjrak ilo jibadbad im kijejeto eo ad n̄an tōpar kōttōbar in ad. Rijilōk Piter ej kakkōļ kōj, “Kom̧win ekil; Rikōjdate kom̧, tepil eo, āinwōt ļaiōn e rorror, ej etetal wōt im pukot eo ej maron̄ in kan̄i.”3

Mekarta ejjeļo̧k juon iien ilo mour ko ad im jejjab maron̄ jab jelm̧ae kapo, kom̧ likao ro rej pād ilo juon iiō me epidodo jodiki kom̧. Iiō ko an jodikdik rej iiō ko ejjeļo̧k lōke er make, jān en̄jake ko kom̧ ban keidi n̄an kom̧, ilo ami kajjieon̄ pukōt jikim ippān ro jon̄aer wōt kom̧, im ilo ami kajjieon̄ karōkļo̧k ami. Kom̧ maron̄ ioon kapo ko bwe kom̧win lelaļtak jon̄ak ko ami im n̄an ļoor jarlepju eo eļap bwe ren bōk kom̧ im erom ro jerāer. Jouj, kom̧win kajoor, im kom̧win pepojakjak n̄an jabdewōt men eo enaaj bōkļo̧k kom̧ jān kōjeraam̧m̧an ko indeeo. Kālet ko kom̧ij kōm̧m̧ane ijin im kiiō rej aorōk n̄an indeeo.

Jej riit ilo 1 Korint: “Elōn̄ … wōt wāween ainikien ilo laļ.”4 Jej jepooļ kōn ainikien akweļap ko, ainikien kōkkaal ko, ainikien kajjirere ko, ainikien kabwebwe ko, im ainikien ko rej pukwōj. Imaron̄ kobaik naan kein ainikien ko reļļaaj. Ij rōjan̄ kom̧ bwe kom̧win kadikļo̧k ainikien eo eļļaaj im bwe kom̧win bōk kareel jān ainikien eo emera, im edik eo enaaj tōlļo̧k kom̧ n̄an kōjparok. Keememej bwe juon eo ewōr maron̄ ippān ekar likūt pein ioon bōram̧ ālkin am̧ kar peptaij, kapen eok āinwōt juon membōr an Kabun̄ in im ba, “Bōk Jetōb Kwojarjar.”5 Kōppeļļo̧k būruōm̧i, aaet aolepān ami, n̄an ainikien eo ejenolo̧k eo ej kam̧ool kōn m̧ool eo. Āinwōt an rikanaan Aiseia kar kallim̧ur, “Lo̧jiln̄ūm̧ renaaj ron̄jake juon naan … , ej ba, En̄in iaļ eo, kom̧win etetal ilowaan.”6 Kōm̧m̧an bwe jen kile, bwe jen maron̄ ron̄ ainikien kaenōm̧m̧an in, ej tōl im naaj letok lo̧mo̧o̧r.

Jab kautiej kien ko ej kōppeļļo̧k iaļ eo an ta eo ij kile bwe ej raan in en̄taan ko ad. Men kein rekoba en̄taan kōn anemkwoj in kālet, en̄taan kōn pija ko renana, en̄taan kōn uno ko rekajoor, en̄taan kōn m̧wil ko renana, im en̄taan kōn m̧an lo̧je, imaron̄ kwaļo̧k wōt jet. Jeje ko rekwojarjar rej jiron̄ kōj bwe rikapo eo ej “[ri jinno̧] an men kein.”7 Jej jeļā bwe e ej “jemān aolep riab otemjeļo̧k, n̄an m̧oņ im n̄an kapiloik armej raņ.”8

Ij akweļap ippāmi bwe kom̧win jab kepaak jabdewōt men eo enaaj bōkļo̧k kom̧ jān m̧ōņōņō eo ami ijin ilo mour in im mour indeeo ilo laļ eo ej itok. Jān m̧oņ ko an im riab ko, rikapo eo enaaj tōlļo̧k kom̧ laļļo̧k n̄an wāween ko renaaj pen im penļo̧k eļan̄n̄e kom̧ naaj kōtļo̧k an kōm̧m̧ane wāween in. Kom̧ naaj pād ilo wāween ko renaaj pen im penļo̧k m̧okta jān am kile bwe ejjeļo̧k iaļ n̄an ami dieojļo̧k jāni. Kom̧ kar ron̄ ennaan eo an rikapo eo. Ejeļā kilen tilpilo: Baj menin ejjab aorōk; aolep rej kōm̧m̧ane; kom̧win jab m̧antin etto; tōre kein roktak; eban kōmetak jabdewōt; mour eo ami ej ami n̄an mour. Rikapo eo ejeļā wōn kōj, im ejeļā kapo ko, ko renaaj pen ad kōwaani. Ekōjkan bwe jen jojokōjparok wōt bwe jen kōwaane ad kaanjoik kain riab kein im kapo kein.

Peran enaaj menin aikuj eo ilo ad tiljek wōt im m̧ool ilubwilijin kareel ko rekajoor im m̧oņ ko, ko rej jepooļe kōj im ko rej ukōt m̧ool eo, rupe ro rem̧m̧an im jouj, im kajjieon̄ bōk jikin kōn katak ko kōm̧m̧an in armej ro jān laļ. Eļan̄n̄e kien ko rekar jeje jān armej, innām bwe n̄an ukōti jān en̄jake ak kakien ak jān jabdewōt men eo enaaj jeraam̧m̧an armej jāne. Kien ko, ijoke, rekar itok jān Anij. Kōjerbal anemkwoj eo ad, jemaron̄ in kōwaani. Jej jab maron̄, ijoke, ukōti āinwōt ad jab maron̄ ukōt waļo̧k ko rej itok jān jab pokake im rupi.

Kōm̧m̧an bwe jen kile bwe m̧ōņōņō eo ad eļaptata ilo mour in enaaj itok ilo ad ļoor kien ko an Anij im pokake kakien ko An! Ij iakwe naan kein ilo Aiseia jebta 32:, eoon 17: “Im jerbal in wānōk enaaj aenōm̧m̧an; im tōprak in wānōk, tōt im lōke n̄an indeeo.” Āinwōt aenōm̧m̧an, āinwōt tōprak renaaj itok wōt jān wānōk.

Jejjab maron̄ kōtlo̧k ad make kanemkwoj kōj ilo ad pedped kōn jerawiwi. Jejjab maron̄ kōtlo̧k kōj make n̄an tōmak bwe jemaron̄ bōk “jidik” koņaad ilo jab pokake kien ko an Anij, bwe jerawiwi emaron̄ peek kōj kōn men eo elukkuun in kōmetak n̄an ad kanemkwoj kōj jāne. An̄ūrlep ko rej itok ippān uno ko rekajoor, arko̧o̧ļ, pija ko renana, im m̧wil ko renana rejjab men bajjōk im ebwe an pen rōļo̧k jāni eļan̄n̄e ejjab jān ad lukkuun kate kōj im eļap jipan̄ jān ro jet.

Eļan̄n̄e elōn̄ iami emōj an kaanjoiktok jerawiwi ilo mour eo an, ij kallim̧uri kom̧ bwe ewōr juon iaļ n̄an ro̧o̧ltok. Wāween ro̧o̧ltok in jej ņaetan ukweļo̧k. Men̄e iaļ in epen, lo̧mo̧o̧r eo ami n̄an indeeo ej pedped wōt ioon. Ta eo emaron̄ in aorōkļo̧k jān ami kijejeto? Ij akweļap ippami bwe kom̧win jeke ippemi ijin im kiiō n̄an ami bōk bun̄tōn ko remenin aikuj n̄an lukkuun ukweļo̧k. An mōkaj ami kōm̧m̧an āindein, enaaj mōkaj ami maron̄ en̄jake aenōm̧m̧an im tōprak in Aiseia ej kōnono kake.

Ikar ron̄jake juon naan in kam̧ool an juon kōrā juon iien jem̧aanļo̧k, ippān ļeo pāleen, rekar jōbwābwe jān iaļ in lo̧mo̧o̧r in, rupi kien ko im, ilo wāween in, nan̄in kar kakkure baam̧le eo aer. Ke kajjojo iaer rekar loe jān an̄ūrlep eļap im kar kile an mour ko aer jab m̧ōņōņō, barāinwōt jon̄an aer kōmetak ro rejitōn bōro ippāer, rekar jino oktak. Jerbal in ukwelo̧k emaron̄ en̄jake an rum̧wij im ekar, ilo iien ko, metak, ak kōn jipan̄ an ritōl ro an priesthood, ippān ļo̧k jipan̄ jān baam̧le im jān ro m̧ōttāer rejouj, rekar bar ro̧o̧ltok.

Ij kwaļo̧k ippami jim̧ettan in wōt naan in kam̧ool in an sister in kōn kajoor in kōmour eo an ukweļo̧k: “Ekōjkan an juon armej maron̄ em̧m̧akūt jān an kar juon sip ejōbwābwe im eddāp kōn [jerawiwi], n̄an aenōm̧m̧an im m̧ōņōņō in jej en̄jake kiiō? Elmen an menin kar waļo̧k? Uwaak eo … ej kōnke gospel eo ewāppen, Nejin ewāppen im en̄taan eo An n̄an n̄a. … Ijo ekar wōr marok ie, ej ijo kiiō elōn̄ meram ie. Ijo im ekar ejjeļo̧k kōjatdikdik ie im metak wōt, ej ijo ewōr lan̄lōn̄ im kōjatdikdik ie. Emōj ad lukkuun jeraam̧m̧an jān oktak in me emaron̄ wōt itok jān ukweļo̧k eo maron̄ kōm̧m̧an jān Pinmuur eo an Jisōs Kraist.”

Ad Rilo̧mo̧o̧r ekar mej n̄an lewaj im letok menin letok in. Mekarta ilo m̧ool bwe iaļ in epen, kallim̧ur eo an em̧ool. Rilo̧mo̧o̧r eo ekar ba n̄an ro rekar ukweļo̧k:

“Men̄e jerawiwi ko rej āinwōt būrōrō, renaaj mouj āinwōt sno.”9

“Im I ban bar keememej jero̧wiwi ko aer.”10

Ilo aolepān mour eo ad, jenaaj aikuj in naajdiki naan in kam̧ool ko rekajoor jān ekkatak jeje ko rekwojarjar im jān jar im jān kejōkļo̧kjeņ kōn m̧ool ko an gospel eo an Jisōs Kraist. Eļan̄n̄e rekar dim katōki, naan in kam̧ool ko ad kōn gospel eo, kōn Rilo̧mo̧o̧r eo, im kōn Jemedwōj Ilan̄ renaaj kōkajoorļo̧k men otemjej jej kōm̧m̧ani.

Ij kam̧ool bwe kōj aolep rej ļaddik ro rejitōn bōro nejin Jemedwōj Ilan̄, kar jilkintok er n̄an laļ in rainin im tōre in kōn juon jibadbad, im kar leļo̧k priesthood eo an Anij n̄an er bwe ren maron̄ jerbal n̄an ro jet im kōm̧m̧ane jerbal eo an Anij ioon laļ in. Kar kakien kōj n̄an mour mour ko ad bwe jen erreo wōt n̄an priesthood in.

Em̧m̧aan ro rejitōn bōro, kōm̧m̧an bwe jen kōjparok kien ko! Men ko rem̧m̧an im aiboojoj emōj kakkoņi n̄an kōj eļan̄n̄e jej kōjparoki. Kōm̧m̧an bwe en ad kōjeraam̧m̧an, ij jar ilo etan Jisōs Kraist, ad Rilo̧mo̧o̧r im Ripinmuur, amen.