2010–2019
Warda e Mandamentunan
2015


Warda e Mandamentunan

Esun ku a krea i ku ta stima nos sa perfektamente kon presis nos tin ku biba nos bida pa asina optené e felisidat di mas grandi posibel.

Mi rumannan stimá, esta bon pa ta ku bosonan atrobe. Nos a wòrdu inspirá e anochi aki pa e palabranan ku nos a tende. Mi ta roga ku mi tambe por wòrdu guia den loke mi ta bisa.

Mi mensahe na boso awe nochi ta direkto. Ta esaki: warda e mandamentunan.

Dios Su mandamentunan no ta wòrdu duná pa frustra nos òf pa bira opstákulonan pa nos felisidat. Ta hustamente e kontrali ta bèrdat. Esun ku a kreá nos i ku ta stima nos sa perfektamente kon nos tin ku biba pa nos por optené e felisidat di mas grandi posibel. El a duna nos presepto ku, si nos sigui nan, lo hiba nos sigur dor di e biahe mortal traishonero. Nos ta kòrda e palabranan di un himno familiar:”tradusí for di Ingles: “Warda e mandamentunan! Den esaki tin siguridat; den esaki tin pas.”1

Nos Tata Selestial ta stima nos sufisiente pa bisa: Lo bo no gaña; lo bo no hòrta; lo bo no kometé adulterio; lo bo stima bo semehante meskos ku bo mes; i sigui asina.2 Nos konosé e mandamentunan. E ta komprondé ku ora nos warda e mandamentunan, nos bida lo ta mas felis, mas yen, i ménos kompliká. Nos desafionan i problemanan lo ta mas fásil pa karga, i nos lo risibí Su bendishonnan prometé. Pero miéntras E ta duna nos Su leinan i mandamentunan, E ta permití nos skohe si nos ke aseptá nan òf rechasá nan. Nos desishonnan den e kaso aki lo determiná nos destino.

Mi tin sigur ku kada un di nos tin komo e meta final bida sempiterno den presensha di nos Tata Selestial i Su Yu, JesuCristu. Ta imperativo, p’esei, pa nos por tuma desishon durante henter nos bida ku ta kondusí na e meta grandi aki. Nos sa, sinembargo, ku e atversario ta komprometé pa laga nos faya. E i su ehérsito ta firme den nan esfuerso pa frustra nos deseo hustu. Nan ta representá un peliger grave i konstante pa nos salbashon eterno, a ménos ku nos tambe ta firme den nos determinashon i esfuerso pa logra nos meta. E Apòstel Pedro a atvertí nos, ”Ta atento; pasó bo atversario e diabel, manera un leon ku ta gruña, ta kana rònt wak ken e por devorá.”3

Maske ku no tin tempu den nos bida ku nos ta eksonerá di tentashon, boso hóbennan ta den un edat ku bo por ta partikularmente vulnerabel. Edat di teenager ta hopi biaha añanan di insiguridat, di sentimentunan ku bo no ta yega bo espektativa, òf trata di haña bo lugá ku esnan meskos ku bo, i trata di pertenesé. Bo por ta tentá pa baha bo normanan i pa sigui e grupo pa asina wòrdu aseptá pa esnan ku bo ta deseá pa ta bo amigunan. Por fabor sea firme, i atento pa tur kos ku por hòrta bo bendishonnan di eternidat. E eskohonan ku bo hasi akinan i awor lo ta semper importante.

Nos ta lesa den 1 Korintionan: “tin asina...tantu sorto di bosnan den e mundu.”4 Nos ta rondoná pa bosnan ku ta persuadí, bosnan ku ta gaña i bosnan ku ta konfundí. Mi por agregá ku esakinan ta bosnan duru. Mi ta amonestá bosonan pa baha e volúmen i na lugá [di esaki] pa wòrdu influenshá pa e bos suave i apasibel ku lo guia bo na seguridat. Kòrda ku un ku outoridat a pone su mannan riba boso kabes despues ku boso a boutisá, konfirmando boso un miembro di e Iglesia i bisando,: Risibí e Spiritu Santu .”5 Habri boso kurason, asta boso alma mes, pa e sonido di e bos speshal ei ku ta testifiká di bèrdat. Manera e profeta Isaias a prometé, ” Boso orea lo tende un palabra … , bisando Esaki ta e kaminda, boso kana den dje.”6 Ku nos por ta sintonisá, pa nos por tende e bos aki ku ta konsolá i guia i ku lo tene boso sigur.

Indiferensha pa e mandamentunan a habri e kaminda pa loke ami ta konsiderá di ta e plaganan di nos dia. Nan ta inkluí e plaga di ke komplasé, e plaga di pornografia, e plaga di droga, e plaga di inmoralidat, i e plaga di aborto, pa menshoná djis un par. E skrituranan ta bisa nos ku e atversario ta “ e fundador di tur e kosnan aki.”7 Boso sa ku e ta e “tata di tur mentira, pa engañá i hasi hende siegu.”8

Mi ta roga na boso pa evitá tur kos ku por priva boso di boso felisidat aki den mortalidat i bida eterno den e mundu benidero. Ku su engaño i mentira, e atversario lo hiba boso abou na un inklinashon ku ta slep pa boso destrukshon si boso pèrmitié pa hasi esaki. Probablemente boso lo ta riba e inklinashon ku ta slep promé ku boso asta realisá ku no tin manera pa stòp. Boso a tende e mensahenan di e atversario. Astutamente e ta yama: Djis e biaha aki no ta importá; tur hende ta hasié; no sea antikuá; tempu a kambia; e no ta hasi daño na niun hende; bo bida ta di bo pa bo biba. E atversario konosé nos, i e sa e tentashonnan ku lo ta difísil pa nos ignorá. Esta vital ta pa nos ehersé vigilansha konstante pa asina evitá pa sede pa mentiranan i tentashonnan asina.

Hopi kurashi lo ta rekerí segun nos keda fiel i firme entre e preshonnan kresiente i influenshanan peligroso ku ta rondoná nos ku ta trose e bèrdat, kibra loke ta bon i e loke ta desente, i intento pa supstituí esaki ku filosofia trahá dor di hende di e mundu. Si e mandamentunan a wòrdu skirbi pa hende, e ora ei pa kambia nan dor di inklinashon òf legislashon òf dor di kualke otro medio lo ta e prerogativa di e hende. E mandamentunan, sinembargo, ta traha dor di Dios. Usando nos albedrio, nos por pone nan un banda. Pero nos no por, sinembargo, kambia nan, meskos ku nos no por kambia e konsekuenshanan ku ta bin di desobedesé i kibra nan.

Ku nos por realisá ku nos felisidat di mas grandi den e bida aki ta bin dor di sigui Dios su mandamentunan i obedesé su leinan! Mi ta gusta e palabranan ku nos ta haña den Isaías kapítulo 32 versíkulo 17 : “E obra di rektitut lo ta pas, i e efekto di rektitut trankilidat i seguridat pa semper.” E pas ei, e seguridat ei por bin solamente dor di rektitut.

Nos no por permití nos mes den e mas mínimo márgen di maniobrá tratando ku pika. Nos no por permití nos mes pa kere ku nos ta partisipá “djis un tiki” den desobedesé e mandamentunan di Dios, pasó e piká por gara bo ku un man di heru di kual ta ekstremadamente doloroso pa liberá nos mes. E adikshonnan ku por bini di droga, alkohòl, pornografia, i inmoralidat ta real i ta kasi imposibel pa kibra sin un lucha grandi i hopi ayudo.

Si algun di boso a trompeká den su kaminda, mi ta sigurá boso ku tin un kaminda pa regresá. E proseso yama arepentimentu. Maske ku e kaminda por ta difísil, bo salbashon eterno ta dependé di dje. Kiko lo por ta di mas balor pa bo esfuersonan? Mi ta roga boso pa determiná aki nan i awor aki pa tuma e pasonan nesesario pa arepentí kompletamente. Mas lihé boso hasi esaki, mas lihé boso lo ta apto pa eksperenshá e pas i e trankilidat i e siguransa di kual Isaías a papia.

Poko tempu pasá mi a tende un testimonio di un muhé,huntu ku su kasá a desviá di e kaminda di seguridat, kibrando e mandamentunan i, den e proseso kasi a destruí nan famia. Ora kada un di nan al final por a mira dor di e neblina diki di adikshon i rekonosé kon infelis nan bida a bira, meskos ku kuantu esaki tabata perhudiká nan sernan stimá, nan a kuminsá kambia. E proseso di arepentimentu tabata parse di bai pokopoko i tin biaha, doloroso, ku e ayudo di e poseedornan di saserdosio, huntu ku ayudo di famia i amigunan leal nan a haña nan kaminda bèk.

Mi ta kompartí un parti di e testimonio di e hermana aki di e poder sanadó di arepentimentu: “Kon un hende ta bai di ta un di e karnénan pèrdí i den gara di [pika], na e pas i felisidat ku nos ta sinti aworakí? Kon esei ta sosodé? E kontesta... ta pa motibu di un evangelio perfekto, un Yu perfekto i Su sakrifisio pa mi ... Kaminda tabatin skuridat, awor tin lus. Kaminda tabatin desesperashon i doló, [awor] tin alegria i speransa. Nos a wòrdu infinitamente bendishoná ku e kambio ku solamente por bin dor di arepentimentu hasí posibel dor di e Ekspiashon di JesuCristu.”

Nos Salbador a muri pa proveé pa bosp i pa ami e don bendishoná ei. Apesar di e hecho ku e kaminda ta difísil, e promesa ta real. Señor a bisa esnan ku arepentí:

“Maske ku bo pikanan ta kòrá manera sanger, nan lo ta blanku manera sneu.”9

“I lo mi no kòrda [nan] mas.”10

Durante di nos bida nos mester nutri testimonionan fuerte dor di studia e skrituranan i dor di hasi orashon i dor di reflekshoná e bèrdatnan di e evangelio di JesuCristu. Si e ta plantá ku firmesa, nos testimonio di e evangelio, di e Salbador, i di nos Tata Selestial lo influenshá tur loke nos hasi.

Mi ta testifiká ku nos tur ta yunan stimá di nos Tata den Shelu mandá den e tempu aki ku un propósito, i e saserdosio di Dios duná p’asina nos por sirbi otro i hasi e obra di Dios aki na mundu. Nos a wòrdu mandá pa biba nos bida di tal manera ku nos por keda digno pa poseé e saserdosio ei.

Mi rumannan, ku nos por warda e mandamentunan! E rekompensanan ku ta wardando nos si nos hasi esaki ta maravioso i glorioso. Ku esaki lo ta nos bendishon, mi ta roga den e nòmber di JesuCristu, nos Salbador i Redentor, amèn.