Kapwaiahda Kosonned akan

Riei oahl akan, meid kaperen ei pil pwurehng patehng kumwail. Ni soutik wet kitail pil marainkidahr mahsen kan me kitail rongehr. I kapakapk pwe maraino en kaweid dahme I pahn kosoia ong kumwail.

Ahi tungoal padahk en pwongpwong wet me mengei. Iei: kapwaiahda kosonned akan.

Sapwellimen Koht kosonned akan sohte wiawihda pwehn keremwpwa de kauhdi atail peren. Soah douluhl. Ih me ketin kapik kitailda oh poakehng kitail mwahngi ia mwomwen atail anahne apwalih atail mour pwe kitail en kak ale peren unsek. E ketin kaunopadahngehr kitail kaweid kan me, ma kitail idawehn, pahn epwel mwahui kitail nan seilok keper en nan mour wet. Kitail tamataman kosoi en koulo me patohwen: Kapwaiahda kosonned akan! Pwe mie perehre; pil mie meleilei.¹

Uwen en Samatail Nanleng poakepoake kitail me E mahsanihki: Koh dehr likamw; koh dehr pirap, koh dehr nenek, poakepoake mehn mpem duwe pein uhk; oh pil ekei.² Kitail ese kosonned akan. E mwahngi me ni atail kin kapwaiahda kosonned akan, atail mour kan pahn ahneki popohl, unsek oh sohte liseliping. Atail kasongsong kan oh kahpwal kan pahn mengei en epwella oh kitail pahn ale Sapwellime kapai kan me sansalehr. Ahpw ni E ketkihda kosonned kan, E pil ketin mweidong kitail en pilada ma kitail pahn kapwaiahda de soah. Atail pilipil nan ire wet me pahn kosoanehdi mwomwen atail mour.

I kamehlele me emen emen kitail kosoanedier en ahneki mour soutuk pahn sihlang in Samataill Nanleng oh Sapwellime Ieros, Sises Krais. Ihme kahrehd e inenen kesemwpwal kitail en wia atail pilipil me pahn kahluwai kitail lahng kosoandio. Ahpw kitail ese me tepelo kin nannanti kitail en dehr pweida. Ih oh iengehkan sohte kin uhdihsang arail en kauhdi atail wiewia mwahukan. Re wia mehkoat keper ong atail komourla soutuk ihte ma kitail pil kin ngiangi oh sohte uhdihsan atail nanantiong en kapwaiahda atail kosoandio. Wahnparon Piter kaparkin kitail, “Kumwail onohnop oh mwasmwasahn. Pwe amwail imwintihtiho, Tepel, kohkohseli duwehte laion emen weriwer raparapahki ihs me e pahn kadalehla.”³

Detehn sohte ansou ehu nan atail mour me kitail sohte kin ale kasongsong, kumwail mwahakapw kan lelehr nan sounpar me kin pwuak kasongsong. Sounpar en me pwulepwul kan kin kalap wia ansoun soakoahiek, medemedwe me ke sohte itar, raprapahki wasa me ke kak pwerda ie rehn peliemw kan, oh songosong ken kak patehng. Kumwail kak medewehda kumwail en wekid amwail tiahk pwe kumail en kak patehng pali moron oh diar kempoakepamwail me pwungkin kumwail. Menlau kehlail oh mwasmwasahn mwahu pwe oakoat mehn de adiasang ahmw kapai poatoapoato. Pilipil kan me kumwail wiahda wasaht oh ansou wet wia mehkoat kesemwpwal poatoapoat.

Kitail wadek nan 1 Korint: “Mie …mahsen en wehi tohto nin sampah.”⁴ Ngihl kapwuriamwei tohto kapel kitail pene, ngilen mwerkau, ngilen kamwamwahl, ngilen me loaloakoang oh ngihl liseliping. Ngihl pwukat wia ngihl kehlail kei. I kangoange kumwail en kapiredi ngihl pwukat oh kin karonge mwahu ngihl meleilei tikitiko me pahn kahluwai kumwail lahng komour. Tamatamn oahl priesthood men me pwilikihdi pehkan pohn moangomwail mwurin amwail pepdaisla oh katengehdi me kumwail wiahlahr tohn Mwomwodiso oh nda, Ale Ngehn Sarawi.⁵ Langahda amwail mohngiong kan, mehlel amwail mour unsek, pwehn ale kaweid sang ngihl me kin kadehde me mehlelo. Soukohp Aiseia inouki, “Kumwail pahn rong kepitie … , Iet ahlo kumwail idawehn.”⁶ I koapwoaroapwoariki me kitail pahn kin wie rongorong ngilen kaweid kansenamwahuo pwehn doarei kitailla.

Sapeikiong kosonned kan me kahlwahlahngehr kalokolok oh keria kan en nan mwehi wet. Mepwukat iei keria en ineng suwed, keria en kilang kilel suwed, keria en ale wini suwed, keria en wia tiahk suwed, keria en kawehla leseian, oh mehteikan. Pwuhk sarawi padahkiong kitail me tepelo me wia pahson en mepwukat koaros.⁷ Kitail ese me ih me wia pahpahn likamw koaros, pwehn piti oh kakunpene mesen aramas.⁸

I peki kumwail en dehr mweidong mehkoat en katiasang amwail peren nan mour wet oh mour poatoapoat me kohkohdo. Tepelo pahn doadoahngki ah likamw kan oh kahluwai kumwail di ni ukedi likekiris ehu ong amwail paisuwed ma kumwail mweidehng en wia mwo. Kumwail pahn kak miehier wasa likekiriso mwhon amwail diarada me kumwail solahr kak uhdi. Kumwail rongehr dahme tepelo kin nda. E kin likwerki: Pak ehute sohte wiahda mehkoat; ihme koaros kin wiewia; ke dehr pweipwei; ansou wekdeklahr; sohte me pahn medekla; ahmw mour met. Tepelo ese kitail oh e ese soangen kasongsong kan me kitail sohte kak powehdi. E inenen kesemwpwal kitail en kin poaden mwasmwasahn pwe kitail en dehr pwupwidiong nan likamw kan oh kasongsong kan.

Kitail anahne eimah oh poadidi nan atail pwoson oh mehlel ni atail sohpai kekehlail lahn wiewia kan oh kemwekid likamw me kapel kitail pene oh kasapwunge me mehlelo, kawehla me mwahu oh me mwakelekel, oh songosong en kaweliankihda irehken me pein aramas wiadahr nan sampa. Ma aramas me pein wiahda kosonned akan, aramas pahn men wekidala sang ni pein nsenarail, de sang ni kokoudahn kosonned de sang ni soahng teikan. Ahpw Koht me ketkihda kosonned akan. Kitail kak doadoahngki atail saledek en pilipil oh sohte kapwaiahda kosonned akan. Ahpw kitail sohte kak wekidala kosonned akan duwehte atail sohte kak wekidala kalokolok kan me kitail kin ale pwehki atail sohte kapwaiahda kosonned akan.

Kitail anahne wehwehki me atail peren keieu laud nan mour wet kin miehda sang ni atail idawehn oh oke Sapwellimen Koht kosonned akan! I pwungki mahsen kan me dierek nan Aiseia irelaud 32 iretikitik 17: “Pwehki aramas koaros pahn weweidki me pwung, oh popohl oh meleilei pahn kakaun kohkohlahte.” Popohl oh meleilei kak mie pwehki sang ni me pwung.

Kitail sohte kak mweidehng pein kitail en wiahki mehkoat tikitik dihp. Kitail sohte kak mweidehng kitail en kamehlele me kitail kak “ekis te” sapeikiong kosonned akan en Koht pwe dihp kak koledi kehlail oh powehdi kitail oh e pahn apwal oh kamedek ong kitail en kak pitsang nan dihp. Kamam me kin pwarada sang ni doadoangki wini suwed, sakau, kilel suwed, oh tiahk suwed kan me inenen kehlail oh kerenieng sohte kak uhdi kahrehda kitail anahne doadoahk kelail oh ale sawas laud pwe kitail en kak kauhdi.

Ma mie me dipekelekelehr nan seilok wet, I kamehlelehiong kumwail me kumwail kak pwuredo. Wiepe wet adaneki koluhla. Detehn ahlo apwal, ahpw e pahn wahdo mour soutuk. Dahme kumwal konehng apwalih likin mwo? I peki kumwail en kosoanehdi wasaht oh ansou wet me kumwail pahn koluhla unsek. Ma kumwail mwadang wia met, kumwail pahn kak mwadang pehm popohl oh meleilei oh inoukan me Soukohp Aiseia wiahier.

Mekeren I rong kadehde en lih emen me, iang ah pwoudo, salongasang nan elen komour, kin kawehla irehn kosonned akan oh, ni ansou ohte, kerenieng kawehla ara peneinei. Ni ansou me emen emen ira kak kilangada wasa nan rotorot en kamam me ira mihla loale oh diarada uwen sonsuwed en ara mour, oh uwen kamedek me ira wiahiengehr neira serihkan, ira tepda wekila. Wiepen ara koluhlaho pwand oh ekei ansou kamedek, ahpw pwehki sawas me ira ale sang kaun en priesthood kan, iangahki sawas sang peneinei oh sang kempoakeperah kan, ira pwuredohr.

I ehukiong kumwail kisehn en liho kadehde me pid keirda pwehki koluhla. Ia mwomwen en aramas emen me duwehla sihpw salongala men oh tengalahr nan [dihp] kak mihla nan meleilei oh peren me se ahneki ansou wet? Ia mwomwen eh wiawi? Pasapengo… iei pwehki rongamwahu mehlelo, Ieros kaselel men oh Sapwellime tohnmeteo ong ie. … Wasa me kin rotorot, marain dahr. Kahpwal oh weirek wialahr popohl oh koapwoaroapwoar. Se ni mehlel kapaikidahr keirda me kak mie pwehki sang ni koluhla me kak wiawi pwehki Toamw en Sises Krais.

Atail Sounkomouro pwoula pwehn wadohng kitail kisakiso. Detehn ahlo ni mehlel me apwal, inouo me mehlel. Kauno masanih ong irail me koluhla:

“Mehnda me kumwail weitahtahkilahr dipamwail kan, ahpw I pahn kamwakelekumwailda duwehla sinoh.”⁹

“Oh I solahr pahn tamanda [arail] sapwung kan.”¹⁰

Erein atail mour kitail pahn anahne kakairada kadehde kehlail sang ni atail wadek pwuhk sarawi oh kapakap oh douloallih me mehlel kan en rongamwahu en Sises Krais. Ni eh poadidi kehlail, atail kadehde pen rongamwahu en Sounkomouro oh Samatail Nanleng pahn kaweid mehkoaros me kitail kin wia.

I kadehde me kitail koaros wia seri kempoake en Samatail Nanleng, pekederdo sampa ansou wet ki kahrepe ehu, oh ale priesthood en Koht pwe kitail en kak papah meteikan oh wia sapwellimen Koht doadoahk pohn sampa. Kitail pehkiekongehr kitail en momourki mour ehu me pahn warehng ale priesthoodo.

Riei oahloko, kitail kapwaiahda kosonned akan. Me kaperen oh mwahu pahn kohdo rehtail ma kitail kapwaiahda. I kapakapki me mepwukat pahn wia atail kapai, ni mwaren Sises Krais, atail Sounkomour oh Soundor, amen.