Cia Li Tshuab Xyu Nrov Meej

Thaum lub caij sov tas los kuv tus poj niam thiab kuv wb muaj wb ob tug tub xeeb ntxwv nrog wb nyob thaum nkawd niam thiab txiv koom nrog lawv ceg txheem ntseeg taug kev li cov pioneer. Wb tus ntxhais xav kom wb ua tib zoo pab ob tug tub xyaum ntaus piano thaum nkawd tsis nyob. Nws paub hais tias ob peb hnub nyob hauv yus niam tais yawm txiv lub tsev ua rau yus yooj yim hnov qab txog kev xyaum ntaus piano. Muaj ib hnub tav su kuv txiav txim siab kuv yuav nrog kuv tus tub xeeb ntxwv uas muaj 13 xyoos, Andrew, nyob thiab mloog nws ntaus piano.

Tus me nyuam tub no muaj zog heev thiab nyiam nyob nraum zoov. Yooj yim rau nws siv tag nrho nws lub sij hawm mus plob hav zoov thiab nuv ntses. Thaum nws xyaum ntaus piano, kuv paub hais tias nws tsuas xav mus nuv ntses nyob ntawm ib tug dej nyob ze. Kuv mloog thaum nws ntaus piano ntaus ib zaj nkauj uas sawv daws paub. Txhua zaus nws ntaus mas nws ntaus zoo ib yam thiab siv qhov kev ntoj zoo ib yam, ua nyuaj rau yus paub lub suab nkauj yog dab tsi. Kuv zaum saum rooj zaum ntawm nws ib sab thiab piav yog vim li cas nws yuav tsum siv zog ntaus tes rau lub suab nkauj me ntsis ntxiv thiab tsis txhob siv zog ntaus tes rau cov suab uas koom nrog lub suab nkauj. Wb sib tham txog qhov uas lub piano tsis yog ib qho txuj ci tseem ceeb xwb. Yog ib qho uas txuas ntxiv rau nws lub suab thiab tej kev xav thiab yuav rais los ua ib lub twj paj nruas uas txawj sib txuas lus. Ib yam li thaum ib tug neeg tham lus thiab hais lus xwm yeem, yuav tsum ntaus kom lub suab nkauj xwm yeem zoo ib yam thaum yus ntaus ib lub cim suab mus rau ib lub ntxiv.

Wb luag ua ke thaum nws pheej rov qab ntaus dua. Nws txoj kev luag nyav loj zuj zus thaum lub suab nkauj nrov zuj zus tuaj dhau los ntawm lub suab uas thaum yav tas los nrov yam tsis muaj lub muaj log. Ua rau nws hnov zaj lus kom meej: “Kuv yog Vajtswv me nyuam, kuv los nyob ntiaj teb no.”¹ Kuv nug Andrew seb puas muaj dab tsi txawv ntawm zaj lus qhia ntawd. Nws teb hais tias, “Muaj, Yawm Txiv, kuv hnov tau!”

Tus Thwj Tim Povlauj qhia peb txog kev muab kev sib txuas lus piv rau tej twj paj nruas thaum nws sau ntawv rau cov Kauleethaus:

“Tus neeg uas tshuab raj thiab qoj nkauj nog ncas, yog nws tsis txawj pos ntiv raj thiab pos ntiv nkauj nog ncas, yeej tsis muaj leej twg paub hais tias nws tshuab thiab qoj hais li cas.

“Thiab yog tus neeg uas tshuab xyu nws tshuab tsis meej, leej twg thiaj yuav paub npaj sib ntaus sib tua?”²

Yog tias tsuas muaj ib lub sij hawm xwb uas yuav tsum muaj cov ntseeg Khetos uas txawj qhia txog txoj moo zoo kom meej thiab qhia los ntawm lawv lub siab, ces lub sij hawm ntawd yog tam sim no. Peb xav tau kev tshuab xyu uas meej.

Yexus Khetos yog tus uas coj yam ntxwv zoo tshaj plaws. Nws yeej coj yam ntxwv ua siab loj ua raws li qhov yog. Nws tej lus nto moo ib tiam dhau ib tiam thaum Nws caw peb los nco ntsoov hlub Vajtswv thiab peb cov neeg zej zog, ua raws li tag nrho Vajtswv cov lus txib thiab ua neej kom ua qhov kaj rau lub ntiaj teb. Nws tsis ntshai hais lus tawm tsam cov uas muaj hwj chim los sis cov nom uas nyob hauv Nws lub caij nyoog, tsis hais thaum cov ntawv tawm tsam Nws lub luag hauj lwm uas Nws Leej Txiv Saum Ntuj Ceeb Tsheej muab rau Nws. Nws tsis hais kom tib neeg tsis paub ua li cas; Nws xav tshoov tib neeg lub siab. Nws paub meej txog Nws Leej Txiv lub siab nyiam thaum Nws hais lus thiab ua txhua yam.

Kuv kuj nyiam Petus tus yam ntxwv, tus uas ua siab loj hais lus rau tib neeg ntawm lub ntiaj teb no thiab qhia meej thaum hnub Pheethekhos. Hnub ntawd tib neeg sib sau ua ke tuaj ntau lub teb chaws tuaj thiab cem cov Neeg Ntseeg vim lawv hnov cov Neeg Ntseeg hais lwm yam lus thiab xav hais tias cov Neeg Ntseeg ntawd qaug cawv. Petus, vim nws muaj tus Ntsuj Plig puv npo, tau sawv los kom tiv thaiv lub Koom Txoos thiab cov mej zeej. Nws ua tim khawv hais tias: “Cov kwv tij Yudais thiab nej txhua tus uas nyob hauv lub nroog Yeluxalees no, nej ua tib zoo mloog tej uas kuv yuav qhia rau nej.”³

Ces nws tau hais ib nqe vaj lug kub uas hais txog tej uas yuav muaj los yav tom ntej txog Yexus Khetos thiab ua tim khawv ncaj ncees no hais tias: “Yog li ntawd cov Ixayees, nej sawv daws yuav tsum paub hais tias tus Yexus uas nej muab ntsia rau saum ntoo khaub lig, yog tus uas Vajtswv tsa ua tus Tswv thiab ua tus Mexiyas lawm.”⁴

Ntau tus mloog nws lus thiab hnov tus Ntsuj Plig, thiab 3,000 tus neeg tau koom lub Koom Txoos. Qhov no ua pov thawj hais tias ib tug txiv neej los sis ib tug poj niam tib leeg uas txaus siab ua tim khawv yeej pab tau txawm neeg ntiaj teb ua qhov tsis yog los.

Thaum peb cov mej zeej txiav txim siab hais tias peb yuav sawv thiab ua tim khawv txog Vajtswv cov lus qhuab qhia thiab Nws lub Koom Txoos, muaj ib yam dab tsi uas hloov nyob hauv peb. Peb txais Nws tus meej yim rau peb tej ntsej muag. Peb nyob ze dua Nws tus Ntsuj Plig. Ces Nws yuav mus ua peb ntej thiab nyob ntawm “[peb] sab tes xis thiab [peb] sab tes laug, thiab [Nws] tus Ntsuj Plig yuav nyob hauv [peb] lub siab thiab [Nws] cov tim tswv yuav nyob ncig [peb] txhawb nqa [peb].”⁵

Khetos cov thwj tim tseeb tsis nrhiav kev zam txim rau cov lus qhuab qhia thaum twg cov lus qhuab qhia ntawd tsis sib haum nrog neeg ntiaj teb tej kev xav. Povlauj yog ib tug thwj tim ntxiv uas ua siab loj tshaj tawm hais tias nws “tsis txaj muag qhia Khetos txoj moo zoo; vim txoj moo zoo ntawd yog Vajtswv lub hwj chim uas cawm tau txhua tus uas ntseeg dim.”⁶ Cov thwj tim tseeb sawv cev rau tus Tswv txawm tsis yooj yim ua li ntawd los. Cov thwj tim tseeb xav tshoov tib neeg lub siab, tsis xav ua kom tib neeg qhuas lawv.

Feem ntau nws tsis yooj yim sawv los ua tim khawv txog Khetos. Kuv xav tias Povlauj xav li ntawd thaum nws raug hu mus ntsib tus Vaj Ntxwv Akipas thiab lawv hais kom nws daws nws tus kheej thiab hais nws zaj. Povlauj yeej tsis tau tos, thiab nws tshaj tawm txog nws txoj kev ntseeg yam li muaj hwj chim heev ua rau tus vaj ntxwv txaus ntshai no lees hais tias nws yuav luag xav ua ib tug Neeg Ntseeg Khetos.

Povlauj tej lus teb qhia txog nws txoj kev xav kom tib neeg to taub nws tej lus tiag tiag. Nws qhia tus Vaj Ntxwv Akipas hais tias nws xav kom tag nrho cov uas hnov nws lub suab yuav tsis txhob yuav luag xav ua Neeg Ntseeg Khetos, tiam sis nws xav kom lawv txhua tus yuav xav ua Khetos cov thwj tim.⁷ Cov uas hais lus meej yuav ua kom muaj li no.

Tau ntau xyoo kuv twb kawm zaj dab neeg txog Lihais zaj npau suav nyob hauv Phau Ntawv Maumoos,⁸ ua rau kuv xav tias lub tsev loj thiab dav yog ib qho chaw rau cov uas ntxeev siab nyob xwb. Lub tsev loj ntawd muaj neeg coob uas thuam thiab taw tes rau cov neeg rau siab ntseeg uas tuav rawv tus nqaj hlau, uas piv rau Vajtswv txoj lus, thiab taug kev mus rau tus ntoo cawm txoj sia, uas piv txog Vajtswv txoj kev hlub. Ib txhia nyiaj tsis tau qhov uas muaj tib neeg thuam lawv thiab lawv mus yuam kev. Ib txhia txiav txim lawv yuav mus koom cov neeg uas thuam lawv nyob rau hauv lub tsev loj thiab dav. Lawv tsis muaj siab loj kom hais lus tawm tsam tej kev thuam los yog neeg ntiaj teb tej lus los?

Thaum kuv tab tom saib neeg ntiaj teb txav mus deb ntawm Vajtswv, kuv xav tias lub tsev no loj tuaj. Ntau tus neeg taug kev hauv lub tsev loj thiab dav no es lawv tsis paub hais tias lawv tab tom rais los ua neeg uas coj zoo li ntawd. Feem ntau lawv ua raws li kev ntxias thiab tej lus uas cov neeg nyob hauv hais. Thaum kawg lawv koom ua ke nrog cov uas cem los sis thuam.

Tau ntau xyoo kuv tau xav tias pawg neeg thuam ntawd thuam cov neeg ntseeg txoj kev ua neej, tiam sis cov suab uas nrov tawm ntawm lub tsev ntawd niaj hnub no tau hloov lawv tej lus thiab tus txheej txheem. Cov uas thuam pheej sim ua rau lwm tus hnov tsis tau txoj moo zoo thaum lawv tawm tsam ib qho los ntawm lub Koom Txoos zaj keeb kwm los sis hnyos ib tug yaj saub los sis lwm tus thawj coj. Lawv kuj tawm tsam lub ntsiab ntawm peb cov lus qhuab qhia thiab Vajtswv tej kev cai, uas Nws pub rau peb txij thaum ntuj tsim teb raug. Peb cov uas yog Yexus Khetos cov thwj tim thiab cov mej zeej ntawm Nws lub Koom Txoos, yuav tsum tsis txhob tso tus nqaj hlau tseg. Peb yuav tsum cia li tshuab xyu nrov meej dhau los ntawm peb tej ntsuj plig.

Zaj lus qhia meej hais tias Vajtswv yog peb Leej Txiv Saum Ntuj Ceeb Tsheej uas hlub peb thiab Yexus Khetos yog Nws Leej Tub. Nyob hauv lub caij nyoog kawg no cov yaj saub uas muaj txoj sia nyob tau muab txoj moo zoo txum tim rov qab los thiab qhov puav pheej yeej nyob hauv Phau Ntawv Maumoos. Txoj kev zoo siab yog dhau los ntawm yus tsev neeg raws li peb Leej Txiv Saum Ntuj Ceeb Tsheej tau txhim tsa thiab muab tshwm sim. Nov yog lub suab nkauj ntawm zaj lus uas neeg coob to taub vim lawv twb hnov lawm nyob hauv lub neej ua ntej yug los.

Vim peb yog Haiv Neeg Ntseeg hauv Hnub Nyoog Kawg, twb txog lub sij hawm uas peb yuav tsum sawv ntsug thiab ua tim khawv. Twb txog lub sij hawm kom lub suab nkauj ntawm txoj moo yuav nrov tshaj neeg ntiaj teb lub suab nrov. Kuv muab kuv zaj lus tim khawv ntxiv rau tus Cawm Seej thiab tus Txhiv Dim ntawm lub ntiaj teb zaj lus. Nws muaj txoj sia noyb! Twb tau muab Nws txoj moo zoo txum tim rov qab los thiab peb txais tau cov koob hmoov ntawm kev zoo siab thiab kev kaj siab lug nyob hauv lub neej yog peb ua raws li Nws cov lus txib thiab taug Nws txoj kev. Nov yog kuv zaj lus tim khawv los ntawm Yexus Khetos lub npe, amees.