2010–2019
Ia Ili Leotele le Pu
Oketopa 2015


Ia Ili Leotele le Pu

E moomia e le lalolagi ni soo o Keriso o e e mafai ona fesootai maia le savali o le talalelei ma le manino ma mai le loto.

I le taumafanafana na tuanai atu nei, sa matou nonofo ai ma lo’u toalua ma le fanau tama laiti e toalua a lo’u afafine, a o auai atu o la matua i se gaoioiga sopo faapaionia a le latou siteki. Sa manao lo ma afafine ia mautinoa e aoao le tapiano a tamaiti a o toesea i la’ua. Sa ia iloaina o nai aso i o la matua matutua o le a faigofie teisi ai ona galo ona tata. I se tasi aoauli sa tonu ia te au ma te nonofo ma le alii o Andrew e 13 tausaga ma faalogologo a o ia tata.

O lenei tamaitiiti e ese le tiotio ma e fiafia i mea e fai i fafo. E faigofie lava ona ia faaaluina atoa lona taimi e tulimanu ma fagota. A o tata le piano, sa ou iloaina e sili ia te ia le alu e fagota i se vaitafe lata ane. Sa ou faalogologo a o ia soona oomiina ki taitasi o se pese masani. O nota uma lava sa ia taina, sa tutusa le faamamafa ma le pā’ō, ma faigata ai ona iloa tonu le fati. Sa ou soafai i luga o se nofoa umi i ona autafa ma faamatala atu le taua o le faaaogaina o si oomi laitiiti i luga o ki ma itiiti teisi i luga o na nota e aumaia ai le leo. Sa ma talanoa e uiga i le piano ua na o se vavega faaalofilima. E mafai ona avea o se faalautelega o lona lava leo ma lagona ma avea ai o se tufugaaao matagofie o fesootaiga. E pei lava ona tautala o se tagata ma agaigai malie atu mai lea upu i lea upu, e tatau foi ona faapena le sololelei o le fati a o agai atu mai le tasi nota i le isi.

Sa ma talie faatasi a o toe taumafai ma toe taumafai o ia. Sa faateleina le oomo o ona alafau i le ataata a o amata ona oso mai le leo masani mai mea sa avea muamua o se seti o leo avaavau. Na oo ina manino le savali: “O au o se atalii o le Atua, ua na auina mai au nei.”1 Sa ou fesili ia Andrew pe ua mafai ona ia lagonaina le eseesega i le sāvali. Sa ia tali mai, “Ioe Papa, ua mafai ona ou lagonaina!”

Ua aoao mai i tatou e le Aposetolo o Paulo e uiga i le faatusaina o fesootaiga i mea faimusika ina ua ia tusi atu i Korinito:

“O mea foi e le ola ua taalili mai leo, po o le fagufagu, po o le kitara, a le fefatifatiai leo, e iloa ea faapefea le mea ua ilia mai, po o le mea ua taia mai?

“Aua foi a faaletonu le leo o le pu, o ai ea se na te sauni e tau?”2

Afai na i ai se taimi e moomia ai e le lalolagi ni soo o Keriso o e e mafai ona fesootai maia le savali o le talalelei ma le manino ma mai le loto, o le taimi lenei. Tatou te manaomia le leo manino o le pu.

O Keriso o lo tatou faataitaiga sili moni lea. Sa Ia faatinoina pea lava pea le lototoa e tu atu ai mo le mea tonu. O Ana upu o loo lagonaina pea i augatupulaga a o Ia valaaulia i tatou ia manatua e alolofa i le Atua ma o tatou uso a tagata, ia tausi i poloaiga uma a le Atua ma ola o ni malamalama o le lalolagi. Sa lei fefe o Ia e fetalai faasagatau i mana po o pule o Ona aso, e oo lava i le taimi na tetee ai i Lana misiona na tuu atu ia te Ia e Lona Tama Faalelagi. O Ana upu e lei mamanuina e faafememeai ai, ae ia tuia ai loto o tagata. Sa Ia silafia manino le finagalo o Lona Tama i mea uma sa Ia fetalai ai ma faia.

Ou te fiafia foi i le faataitaiga a Peteru, o le sa faafetaia’ia tagata o le lalolagi i le lototoa ma le manino i le aso Penetekoso. I lena aso, sa faapotopoto ai tagata mai le tele o atunuu ma faitio i le Au Paia anamua, ona sa latou faalogo ua latou fetautalatalaai i gagana ma sa latou manatu ua onana i latou. Na tulai Peteru, na i ai le Agaga ma puipuia le Ekalesia ma ona tagata. Sa ia molimau atu i upu nei: “Sema e, o outou Iutaia e, atoa foi ma e ua nonofo i Ierusalema uma lava, ia iloa e outou lenei mea, ma ia faafofoga mai i a’u upu.”3

Ona ia sii atu lea mai tusi paia o i ai valoaga ia Keriso ma tuuina atu le molimau tuusao lenei: “O lenei foi, ia matua iloa e le aiga uma o Isaraelu, o Iesu lava lena na faasatauroina e outou, ua faia lea e le Atua ma Alii ma Keriso.”4

E toatele sa faalogo i ana upu, sa lagonaina le Agaga, ma e 3,000 tagata na auai atu i le uluai Ekalesia. O se faamaoniga mamana lea o le mafai e se alii po o se tamaitai e toatasi, o le e naunau e molimau atu a o foliga mai ua agai atu le lalolagi i le itu faafeagai, ona faia o se eseesega.

A tatou faia o ni tagata o le ekalesia le faaiuga e tutu atu ma le mamana e molimau atu i le mataupu a le Atua ma Lana Ekalesia, e i ai se mea ua suia i totonu o i tatou. Ua tatou tauaveina Ona foliga i o tatou luga. Tatou te latalata atili i Lona Agaga. O le a muamua o Ia ia i tatou “i [o tatou] itu taumatau ma i [o tatou] tauagavale ma o [Lona[ Agaga o le a i ai i o [tatou] loto, ma o [ana] agelu foi e sapasapai i [tatou] i luga.”5

O soo moni o Keriso e le vaavaai e faia ni alofaga mo le mataupu, pe a le fetaui ma manatu faavae o le lalolagi i le taimi nei. O Paulo o le isi lea soo lototoa na folafola atu ma le le fefe o ia sa “lei ma i le talalelei a Keriso: aua o le mana o le Atua lea i le faaolataga mo tagata uma o e talitonu.”6 O soo moni ua avea ma sui o le Alii i le taimi atonu e le faigofie ona faia. O soo moni e mananao e musuia loto o tagata, ae le na o le uunaia o i latou.

E tele taimi e le faigofie ai pe toafimalie le tu atu mo Keriso. Ou te talitonu o le tulaga lena sa i ai Paulo ina ua aami atu e tu i luma o le Tupu o Akeripa ma sa fesiligia ai e faamaonia atu ia lava ma faamatala atu lana tala. E aunoa ma se faatuatuai, sa folafola atu e Paulo lona talitonuga ma le mana tele, o lea na ta’u sao atu ai lenei tupu ua matamuli e faapea, “toeitiiti” lava a ia faaliliuina o ia e fai ma Kerisiano.

O le tali a Paulo na molimauina ai lona manao ia malamalama a’ia’i tagata i le mea sa ia fai atu ai. Sa ia ta’u atu i le Tupu o Akeripa o lona manao o i latou uma sa faalogo ia te ia o le a le “toetoe: ina avea ma Kerisiano, ae “o tagata uma” ia avea ma soo o Keriso.7 O i latou e tautala atu ma le manino e mafai ona latou faataunuuina.

I le tele o tausaga sa ou suesueina ai le tala i le miti a Liae i le Tusi a Mamona,8 sa ou mafaufau pea lava i le fale tele ma le ateatea faapea o se nofoaga e na o tagata fouvale e nonofo ai. Sa faatumulia le fale i tagata, sa tauemu ma tusitusilima i e faamaoni o e sa pipiimau pea i le ai uamea, e faatusa i le afioga a le Atua, ma sa latou agai atu i le laau o le ola, e faatusa i le alofa o le Atua. O nisi sa le mafai ona onosaia ona o le uunai atu a tagata sa tauemuina i latou ma o ese atu ai. O isi na filifili e aufaatasi atu ma le au tauemu sa i ai i lea fale. Pe latou te lei maua ea le lototele e tautatala atu ai ma le totoa e faasaga i faitioga po o savali a le lalolagi?

A o ou matamata i le lalolagi o i ai nei a o agai ese mai le Atua, ou te mafaufau i lenei fale ua faatupulaia le tele. E toatele ua iloa i latou lava ua savavali i alasavali o le fale tele ma le ateatea ma le le iloaina ua avea moni i latou o se vaega o ana aganuu. E tele ina latou gauai atu i faaosoosoga ma ana sāvali. E iu ina tatou maua i latou o tauemu pe ua tagitagi faatasi ma i latou o e faitio pe tauemu.

E tele tausaga sa ou mafaufau ai o i latou sa tauemu, sa ulagia le ala o ola ai e faamaoni, ae o leo mai le fale o le taimi nei ua suia la latou fati ma le faiga. O i latou o e tauemu e tele ina taumafai e lelemo le sāvali faigofie o le talalelei e ala i le osofaia o ni nai vaega o le talafaasolopito o le Ekalesia pe tuuina mai se faitioga patino i se perofeta po o isi taitai. O loo latou osofaia foi le fatu tonu o la tatou aoaoga faavae ma tulafono a le Atua, na tuuina mai talu mai le Foafoaga o le lalolagi. O i tatou, o ni soo o Iesu Keriso ma tagata o Lana Ekalesia, e le tatau ona tatou faamaamulu le ai uamea. E tatau ona tatou iliina leotele lena pu mai o tatou agaga.

O le savali faigofie, o le Atua o lo tatou Tama Faalelagi alofa ma o Iesu Keriso o Lona Alo. O le talalelei ua toefuatai mai i nei aso e gata ai e ala mai i perofeta soifua ma o le faamaoniga o le Tusi a Mamona. O le ala i le fiafia e ala mai lea i le iunite faavae o le aiga, e pei ona muai faatulagaina ai ma faaalia mai e lo tatou Tama Faalelagi. O le fati masani lea o le savali lea e mafai e le toatele ona iloa ona sa latou faalogo ai i le muai olaga.

I le avea ai ma Au Paia o Aso e Gata Ai, ua oo i le taimi tatou te tutu atu ai ma molimau atu. Ua oo i le taimi mo nota o fati o le talalelei e tulai ae ai i luga atu o leo o le lalolagi. Ou te faaopoopo atu la’u molimau i le savali a le Faaola ma le Togiola o le lalolagi. O loo soifua o Ia! Ua toefuatai mai Lana talalelei ma e mafai ona faamautinoa ia faamanuiaga o le fiafia ma le filemu i lenei olaga i le ola ai lea i Ana poloaiga ma savavali i Ona ala. O la’u molimau lea i le suafa o Iesu Keriso, amene.