Winim Ol Jalenj blong Wol blong Tedei

Oli raetem mo talem plante samting finis abaot jeneresen blong ol yang singgel adalt blong tedei. Stadi i soem se plante oli agensem relijin we i oganaes. Plante oli gat kaon mo oli no gat wok. Bigfala namba i laekem tingting ia blong mared, be oli no wantem tekem step ia. Namba we i no wantem gat pikinini i stap kam antap. Sapos oli no gat gospel mo insperesen blong lidim olgeta, plante oli stap folem ol nara kaen rod mo lusum rod blong olgeta.

Laki tumas, namba blong ol yang adalt memba blong Jos i no antap tumas long ol trabol taem ia, mo hemia, from se oli gat blesing blong gat plan blong gospel. Plan ia we i no save finis, i blong hang strong long rel blong aean—hang long toktok blong God mo toktok blong ol profet blong Hem. Yumi nid blong holem strong moa rel blong aean ia we i lidim yumi gobak long Hem. Naoia i “dei blong jusum”¹ blong yumi evriwan.

Taem mi wan boe, taem mi stap rere blong mekem wan joes we mi no tingting long hem, papa blong mi bae i talem: “!Robet, yu stretem yu, yu flae stret!” I hapen long yufala tu. Long sem laen wetem klia toktok blong hem, bae mi wantem toktok speseli long yufala, ol yut—yut blong laen blong hae king—mo ol yang adalt blong laen blong hae king, from “sol blong mi i glad blong toktok klia … blong mekem se [yumi] save lanem samting.”²

Yufala i stap laef long wan impoten taem long laef blong yufala. Ol joes we yufala i mekem—misin, edukesen, mared, wok, mo seves long Jos—bae i sepem fiuja blong yu we i no save finis. Hemia i minim we, oltaem, bae yu mas lukluk i go fored—lukluk i go long fiuja.

Olsem wan paelot long Ea Fos, mi lanem prinsipol ia: neva minim blong flae tru long wan strong win wetem tanda mo laetning (bae mi no talemaot olsem wanem mi faenemaot hemia.) Be flae raon long hem, tekem wan nara rod, o wet blong strong win i kam klia bifo yu mekem plen i lan.

Ol yang adalt brata mo sista we mi lavem. Mi wantem helpem yufala blong “flae stret” long ol strong win blong ol las dei. Yu nao yu paelot. Yu nao yu responsibol blong yu tingting long ol risal blong evri joes we yu mekem. Askem yuwan: “Sapos mi mekem joes ia, ?wanem nogud samting we bae i save hapen?” Ol stret mo gud joes bae oli holemtaet yu blong aot long rod.

Tingbaot hemia: Sapos yu jusum blong no tekem alkol, !bae yu no kam wan alkolik! Sapos yu jusum blong no gat kaon; !bae yu stap longwe blong kam bagarap!

Wan long ol stamba tingting blong gat skripja, i blong soem long yumi wanem ol stret mo gud man oli mekem long fored blong temtesen mo nogud fasin. Long sot toktok, !oli stap longwe long hem! Josef i ronwe long waef blong Potifa.³ Lihae i tekem famli blong hem mo aot long Jerusalem.⁴ Meri mo Josef oli aot i go long Ijip blong ronwe long nogud plan blong Herod.⁵ Long evri taem ia, Papa long Heven i bin givim woning long ol man ia we oli biliv. Semmak, bae Hem i helpem yumi save sapos yumi mas faet, ronwe, o akseptem situesen we i jenis. Bae Hem i toktok long yumi tru long prea, mo taem yumi prea, bae yumi gat Tabu Spirit we bae i lidim yumi. Yumi gat ol skripja, ol tijing blong ol profet we oli stap laef, ol petriakel blesing, kaonsel blong papa mo mama mo prishud mo okseleri lida we i gat insperesen, mo antap long evriwan, tru long kwaet smol voes blong Spirit.

Oltaem bae Lod i kipim promes blong Hem: “Bambae mi lidim yufala i go.”⁶ Wan kwestin nomo i stap se, ?bae yumi letem Hem i lidim yumi? ?Bae yumi harem voes blong Hem mo voes blong ol wokman blong Hem?

Mi testifae se sapos yu stap ia from Lod, bae Hem i stap ia from yu.⁷ Sapos yu lavem Hem mo obei ol komanmen blong Hem, bae yu gat Spirit blong Hem i stap wetem yu, mo i lidim yu. “putum tras blong yu long Spirit ia we i lidim man blong mekem gud. …Mo long taem ia nao bambae yu save, … evri samting … we oli abaot ol samting we oli stret mo gud.”⁸

Wetem ol prinsipol ia olsem fandesen, ?bae mi save givim sam kaonsel blong ril laef?

Plante long jeneresen blong yufala i stap fesem bigfala kaon. Taem mi wan yang adalt, stek presiden blong mi i wan man blong invesmen long Wol Strit. Hem i tijim mi: “Yu rij sapos yu save laef hapi wetem wanem mane yu stap winin.” ?Olsem wanem nao yu mekem samting ia? !Pem taeting blong yu mo sevem mane! Taem yu winim moa, sevem moa mane. Yu no kompit wetem ol narawan blong gat ol sas tul blong pleiplei. Yu no pem wanem we yu no save pem.

Plante yang adalt long wol ia oli stap mekem kaon blong go long skul, be afta, oli faenem se mane blong pem skul i moa hae bitim wanem we oli save pembak. Lukaot ol skolasip, ol grant, Kasem wan haf dei wok, sapos i posibol, blong help blong pem skul blong yu. Hemia i nidim sakrifaes, be bae i helpem yu blong gat sakses.

Edukesen i mekem yu rere blong kasem moa gud janis blong wok. I putum yu long wan moa gud ples blong givim seves, mo blesem olgeta raon long yu. Bae i putum yu long wan rod blong lanem samting ful laef. I mekem yu kam strong blong faet agensem fasin blong no save samting mo mistek. Olsem Josef Smit i tijim: “Save i ronemaot tudak, miks tingting, mo tu tingting; from olgeta samting ia oli no save stap long ples we i gat save. … Wetem save, i gat paoa.”⁹ “Be blong gat save i gud sapos yu lisin long ol kaonsel blong God.”¹⁰ Edukesen bae i mekem yu rere long wanem i stap kam, wetem mared tu.

Bakegen, ?mi save tok stret long yufala? Smol rod we i lidim man long mared i pastru long ples ia oli singaotem: deiting. Deiting i wan janis blong save storian longtaem. Taem yu go deit, lanem evri samting we yu save abaot wanwan long yutufala. Kam blong save famli blong yutufala taem i posibol. ?Gol blong yutufala i go tugeta? ?Yutufala i serem ol sem filing abaot ol komanmen, Sevya, prishud, tempol, fasin blong stap papa mo mama, ol koling long Jos, mo givim seves long ol narawan? ?Yu bin stap wajem hem taem samting i fasfas, hao hem i fesem sakses, taem i no winim samting, kros, o samting we i blokem hem? ?Huia we yu stap deitem i stap spolem gud ol man o i stap bildimap olgeta? ?Olsem wanem long fasin, mo lanwis, mo aksen blong hem? ?Bae yu laekem blong laef wetem evri dei?

Nao we mi talem hemia, i no gat wan i maredem fasin we i stret gud evriwan; yumi maredem paoa we wan i save kasem. Stret mared i no abaot wanem mi wantem; i abaot wanem hem—huia bae i kam kompanion blong mi—wantem hem i wantem mo wanem hem i nidim blong mi kam.

Bae mi tok klia. Plis yufala i no deit long ol ful 20 yia blong yufala jes blong “gat wan gudfala taem,” mo long wei ia, yufala i pusumbak taem blong mared blong save mekem ol nara samting mo aktiviti. ?From wanem? From se blong deit mo mared, i no ples we yu kasem. Oli ol get long ples we yu wantem go long hem. “Taswe, oltaem, man i mas aot long papa mo mama blong hem, i mas go joen wetem woman blong hem.”¹¹

Responsabiliti blong yu naoia, i blong yu gud inaf long huia yu wantem maredem. Sapos yu wantem maredem wan we i helti, i naes gud, i ones, i hapi, i wok had, i gat Spirit, nao yuwan yu mas stap kaen man o woman ia. Sapos yu yu kaen man o woman ia be yu no mared yet, yu wet smol taem moa. Mi testifae long yu se Lod i save wanem yu wantem mo i lavem yu from fetful tingting blong yu long Hem. Hem i gat wan plan from yu. Lisin long Spirit blong Hem. “No lukaotem blong givim advaes long Lod, be tekem advaes long han blong hem.”¹² Long laef ia o long nekiswan, promes blong Hem bae oli kamtru. “sapos yufala i rere, bae yufala i no fraet.”¹³

Sapos yu no gat fulap samting, yu no wari. Wan gudfala memba blong Jos i jes talem: “Mi no lukaotem pikinini blong mi wetem mane; mi lukaotem olgeta wetem fet.” Wan bigfala trutok i stap biaen long toktok ia. Stat blong praktisim fet blong yu long evri eria blong laef blong yu. Sapos yu no mekem, bae yu safa long wanem mi singaotem “fet we i godaon.” Stret paoa we yu nidim blong praktisim fet bae i godaon. Mekem se yu mas praktisim fet blong yu evri dei, mo bae yu “kam moa strong mo moa strong …, mo oli kam moa strong mo moa strong long fet blong Kraes.”¹⁴

Blong rere from mared, meksua se yu klin inaf blong tekem sakramen, mo holem wan tempol rekomen. Go long tempol oltaem. Givim seves long Jos. Antap long ol wok we yu stap mekem long ol koling blong Jos, folem eksampol blong Sevya we i “go mo mekem ol gudfala wok.”¹⁵

Nao, maet yu gat ol series kwestin abaot ol joes blong mekem. Long ol adalt yia blong mi, mi askem kaonsel long papa mo mama blong mi, mo long ol fetful advaesa we mi trastem. Wan i wan prishud lida; wan narawan i wan tija we i biliv long mi. Tufala i talem: “Sapos yu wantem advaes blong mi, yu mas rere blong harem mo mekem.” Mi andastanem toktok ia i minim wanem. Wetem prea, jusum ol man we bae oli lidim tingting blong yu we oli wari long gudlaef blong yu. Yu mas lukaot long fasin blong karem advaes long fren blong yu. Sapos yu wantem moa bitim we yu gat naoia, !go antap, yu no go long saed!¹⁶

Tingbaot se i no gat wan i save go antap long bihaf blong yu. Bae fet mo prea blong yu nomo bae i mekem se yu leftemap yuwan mo bae yu gat bigfala jenis long hat. Bae desisen blong yu nomo blong stap obei bae i jenisim laef blong yu.¹⁷ Yu gat fridom blong yu blong mekem joes, yu gat strong testemoni blong yu sapos yu obei, mo yu save folem Spirit we i stap lidim yu.

I no longtaem i pas, wan yang man we i mekem muvi i talem se hem i filim se hem i pat blong wan jeneresen blong ol pikinini we oli lus mo kambak—wan jeneresen we i stap lukaotem hop mo glad mo sakses, be oli stap lukaot long ol rong ples mo long ol rong wei.”¹⁸

Long parabol blong Sevya abaot boe we i lus mo kambak, boe ia i bin gat plante blesing we i wet long hem, be bifo hem i save kasem olgeta, hem i mas luklukgud long laef blong hem, joes blong hem, mo situesen blong hem. Merikel we i hapen afta, oli tokbaot long skripja long wan simpol toktok: “gudfala tingting i kambak long hem.”¹⁹ Mi askem yufala blong gudfala tingting i kambak long yufala. Insaed long Jos, taem yumi mas mekem ol impoten desisen, plante taem, yumi holem wan kaonsel miting. Ol famli kaonsel oli blong lukluk long hemia nao. Yu save gat wanem mi singaotem wan “kaonsel blong miwan.” Afta we yu prea, spendem sam taem yuwan. Tingbaot wanem i stap long fored. Askem yuwan: “?Wanem eria blong laef blong mi we mi mas kam strong moa long hem blong mi save mekem ol narawan oli kam strong moa? ?Weaples mi wantem stap afta wan yia stat tedei? ?Tu yia stat tedei? ?Wanem joes bae mi mas mekem blong kasem ples ia? Jes rimemba, yu nao yu paelot, mo yu nao yu mekem wok. Mi testifae long yu se taem yu wekap mo openem ae, Papa blong yu long Heven bae i kam long yu. Tru long han Tabu Spirit blong Hem we i stap givhan, bae Hem i lidim yu folem rod ia.

Mi talem testemoni blong mi se God i stap laef. Mi talem spesel witnes blong mi se Sevya i lavem yufala. “?Olsem wanem? ?Bae yumi no gohed long wan bigfala wok olsem? Go fored be i no arier.”²⁰ Taem yu stap folem Hem, bae Hem i mekem yu strong moa mo i sapotem yu. Bae Hem i tekem yu i gobak long hom ia we i hae olgeta. Long nem blong Jisas Kraes, amen.