Kev Kov Yeej tej Kev Cov Nyom Niaj Hnub Nim No

Muaj ntau yam uas neeg sau ntawv thiab hais txog cov tub hluas ntxhais hluas niaj hnub nim no. Kev tshawb fawb qhia hais tias feem coob tsis xav koom ib lub koom txoos. Ib txhia tshuav nqi ntau thiab tsis muaj hauj lwm. Feem ntau xav sib yuav, tiam sis lawv ntshai ua li ntawd. Cov uas tsis xav muaj me nyuam los coob zuj zus tuaj. Muaj coob tug uas mus ua yuam kev thiab mus ub mus no vim tsis muaj txoj moo zoo thiab txoj kev coj.

Zoo siab uas cov tub hluas ntxhais hluas nyob hauv lub Koom Txoos tsis muaj teeb meem no npaum li lwm tus, ib feem yog vim lawv tau cov koob hmoov ntawm txoj moo zoo. Txoj hau kev nyob mus ib txhis ntawd qhia kom peb tuav nkaus tus nqaj hlau—tso siab rau Vajtswv txoj lus thiab Nws cov yaj saub tej lus. Peb yuav tsum tuav rawv tus nqaj hlau uas coj peb rov qab mus cuag Nws. Tam sim no yog hnub xaiv¹ rau peb txhua tus.

Thaum kuv yog ib tug me nyuam tub, thiab kuv tab tom yuav ua ib qho uas kuv tau xaiv ua tsis zoo, kuv txiv yuav hais rau kuv hais tias, “Robert, cia li ua ncaj qha thiab ya mus zoo!” Nyaj nej zoo ib yam li kuv. Raws li nws txoj kev qhia meej, kuv xav hais ncaj qha rau cov tub hluas ntxhais hluas—cov tub hluas ntxhais hluas uas muaj hwj chim—vim kuv tus ntsuj plig zoo siab rau txoj kev qhia uas meej xwv kom peb yuav kawm tau.²

Tam sim no yog ib lub sij hawm tseem ceeb nyob hauv nej lub neej. Tej yam uas nej xaiv—xws li kev ua tub txib, kev kawm ntawv, kev sib yuav, kev ua hauj lwm, thiab kev pab nyob hauv lub Koom Txoos—tej no yuav hloov nej lub neej nyob mus ib txhis. Qhov no txhais hais tias nej yeej yuav saib tom hauv ntej—saib rau yav tom ntej.

Thaum kuv yog ib tug kws tsav nyab hoom nyob hauv pawg Air Force, kuv tau kawm lub ntsiab cai no: yus yeej tsis xav txhob txwm ya mus rau hauv nag xob nag cua uas muaj xob laim thiab xob nroo. (Kuv yuav tsis qhia nej hais tias kuv tau kawm qhov ntawd li cas.) Tiam sis yuav tsum ya kom mus ib ncig, ya mus rau lwm txoj kev, los sis tos kom txog thaum nag xob nag cua tu ua ntej yus tsaws nyab hoom.

Cov kwv tij thiab cov muam hluas, kuv xav pab nej “ya mus zoo” thaum muaj nag xob nag cua hauv lub caij nyoog kawg no. Nej yog cov kws tsav nyab hoom. Nej lav ris qhov uas nej yuav tsum xav txog tej yam uas yuav muaj los ntawm nej txhua txoj kev xaiv. Nug nej tus kheej, “Yog kuv xaiv li no, ces qhov phem tshaj plaws uas tej zaum kuv yuav raug yog dab tsi?” Nej tej kev xaiv ncaj ncees yuav pab nej kom txhob ua yuam kev.

Cia li xav txog qhov no: yog nej xaiv kom tsis txhob haus cawv, ces nej yuav tsis rais los ua ib tug neeg quav cawv! Yog nej xaiv kom tsis txhob tshuav nqi ib zaug li, ces nej yuav tsis tshua muaj cib fim poob nyiaj txiag tag nrho!

Ib lub hom phiaj ntawm cov vaj lug kub yog qhia peb tias cov neeg ncaj ncees ua li cas thaum lawv raug kev ntxias thiab kev phem. Lawv tiv thaiv kom txhob raug! Yauxej khiav ntawm Pautifas tus poj niam mus.³ Lihais coj nws tsev neeg tawm hauv Yeluxalees mus.⁴ Maivliag thiab Yauxej khiav mus rau Iyiv kom dim Helauj lub tom txwv phem.⁵ Txhua zaus, Leej Txiv Saum Ntuj Ceeb Tsheej ceeb toom cov ntseeg no. Ib yam nkaus li ntawd, Nws yuav pab peb paub puas tsim nyog tawm tsam, khiav, los sis ua raws li lwm tus ua thaum peb raug xwm txheej. Nws yuav hais lus rau peb dhau los ntawm kev thov Vajtswv, thiab thaum peb thov Vajtswv, peb yuav muaj tus Vaj Ntsuj Plig Dawb Huv, tus uas yuav coj peb kev. Peb muaj cov vaj lug kub, cov yaj saub tej lus, cov yawg suab zaj foom koob hmoov, cov niam tsev txiv tsev thiab cov thawj coj pov thawj hwj thiab koom haum pab tej lus ntuas, thiab qhov tseem ceeb tshaj, tus Ntsuj Plig lub suab yau yau.

Tus Tswv yeej yuav ua raws li Nws cog lus tias Nws yuav coj peb kev.⁶ Tsuas xav paub seb, peb puas txaus siab cia nws coj peb kev? Peb puas yuav mloog Nws lub suab thiab Nws cov tub qhe lub suab?

Kuv ua tim khawv hais tias yog nej mloog tus Tswv lus, Nws yeej yuav pab nej.⁷ Yog nej hlub Nws thiab ua raws li Nws tej lus txib, nej yuav muaj Nws tus Ntsuj Plig nrog nej nyob thiab coj nej kev. Cia li tso siab rau tus Ntsuj Plig uas coj mus ua qhov zoo. los ntawm qhov no nej yuav paub tias, txhua tsav txhua yam ... uas yog ntsig txog tej yam ntawm kev ncaj ncees.⁸

Vim tau hais txog tej lub ntsiab cai no ua ib lub hauv paus, thov cia kuv muab lus ntuas rau nej.

Nej feem coob hauv nej tiam tshuav nqi ntau tsis ntau. Thaum kuv yog ib tug tub hluas, kuv ceg txheem ntseeg tus thawj tswj hwm yog ib tug kwv tso nyiaj ua lag luam nyob ntawm Wall Street. Nws qhia kuv tias, “Koj nplua nuj yog tias koj zoo siab ua neej raws li koj muaj.” Yus yuav ua li cas? Cia li them ib feem kaum ces muab nyiaj tseg cia! Thaum nej tau ntxiv, cia li tseg cia ntxiv. Tsis txhob sib tw seb leej twg tau tej khoom kim dua. Tsis txhob yuav tej uas yus them tsis tau.

Ntau tus tub hluas ntxhais hluas nyob hauv lub ntiaj teb tshuav nqi kom kawm ntawv, ces lawv kawm tias tus nqi them kawm ntawv yeej loj tshaj lawv them tau. Cia li nrhiav nyiaj pab kawm ntawv thiab nyiaj pub kawm ntawv. Yog nej ua tau, cia li yuav hauj lwm ua ib nrab sij hawm kom pab them nqi. Yus yuav tsum ua kev txi kom ua tau li no, tiam sis qhov no yuav pab nej vam meej.

Kev kawm ntawv npaj nej muaj cib fim ua tej hauj lwm zoo dua. Kev kawm ntawv yuav pab nej muaj cib fim pab thiab foom koob hmoov rau lwm tus. Kev kawm ntawv yuav pab nej xav kawm tas ib sim neej. Kev kawm ntawv yuav txhawb nej lub dag zog kom tawm tsam kev txhaum. Raws li Yauxej Xamiv qhia: “Txoj kev txawj ntse pab tshem kev tsaus ntuj, kev ntshai thiab kev poob siab mus; vim cov no nyob tsis tau nrog txoj kev txawj ntse. … Dhau los ntawm txoj kev txawj ntse los muaj hwj chim.”⁹ Kev kawm txawj kawm ntse yog ib qho zoo yog lawv mloog Vajtswv tej lus qhuab qhia.¹⁰ Kev kawm ntawv yuav npaj nej rau yav tom ntej, tsis hais kev sib yuav los yog.

Thov cia kuv hais ncaj qha rau nej. Kom los txog txoj kev uas yog kev sib yuav, yus yuav tsum hla daim teb hu ua kev tham hluas nkauj hluas nraug! Kev tham hluas nkauj hluas nraug uas rau yus muaj cib fim sib tham ntev me ntsis. Thaum nej tham hluas nkauj hluas nraug, ib leeg yuav tsum kawm txhua yam txog ib leeg. Cia li kawm txog nws tsev neeg thaum nej ua tau. Nej lub hom phiaj puas sib haum? Nej puas xav zoo ib yam txog tej lus txib, tus Cawm Seej, lub pov thawj hwj, lub tuam tsev, kev ua niam tsev txiv tsev, tej hauj lwm hauv lub Koom Txoos, thiab kev pab lwm tus? Nej ib leeg puas saib ib leeg thaum muaj kev txhawj xeeb, muaj kev vam meej thiab ua yuam kev, tiv tau kom txhob npau taws, thiab kev kho teeb meem? Tus neeg uas nej tham puas rhuav lwm tus los yog txhawb nqa lawv? Nws tus cwj pwm thiab tej lus thiab tus yam ntxwv puas raws li nej yuav nyiam txhua hnub?

Hais li ntawd mas, tsis muaj leej twg uas yuav tus zoo tag nrho; peb xav yuav tus uas muaj peev xwm. Kev sib yuav uas zoo tsis yog nyob ntawm tej uas yus xav tau xwb; kev sib yuav nyob ntawm qhov uas nws—tus uas yuav ua yus tus khub—xav tau thiab xav kom ua neeg zoo li cas.

Kuv xav qhia meej hais tias, tsis txhob tham hluas nkauj hluas nraug thaum nej muaj 20 xyoo tawm kom “tau kev lom zem xwb,” thiab tsis yuav poj niam yuav txiv kom muaj sij hawm ua lwm yam nej xav ua. Vim li cas? Vim kev tham hluas nkauj hluas nraug thiab kev sib yuav tsis yog qhov kawg. Tej no yog tej uas qhib kev rau qhov chaw uas nej xav mus thaum kawg. “Twb yog vim li no tus txiv neej thiaj tso nws niam nws txiv tseg, thiab mus nrog nws tus poj niam nyob.”¹¹

Nej txoj kev lav ris tam sim no yog kev ua neeg tsim nyog yuav tus uas nej xav yuav. Yog nej xav yuav ib tug neeg uas neeg huv, zoo nkauj zoo nraug, ncaj ncees, zoo siab, txawj khwv ua hauj lwm, mloog tau sab ntsuj plig, cia li ua ib tug neeg zoo li ntawd. Yog tias nej twb yog ib tug neeg zoo li ntawd thiab tseem tsis tau sib yuav, cia li ua siab ntev. Cia siab tos ntsoov tus Tswv. Kuv ua tim khawv tias tus Tswv paub nej tej kev xav thiab hlub nej vim nej tso siab plhuav rau Nws. Nws muaj ib txoj hau kev rau nej, txawm yog hauv lub neej no los sis lub neej tom ntej los yog. Cia li mloog Nws tus Ntsuj Plig lus. “Tsis txhob nrhiav yuav qhuab ntuas tus Tswv, tiam sis txais lus qhuab ntuas los ntawm nws txhais tes.”¹² Nyob hauv lub neej no los sis lub neej tom ntej, yuav muaj raws li Nws tau cog lus rau nej. Yog nej npaj siab nej yuav tsis ntshai.¹³

Yog nej tsis muaj nyiaj ntau, los tsis txhob txhawj. Ib tug mej zeej hauv lub Koom Txoos zoo qhia kuv hais tias, “Kuv tsis tau muab nyiaj rau kuv me nyuam tu lawv; kuv muab kev ntseeg rau lawv.” Qhov no yog ib qho tseeb uas tseem ceeb. Cia li muab siab rau ntseeg ua txhua yam nyob hauv nej lub neej. Yog nej tsis ua li ntawd, nej txoj kev ntseeg yuav tsis muaj zog zuj zus. Lub zog uas nej yuav tsum muaj kom muab siab rau ntseeg ntshe yuav ploj mus. Yog li ntawd, cia li muab siab rau ntseeg txhua hnub, thiab nej yuav “loj hlob muaj zog me ntsis thiab me ntsis tuaj … thiab ruaj khov me ntsis thiab me ntsis tuaj [muaj] txoj kev ntseeg Khetos.”¹⁴

Yog nej xav npaj yuav txiv los sis yuav poj niam, ua tib zoo ua neej tsim nyog txais lub cim nco txog thiab muaj ib daim tso cai nkag tuam tsev. Ib sij mus rau lub tuam tsev. Cia li ua hauj lwm pab hauv lub Koom Txoos. Ntxiv rau ua hauj lwm hauv lub Koom Txoos, cia li ua raws li tus Cawm Seej tus yam ntxwv, tus uas “mus thoob plaws qhov txhia chaw ua tej hauj lwm zoo.”¹⁵

Tej zaum nej yuav muaj lus nug txog tej kev xaiv thaum yav tom ntej. Thaum kuv yog ib tug tub hluas, kuv xav txais lus ntuas los ntawm kuv niam kuv txiv, thiab los ntawm kuv cov thawj coj uas kuv tso siab rau. Ib tug yog ib tug thawj coj pov thawj hwj; lwm tus yog ib tug xib hwb uas ntseeg tias kuv yog ib tug neeg zoo. Nkawd ob leeg hais rau kuv tias, “Yog koj xav hnov kuv tej lus ntuas, cia li npaj siab ua li kuv hais.” Kuv to taub qhov ntawd txhais li cas. Cia li thov Vajtswv xaiv neeg los pab nej uas xav kom nej tau zoo ntawm sab ntsuj plig tiag tiag. Xyuam xim thaum nej cov phooj ywg qhia tswv yim rau nej. Yog nej xav muaj tswv yim ntau tshaj nej muaj tam sim no, cia li nug cov laus, tsis txhob nug cov phooj ywg xwb!¹⁶

Cia li nco ntsoov tias, tsis muaj leej twg txais tau kev ntuas rau koj. Tsuas yog nej txoj kev ntseeg thiab tej kev thov Vajtswv thiaj li yuav pab nej txhawb nqa nej tus kheej thiab hloov nej lub siab loj heev. Tsuas yog nej txoj kev rau siab mloog lus yuav hloov tau nej lub neej. Vim tus Cawm Seej theej nej lub txhoj, nej thiaj muaj lub hwj chim nyob hauv nej.¹⁷ Nej muaj kev ywj siab xaiv, nej muaj zaj lus tim khawv uas muaj zog yog nej mloog lus, thiab nej ua tau raws li tus Ntsuj Plig uas coj nej txoj hau kev.

Tsis ntev tas los, ib tug kws thaij nam uas yog ib tug tub hluas hais tias nws xav nws yog ib tug los ntawm “ib tiam neeg uas ua txhaum”—ib tiam neeg uas “nrhiav kev cia siab thiab kev xyiv fab thiab kev vam meej, tiam sis nrhiav hauv tej qhov chaw tsis yog thiab ua tej yam tsis yog.”¹⁸

Nyob hauv tus Cawm Seej zaj lus piv txwv txog tus tub ua txhaum, tus tub ntawd muaj cov koob hmoov ntau, tiam sis ua ntej nws txais tau tej ntawd, nws yuav tsum xav txog nws lub neej, tej yam uas nws tau xaiv, thiab tej xwm txheej. Qhov txuj ci uas cov vaj lug kub piav txog mas lub ntsiab nyob hauv ib kab lus xwb: “Nws tau nco dheev.”¹⁹ Kuv xav hais kom nej nco dheev. Nyob hauv lub Koom Txoos, thaum peb yuav tsum txiav txim siab txog tej yam tseem ceeb, ntau zaus peb muaj kev sib sab laj. Tsev neeg kev sib sab laj muaj ib lub hom phiaj zoo ib yam. Tej zaum nej yuav xav ua ib qho kuv hu ua “kev sab laj txog yus tus kheej.” Tom qab nej thov Vajtswv, siv sij hawm nyob nej tus kheej. Xav txog yav tom ntej. Nug nej tus kheej hais tis: “Kuv xav pab tej yam twg hauv kuv lub neej kom muaj zog kuv thiaj yuav txawj ntxiv dag zog rau lwm tus? Ib xyoos tom ntej kuv xav ua neeg zoo li cas? ob xyoos tom ntej thiab? Kuv yuav tsum xaiv ua dab tsi kom rais los ua neeg zoo li ntawd?” Cia li nco ntsoov tias, nej yog cov kws tsav nyab hoom, thiab nej tswj nej tus kheej. Kuv ua tim khawv hais tias thaum nej nco dheev, nej Leej Txiv Saum Ntuj Ceeb Tsheej yuav los cuag nej. Dhau los ntawm Nws tus Ntsuj Plig Dawb Huv txoj kev nplij siab, Nws yuav coj nej kev.

Kuv ua tim khawv hais tias Vajtswv muaj txoj sia nyob. Kuv ua tim khawv hais tias peb tus Cawm Seej hlub nej. “Peb yuav tsis mus lawm yav tom ntej nrog txoj hauj lwm uas tseem ceeb ua luaj no los? Mus lawm tom ntej txhob poob qab.”²⁰ Thaum nej nrog Nws mus, Nws yuav txhawb nej lub dag lub zog thiab txhawb nqa nej. Nws yuav coj nej mus rau nej lub tsev uas siab tshaj plaws. Los ntawm Yexus Khetos lub npe, amees.