2010–2019
Kuv lub Siab Xav Ntsoov txog cov Vaj Lug Kub
October 2015


Kuv lub Siab Xav Ntsoov txog cov Vaj Lug Kub

Kuv thov kom nej yuav xav txog Vajtwv txoj lus ntev dua li yav tas los.

Kuv txoj hauj lwm yog kev tso nyiaj ua lag luam. Kuv txoj kev ntseeg yog kev ua Yexus Khetos, Vajtswv Leej Tub, tus pab coj.1 Thaum kuv ua lag ua luam, kuv ua raws li tej ntsiab cai zoo txog nyiaj txiag. Thaum kuv teev ntuj, kuv sim ua raws li tej ntsiab cai ntawm sab ntsuj plig uas yuav pab kuv ua neeg zoo li tus Cawm Seej.

Kev Caw Coj Koob Hmoov Los

Tej lub nqi zog uas kuv tau txais nyob hauv kuv lub neej los feem ntau muaj los ntawm ib tug neeg txoj kev caw kuv ua ib qho nyuaj. Yog li ntawd, kuv xav muab ob txoj kev caw rau nej txhua tus. Txoj kev caw thib ib hais txog nyiaj txiag. Txoj kev caw thib ob hais txog sab ntsuj plig. Yog nej ua raws li ob txoj kev caw no, ces nej yuav tsum siv dag zog thiab siv sij hawm ntev me ntsis kom txais tau tej nqi zog.

Txoj Kev Caw thib Ib

Txoj kev caw thib ib yeej yooj yim ua: kuv caw nej tseg nyiaj cia txhua lub lim tiam. Nej tseg cia npaum li cas los tsis tseem ceeb; nyob ntawm nej. Thaum nej coj cwj pwm tseg nyiaj cia, nej yuav tau koob hmoov. Thiab tej zaum nej yuav muaj cib fim pab lwm tus vim nej rau siab ua li no. Cia li xav seb yuav zoo li cas yog nej tseg nyiaj cia tau rau lub hlis, ib xyoos, 10 xyoo, los sis ntxiv. Tej yam me me yus pheej ua thaum sij hawm dhau mus ces ua rau yus ua tau tej yam loj.2

Txoj Kev Caw thib Ob

Kuv txoj kev caw thib ob yeej txawv ntawm txoj kev caw thib ib thiab tseem ceeb dua. Yog li no: Kuv caw nej muab ib nqe vaj lug kub xav xeeb3 txhua lub lim tiam. Tsis muaj lo lus xav xeeb nyob hauv vaj lug kub, tiam sis lo lus no muaj nqi heev rau kuv. Yog li ntawd kev xav xeeb txhais li cas? Kuv nyiam hais tias kev xav xeeb yog 80 feem pua kev xav ntsoov thiab 20 feem pua kev cim xeeb.

Muaj ob qho yooj yim uas yus yuav tsum ua:

Qhov thib ib, xaiv ib nqe vaj lug kub txhua lub lim tiam thiab tso nqe ntawd rau ib qhov chaw uas koj yuav pom txhua hnub.

Qhov thib ob, cia li nyeem los sis xav txog nqe vaj lug kub ntawd ob peb zaug txhua hnub thiab xav txog nqe ntawd lub ntsiab thiab tej lus mus tas ib lim tiam.

Cia li xav seb yuav zoo li cas yog nej ua li no tau rau lub hlis, ib xyoos, 10 xyoo, los sis ntxiv.

Thaum ua li no, nej yuav haj yam hnov tau sab ntsuj plig. Nej kuj yuav txawj qhia thiab txhawb nqa cov uas nej hlub yam li muaj nqi heev.

Daim Duab
Ua luam dej

Yog nej xav xeeb txhua lub lim tiam, tej zaum nej yuav xav tias nej zoo li tus neeg uas nyiam ua luam dej thaum yav tas los tiam sis tam sim no yus xav sim ua hauv qab thu dej. Thaum nej txiav txim siab ua li no, nej yuav to taub txoj moo zoo tej ntsiab cai zoo dua thiab nej yuav muaj tswv yim ntawm sab ntsuj plig tshiab uas yuav foom koob hmoov rau nej lub neej.

Daim Duab
Ua luam dej hauv qab thu dej

Thaum nej xav txog nqe vaj lug kub uas nej xaiv txhua lub lim tiam, tej lus thiab tej kab lus yuav sau rau hauv nej lub siab.4 Yuav muaj tej lus thiab tej kab lus uas sau rau hauv nej lub cim xeeb. Los sis hais tias, yuav yooj yim rau nej cim ntsoov tej yam. Tiam sis lub hom phiaj tseem ceeb tshaj ntawm kev xav xeeb yog qhov uas yus xav kho ib qhov chaw rau yus tej kev xav mus—ib qho chaw uas yuav pab nej nyob ze tus Tswv tus Ntsuj Plig.

Tus Cawm Seej hais kom peb khaws tej lus cawm neeg txoj sia cia rau hauv peb lub siab kom cuag ncua.5 Kev xav xeeb yog ib txoj kev zoo thiab yooj yim ua li ntawd.

Kuv xav tias Nifais yog ib tug neeg nyiam xav xeeb. Nws hais tias, “Kuv nyiam cov vaj lug kub heev, thiab kuv lub siab xav ntsoov txog cov vaj lub kub [tsis tu tsis tseg], thiab sau cov no cia rau kuv tej me nyuam tau kawm thiab kom pab lawv.”6 Nws xav txog nws cov me nyuam thaum nws xav txog thiab sau cov vaj lug kub. Nej tsev neeg yuav tau kev pab li cas thaum nej siv zog xav txog Vajtswv tej lus tsis tu tsis tseg?

Kuv Nqe Vaj Lug Kub

Tsis ntev tas los kuv tau xav xeeb Amas 5:16. Nqe vaj lug kub no hais tias, “Kuv hais rau nej tias, nej puas xav tau hauv nej tus kheej tias nej hnov tus Tswv lub suab, hais rau nej, nyob rau hnub ntawd tias: Cia li los ntawm kuv nej cov uas tau koob hmoov, vim saib seb, nej tej hauj lwm tau yog tej hauj lwm uas ncaj ncees nyob hauv lub ntiaj teb no?”

Thaum lub lim tiam tag lawm, ces kuv nco ntsoov li no hais tias: Cia li xav tias koj hnov tus Tswv lub suab hais tias, “Cia li los ntawm kuv nej cov uas tau koob hmoov, vim saib seb, nej tej hauj lwm tau yog tej hauj lwm uas ncaj ncees” (Amas 5:16).

Nej pom tias, kuv tsis tau cim ntsoov txhua lo lus nyob hauv nqe vaj lug kub ntawd. Tiam sis, tej lub sij hawm kuv twb xav txog lub ntsiab ntawm nqe ntawd thiab kawm tias kuv yuav nrhiav tau qhov twg. Tiam sis qhov zoo tshaj ntawm tus txheej txheem no yog qhov uas kuv xav txog tej yam uas siab dua. Thaum lub lim tiam ntawd kuv xav tias tus Cawm Seej tau hais tej lus zoo kom txhawb nqa kuv. Qhov no tau tshoov kuv lub siab thiab ua rau kuv xav ua “tej hauj lwm ncaj ncees.” Yuav muaj li no thaum peb “ntsia ntsoov [Khetos] nrog txhua txoj kev xav.”7

Peb Yuav Tsum Tawm Tsam Kev Phem

Tej zaum nej xav nug hais tias, “Vim li cas kuv yuav tsum ua li no?” Kuv teb hais tias peb ua neej nyob hauv ib lub caij nyoog uas muaj kev phem loj zuj zus. Tsis tsim nyog uas peb txais tej yam uas ib txwm muaj los thiab tej lus phem thiab saib daim duab txhaum uas nyob qhov txhia chaw thiab peb tsis ua ib yam dab tsi. Peb yuav tsum tawm tsam tej ntawd. Thaum peb lub siab puv tej kev xav thiab tej daim duab zoo, ces peb “nco ntsoov txog nws,”8 ces tsis muaj chaw rau peb xav txog tej yam qias neeg.

Nyob hauv Phau Ntawv Maumoos, Yexus Khetos caw txhua tus, “ua tib zoo xav txog tej yam uas [Nws] tau hais.”9 Cia li siv txoj kev xav xeeb muab ntxiv rau nej thiab nej tsev neeg txoj kev kawm vaj lug kub, tiam sis tsis txhob siv kom pauv. Kev xav xeeb muaj ntsis zoo li ib lub vitamin uas nej noj nrog nej pluas mov ntawm sab ntsuj plig.

Nyuaj Dhau

Tej zaum nej yuav hais tias, “Kev xav xeeb mas ntshe nyuaj dhau rau kuv ua.” Tsis txhob ntshai. Nyuaj yog ib qho zoo. Khetos caw peb ua tej yam nyuaj ntau vim Nws paub tias peb yuav tau koob hmoov yog peb siv zog ua tej ntawd.10

Daim Duab
Nqe vaj lug kub hauv xov tooj

Ib tug neeg zej zog nrhiav tau ib txoj kev yooj yim kom xav xeeb. Nws muab nws nqe vaj lug kub tso rau ntawm thawj daim screen hauv nws lub xov tooj. Ib lub tswv yim ntxiv yog qhia nej nqe vaj lug kub rau ib tug muam, ib tug kwv tij, ib tug me nyuam, los sis ib tug phooj ywg. Kuv tus poj niam, Julie, thiab kuv wb ib leeg pab ib leeg. Txhua hnub Sunday wb xaiv ib nqe vaj lug kub. Nws tso nws li dai rau ntawm lub tub yees. Kuv tso kuv li nyob hauv kuv lub tsheb. Ces thaum lub lim tiam ntawd wb ib leeg qhia wb tej kev xav txog wb nqe vaj lug kub rau ib leeg. Wb kuj nyiam sib tham txog wb nqe vaj lug kub nrog peb cov me nyuam. Thaum wb ua li ntawd, ces zoo li lawv haj yam txaus siab qhia lawv tej kev xav txog Vajtswv txoj lus rau peb.

Daim Duab
Muam Durrant muab nqe vaj lug kub dai ntawm lub tub yees
Daim Duab
Tij Laug Durrant tso nqe vaj lug kub hauv lub tsheb

Julie thiab kuv wb kuj koom nrog ib pawg hauv Internet uas tsev neeg, cov phooj ywg, thiab cov tub txib qhia tau lawv tej nqe vaj lug kub txhua lub lim tiam thiab tej lub sij hawm wb yuav sau wb tej kev xav los sis wb zaj lus tim khawv. Qhov uas yus koom ib pawg zoo li ntawd ua yooj yim rau yus ua txhua zaus. Kuv tus ntxhais uas kawm high school thiab nws cov phooj ywg siv social media thiab kev ntaus ntawv text kom ib leeg qhia tau lawv tej nqe vaj lug kub rau ib leeg.

Daim Duab
Ib tug ntxhais hluas uas siv social media qhia txog nws nqe vaj lug kub

Tsis txhob ntshai qhia nej nqe vaj lug kub rau cov uas tsis ntseeg li peb nyob hauv nej tej pawg. Lawv kuj nrhiav tej yam uas yuav pab lawv txhawb nqa lawv tej kev xav thiab nyob ze Vajtswv.

Tej Nqi Zog Yog Dab Tsi?

Daim Duab
Muam Durrant kawm vaj lug kub

Yog li ntawd, tej nqi zog yog dab tsi? Julie thiab kuv wb tau xav xeeb txog ib nqe vaj lug kub txhua lub lim tiam tau peb xyoos lawm. Thaum wb pib, wb cuab hom phiaj yuav ua tau 20 xyoo. Tsis ntev tas los nws qhia kuv tias, “Thaum koj caw kuv xav xeeb ib nqe vaj lug kub txhua lub lim tiam tau 20 xyoo, kuv xav tias ntshe kuv ua tsis tau ib lub hlis. Kuv tsis xav li ntawd lawm. Kuv tsis tau xav tias yuv muaj kev lom zem muab ib nqe vaj lug kub dai rau ntawm lub tub yees txhua lub lim tiam thiab thaum kuv xav xeeb txhua zaus kuv pom nqe ntawd, ua rau kuv zoo siab.”

Tom qab wb xav xeeb tau rau lub lim tiam, ib tug muam los ntawm Texas, Teb Chaws Amelikas hais tias: “Kuv zaj lus tim khawv haj yam muaj zog, … thiab kuv xav tias kuv nyob ze dua rau kuv Leej Txiv Saum Ntuj Ceeb Tsheej. … Kuv nyiam qhov uas Vajtswv txoj lus hloov kuv lub siab kom kuv xav ua zoo dua.”

Ib tug tub hluas sau hais tias: “Kuv nyiam xav xeeb vim qhov no pab kuv tsom ntsoov rau tej yam uas tseem ceeb tiag tiag.”

Ib tug tub txib hais li no hais tias: “Kuv twb xav xeeb ib nqe vaj lug kub txhua lub lim tiam txij thaum lub Rau Hli Ntuj xyoo 2014 los, thiab kuv nyiam heev. … Cov vaj lug kub no yeej zoo li cov phooj ywg uas kuv tso siab rau thaum kuv xav tau.”

Hais txog kuv mas, kuv hnov tus Ntsuj Plig thaum kuv xav xeeb txhua lub lim tiam. Ua kuv haj yam nyiam cov vaj lug kub vim kuv cia kev tsim txiaj txhawb kuv tej kev xav kom tsis tu ncua.11

Cia li xav txog txoj kev caw thiab cov koob hmoov uas Nifais hais no hais tias: “Yog tias nej yuav thawb lawm tom hauv ntej, [mloog nkaus rau] Khetos tej lus, thiab tiv kom mus txog thaum kawg, saib seb, Leej Txiv hais li no tias: Nej yuav muaj txoj sia nyob mus ib txhis.”12 Txoj kev xav xeeb yeej zoo li yus noj cov mov qab heev ces yus maj mam zom kom txaus siab tshaj plaws.

Daim Duab
Ib tug poj niam noj zaub

Koj Nqe Yog Dab Tsi?

Nej puas kam xav xeeb ib nqe vaj lug kub txhua lub lim tiam tas lub hlis no? tas xyoo no nev? Tej zaum nej yuav kam ua ntev zog? Julie thiab kuv caw wb cov tub txib nyob hauv Texas Dallas kom lawv nrog wb xav xeeb tau 20 xyoo. Tshuav 17 xyoo xwb ces peb yuav ua tag lawm. Ces peb yuav cuab hom phiaj tshiab kom txhawb nqa peb tej kev xav thiab pab peb los nyob ze Khetos ntxiv.

Koj nug tau peb seb “Koj nqe vaj lug kub yog dab tsi?” Yog nej nug peb, cia li npaj siab qhia peb txog nej nqe vaj lug kub thiab. Ib leeg yuav txhawb nqa ib leeg thaum peb sib qhia li ntawd.

Nej puas paub nej lub neej thiab nej tsev neeg lub neej yuav hloov npaum li cas yog nej sau ib nqe vaj lug kub rau hauv nej lub siab txhua lub lim tiam tau ob peb hlis los yog ob peb xyoos los yog ntev zog?

Yexus Khetos Yog Peb tus Yam Ntxwv

Nyaj Yexus Khetos nyiam kawm vaj lug kub thaum nws tseem hluas. Nyaj nws tau nyeem thiab xav txog cov vaj lug kub thaum nws yog ib tug me nyuam nws thiaj yuav txawj sib tham nrog cov xib hwb nyob hauv lub tuam tsev thaum nws muaj 12 xyoo.13 Nws pib nws txoj hauj lwm thaum nws muaj 30 xyoo,14 thiab Nws tau hais txog vaj lug kub ntau heev thaum nws ua hauj lwm qhuab qhia.15 Tej zaum Yexus tau siv 20 xyoo kawm thiab xav txog cov vaj lug kub kom npaj rau nws txoj hauj lwm qhia txog txoj moo zoo. Puas muaj ib yam dab tsi uas nej yuav tsum ua hnub no kom npaj nej sab ntsuj plig rau tej cib fim yav tom ntej kom qhia thiab foom koob hmoov rau nej tsev neeg thiab lwm tus?

Muab Siab Rau Ntseeg thiab Ua Kiag

Kuv cia siab hais tias nej yuav tseg nyiaj cia txhua lub lim tiam. Muab siab rau ntseeg, tswj nej tus kheej, thiab ua kiag. Kuv kuj thov kom nej yuav xav txog Vajtwv txoj lus txhua lub lim tiam ntev dua li yav tas los. Muab siab rau ntseeg, tswj nej tus kheej, thiab ua kiag.

Tsis zoo li kuv txoj kev caw kom nej tseg nyiaj cia, tag nrho tej nqi zog ntawm kuv txoj kev caw thib ob kom cawm yus tus ntsuj plig mas nej tseg tau cia mus ib txhis—tsis muaj ntsaum kab rwg thiab xeb ntawm lub ntiaj teb no uas noj tau.16

Txwj Laug D. Todd Christofferson muab cov lus qhuab qhia thiab txoj kev cog lus no hais tias: “Cia li ua tib zoo kawm cov vaj lug kub. Xav txog thiab thov Vajtswv txog cov vaj lug kub. Cov vaj lug kub yog kev tshwm sim, thiab yuav ua rau nej txais tau kev tshwm sim ntxiv.”17

Lus Xaus

Kuv cog lus rau nej hais tias nej yeej yuav tsis khuv xim qhov uas nej sau ib nqe vaj lug kub rau hauv nej lub siab txhua lub lim tiam. Nej yuav hnov tau ib lub hwj chim ntawm sab ntsuj plig uas pov hwm nej tsis tu tsis tseg.

Cia li nco txog Yexus Khetos tej lus thaum Nws hais tias, “Ua tej uas nej tau pom kuv ua lawm.”18 Thov kom peb yuav rau siab muab Nws tej lus nruab rau peb lub neej, los ntawm Yexus Khetos lub npe, amees.