ចិត្តខ្ញុំរំពឹងគិតពីបទគម្ពីរទាំងនោះជារៀងរហូត
ដោយ ដេវិន ជី ឌើរ៉ាន់
ទីប្រឹក្សាទីមួយក្នុងគណៈប្រធានសាលាថ្ងៃអាទិត្យទូទៅ
ខ្ញុំសូមអធិស្ឋានដោយស្មោះសរថា អ្នកនឹងជ្រើសយកការពិចារណាលើព្រះបន្ទូលព្រះក្នុងលក្ខណៈមួយកាន់តែច្រើនឡើង និង ជ្រាលជ្រៅ ។
ខ្ញុំធ្វើការជាអ្នកវិនិយោគទុន ។ នៅក្នុងសាសនា ខ្ញុំគឺជាកូនសិស្សម្នាក់របស់ព្រះយេស៊ូវគ្រីស្ទ ព្រះរាជបុត្រានៃព្រះ ។១ នៅក្នុងមុខជំនួញរបស់ខ្ញុំ ខ្ញុំបានឱបក្រសោបយកគោលការណ៍ហិរញ្ញវត្ថុ ។ នៅពេលខ្ញុំរស់នៅតាមជំនឿរបស់ខ្ញុំ ខ្ញុំព្យាយាមធ្វើតាមគោលការណ៍ខាងវិញ្ញាណដែលនឹងជួយខ្ញុំឲ្យប្រែក្លាយដូចជាព្រះអង្គសង្គ្រោះ ។
ការអញ្ជើញនាំមកនូវពរជ័យ
ពរជ័យផ្ទាល់ខ្លួនជាច្រើនដែលខ្ញុំបានទទួលនៅក្នុងជីវិតនេះ ត្រូវបានប្រទានមកដល់ខ្ញុំតាមរយៈការអញ្ជើញរបស់បុគ្គលណាម្នាក់ដែលអញ្ជើញឲ្យខ្ញុំធ្វើនូវកិច្ចការលំបាកៗ ។ នៅក្នុងស្មារតីនោះ ខ្ញុំចង់ផ្តល់ការអញ្ជើញពីរដល់ពួកយើងគ្រប់គ្នា ។ ទីមួយគឺទាក់ទងនឹងហិរញ្ញវត្ថុ ។ ឯការអញ្ជើញទីពីរ គឺទាក់ទងនឹងកិច្ចការខាងវិញ្ញាណ ។ ប្រសិនបើព្រមទទួលយក ការអញ្ជើញទាំងពីរនេះ នោះនឹងតម្រូវឲ្យមានការដាក់វិន័យមួយរយៈពេលយូរ ដើម្បីច្រូតកាត់បាននូវរង្វាន់នោះ ។
ការអញ្ជើញទីមួយ
ការអញ្ជើញទីមួយគឺសាមញ្ញ ៖ ខ្ញុំសូមអញ្ជើញបងប្អូនឲ្យសន្សំប្រាក់រាល់សប្តាហ៍ ។ អ្នកសន្សំប៉ុន្មាននោះវាមិនសំខាន់ទេ គឺស្រេចតែលើអ្នក ។ នៅពេលបងប្អូនបង្កើនទម្លាប់សន្សំប្រាក់ នោះបងប្អូននឹងទទួលបានប្រយោជន៍ផ្ទាល់ខ្លួន ។ ហើយបងប្អូនក៏នឹងមានឱកាសជួយមនុស្សដទៃខាងផ្នែកហិរញ្ញវត្ថុផងដែរ ដោយសារតែភាពឧស្សាហ៍ព្យាយាមរបស់បងប្អូន ។ សូមស្រមៃគិតពីលទ្ធផលវិជ្ជមានដែលកើតមានពីការសន្សំប្រាក់រាល់សប្តាហ៍រយៈពេល ៦ ខែ ១ ឆ្នាំ ១០ ឆ្នាំ ឬ ច្រើនឆ្នាំជាងនេះទៀត ។ ការប្រឹងប្រែងបន្តិចបន្តួចក្នុងរយៈពេលយូរ អាចបង្កើតនូវលទ្ធផលដ៍ធំអស្ចារ្យ ។២
ការអញ្ជើញទីពីរ
ការអញ្ជើញទីពីររបស់ខ្ញុំគឺផ្ទុយស្រឡះ ហើយកាន់តែសំខាន់ជាងការអញ្ជើញទីមួយទៅទៀត ។ ការអញ្ជើញនោះគឺ ៖ ខ្ញុំសូមអញ្ជើញបងប្អូនឲ្យ « ពិចារណាឲ្យចាំ »៣ មួយខគម្ពីររាល់សប្តាហ៍ ។ ពាក្យថា ពិចារណាឲ្យចាំ ពុំមាននៅក្នុងវចនានុក្រមទេ ប៉ុន្តែវាមាននៅក្នុងដួងចិត្តរបស់ខ្ញុំ ។ ដូច្នេះ តើពិចារណាឲ្យចាំមានន័យដូចម្តេច ? ខ្ញុំចូលចិត្តនិយាយថា វាគឺជាការរួមផ្សំនូវការរិះគិតចំនួន ៨០ភាគរយ និង ការទន្ទេញចាំ ២០ភាគរយ ។
មានជំហានសាមញ្ញពីរ ៖
ទីមួយ សូមរើសខគម្ពីរមួយរាល់សប្តាហ៍ ហើយទុកវានៅកន្លែងណាដែលអ្នកនឹងឃើញវារាល់ថ្ងៃ ។
ទីពីរ សូមអាន ឬគិតពីខគម្ពីរនោះបួនប្រាំដងរាល់ថ្ងៃ ហើយរិះគិតពីអត្ថន័យនៃពាក្យពេចន៍ក្នុងខគម្ពីរនោះ និង ឃ្លាគន្លឹះពេញមួយសប្តាហ៍ ។
សូមគិតស្រមៃពីលទ្ធផលដ៏លើកស្ទួយខាងវិញ្ញាណ តាមរយៈការធ្វើកិច្ចការនេះប្រចាំសប្តាហ៍រយៈពេល ៦ខែ មួយឆ្នាំ ១០ ឆ្នាំ ឬច្រើនឆ្នាំជាងនេះទៀត ។
នៅពេលអ្នកធ្វើនូវកិច្ចការនេះ នោះអ្នកនឹងទទួលអារម្មណ៍កាន់តែរីកចម្រើនខាងវិញ្ញាណ ។ អ្នកក៏អាចបង្រៀន និង លើកស្ទួយដល់អស់អ្នកដែលអ្នកស្រឡាញ់ តាមរបៀបជាច្រើនដែលកាន់តែមានអត្ថន័យ ។
ប្រសិនបើអ្នកជ្រើសដើម្បីពិចារណាឲ្យចាំរាល់សប្តាហ៍ នោះអ្នកអាចមានអារម្មណ៍ថាកាលពីមុនអ្នកគ្រាន់តែជា មនុស្សម្នាក់ដែលចូលចិត្តហែលទឹកប៉ុណ្ណោះ តែឥឡូវបានសម្រេចចិត្តសាកល្បងហែលទឹកដោយពាក់បំពង់អុកស៊ីស្សែនវិញម្តង ។ ជាមួយការសម្រេចចិត្តនោះ ការយល់កាន់តែជ្រាលជ្រៅអំពីគោលការណ៍នៃដំណឹងល្អនឹងក្លាយជារបស់អ្នក និង ទស្សនវិស័យខាងវិញ្ញាណថ្មីៗនឹងប្រទានពរដល់ជីវិតអ្នក ។
នៅពេលអ្នករិះគិតពីខគម្ពីរដែលអ្នកបានរើសរាល់សប្តាហ៍ នោះពាក្យពេចន៍ និង ឃ្លានានានឹងចារនៅក្នុងដួងចិត្តរបស់អ្នក ។៤ ពាក្យពេចន៍ និង ឃ្លាទាំងនោះក៏នឹងចារនៅក្នុងគំនិតរបស់អ្នកផងដែរ ។ និយាយម្យ៉ាងទៀតថា ការទន្ទេញចាំនឹងកើតឡើងយ៉ាងងាយ និង ឯកឯង ។ ប៉ុន្តែគោលបំណងចម្បងនៃការពិចារណាឲ្យចាំគឺដើម្បីផ្តល់កន្លែងលើកស្ទួយមួយសម្រាប់គំនិតរបស់អ្នក—គឺកន្លែងមួយដែលរក្សាអ្នកឲ្យនៅជិតនឹងព្រះវិញ្ញាណនៃព្រះអម្ចាស់ ។
ព្រះអង្គសង្គ្រោះមានបន្ទូលថា « ចូររក្សាទុកក្នុងគំនិតរបស់អ្នករាល់គ្នា ជាបន្ត នូវព្រះបន្ទូលទាំងឡាយខាងជីវិតវិញ » ។៥ ការពិចារណាឲ្យចាំគឺជារបៀបមួយសាមញ្ញ និង ស្អាងឡើង ។
ខ្ញុំជឿថានីហ្វៃគឺជាអ្នកពិចារណាឲ្យចាំម្នាក់ ។ លោកបានថ្លែងថា « ព្រលឹងខ្ញុំត្រេកអរចំពោះបទគម្ពីរទាំងឡាយ ឯចិត្តខ្ញុំរំពឹងគិតពីបទគម្ពីរទាំងនោះ [ ជារៀងរហូត ] ហើយខ្ញុំក៏សរសេរទុក ដើម្បីជាការចេះដឹង និង ជាប្រយោជន៍ដល់កូនចៅខ្ញុំ » ។៦ លោកបានគិតគូរដល់កូនចៅរបស់លោក នៅពេលលោកបានពិចារណា និង សរសេរព្រះគម្ពីរ ។ តើគ្រួសារអ្នកអាចទទួលប្រយោជន៍តាមរបៀបណា នៅពេលអ្នក បន្តជានិច្ច ដើម្បីព្យាយាមបំពេញគំនិតរបស់អ្នកជាមួយនឹងព្រះបន្ទូលនៃព្រះនោះ ?
ខគម្ពីររបស់ខ្ញុំ
ថ្មីៗនេះខ្ញុំបានពិចារណាឲ្យចាំពី អាលម៉ា ៥:១៦ ។ វាអានថា «ខ្ញុំសូមសួរអ្នកថា តើអ្នករាល់គ្នាអាចរមិលមើលខ្លួនឯងថា អ្នករាល់គ្នាឮសំឡេងនៃព្រះអម្ចាស់ មានបន្ទូលទៅកាន់អ្នកក្នុងថ្ងៃនោះថា ៖ នែ៎ពួកជនដ៏មានពរអើយ ចូរមករកយើងចុះ ដ្បិតមើលចុះកិច្ចការទាំងឡាយរបស់អ្នករាល់គ្នាសុទ្ធសឹងជាកិច្ចការសុចរិតនៅលើផ្ទៃផែនដីនេះ ? »
នៅចុងសប្តាហ៍នោះ នេះគឺជាលទ្ធផលដែលបានចារនៅក្នុងគំនិតរបស់ខ្ញុំ ៖ សូមស្រមៃគិតពីការឮសំឡេងនៃព្រះអម្ចាស់មានបន្ទូលថា « នែ៎ពួកជនដ៏មានពរអើយ ចូរមករកយើងចុះ ដ្បិតមើលចុះ កិច្ចការទាំងឡាយរបស់អ្នក សុទ្ធសឹងជាកិច្ចការសុចរិត ? » (អាលម៉ា ៥:១៦) ។
ដូចអ្នកអាចឃើញ ថាខ្ញុំពុំបានទន្ទេញពាក្យមួយៗក្នុងខគម្ពីរទាំងមូលឡើយ ។ ប៉ុន្តែ ខ្ញុំបានពិចារណាម្តងហើយម្តងទៀតនូវធាតុសំខាន់នៃខគម្ពីរនេះ និង ទីតាំងដើម្បីរកឃើញវា ។ ប៉ុន្តែផ្នែកល្អបំផុតនៃដំណើរការនេះគឺថា ខ្ញុំមានចំណុចកាន់តែប្រសើរឡើងដើម្បីគិត ។ ពេញមួយសប្តាហ៍ខ្ញុំបានគិតស្រមៃពីព្រះអង្គសង្គ្រោះមានបន្ទូលលើកទឹកចិត្តដល់ខ្ញុំ ។ រូបភាពនោះបានដក់ជាប់ក្នុងដួងចិត្តខ្ញុំ ហើយបានបំផុសគំនិតខ្ញុំឲ្យចង់ធ្វើ « កិច្ចការសុចរិត » ។ នោះគឺអ្វីដែលអាចកើតឡើងនៅពេលយើង « មើលមកឯ [ ព្រះគ្រីស្ទ ] ដោយនូវគ្រប់ទាំងគំនិត » ។៧
យើងត្រូវតែវាយបកទៅវិញ
អ្នកអាចសួរថា « ហេតុអ្វីខ្ញុំគួរធ្វើបែបនេះ ? » ខ្ញុំនឹងឆ្លើយថា យើងកំពុងរស់នៅក្នុងគ្រាមួយនៃការសាបព្រោះអំពើអាក្រក់ជាប់ជានិច្ច ។ យើងពុំគ្រាន់តែទទួលយករបៀបនានាក្នុងពេលឥឡូវនេះឡើយ យើងថែមទាំងបានឮពាក្យស្មោកគ្រោក និង រូបភាពនៃអំពើបាបស្ទើរគ្រប់ទីកន្លែងដែលយើងទៅ ហើយពុំបានធ្វើអ្វីឡើយដើម្បីឆ្លើយតប ។ យើងត្រូវតែវាយបកទៅវិញ ។ នៅពេលគំនិតរបស់យើងបំពេញដោយគំនិត និង រូបភាពលើកតម្កើង នោះគឺនៅពេលយើង « ចងចាំទ្រង់ជានិច្ច »៨ គ្មានកន្លែងសម្រាប់ទុកគំនិតស្មោកគ្រោក និង លាមកឡើយ ។
នៅក្នុងព្រះគម្ពីរមរមន ព្រះយេស៊ូវគ្រីស្ទអញ្ជើញមនុស្សទាំងអស់ឲ្យ « ពិចារណាគិតអំពីរឿងទាំងឡាយដែល [ ទ្រង់បាន ] មានព្រះបន្ទូល » ។៩ សូមចាត់ទុកថា ការពិចារណាឲ្យចាំគឺជាល្បោយបន្ថែមលើការសិក្សាព្រះគម្ពីរផ្ទាល់ខ្លួន និង ជាមួយគ្រួសារ ប៉ុន្តែសុំកុំធ្វើវាជំនួសការសិក្សាទាំងពីរនេះឡើយ ។ ការពិចារណាឲ្យចាំគឺដូចជាថ្នាំវីតាមីនបន្ថែមលើម៉ោងសិក្សាពីសាសនាទៅលើរបបអាហារខាងវិញ្ញាណបច្ចុប្បន្នរបស់អ្នក ។
វាលំបាកពេក
អ្នកអាចវាចាថា « ការពិចារណាឲ្យចាំទំនងដូចជាលំបាកពេកចំពោះខ្ញុំ » ។ សូមកុំរុញរាឡើយ ។ កិច្ចការលំបាកអាចប្រែជាល្អវិញ ។ ព្រះគ្រីស្ទអញ្ជើញយើងឲ្យធ្វើកិច្ចការលំបាកៗ ដោយសារទ្រង់ដឹងថាយើងនឹងទទួលពរដែលវាជាលទ្ធផលនៃការខ្នះខ្នែងរបស់យើងនោះ ។១០
ក្មេងម្នាក់ជាអ្នកភូមិផងរបងនឹងយើង បានរកឃើញរបៀបសាមញ្ញមួយដើម្បីពិចារណាឲ្យចាំ ។ គាត់ដាក់កាលវិភាគអានព្រះគម្ពីរប្រចាំសប្តាហ៍របស់ខ្លួននៅលើអេក្រង់ទូរសព្ទ ។ យោបល់មួយផ្សេងទៀតដែលអ្នកអាចសាកល្បងនោះគឺ ចែកចាយខគម្ពីររបស់អ្នកជាមួយបងប្អូនបង្កើតខ្លួន ជាមួយកូន ឬ មិត្តភក្ដិ ។ ជូលី ភរិយាខ្ញុំ និង រូបខ្ញុំបានជួយគ្នាទៅវិញទៅមក ។ យើងជ្រើសយកខគម្ពីររៀងៗខ្លួនរាល់សប្តាហ៍ ។ គាត់ទុកខគម្ពីររបស់គាត់នៅលើទូរទឹកកក ។ ខ្ញុំដាក់ខគម្ពីររបស់ខ្ញុំនៅលើឡានដឹកទំនិញរបស់ខ្ញុំ ។ បន្ទាប់មកយើងចែកចាយគំនិតយើងអំពីខគម្ពីរនោះពេញមួយសប្តាហ៍តែម្តង ។ យើងក៏ចូលចិត្តពិភាក្សាខគម្ពីររបស់យើងជាមួយកូនៗយើងផងដែរ ។ នៅពេលយើងធ្វើដូច្នោះ វាហាក់បីដូចជាធ្វើឲ្យពួកគេកាន់តែមានភាពងាយស្រួល ដើម្បីចែកចាយគំនិតរបស់ខ្លួនជាមួយពួកយើងអំពីព្រះបន្ទូលនៃព្រះ ។
ជូលី និង ខ្ញុំក៏ជាផ្នែកមួយនៃក្រុមលើអ៊ិនធើរណែតដែលមានសមាជិកគ្រួសារ មិត្តភក្ដិ និង អ្នកផ្សព្វផ្សាយសាសនាដែលអាចចែកចាយខគម្ពីរ រួមទាំងគំនិតដែលទាក់ទងខគម្ពីរនោះ ឬ ថ្លែងទីបន្ទាល់របស់ខ្លួនរាល់សប្តាហ៍ និង យូរៗ ម្តង ។ ការធ្វើជាផ្នែកមួយនៃក្រុមនោះ ធ្វើឲ្យវាកាន់តែងាយស្រួលដល់យើងដើម្បីបន្តធ្វើវាជាប់លាប់ ។ កូនស្រីរបស់ខ្ញុំដែលរៀននៅវិទ្យាល័យ និង មិត្តភក្ដិរបស់នាងមួយក្រុម ប្រើប្រាស់ប្រព័ន្ធផ្សព្វផ្សាយសង្គម និង ផ្ញើសារដើម្បីចែកចាយខគម្ពីរជាមួយគ្នាទៅវិញទៅមក ។
សូមកុំរុញរាដើម្បីដាក់បញ្ចូលមនុស្សដែលមានជំនឿផ្សេងនៅក្នុងក្រុមរបស់អ្នកនោះឡើយ ។ ពួកគេក៏កំពុងស្វែងរករបៀបផ្សេងៗដើម្បីលើកតម្កើងគំនិត និង អារម្មណ៍របស់ខ្លួនឲ្យខិតកាន់តែជិតព្រះផងដែរ ។
តើមានប្រយោជន៍អ្វីខ្លះ ?
ដូច្នេះតើមានប្រយោជន៍អ្វីខ្លះទៅ ? ជូលី និង ខ្ញុំបានពិចារណាឲ្យចាំមួយខគម្ពីរក្នុងមួយសប្តាហ៍អស់រយៈពេលជាងបីឆ្នាំហើយមកដល់ពេលនេះ ។ យើងចាប់ផ្តើមដោយដាក់គោលដៅធ្វើវា ២០ឆ្នាំ ។ ថ្មីៗនេះគាត់បានប្រាប់ខ្ញុំ ៖ « នៅពេលដំបូងដែលបងបានអញ្ជើញអូនឲ្យពិចារណាឲ្យចាំមួយខគម្ពីររាល់សប្តាហ៍រយៈពេល ២០ឆ្នាំ នោះអូនបានឆ្ងល់ថា តើអូនអាចធ្វើវាបានដល់មួយខែដែរឬអត់ផង ។ អូនគ្មានមន្ទិលសង្ស័យបែបនោះទៀតឡើយ ។ អូនពុំជឿសោះថា វាពិតជាសប្បាយណាស់ដើម្បីដាក់ខគម្ពីរមួយនៅលើទូរទឹកកករាល់សប្តាហ៍ ហើយគ្រាន់តែពិចារណាវាគ្រប់ពេលដែលអូនឃើញវានោះ វាបានលើកស្ទួយវិញ្ញាណរបស់អូន » ។
បន្ទាប់ពីពិចារណាឲ្យចាំបានប្រាំមួយសប្តាហ៍ បងស្រីម្នាក់មកពីរដ្ឋ តិចសាសស.រ.អា.បានថ្លែង ៖ « ខ្ញុំមានចិត្តរឹងប៉ឹង … ហើយខ្ញុំមានអារម្មណ៍ខិតកាន់តែជិតព្រះវរបិតាសួគ៌របស់ខ្ញុំ ។ … ខ្ញុំចូលចិត្តពីរបៀបដែលព្រះបន្ទូលព្រះកំពុងតែផ្លាស់ប្តូរខ្លួនខ្ញុំឲ្យកាន់តែប្រសើរឡើង » ។
មិត្តភក្ដិវ័យក្មេងម្នាក់បានសរសេរ ៖ « ខ្ញុំពិតជារីករាយដែលអាច [ ពិចារណាឲ្យចាំ ] ពីព្រះគម្ពីរ ដោយសារវាបានជួយខ្ញុំឲ្យផ្តោតចិត្តលើកិច្ចការនានាដែលពិតជាសំខាន់ » ។
អ្នកផ្សព្វផ្សាយសាសនាម្នាក់របស់យើងបានចែកចាយ ៖ « ខ្ញុំបានពិចារណាឲ្យចាំមួយខគម្ពីររាល់សប្តាហ៍ ចាប់តាំងពីខែ មិថុនា ឆ្នាំ ២០១៤ ម្ល៉េះ ហើយខ្ញុំចូលចិត្តធ្វើវា ។ … ខគម្ពីរទាំងនេះបានក្លាយដូចជាមិត្តភក្តិ ដែលខ្ញុំអាចពឹងពាក់បាននៅពេលគ្រាត្រូវការ » ។
សម្រាប់ខ្ញុំវិញ ខ្ញុំមានអារម្មណ៍ពីព្រះវិញ្ញាណកាន់តែពោរពេញ នៅពេលខ្ញុំពិចារណាឲ្យចាំវារាល់សប្តាហ៍ ។ សេចក្តីស្រឡាញ់របស់ខ្ញុំចំពោះព្រះគម្ពីរបានកើនឡើង ដែលជាលទ្ធផលមួយនៃការព្យាយាមដើម្បី « ឲ្យគុណធម៌តុបតែងគំនិត [ របស់ខ្ញុំ ] ដោយឥតឈប់ឈរឡើយ » ។១១
សូមពិចារណាពីការអញ្ជើញនេះ និង ពរជ័យដ៏អស្ចារ្យដែលនីហ្វៃបានចែកចាយ ៖ « បើសិនជាអ្នករាល់គ្នាខិតខំជឿនទៅមុខ ដោយទទួលទាន នូវព្រះបន្ទូលនៃព្រះគ្រីស្ទ ហើយកាន់ខ្ជាប់ដរាបដល់ចុងបំផុត មើលចុះ នោះព្រះវរបិតាទ្រង់មានព្រះបន្ទូលដូច្នេះ ៖ អ្នករាល់គ្នានឹងមានជីវិតដ៏នៅអស់កល្បជានិច្ច » ។១២ នៅក្នុងស្មារតីនៃការ « ទទួលទាននូវព្រះបន្ទូលនៃព្រះគ្រីស្ទ » នោះការពិចារណាឲ្យចាំគឺដូចជាការខាំយកនូវអាហារដ៏ឆ្ងាញ់ពិសាមួយម៉ាត់ ហើយទំពាវាមួយៗ ដើម្បីរីករាយនឹងរសជាតិដ៏ឆ្ងាញ់បំផុតរបស់វា ។
តើខគម្ពីរណាខ្លះជារបស់អ្នក ?
តើអ្នកនឹងពិចារណាឲ្យចាំមួយខគម្ពីរក្នុងមួយសប្តាហ៍រហូតដល់ដាច់ខែនេះទេ ? រហូតដល់ដាច់ឆ្នាំនេះឬទេ ? ប្រហែលជាយូរជាងនេះទៀតឬទេ ? ជូលី និង ខ្ញុំបានអញ្ជើញអ្នកផ្សព្វផ្សាយសាសនាដ៏អង់អាចទាំងអស់របស់យើងនៅ តិចសាស ដាឡាស ឲ្យពិចារណាឲ្យចាំជាមួយយើងរយៈពេល ២០ឆ្នាំ ។ យើងនឹងឈានដល់ទីផ្តាច់ព្រ័ត្រជាមួយគ្នាក្នុងពេល ១៧ ឆ្នាំដ៏ឆាប់ខាងមុននេះ ។ បន្ទាប់មកទៀតយើងនឹងដាក់គោលដៅថ្មី ដើម្បីលើកស្ទួយគំនិតរបស់យើង ព្រមទាំងនាំយើងឲ្យខិតកាន់តែជិតព្រះគ្រីស្ទ ។
អ្នកអាចឆែកមើលយើងដោយសួរថា « តើខគម្ពីរណាខ្លះជារបស់អ្នក ? » ប៉ុន្តែប្រសិនបើអ្នកសួរដូច្នោះ សូមត្រៀមខ្លួនអ្នកចែកចាយខគម្ពីររបស់អ្នកវិញផងដែរ ។ យើងម្នាក់ៗនឹងត្រូវបានលើកស្ទួយមកពីលទ្ធផលនៃការផ្តោះប្តូររបស់យើងនោះ ។
អ្នកអាចគិតស្រមៃមើលថា តើជីវិតរបស់អ្នក និង គ្រួសារអ្នកនឹងផ្លាស់ប្តូរយ៉ាងណា ប្រសិនបើអ្នកចារខគម្ពីរថ្មីមួយនៅក្នុងដួងចិត្ត និង គំនិតរបស់អ្នករាល់សប្តាហ៍រយៈពេលពីរបីខែក្រោយទៀត ឬ ពីរបីឆ្នាំបន្ទាប់ទៀត ឬ ច្រើនឆ្នាំជាងនេះទៀតទេ ?
ព្រះយេស៊ូវគ្រីស្ទគឺជាគំរូរបស់យើង
ព្រះយេស៊ូវគ្រីស្ទបានបង្កើនសេចក្តីស្រឡាញ់ចំពោះព្រះគម្ពីរតាំងតែពីទ្រង់នៅក្មេង ។ ទ្រង់ប្រាកដជាបានអាន និង ពិចារណាខគម្ពីរតាំងតែពីក្មេង ដើម្បីមានការពិភាក្សាដ៏មានអត្ថន័យជាមួយពួកអាចារ្យនៅក្នុងព្រះវិហារបរិសុទ្ធកាលព្រះជន្ម ១២ ព្រះវស្សានោះ ។១៣ ទ្រង់បានចាប់ផ្តើមបេសកកម្មរបស់ទ្រង់នៅព្រះជន្ម ៣០ ព្រះវស្សា១៤ ហើយទ្រង់បានសិក្សាព្រះគម្ពីរតាំងតែពីវ័យក្មេង ហើយជាញឹកញាប់ពេញការបម្រើរបស់ទ្រង់ ។១៥ តើយើងពុំអាចនិយាយដោយស្រួលឬទេថា ព្រះគ្រីស្ទបានចំណាយពេលយ៉ាងហោចណាស់ ២០ឆ្នាំ ដើម្បីសិក្សា និង ពិចារណាព្រះគម្ពីរ ដែលជាផ្នែកមួយនៃការរៀបចំបេសកកម្មរបស់ទ្រង់ទេឬ ? តើមានអ្វីខ្លះដែលអ្នកត្រូវធ្វើថ្ងៃនេះដើម្បី ត្រៀមខ្លួនអ្នកខាងវិញ្ញាណសម្រាប់ឱកាសនានានាពេលអនាគត ដើម្បីបង្រៀន និង ប្រទានពរដល់គ្រួសាររបស់អ្នក និង មនុស្សដទៃ ?
អនុវត្តសេចក្តីជំនឿរបស់អ្នក ហើយចូរធ្វើវាចុះ
ជាការរំឭកឡើងវិញ ខ្ញុំសង្ឃឹមថាអ្នកនឹងសម្រេចចិត្តដើម្បីសន្សំប្រាក់រាល់សប្តាហ៍ ។ ចូរអនុវត្តសេចក្តីជំនឿរបស់អ្នក ចូរដាក់វិន័យដល់ខ្លួនអ្នក ហើយចូរធ្វើវាចុះ ។ ខ្ញុំក៏សូមអធិស្ឋានដោយស្មោះសរថា អ្នកនឹងជ្រើសយកការពិចារណាលើព្រះបន្ទូលព្រះក្នុងលក្ខណៈមួយកាន់តែច្រើន និង ជ្រាលជ្រៅរាល់សប្តាហ៍ ។ ចូរអនុវត្តសេចក្តីជំនឿរបស់អ្នក ចូរដាក់វិន័យដល់ខ្លួនអ្នក ហើយចូរធ្វើវាចុះ ។
ពុំដូចជាការអញ្ជើញទីមួយរបស់ខ្ញុំឲ្យ សន្សំប្រាក់ នោះទេ នោះគ្រប់ប្រយោជន៍នៃការអញ្ជើញទីពីររបស់ខ្ញុំឲ្យ សង្គ្រោះព្រលឹង នឹងក្លាយជារបស់អ្នកជារៀងរហូត—ដែលគ្មានកន្លាត និង ច្រែះស៊ីបំផ្លាញនៅផែនដីនេះឡើយ ។១៦
អែលឌើរ ឌី. ថត គ្រីស្តូហ្វឺសិន បានផ្តល់ការទូន្មាន និង ការសន្យាដ៏ច្បាស់នេះ ៖ « ចូរសិក្សាព្រះគម្ពីរដោយយកចិត្តទុកដាក់ ដោយមានចេតនា ។ សូមពិចារណា ព្រមទាំងអធិស្ឋានអំពីវា ។ ព្រះគម្ពីរគឺជាវិវរណៈ ហើយវានឹងនាំមកនូវវិវរណៈបន្ថែមទៀត » ។១៧
សេចក្ដីបញ្ចប់
ខ្ញុំសូមសន្យាថា អ្នកនឹងមិនស្តាយក្រោយឡើយ ក្នុងការចារខគម្ពីរមួយនៅក្នុងគំនិត និង ដួងចិត្តរបស់អ្នករាល់សប្តាហ៍ ។ អ្នកនឹងដកពិសោធន៍ពីអារម្មណ៍នៃគោលបំណង ការការពារ និង ព្រះចេស្តាខាងវិញ្ញាណជាបន្តបន្ទាប់ ។
ចូរចាំពីព្រះបន្ទូលនៃព្រះយេស៊ូវគ្រីស្ទ នៅពេលទ្រង់មានបន្ទូលថា « ធ្វើនូវអ្វីៗដែលអ្នករាល់គ្នាបានឃើញយើងធ្វើចុះ » ។១៨ សូមឲ្យយើងអាចអនុវត្តតាមព្រះបន្ទូលរបស់ទ្រង់ យ៉ាងពេញទំហឹង នៅក្នុងជីវិតរបស់យើង ខ្ញុំក៏សូមអធិស្ឋានដូច្នេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។