Mi Kurason ta Meditá [riba] Nan Kontinuamente

Hopi di e rekompensanan personal ku mi a risibí den bida a bini komo resultado ku un hende a invitá mi pa hasi un tarea difísil. Den e spiritu ei, lo mi gusta pa ekstendé na kada un di boso dos invitashonnan. Tur dos invitashon, si wòrdu akseptá, lo rekirí un esfuerso disipliná pa un período ekstendé di tempu pa kosechá e rekompensa.

E promé invitashon ta simpel: Mi ta invitá boso pa spar plaka kada siman. E suma ku bo ta spar no ta partikularmente signifikante; esei ta bo desishon. Segun bo ta desaroyá un kustumber di spar plaka, lo bo benefisiá personalmente. I bo tambe por tin oportunidatnan pa yuda otronan finansieramente komo un resultado di bo diligensia. Imaginá e resultado positivo di spar plaka kada siman pa seis luna, un aña, 10 aña, òf mas. Esfuersonan chikitu mantené riba tempu por produsí resultadonan signifikante.²

Mi di dos invitashon ta kompletamente diferente di i hopi mas importante ku e promé. E ta: Mi ta invitá boso pa “meditisᔳ un versíkulo di skritura kada siman. E palabra meditisá no ta den e dikshonario, pero el a haña un lugá den mi kurason. Anto kiko e ke min pa meditisá? Mi ta gusta bisa ku e ta un kombinashon di 80 porshento meditá i 20 porshento memorisá.

Tin dos stap simpel:

Promé, skohé un versíkulo di skritura kada siman i pon’é un kaminda unda bo por mir’é kada dia.

Di dos, lesa i pensa riba e versíkulo vários biaha kada dia i meditá e nifikashon di su palabranan i frasenan klave durante e siman.

Imaginá e resultado elevá di hasi esaki kada siman pa seis luna, un aña, 10 aña, òf mas.

Segun boso ta hasi e esfuerso aki, boso lo sinti [boso] spiritualidat oumentá. Boso tambe lo ta kapas pa siña i hisá esnan boso ta stima den maneranan ku mas nifikashon.

Imagen

Snòrkel

Si boso ta skohé pa meditisá semanal, boso por sinti un tiki manera un persona kende a disfrutá snòrkel den pasado i awor a disidí pa purba sambuyá. Ku e desishon ei, un komprendementu mas profundo di prinsipionan di evangelio lo ta di boso i un perspektiva spiritual nobo lo bendishoná boso bida.

Imagen

Sambuyá

Ora boso reflehá riba e versíkulo selekshoná kada siman, palabranan i frasenan lo wòrdu skirbí riba boso kurason.⁴ Palabranan i frasenan tambe lo wòrdu skirbí riba boso mente. Ku otro palabra, memorisá lo tuma lugá fásilmente i naturalmente. Pero e meta primario di meditisá ta pa proveé un lugá elevá pa boso pensamentunan bai—un lugá ku ta mantené boso serka e Spiritu di Señor.

E Salbador a bisa, “Tesorá den boso mente kontinuamente e palabranan di bida.”⁵ Meditisá ta un manera simpel i edifikante pa hasi djis esei.

Mi ta kere Nefi tabata un meditisadó. El a bisa, “Mi alma ta deleitá den e skrituranan, i mi kurason ta meditá nan [kontinuamente], i ta skirbi nan pa e instrukshon i probecho di mi yunan.”⁶ E tabata tin su yunan na mente ora el a meditá i skirbí e skrituranan. Kon boso famia lo por probechá ora boso kontinuamente trata di yena boso mente ku e palabranan di Dios?

Resientemente mi a meditisá Alma 5:16. E ta bisa, “Mi ta bisa boso, boso por imaginá boso mes ku boso ta skucha e bos di Señor, bisando na boso, den e dia ei: Bini na ami [bosonan bendishoná, pasobra mira, boso obranan tabata e obranan di hustisia riba e superfisio di e tera?”

Na e fin di e siman, esaki tabata loke a kaba di ta skirbí riba mi mente: Imaginá e stèm di Señor bisa, “Bini na ami bosonan bendishoná, pasobra mira, boso obranan tabata e obranan di hustisia.” (Alma 5:16).

Manera boso por mira, mi no a memorisá henter e versíkulo palabra pa palabra. Sinembargo, mi a meditá tempu tras tempu atrobe e elementunan klave di e versíkulo i unda pa hañ’é. Pero e parti mihó di e proseso tabata ku mi tabatin un lugá mas haltu pa mi pensamentunan bai. Durante e siman mi a imaginá e Salbador bisa palabranan ku ta enkurashá na mi. E imágen ei a toká mi kurason i a sirbí pa inspirá mi pa ke hasi “obranan di hustisia.” Esei ta loke por pasa ora nos “wak na [Cristu] den kada pensamentu.”⁷

Boso por bisa, “Dikon mi mester hasi esaki?” Mi lo kontestá ku nos ta bibando den un temporada unda maldat ta plamá tur kaminda. Nos no por djis akseptá e status quo i wòrdu alimentá palabranan mahos i imágennan pekaminoso kasi tur kaminda nos ta bira i hasi nada komo kontesta. Nos mester bringa bèk. Ora nos mentenan ta yená ku pensamentunan i imágennan elevá, ora nos “semper kòrda riba djE,”⁸ no tin lugá mas pa sushi i basura.

Den e Buki di Mormon, JesuCristu ta invitá nos tur pa “meditá riba e kosnan ku [E] a bisa.”⁹ Wak na meditisá komo un kos èkstra na bo studio di skritura personal i familiar, pero nunka laga e ta un remplaso. Meditisá ta kasi manera agradá un vitamina nobo na boso dièta spiritual aktual.

Boso por bisa, “Meditisá ta zona muchu duru pa mi.” No laga esaki deskurashá bo. Duru por ta bon. Cristu ta invitá nos pa hasi hopi kosnan duru pasobra E sa ku nos lo wòrdu bendishoná komo resultado di nos esfuersonan.¹⁰

Imagen

Skrituranan riba telefon

Un bisiña yòn di nos a haña un manera simpel pa meditisá. E ta pone su skritura semanal riba e home screen di su telefon. Un otro idea boso por purba ta kompartí boso versíkulo ku un ruman, un yu, òf un amigu. Mi kasa, Julie, i ami ta yuda otro. Nos ta skohé nos versíkulo kada Djadumingu. E ta pone esun di dje riba nos frishidèr. Mi ta pone esun di mi den mi trùk. Anto nos ta kompartí pensamentunan tokante nos versíkulonan durante e siman. Nos tambe ta gusta diskutí nos versíkulonan ku nos yunan. Ora nos ta hasié, e ta parse ku e ta mas fásil pa nan pa kompartí nan pensamentu ku nos tokante e palabra di Dios.

Imagen

Hermana Durrant poniendo skritura riba frishidèr

Imagen

Hermano Durrant poniendo skritura den truk

Julie i ami tambe ta parti di un grupo riba Internèt den kua miembronan di famia, amigunan, i misioneronan por kompartí nan skritura kada siman i tin biaha inkluí un pensamentu òf testimonio relashoná. Pa ta parti di un grupo ta hasié mas fásil pa ta konsistente. Mi yu muhé hóben i un grupo di su amigunan ta usa ret sosial i manda mensahenan di teksto pa kompartí skrituranan un ku otro.

Imagen

Muhé hóben kompartiendo skritura riba ret sosial

Por fabor no basilá pa inkluí hendenan di otro religion den boso grupo. Nan tambe ta buskando pa maneranan pa elevá nan pensamentunan i pa sinta mas serka di Dios.

Imagen

Ruman Durrant studiando e skrituranan

Anto, kiko ta e benefishinan? Julie i ami a meditisá un versíkulo kada siman pa mas ku tres aña awor. Inisialmente, nos a pone un meta pa 20 aña. El a bisa mi resientemente: “Ora bo a invitá mi promé pa meditisá un skritura kada siman pa 20 aña, mi a puntra mi mes si mi lo por a hasié pa un luna. Mi no tin e dudanan ei mas. Mi no por kere kon prèt e tabata pa pone un skritura riba e frishidèr kada siman i djis pa meditis’é kada biaha mi ta mir’é, e ta hisá mi spiritu.”

Despues di a meditisá pa seis siman, un ruman for di Texas na Merka a bisa: “Mi testimonio a wòrdu fortalesé, … i mi a sinti mi mas serka di mi Tata Selestial. … Mi ta stima kon e palabra di Dios ta kambiá mi pa e mihó.”

Un amigu hóben a skirbí: “Mi a disfrutá realmente di por a [meditisá] pasobra e ta yuda mi pa enfoká riba kosnan ku ta realmente importante.”

Un di nos misioneronan a kompartí esaki: “Mi tabata meditisando un versíkulo kada siman desde yüni 2014, i mi ta gust’é. … E skrituranan ei a bira manera amigunan ku mi por dependé riba nan den tempunan di nesesidat.”

Den mi kaso, mi ta sinti e Spiritu mas kompleto ora mi ta meditisá semanal. Mi amor pa e skrituranan tambe a oumentá komo resultado di tratando pa “laga virtut engalane [mi] pensamentunan insesantemente. ”¹¹

Konsiderá e invitashon i bendishon supremo aki kompartí pa Nefi: “Si boso pusha dilanti, alimentando boso ku e palabra di Cristu, i perseverá te na fin, ata ki, asina e Tata ta bisa: Boso lo tin bida eterno.”¹² Den e spiritu di “alimentando riba e palabra di Cristu,” meditisá ta manera tuma un tiki di kuminda dushi i anto kou masha slo mes pa asina disfrut’é kompletamente.

Imagen

Muhé gosando un salada

Lo boso meditisá un versíkulo di skritura kada siman pa e restu di e luna aki? Pa e restu di e aña? Por ta mas largu? Julie i ami a invitá tur e balente misioneronan di Texas Dallas pa meditisá ku nos pa 20 aña. Nos lo krusá e liña final aki djis 17 aña. Anto nos lo pone un meta nobo pa elevá nos pensamentunan i tresé nos mas serka di Cristu.

Boso por chèk riba nos dor di puntra, “Kiko ta bo versíkulo?” Pero si boso ta has’é, ta prepará pa kompartí ku nos boso skritura tambe. Kada un di nos lo ta elevá komo un resultado di nos kambio.

Boso por imaginá kon boso bida i e bida di boso famia lo wòrdu kambiá si boso ta skirbí un versíkulo nobo di skritura riba boso kurason i mente kada siman pa e siguiente par di lunanan òf par di añanan òf mas largu?

JesuCristu mester a desaroyá un amor pa e skrituranan na un edat yòn. E mester tabata lesando i meditando e skrituranan komo un mucha yòn pa por a tin diskushonnan ku nifikashon ku e dòktornan sabí den e tèmpel tempu e tabatin 12 aña.¹³ El a kuminsá su mishon na edat di 30,¹⁴ i El a referí na e skrituranan trempan i hopi biaha durante Su ministerio.¹⁵ Nos lo no por bisa ku siguransa ku Jesus a gasta por lo ménos 20 aña studiando i meditando e skrituranan komo parti di Su preparashon misional? Tin algu ku boso mester hasi awe pa prepará boso mes spiritualmente pa oportunidatnan futuro pa siña i bendishoná boso famia i otronan?

Pa repasá, mi ta spera boso lo disidí pa spar plaka kada siman. Ehekutá boso fe, disipliná boso mes, i hasié. Mi tambe ta resa sinseramente boso lo skohé pa meditá Dios su palabranan den un manera ekstendé i mas profundo riba un base semanal. Ehekutá boso fe, disipliná boso mes, i hasié.

Diferente ku mi promé invitashon pa spar plaka, tur e benefishinan di mi di dos invitashon pa salba boso alma lo ta di boso pa semper—liber for di e mòtnan i frus di e mundu aki.¹⁶

Elder D. Todd Christofferson a ofresé e konseho i promesa klaro aki: “Studia e skrituranan kuidadosamente, deliberadamente. Meditá i resa ofer di nan. Skrituranan ta revelashon, i nan lo tresé revelashon agregá.”¹⁷

Mi ta primintí boso ku lo boso no lamentá skirbí un versíkulo di skritura riba boso mente i kurason kada siman. Boso lo eksperensia un sentimentu di propósito, protekshon, i poder spiritual perpetuo.

Kòrda e palabranan di JesuCristu ora El a bisa, “Hasi e kosnan ku bo a wetami hasi.”¹⁸ Ku nos kompletamente ta apliká Su palabranan den nos bida, mi ta resa den e nòmber di JesuCristu, amèn.