Mohngiongi Kin Poaden Douloalli Mepwukat
By Devin G. Durrant
Sounsawas Keieu nan Presidensi Lap en Santi Skuhl
I ngidingid kapakapki me kumwail pahn pilada douloalih mahsen en Koht nan wihk koaros.
Ahi doadoahk, I kin wia soun nekinek men. Nan mwomwohdiso, ngehi emen tohnpadahk en Sises Krais, Sapwellimen Koht.1 Nan koasoandihkan en ahi doadoahk, I kin idawehn kosonned kan me pid mwohni. Ni ahi momourki ahi pwoson, I kin nantiong idawehn kosondihkan en ngehno me pahn sewese ie en duwehla Sounkomouro.
Luhk kan Kin Wahdo Kapai kan
Kapai tohto me I alehier nan ahi mour kin pwaradahsang en emen tohrohr ah luke ie ien wia mehkoat apwal. Nin duwe met, I men kiong emen emen kumwail luhk riau. Keieun luhko pid mwohni. Keriau en luhko pid duwen pali ngehn. Pwe kumwail en kak ale wahn luhngko, kumwail anahne kanengamahkihla ansou reirei ehu.
Luhk Keieu
Keieun luhko me mengei. I luke kumwail en nekidala mwohni wihk koaros. Kumwail me pahn pilada uwen mwohni me kumwail pahn nekidala. Ni amwail ahnlahr nekidala, kumwail pahn diar kamwahupe. Kumwail pil kak diar ansou mwahu en sewese ekei pwehki sang ni amwail ngoang. Medewe uwen mwohni me kak dierek sang amwail kin wie nekinek wihk koaros mwurin sounpwong 6 [weneu], sounpahr ehu, sounpar 10 [eisek] de reireisang.2
Luhk Keriau.
Ahi Keriaun luhko weksang oh kesemwpwalasang keieun luhko. Ih met. I luke kumwail en “ponderize”3 ehu irehn pwuhk sarawi nan ehu wihk. Lepin pato ponderize sohte kin dierek nan diksenari, ahpw mie dewe nan ahi mohngiong. Eri ia wehwehn ei pahn ponderize? I men nda me e wiawihkihda persent 80 [welihsek] douloalli oh persent 20 [rieisek] wadlikiala.
Wiepe mengei riau mie:
Keieu, pilada ehu irehn pwuhk sarawi nan ehu wihk oh pwilikihdi wasa me kumwail pahn kilekilang rahn koaros.
Keriau, wadek de medewe ireho pangkei ehu rahn oh douloallih wehwehn lokaiah kan oh mour en ireho nan erein wihko.
Medewe uwen kamarain me pahn dierek sang amwail wiewia met wihk koaros mwurin sounpwong 6 [weneu], sounpar ehu, sounpar 10 [eisek], de reireisang.
Ni amwail wiewia met, kumwail pahn kehn keirdahn pali ngehn. Kumwail pahn kak, ni wehwe mwahu, kasukuhli oh pwekada irail kan me kumwail pokepoke.
Ni amwail tepda ponderize ni wihk kan, kumwail pahn ele duwehla aramas emen me kin pereniki pampapki mehn esingek mahs ah met e uhd kin duh loalki denk. Koasondi wet pahn kapaiahda amwaul mour ni amwail wehwehkihla mehlel duwen mour kapw wet.
Ni amwail kin medewe irehkan me kumwail pilada nan ehu wihk, lepin mahsen kan pahn tengala nan amwail mohngiong.4 Lepin mahsen kan pil pahn tengala nan mangomwail. E pahn mengei ong kumwail en wadlikiala. Ahpw kahrepe keieu en ponderizing iei en ropada wasa mwahu ehu me amwail madamadau kak uhlang ie—wasa ehu—me kumwail kak karanih Ngehn en Kauno.
Sounkomouro masanih, En poaden tamataman mahsen kan en mour.5 Ponderizing kamangaiala kitail en kapwaiahda mahseno.
I kamehlel me Nephi kin ponderize. E nda “ngeni kin perenkihda mehkan me pid Kauno oh mohngiongi kin poaden] medemedewe, oh intingihdi irail ong mehn wia kaiahn oh kapai ong nei serihkan.”6 E kin tamtaman nah serihkan ni eh kin medewe oh ntingi pwuhk sarawi. Ia mwoamwen amwail peneinei pahn paiekihda amwail kin poaden nantiong audaudki mahsen en Koht.?
Ahi Ireho
Mekeren I ponderize Alma 5:16. E mahsani, “I indahiong kumwail, dah, kumwail kak lemehiong me pein kumwail me rongada kepitien Kauno, me pahn mahseniong kumwail rahno: Kohdo rehi kumwail me kapaidahr akan, pwe kilang, amwail doadoahk kan iei me doadoahk pung kan nan sampah?”
Ni imwin wihko, iet me ntindi nan ahi madmadau ni imwio: Medewe wie rongorong kepitien Kauno mahsani, “Kohdo rehi kumwail me kapaidahr akan, pwe kilang, amwail doadoahk kan iei me doadoahk pwung kan”(Alma 5:16).
Kumwail kak kilang me I sohte wadlikiala ireho pwon. Ahpw, I medemedewe pangkei ire kesemwpwal akan en nan ireho oh ia wasa kak dierek ie. Ahpw ihme keieu mwahu, ahi tungoal madmadau deila. Nan erein wihko I lemlemehiong me Sounkomouro mamahsenihong ie mahsen en kakehlail kei. Kilelo sair ahi mohngiong oh kamarainihkin ie ien men wia doadoahk mwahu kan. Ihmet me kin wiawi ma kitail kin kilekilanglahng Krais nan atail madmadau koaros.7
Kitail AnahnePelian
Kumwail kak idek, “Dahme I anahneki wia met?” I pahn sapengki me kitail wie momour nan ansou ehu me direkihlahr tepelo. Kitail sohte kak itarkihla dahme miehier oh alahle kosoi oh kilel suwed kan kereniong wasa koaros ah kitail ahpw sohte wiahiong mehkoat. Kitail anahne pelian. Ni ansou me atail madmadau direkihla madmadau oh kilel mwahu ni atail kin kalap taman Ih,8 solahr wasa me suwed oh samin kak pedelong ie.
Nan Pwuken Mormon, Sises Krais ketin luke koaros en douloallih mehkan me Eh mahsanier.9 Ale ponderizing oh kapatahiong en amwail peneinei kan kin kaskuhlki pwuhk sarawi, ahpw dehr mweidong en weliandi. Ni soangen mwoahmwohte, ponderizing duwehte amwail ale paidamin oh kapatahiong mehn ketihnain ong pali ngenomwail.
E Inenen Apwal
Kumwail kak nda, Ponderizing inenen apwal ong ie. Dehr pweiek. Mehkoat apwal kak wia mehkoat mwahu. Krais luke kitail en wia mehkoat apwal tohto pwe E ketin mwahngi me kitail pahn ale kapai sang atail doadoahk.10
Mehn mpat pwulepwul men diarada wiepe mengei ehu en ponderize. E kin ntingihdi ah irehn wihko pohn nah delepwohno. Pilehu wiepe me kumwail kak soang ehukiong amwail ireho rehn emen riomwail, emen seri de emen kempoakepomwail. Ahi pwoud Julie, oh ngehi kin sawaspene. Se kin pilada aht irehko rahn Sarawi. E kin kapasahda ah ireho ni nait aispwokso. I kin pwilikihdi ahi ireho nan sidohsao. Kiht eri kin koskosoiapene audepen aht irehko nan erein wihko. Se pil kin kosoiaiong nait serihko aht irehko. Ni aht wia met, e kin mengeiongla nait serihko en kin ehukihda arail madmadau me pid mahsen en Koht.
Ngehi oh Julie pil iang ehu pwihn en tohn peneinei, kempoakepat oh misineri kan kin ehukipene nan internet aht irehkan wihk koaros oh ekei ansou pil iangahki ire tohrohr kan oh kadehde. Iangala ehu pwihn kin kamangaiala en kaukaule. Nei serepein me ieiang ahiskuhl oh ah pwihn en kempoakepehkan kin doadoangki soshial media oh sell pwohn pwe ren ehukihpene arail irehkan.
Menlau dehr peikasalki ale tohn ehu mwomwohdiso tohrohr en iang amwail pwihnko. Irail pil kin raprapahki elen arail kak kadaiala arail madmadau oh karanih Koht.
Ia Katepe kan?
Eri, ia katepe kan? Julie oh ngehi kin ponderize ih ehu ire nan ehu wihk ki erein sounpar ehr silu samwa. Ni tapio, se kosoanehdi en lel sounpar 20 [rieisek]. Me kerente e nda, ni ansou me ke nda kita en ponderize ih irehn pwuhk sarawi wihk koaros ki sounpar 20 [rieisek] I mwur medewe ma I pahn kak lel sounpwong ehu. I solahr ahneki peikasalo. I sohte kamehlele uwen ahi peren ni ahi kin kapasahda ehu ire ni aispwokso ni ehu wihk oh ponderize ih ansou koaros me I kin kilang, e kin kamarainih iehda.
Mwurin ah ponderize ki wihk weneu, emen lih sang Texas nda: Ahi kadehde kehlaillahr, … oh I kehn me I karanih Semei Nanleng. … I perenkihda uwen mahsen en Koht ah wekidala ahi mour ong me mwahu.
Emen me pwulepwul ntingi: I inenen perenki ei kak ponderize pwe e sewese iedahr en kak nsenohki mehkan me inenen kesemwpwal.
Emen nait misinerihko ehukihda met: I kin ponderize ehu ire wihk koaros sangete Suhn 2014 oh I perenki mehlel. … Irehn pwuhk sarawi pwukat wialahr kempoakepahi me I kin koapwoaroapwoarki ni ansou apwal.
Ong ie, I kin kehn me Ngehno kin kadirehla ahi mour ni ahi kin ponderize wihk koaros. Ahi perenki irehn pwuhk sarawi kan kekeirkihda ahi kin nanantiong en kapidelong me mwahu nan ahi madmadau ansou koaros.11
Medewe duwen luhk wet oh kapai mwuledek me Nephi ehukidahr: “Ma kumwail pahn nantihla mwowe, pereniki mahsen en Krais, oh dadaurete lel imwi, kilang iet me Sahmo mahsaniher: Kumwail pahn ahneki mour soutuk.”12 Nin duwen “pereniki mahsen en Krais,” ponderizing duwehte ahmw ngalis ehu kisin mwenge iou oh kapw rukoruko wawai pwe ken kak alehdi wasa iou koaros.
Ia Ahmw Irehn?
Kumwail kak ponderize ehu irehn pwuhk sarawi nan ehu wihk ki sounpwong ehu? Lel ni imwin pahr wet? De reireisang? Julie oh ngehi lukehier nait misineri pwerisek koaros nan Dallas, Texas en iang kiht ponderize ki sounpar 20 [rieisek]. Se pahn pwonte kotehla sahlo nan irair en sounpar mwotomwot 17 [eisek isuh]. Kiht eri pil pahn kosoanehdi ehu kilel me pahn kadaiala aht madmadau oh wai kihtla rehn Krais.
Kumwail kak dawih kiht oh idek, Ia ahmw irehn? Ahpw ma kumwail pahn wia met, kumwail onopada ehukihda amwail irehkan. Kitail koaros pahn kehlailkihda atail ehukihpene atail irehko.
Kumwail kak dawih kiht oh idek, Ia ahmw irehn? Ahpw ma kumwail pahn wia met, kumwail onopada ehukihda amwail irehkan. Kitail koaros pahn kehlailkihda atail ehukihpene atail irehko.
Sises Krais Iei Atail Karasaras
Sises Krais mwein mwadangete perenkihla pwuhk sarawi ni eh pwulepwulte. E mwein kin wadwadek oh medmedewe irehn pwuhk sarawi kan ni Eh wiahte seri pwehn kak wia mahsen kapwuriamwei ong toahkte ko nan tehnpas sarawio ni Eh sounar te 12 [eisek riau].13 E tapiada sapwellime misin ni eh sounpar 30 [silihsek],14 oh E kin kalap mahsaniada irehn pwuhk sarawi kan nan erein Sapwellime rongamwahuo.15 Kitail kak kosoia ni mehlel me Sises ketin onopki on douloalli pwuhk sarawi ki sounpar 20 [rieisek] pwehn kaunopada ong Sapwellime rongamwahuo? Mie mehkoat me kumwail anahne wia rahn wet pwe kumwail en kaunopada pali ngenomwail en kak kasukuhl oh kapaiada amwail peneinei oh mehteikan?
Doadoahngki Amwail Pwoson oh Wia Met
Pwehn kapwurehiong, I koapwoaroapwoarki me kumwail pahn nekidala mwohni wihk koaros. Kakehlaka amwail pwoson, kainene kumwail oh wia met. I pil ni ngidingid kapakapki kumwail en pilada douloalli mahsen en Koht ni mehlel ki ansou ehu nan wihk koaros. Kakehlaka amwail pwoson, kainene kumwail, oh wia met.
Ni eh weksang ahi keieu en luhk me pid nekneklahn mwohni, kapai koaros me alahldi sang ahi keriaun luhk en komouro oh nekidala wasa me mer oh loangenmwet en sampa sohte kin kawehla.16
Elder D. Todd Christofferson patohwenda kaweid oh inou wet: Onopiki irehn pwuhk sarawi kan ni keneinei. Douloalli oh kapakapki irehkan. Irehn pwuhk sarawi wia kaudial kei, oh re pahn kihda kaudial mehlel.17
Kaimwsekala
I inouki me kumwail sohte pahn kaulimkihla amwail katengehdiong nan amwail madmadau oh mohngiong ehu irehn pwuhk sarawi nan ehu wihk. Kumwail pahn pehm kehlaillahn pali ngenomwail, soanamwahu, oh roson.
Tamataman mahsen en Sises Krais ni Eh mahsani, Wia mehkan me kumwail kilangehr me I kin wia.18 I kapakapki kitail en kapwaiahda ni unsek Sapwellime mahsen kan nan atail mour, ni mwaren Sises Krais, amen.