Tej Kev Tseeb uas Yooj Yim To Taub thiab Muaj Nuj Nqi
Los ntawm Txwj Laug Gary E. Stevenson
Los ntawm Pawg Kaum Ob tug Thwj Tim
Leej Txiv Saum Ntuj Ceeb Tsheej qhov koob hmoov rau lub caij uas muaj kev ntxhov siab heev yog qhov uas peb muaj cib fim los nyob hauv lub caij uas muaj txhij txhua.
Kuv cov kwv tij thiab cov muam, twb tau ntau xyoo txij thaum muaj lub tuam rooj sab laj uas tsis muaj Thawj Tswj Hwm Boyd K. Packer thiab Txwj Laug L. Tom Perry thiab Richard G. Scott zaum ntawm lub sam thiaj no thiab hais lus hauv ib tuas rau lub rooj sab laj no. Peb yeej muaj ntau yam kev xav txog lawv, thiab kuv los xav hwm lawv, nyias muaj nyias tus cwj pwm tiam sis yeej tau sib koom ua tim khawv thiab hais lus pov thawj txog Yexus Khetos thiab Nws txoj Kev Theej Txhoj.
Tsis tas li ntawd xwb, zoo li nej sawv daws, kuv tau dag zog los ntawm thiab yeej txhawb nqa Thawj Tswj Hwm Thomas S. Monson ua tus yaj saub, tus pom tau, thiab tus txais kev tshwm sim, thiab kuv xav tsis thoob txog nws txoj kev rau siab ntseeg thiab kev rau siab ua hauj lwm ua ib tug thwj tim tau 50 xyoo los lawm.
Yog li ntawd hnub Tuesday sawv ntxov lub lim piam no, thaum 9:00 moos sawv ntxov, thaum Pawg Npis Sov tab tom sab laj nrog Asia Cheeb Tsam Pawg Thawj Tswj Hwm uas los nyob no rau lub rooj sab laj no, lawv hu kuv mus ntsib Thawj Tswj Hwm Monson, thiab nws ob tug pab cuam. Ob peb feeb tom qab ntawd, thaum kuv mus hauv chav tsev ze ze nws lub hoob kas, kuv zaum tsis tswm xeeb li, ces nws hais lus zoo zoo los pab nplij kuv siab. Nws hais tias zoo nkaus li kuv hluas heev, hais qhia seb kuv muaj hnub nyoog li cas, thiab hais tias kuv lub ntsej muag yeej hluas tshaj kuv lub hnub nyoog.
Ces ob peb feeb tom qab ntawd, Thawj Tswj Hwm Monson piav hais tias nws los ua hauj lwm sawv cev rau tus Tswv ces, xav hu kuv los ua hauj lwm ua ib tug hauv Pawg Kaum Ob tug Thwj Tim. Nws nug seb kuv puas kam ua txoj hauj lwm no, tom qab kuv huas pa nrov nrov, vim kuv xav tsis thoob kiag li, kuv teb hais tias kuv mam li ua. Thiab ces, ua ntej kuv muaj cai hais txog ntau yam kev xav uas los rau hauv kuv lub paj hlwb, uas feem ntau yog tej kev xav tias kuv tsis tsim nyog, Thawj Tswj Hwm Monson piav ntxiv, txog ntau ntau xyoo tas los lawm thaum Thawj Tswj Hwm David O. McKay hu nws los ua ib tug Thwj Tim thiab, lub sij hawm ntawd nws los xav tias nws tsis tsim nyog thiab. Nws ua tib zoo hais tias, “Npisov Stevenson, tus Tswv yeej yuav pab cov uas Nws hu kom lawv yuav tsim nyog txaus.” Tus yaj saub cov lus no tau ua rau kuv muaj kev thaj yeeb nyab xeeb, tau pab kuv nyob ntsiag tos hauv txoj kev muaj kev ntxhov siab thaum ntsuam xyuas kuv tus kheej thiab tej kev xav hauv kuv nruab siab txij thaum ntawd los.
Hnub ntawd thaum ib tsam tsaus ntuj, kuv tau los piav tias muaj xwm dab tsi rau kuv tus khub, Lesa, thaum wb mus zaum ua ke hauv Tshav Tuam Tsev, nyob ntawd wb ntsia lub tuam tsev thiab lub Tsev Kheej. Thaum wb sim xav seb tau muaj xwm dab tsi hnub ntawd, wb pom hais tias wb nyob ruaj khov vim yog wb txoj kev ntseeg Yexus Khetos thiab qhov uas wb paub txog txoj kev cawm seej. Ua li kuv thiaj xav qhia kuv txoj kev hlub rau Lesa. Nws yog qhov kaj hauv kuv lub neej thiab yog Vajtswv ib tug ntxhais tsim txiaj kawg. Hauv nws lub neej nws ib txwm tsis qias dub thiab muab kev hlub dawb paug rau sawv daws. Kuv pheej yuav sim ua neeg uas tsim nyog tau koob hmoov vim wb yuav nyob ua ke tas mus ib txhis.
Kuv xav qhia kuv txoj kev hlub rau wb plaub tug tub thiab lawv tsev neeg, peb tug ntawd nyob hauv no nrog lawv tus poj niam, cov niam rau wb rau tus me nyuam xeeb ntxwv; tus tub thib plaub, uas ua tub txib, tau kev tso lus tshwj xeeb kom nyob lig lig dhau cov tub txib tej kev cai thiab tab tom saib lub rooj sab laj no nrog nws tus thawj tswj hwm rau qhov chaw tshaj tawm txoj moo zoo thiab nws tus poj niam nyob hauv nkawd lub tsev tim Suav teb. Kuv hlub lawv txhua tus thiab nyiam qhov uas lawv hlub tus Cawm Seej thiab txoj moo zoo no.
Kuv xav qhia kuv txoj kev hlub rau txhua tus neeg hauv kuv tsev neeg: rau kuv niam thiab kuv txiv, uas tso lub neej no tseg xyoo tas los lawm, nkawd tau pab kuv tau kuv zaj lus tim khawv uas kuv yeej muaj txij thaum kuv me me los. Kuv kuj xav qhia txoj kev ris txiaj no rau kuv tus tij laug, cov muam, thiab lawv tus khub uas rau siab ntseeg thiab rau Lesa tsev neeg, hnub no lawv coob leej tuaj koom nrog peb thiab. Kuv xav hais ua tsaug rau tag nrho kuv tsev neeg, cov phooj ywg, cov tub txib, cov thawj coj, thiab xib hwb hauv kuv lub neej.
Kuv muaj hmoov vim kuv tau nrog cov mej zeej hauv Thawj Pawg Thawj Tswj Hwm, Pawg Kaum Ob tug, Pawg Xya Caum thiab cov tuam koom haum pab tej pawg thawj tswj hwm sib raug zoo ntau. Kuv xav qhia kuv txoj kev hlub thiab xav qhuas nej cov muam thiab cov kwv tij no thiab tseem xav nrog nej sib raug zoo mus lawm tom ntej. Thawj Pawg Npisov yeej sib koom ib lub siab li nyob saum ntuj ceeb tsheej. Kuv yuav nco qhov uas txhua hnub nrog Npisov Caussé thiab Npisov Davies, thiab lwm cov neeg ntawd sib txuas lus.
Kuv sawv ntawm nej, ua ib tug neeg tim khawv txog tus Tswv cov lus uas tau sau tseg hauv tshooj ib hauv Phau Lus Qhuab Qhia thiab Kev Khi Lus hais tias: “Cov uas qaug zog thiab cov uas tsis yog neeg txawj ntse yuav tshaj tawm tag nrho txoj moo zoo rau tag nrho lub ntiaj teb, rau cov vaj ntxwv thiab cov nom tswv.”1 Cov lus no raug sau tseg ua ntej tus Tswv txoj lus tshaj tawm uas qhia txog Leej Txiv txoj kev hlub rau Nws cov me nyuam uas hais tias tus Tswv paub ntsoov tias yuav muaj kev kub ntxhov li cas hauv ntiaj teb no, Nws thiaj hu Nws tus tub qhe Yauxej Xamiv tus Hluas, thiab tau hais lus saum ntuj ceeb tsheej los rau nws, thiab tau muab lus txib rau nws.2
Peb Leej Txiv Saum Ntuj Ceeb Tsheej thiab Nws tus Tub, Yehauvas, vim nkawd paub qhov pib tawm ntawm qhov kawg,3 tau qhib rooj ntug thiab ib lub caij nyoog tshiab kom los tawm tsam tej kev kub ntxhov uas Nkawd paub hais tias yuav los. Tus Thwj Tim Pov Lauj piav txog tej kev kub ntxhov hais tias yog tej “kev ntxhov siab heev.”4 Rau kuv mas, qhov no hais tias Leej Txiv Saum Ntuj Ceeb Tsheej qhov koob hmoov rau lub caij uas muaj kev ntxhov siab heev yog qhov uas peb muaj cib fim los nyob hauv lub caij uas muaj txhij txhua.
Lub lim piam no thaum kuv pheej tsim txom kuv tus kheej tej kev qaug zog, kuv tau ib txoj kev tshoov siab uas muaj ntsis cem kuv thiab nplij kuv siab tib si; uas hais kom kuv tsis txhob xav ntau ntau txog tej yam uas kuv tsis txawj ua tiam sis kom xav txog tej uas kuv muaj peev xwm ua. Kuv muaj cai hais lus pov thawj txog tej kev tseeb meej meej thiab muaj nuj nqi heev hauv txoj moo zoo.
Cov lus uas kuv tau hais ntau pua zaus rau cov neeg hauv lub Koom Txoos thiab coob tug neeg uas tsis tau yog mej zeej hais tias: “Vajtswv yeej yog peb Leej Txiv Saum Ntuj Ceeb Tsheej [uas hlub peb]. Peb yog Nws cov me nyuam. … Nws los kua muag thaum twg peb txom nyem thiab zoo siab heev thaum peb ua qhov yog. Nws xav nrog peb sib txuas lus, thiab peb muaj cai nrog Nws sib txuas lus thaum peb mob siab thov Vajtswv. …
“Leej Txiv Saum Ntuj Ceeb Tsheej tau muab rau peb, cov uas yog Nws cov me nyuam, ib txoj hau kev … uas pab tau peb rov qab mus nrog Nws nyob ua ke dua. … Qhov tseem ceeb tshaj plaws hauv peb Leej Txiv Saum Ntuj Ceeb Tsheej txoj hau kev yog Yexus Khetos txoj Kev Theej Txhoj.”5
Leej Txiv Saum Ntuj Ceeb Tsheej tau xa Nws Tib Leeg Tub los nyob hauv ntiaj teb no yuav theej noob neej sawv daws tej kev txhaum. Kuv hais lus tim khawv txog tej qhov tseeb uas yooj yim to taub thiab muaj nuj nqi no thiab kuv hais li no los ntawm Yexus Khetos lub npe, amees.