Ma Sacohk ac Pwacye uh

Tamuhlwel ac tahmtahel sacohk, e ke toeni luhlahp se orek ma Prestuhn Boyd  K. Packer, Elder L.  Tom Perry kuh Elder Richard  G. Scott elos tiacna muhta tukun podium uh ac sramsram ke toeni se inge. Esam lasr kaclos uh arulacna yohk ke puhlakihnyac uh, ac nga wi kaksahkuhnuhlos, kais sie selos siena tuhsruhk ma sefanna ke mwe lohoh ac luhlahlfongi lalos ke Jisus Kraist ac Iwaclah Lal.

In wi ma inge, nga, oacna kowos, konwacack kuh kac ac tahpuhk Prestuhn Thomas S. Monson in ekihn sie mwet pahluh, mwet liyactwen, ac mwet in eis fwackyuck se, ac nga fwefwelac ke kuhlwacnsap luhlahlfongi ac oaru lal oacna mwet sap ke ke lusen yac 50.

Ac ohinge ke Tuste tari ah ke wik se inge, tukunna ao 9:00 ke lututacng ke Pisaprik ah muhtwacwacack miting sie yurin Prestuhnsi luhn Asia Area, suc oasr inge ke toeni uh, nga tuh pahngonyuck in ohsun nuh sel Prestuhn Monson, wi pac mwet in kahsruh lal. Kihtin pacl tohkoh, ke nga fahsr utyak nuh in boardroom ma sisken office lal ah, nga tuh sahp luhman tuhfal ke nga muhta lacyacn sahyac ke tepuh ah, mweyen el sramsram arlac kuhlwacng in ahkmihsye tuhfal luhk. El fahk, siyuck matwuck, lah nga luhman fuhsr na ac luhman fuhsr liki pacna matwuck.

Na, tukun kihtin na pacl, Prestuhn Monson el ahkuhtweyac nuh sihk muh el mukwikwi ke kena luhn Leum, ac sie pahng nuh ke U luhn Mwet Singucul Luo uh tahfweyuckme nuh sihk. El siyuck sihk lah nga e insese nuhke kunohkohn se inge, nuhke ma, tukun nga mongyak ke lut ac, fwefwelac na, nga topuk ahok. Na, met liki nga kuh in ahkkahlwemye ke kahs puhlakihn inge nuhkwewa ma nga puhla uh, inkaiyac uh muh nga puhla suhfal, Prestuhn Monson el nuh sihk tahfwema ke kuhlwacng, ahkuhtweyac ohiyac ma el tuh pahngonyuck oacna Mwet Sap ke yac puhs somlah sin Prestuhn David O. McKay, ke pacl sacn el puhla muh el suhfallac na . El ahkuhtweyac arlac efahllah nuh sihk, “Pisap Stevenson, Leum El ac fah ahkwoye mwet suc El pahngon uh.” Kahs in ahkweye inge sin mwet pahluh uh arlac kahsrweyuc in mihslac, sie mwe ahkmihsye ke pahkah luhn nuhnak ke nuhnuhnkweyuc sifacna ac puhla ke pacl kweok na upac tohkohyang suc sunyuc ke lwen ac fong e ke pacl sac.

Nga fahk ma nga tuhfahnna ahkuhtweyac nuh suwos nuh sin muhtwacn wowo kiyuck, Lesa, tohkohyang ke lwen sac, ke kuht muhta ke sie acn mihs ke Tempuhl Square, ke sie yen ngwetngwet mihs ke tempuhl ac yen ahktucktuck mahtuh oan met liki kuht. Ke kuht srihke in kahlwem kac ac nuhnkuh ke ma sikyak ke lwen sac, kuht konwacack muh kuh lasr pa luhlahlfongi lasr ke Jisus Kraist ac etwacack lasr ke plwacn wolacna luhn engan uh. Ma inge kol nuhke mwe fahkwack ke luhngse na yohk luhk nuh sel Lesa. El pa orwaclah engan in moul luhk uh ac sie acn na wowo nuhtin God. Moul lal uh akihlenyuck ke kuhlwacnsap tiac srohwohsr ac luhngse tiac eklac na nuh sin mwet nuhkwewa. Nga fah kampare in moul nwacsnwacs na in fal nuhke mwe insewowo luhn pahyuck ma pahtpaht lasr uh.

Nga fahkwack luhngse yohk luhk nuh sin mukul ahkohsr nahtuhsr ac sucu lalos, suc tolu selos oasr ngwe yurin muhtwacn kahto kiyaclos, ninac kiyacn tuhlihk ohnkohsr nuhtin nahtuhsr; tuhlihk se ahkahkohsr uh, sie misineri, el lwelah in ngwetngwet in fong na ahluhkwelah pacl fal luhn misineri ac el liye toeni se inge ingena yurin misin prestuhn lal ac muhtwacn kiyacl ke lohm sin misin lalos ke acn Taiwan. Nga luhngse kais sie selos ac luhngse ohiyacn luhngse lalos nuh sin Mwet Lahngo ac wosasuc uh.

Nga fahkwack luhngse luhk nuh sin kais sie mwet in sucu luhk: nuh sin ninac sacohk kiyuck ac pahpah tuhmuhk, suc misac ke yac tari ah, suc kahsrweyuc in eis luhlahlfongi se suc oan na yuruk e ke esam luhk emet ah. Nga tahfwelah pac srui se inge nuh sin tamuhlwel wiyuck, tahmtahel wiyuck, ac muhtwacn ac mukul tuhmwaclos ah, ac oacyacpac sucu lal Lesa, pucs selos suc wi toeni mihsenge uh. Nga sang pac kuloh nuh sin sucu pucspucs sahyac, kawuck, misineri, mwet kol, ac mwet luti suc nga tuh sun ah.

Nga tuh ahkinsewowoyeyuck ke kuhpahsr fototo yurin mempucr ke Prestuhnsi Se Met, Mwet Singucul Luo ah, Mwet Itngucul, ac prestuhnsi luhn u srihsrihk uh. Nga fahkwack luhngse luhk ac kaksak nuh suwos kais sie tahmtahel ac tamuhlwel ac fah kampare in moul fal nuh ke kuhpahsr kalweniyuck lasr uh. Pisaprik ma Karihngihn uh engankihn kuhpahsr ma apkuhran na ma muhtahl se. Nga fah ahsrwelah sie sin sie luhk penga na lwen yorol Pisap Caussé ac Pisap Davies.

Nga tu ye motowos in ahkpwacyei ma Leum El fahk ke El fahk muh fohnlah luhn wosasuc uh ac fah fwackwelihk sin mwet muhnahs ac fihsrwacsr nuh fin facluh nohfohn, ac ye muhtuhn tohkohsrah ac mwet kol fuhlwact.” ¹ Kahs inge fwack tukun mwe fahkwack ma Leum el orwaclah ma ahkkahlwemye luhngse luhn Pahpah uh nuh sin tuhlihk Nahtuhl: “Ke ohinge, Nga Leum, ke nga etuh ma upac ma fah orek nuh sin mwet muhta facluh uh, tuh pahngon mwet kuhlwacnsap Luhk Joseph Smith, ac sramsram nuh sel inkuhsrao me, ac sang nuh sel ma sap uh. ²

Pahpah luhngse tuhmasr Inkuhsrao ac Wen Nahtuhl, Jehovah, suc ma etuh ma uh ke muhtwacwacack nwe ke sahflah uh, ³ ikacslah inkuhsrao ac fihl sasuc in kahsruh ke ma upac ma Elos etuhlah efah tuhkuh. Mwet Sap Paul el ahkuhtweyac ma upac tuhkuh tohkohyang ohinge “paclongaiyac luhlahp ” uh.⁴ Nuh sihk, ma inge oruh nga in nuhnkuh lah mwe insewowo yohk luhn Pahpah Lucng ma tuhkuh ke srihpen kuht muhta ke pacl ongaiyac luhlahp uh kuht oacyacpac muhta ke fohnlah luhn pacl uh.

Ke nga kweoklac ke ma suhfal luhk ke wik se inge, nga puhlahkuhnwack pihrihkyuck na suwohs ke nuhnak se suc kwewa na kaiyuc ac ahkmihsyeyuc: in lohacng tiac nuhke ma nga tiac kuh in oruh tuhsruhk nuhke ma nga kuh in oruh. Nga kuh in fahkwack luhlahlfongi ke ma pwacye fihsrwacsr ac sacohk luhn wosasuc.

Pa inge kuhtuh kahs ma nga tuh fahk foko pacl nuh sin kwewa na mwet suc mempucr luhn Alu uh ac oacyacpac puhs suc tiac mempucr: “God El Pahpah tuhmasr Inkuhsrao. Kuht tuhlihk Natuhl. … El wi tuhngi ke pacl kuht kweok ac enganwack ke kuht oruh ma pwacye. El ke sramsram nuh sesr, ac kuht kuh in sramsram nuh Sel ke pruhe pwacye. …

Pahpah tuhmasr Inkuhsrao el acse nuh sesr, tuhlihk Nahtuhl, sie inkacnek in … fohlohk nuh ye Muhtahl. …Ke plwacn luhn Pahpah tuhmasr [Inkuhsrao] uh pa ke Iwaclah luhn Jisus Kraist.”⁵

Pahpah Lucng El suhpwacma Wen Nahtuhl nuh facluh in iwaclah ke ma koluk luhn mwet nuh kwewa ac in kuhtanglah misac. “Tuh God El luhngse facluh ohinge: El acse Wen sefanna nahtuhl.” Ke inen Jisus Kraist, amen.