Bèrdatnan Simpel i Presioso

Kerido rumannan, ta hopi dékada ku un konferensha general a keda tené ku Presidente Boyd K. Packer i e Èldernan L. Tom Perry i Richard G. Scott no tabata sintá dirèkt patras di e podio i a papia den un di e seshonnan. Nos rekuerdonan di nan ta konmovedor, i mi ta rindi tributo na nan. Kada un di nan tabata diferente, pero asina uní komo testigu i den nan testimonio di JesuCristu i Su Ekspiashon.

Ademas, ami, meskos ku boso, ta haña fortalesa den i o sostené Presidente Thomas S. Monson komo profeta, vidente i reveladó, i mi ta asombrá pa su fieldat i servisio apostóliko dediká pa mas ku sinkuenta aña.

I asina tabata riba djamars mainta e siman aki, djis despues di nueb’or di mainta, ora e obispado tabata kuminsando un reunion ku e e presidente di aria di Asia, ku ta aki pa e konferensha, ku mi a wòrdu yamá pa Presidente Monson, huntu ku su konseheronan. Algun momentu despues ora mi a kana drenta e sala banda di su ofisina, mi mester tabata parse nervioso sintá na e mesa, pasó el a papia amabel tratando di kalma mi nervionan. El a komentá, notando mi edat, ku mi ta hopi yòn i asta parse mas yòn ku mi edat.

E ora ei, despues di un ratu kòrtiku, Presidente Monson a deskribí ku aktuando konforme bondat di Señor, el a ekstendé un yamamentu pa e Quorum di e Diesdos Apòstelnan na mi. El a puntra mi si lo mi aseptá e yamamentu aki, i despues di loke tabata parse un ”halamentu di rosea indigno, kompletamente den shòk, mi a kontestá afirmativo. I e ora ei, promé ku mi por ni sikiera verbalisá, un tsunami di emoshon ku no por wòrdu deskribí, mayoria di nan ku tabata sintimentu di ”no ta adekuá”, Presidente Monson amablemente a aserkámi, deskribiendo kon el a wòrdu yama hopi aña pasá komo Apòstel pa Presidente David O. McKay, momentu ku e tambe a sinti ku e no ta adekuá. Ku kalmu el a instruí mi. ”Obispu Stevenson, Señor lo kalifiká esnan ku E yama.” E palabranan apropiá ei di un profeta tabata un fuente di pas, un trankilidat den un tormento di un outo eksaminashon doloroso i sentimentunan tierno den e oranan ku a sigui di agonia ku a pasa durante e dianan i nochinan for di e momentu ei.

Mi a ripití loke mi a kaba di deskribí na boso awor ei, na mi dushi kasá Lesa, mas lat e dia ei, sintá den un skina trankilo na Temple Square, ku e bista sereno di e tèmpel i Tabernakel históriko dilanti di nos. Segun nos tabata komprondé i prosesá e akontesimentunan di e dia ei, nos a haña ku nos anker ta nos fe den JesuCristu i nos konosementu di e gran plan di salbashon. Esaki a kondusí na un ekspreshon di e amor mas profundo pa Lesa. E ta e lus [di solo] den i di mi bida i un yu muhé remarkabel di Dios. Su bida ta marká ku servisio desinteresá i [di] amor inkondishonal pa tur hende. Mi lo lucha pa ta digno pa keda digno di e bendishon di nos union eterno.

Mi ta ekspresá mi amor hopi profundo pa nos kuater yunan i nan famia, tres di nan ku ta aki ku nan bunita kasánan, e mamanan di nos seis ñetunan, e di kuater, un misionero, tin e pèrmit speshal pa keda mas lat ku e ora di drumi pa misioneronan i ta mirando e prosedimentunan aki bibu ku su presidente di mishon i su kasá for di nan kas misional na Taiwan. Mi stima kada unu di nan i stima kon nan ta stima e Salbador i e evangelio.

Mi ta ekspresá mi amor pa kada miembro di mi famia: na mi mama i na mi tata, ku a fayesé aña pasá, ku a inkulká den mi un testimonio ku ta parse di ta biba den mi for di mi promé memoria. Tambe mi ta ekstendé e gratitut na mi ruman hòmber, ruman muhé, i nan kasánan, tambe na Lesa su famia, hopi di nan ku ta presente aki awe. Mi ta manda e ret di gratitut aki na e numeroso famia ekstendé, na amigunan, misioneronan, lidernan i na maestronan riba e kaminda.

Mi a wòrdu bendishoná ku un amistat sera ku e miembronan di e Promé Presidensha, e Diesdos, e Setentanan i e Presidenshanan general ousiliar. Mi ta ekspresá mi amor i apresio pa kada un di e hermananan i hermanonan i lo lucha pa ta digno di boso amistat kontinuo. E Obispado Presidente ta gosa di un unidat kasi selestial. Mi lo bai sinti falta di e asosiashon di kada dia ku Obispu Gerald Caussé, Obispu Dean M. Davies i e staf.

Mi ta para dilanti boso komo evidensia ku e palabranan di Señor ku ta den e promé seshon di Doktrina i Kombenio: ”Ku e plenitut di [e] evangelio lo wòrdu proklamá dor di e suak i e simpel na e ekstremo di [mundu], i dilanti reinan i gobernantenan.”¹ E palabranan aki ta presedé Señor Su deklarashon ku ta demostrá e amor di un Tata pa Su yunan:”P’esei ami e Señor, konosiendo e kalamidat ku lo bai kai riba e habitantenan di e mundu, ta hasi un yamada na mi siervo, Jose Smith, Yu, i papia ku n’e for di shelu, i a dun’é mandamentunan.”²

Nos Tata Selestial i Su Yu, Yehova, ku un konosementu di e kuminsamentu,³ te e fin, ta habrí e shelunan i un dispensashon nobo pa kompensá e kalamidatnan ku Nan sa ku lo bin, E Apòstel Pablo a deskribí e kalamidatnan ku lo bin pasa komo ”tempu peligroso.”⁴ Pa mi, esaki ta sugerí ku nos Tata Selestial su kompensashon generoso pa biba den tempunan difísil ta ku nos tambe ta biba den e plenitut di tempu.

Miéntras mi tabata agonisá riba mi ”inkapasidatnan” e siman aki, mi a risibí un impreshon speshal ku a tantu skrementá mi komo konsolá mi: Pa enfoká no riba loke mi no por hasi, pero mas bien riba loke mi por hasi. Mi por testifiká di e bèrdatnan simpel i presioso di e Evangelio.

Esaki ta e palabranan ku mi a kompartí mas di shenti piko di biaha ku tantu esnan ku ta pertenesé na e Iglesia komo hopi ku no ta miembro: Dios ta nos Tata Selestial amoroso. Nos ta Su yunan .... E ta yora ku nos ora nos ta sufri i ta kontentu ora nos ta hasi loke ta korekto. E ke komuniká ku nos, i nos por komuniká ku n’E dor di orashon sinsero. …

Tata Selestial a proveé nos, Su yunan, ku un manera pa ... regresá pa biba den Su presensha, .... Sentral den nos Tata [Selestial] Su plan ta JesuCristu Su Ekspiashon.”⁵

Tata Selestial a manda Su Yu na mundu pa ekspiá pa e pikánan di henter e género humano. Di e bèrdatnan simpel i presioso aki mi ta duna mi testimonio i ta mi ta hasi esaki den e nòmber di JesuCristu, amèn