2010–2019
Nco txog Tus uas Peb Tso Siab Rau
October 2015


Nco txog Tus uas Peb Tso Siab Rau

Yog peb xav muaj kev cia siab rov qab nrog Leej Txiv nyob ces peb yuav tsum muaj Yexus Khetos txoj Kev Theej Txhoj

Thaum kuv muaj cuaj xyoos, kuv tus niam tais uas muaj plaub hau dawb thiab siab li plaub foot kaum ib inch (1.5 m) xwb tuaj nrog peb nyob tau ob peb lim tiam nyob hauv peb tsev. Muaj ib hnub thaum nws nyob, kuv ob tug tij laug thiab kuv txiav txim siab khawb ib lub qhov nyob ntawm lub tshav sab tim peb lub tsev. Kuv tsis paub vim li cas; tej lus sij hawm me nyuam tub nyiam khawb lub qhov xwb. Peb lo av me ntsis tiam sis tsis muaj dab tsi uas yuav ua rau peb muaj teeb meem. Lwm tus tub hluas nyob hauv zej zog pom hais tias kev khawb ib lub qhov lom zem npaum li cas es lawv thiaj li tuaj pab. Ces peb sawv daws haj yam lo av ua ke. Cov av khov heev, peb thiaj li rub ib txoj hlua dej tuaj thiab tso dej rau hauv lub qhov kom cov av tsis khov. Peb lo av nplaum thaum peb tseem khawb lub qhov, tiam sis lub qhov tob me ntsis ntxiv.

Ib tug nyob peb pawg txiav txim siab tias tsim nyog muab peb lub qhov hloov los ua ib lub pas ua luam dej, peb thiaj li muab lub qhov puv dej tas lawm. Vim kuv yog tus yaus tshaj thiab kuv xav kom lawv nyiam kuv, lawv yaum kuv dhia mus hauv sim seb nws zoo li cas. Nim no kuv qias neeg tiag tiag. Kuv tsis tau xav hais tias kuv yuav lo av nplaum tag, tiam sis twb zoo li ntawd tiag.

Huab cua tab tom no no kuv, kuv thiaj li hla kev, xav hais tias kuv yuav nkag mus rau hauv kuv lub tsev. Kuv tus niam tais ntsib kuv ntawm lub qhov rooj tag thiab tsis kam cia kuv nkag los. Nws hais tias yog nws cia kuv nkag los, kuv yuav ua rau lub tsev uas nws nyuam qhuav tu tag lo av nplaum. Yog li ntawd kuv ua li txhua tus uas muaj cuaj xyoo yuav ua thiab khiav mus rau qhov rooj txuas, tiam sis nws sai dua li kuv xav. Kuv chim siab, ntaug sab ko taw, thiab thov kom kuv nkag tau los rau hauv lub tsev, tiam sis nws tsis kam qhib qhov rooj.

Kuv ntub, lo av nplaum, no no, thiab kuv xav zoo li ib tug me nyuam xav hais tias kuv yuav tuag nyob hauv kuv lub tiaj nraum qaum tsev. Ces, kuv nug nws seb kuv yuav tsum ua dab tsi kom nkag los rau hauv lub tsev. Zoo li tib pliag tom qab ntawd xwb, kuv sawv hauv peb lub tiaj nraum qaum tsev thaum kuv tus niam tais siv txoj hlua dej tsuag dej rau kuv. Kuv xav tias kuv twb tos lub sij hawm mus ib txhis, tiam sis tom qab ntawd kuv tus niam tais hais tias kuv huv thiab cia kuv nkag los rau hauv lub tsev. Sov sov nyob hauv tsev thiab kuv hnav khaub ncaws uas huv thiab tsis ntub dej.

Thaum peb xav txog zaj lus piv txwv los ntawm kuv lub neej ntawd, cia li xav txog Yexus Khetos tej lus hais tias: “Thiab tsis muaj ib yam uas tsis huv yuav muaj peev xwm nkag tau mus rau hauv nws lub nceeg vaj; yog li ntawd tsis muaj ib yam dab tsi nkag tau mus rau hauv nws qhov chaw so tsuas yog cov uas tau ntxuav lawv tej ris tsho nyob hauv kuv cov ntshav, vim yog lawv txoj kev ntseeg, thiab txoj kev hloov siab lees txim ntawm tag nrho lawv tej kev txhaum, thiab lawv txoj kev ntseeg kom mus txog thaum kawg.”1

Qhov uas kuv sawv nraum zoov kuv lub tsev raug kuv tus niam tais tsuag dej rau kuv yog ib qho tsis ntxim nyiam thiab tsis xis nyob me ntsis. Yog peb tsis muaj cib fim rov qab mus nrog peb Leej Txiv Saum Ntuj Ceeb Tsheej nyob vim peb tau xaiv nyob hauv los yog lo av nplaum los ntawm lub qhov ntawm kev txhaum ntshe yuav tu siab tas mus ib txhis. Peb yuav tsum tsis txhob ntxias peb tus kheej txog tej yam uas peb yuav tsum ua kom rov qab los thiab nyob hauv peb Leej Txiv Saum Ntuj Ceeb Tsheej lub xub ntiag. Peb yuav tsum huv.

Ua ntej peb yug los rau lub ntiaj teb no, peb cov uas yog Vajtswv cov tub thiab ntxhais ntsuj plig tau koom ib pawg sab laj loj.2 Peb txhua tus tau mloog zoo, thiab tsis muaj leej twg tsaug zog. Nyob hauv rooj sab laj ntawd peb Leej Txiv Saum Ntuj Ceeb Tsheej tau qhia txog ib txoj hau kev. Vim raws li txoj hau kev no peb yuav muaj kev ywj siab xaiv thiab yuav kawm los ntawm peb lub neej thiab tsis kawm los ntawm Nws xwb, Nws paub tias peb yuav ua txhaum. Nws kuj paub tias kev txhaum yuav ua kom peb tsis huv thiab peb yuav rov qab tsis tau los rau Nws, vim qhov chaw uas Nws nyob yeej huv tshaj ib lub tsev uas kuv tus niam tais tu tas.

Vim peb Leej Txiv Saum Ntuj Ceeb Tsheej hlub peb thiab Nws lub hom phiaj yog ua kom peb txais tau txoj kev tsis txawj tuag thiab txoj sia nyob mus ib txhis,3 Nws txoj hau kev tau npaj ib tug Cawm Seej—ib tug uas yuav pab peb rov qab ua neeg huv txawm peb lo av npaum li cas. Thaum peb Leej Txiv Saum Ntuj Ceeb Tsheej tshaj tawm tias yuav tsum muaj ib tug Cawm Seej, kuv ntseeg tias peb sawv daws tau tig mus saib Yexus Khetos, Thawj Leej Tub ntawm Ntsuj Plig, tus uas tau rais los ua neeg zoo li Leej Txiv lawm.4 Kuv ntseeg tias peb txhua tus tau paub tias Nws yuav tsum ua, peb txhua tus ua tsis taus, tiam sis Nws ua taus thiab Nws txaus siab ua.

Nyob hauv lub Vaj Khexemanes thiab nyob saum tus ntoo khaub lig ntawm Khaulakhauthas, Yexus Khetos raug txom nyem ntawm sab cev nqaij daim tawv thiab sab ntsuj plig, tshee hnyo vim txoj kev mob, los ntshav ntawm txhua lub qhov hws, thov Nws Leej Txiv kom tshem lub khob iab ntawm Nws mus,5 tiam sis Nws tseem haus tag lawm.6 Vim li cas Nws tau ua li no? Raws li Nws hais, Nws tau hais tias Nws xav ua kom Nws Leej Txiv muaj yeeb koob thiab ua tiav Nws tej kev npaj rau noob neej.7 Nws xav ua raws li Nws txoj kev khi lus kom qhib kev rau peb rov qab mus tsev. Thiab nws hais kom peb ua dab tsi? Nws thov kom peb lees peb tej kev txhaum thiab hloov siab lees txim kom peb thiaj yuav tsis raug txom nyem zoo li Nws.8 Nws thov kom peb los ua neeg huv peb thiaj yuav tsis nyob peb Leej Txiv Saum Ntuj Ceeb Tsheej lub tsev sab nraud.

Txawm zoo dua yog peb tsis ua txhaum hauv lub neej no los, hais txog qhov uas Yexus Khetos txoj Kev Theej Txhoj muaj hwj chim npaum li cas, peb tau ua txhaum dab tsi los sis poob tob npaum li cas nyob hauv lub qhov ntawm kev txhaum los tsis ua li cas. Tsis ua li cas yog peb txaj muag vim muaj tej kev txhaum uas zoo li tus yaj saub Nifais hais tias, “yooj yim ua rau [nej] poob siab.”9 Tsis ua li cas yog muaj ib zaug uas peb muab peb txoj cai ua tub hlob pauv rau ib co taum liab.10

Qhov uas muaj nqi yog qhov uas Yexus Khetos, Vajtswv Leej Tub, raug “tej kev mob thiab kev tsim txom thiab kev haub ntxias txhua yam” nws thiaj yuav “xwv kom nws yuav paub pab nws cov neeg raws li ntawm cev nqaij daim tawv.”11 Qhov uas muaj nqi yog qhov uas Nws txaus siab txo hwj chim,12 los rau hau lub ntiaj teb thiab “nqes mus raug txhua yam”13 thiab raug “tej kev txom nyem loj tshaj ib tug neeg” nyiaj tau.14 Qhov uas muaj nqi yog qhov uas Khetos thov peb Leej Txiv kom zam txim rau peb hais tias: Txiv, thov saib tej kev txom nyem thiab kev tuag ntawm tus tsis tau ua txhaum, tus uas koj tau txaus siab rau; … Yog li ntawd, Leej Txiv, thov tseg kuv cov kwv tij no uas ntseeg kuv lub npe, xwv kom lawv yuav los cuag kuv thiab tau txoj sia kav ib txhis.15 Tej no muaj nqi tshaj plaws thiab tsim nyog uas tej no yuav ua rau peb cia siab thiab txiav txim siab tias peb yuav sim ua ib zaug ntxiv, vim Nws tsis tau hnov qab peb.16

Kuv ua tim khawv tias tus Cawm Seej yeej yuav tsis tig ntawm peb mus thaum peb txo hwj chim nrhiav Nws kom hloov siab lees txim; Nws yeej yuav tsis xav tias peb tsis tsim nyog pab; Nws yeej yuav tsis hais tias, “Yog koj dua ntxiv los”; Nws yeej yuav tsis tso peb tseg vim Nws tsis to taub hais tias nyuaj rau peb tsis ua txhaum. Nws to taub txhua yam, tsis hais kev tu siab, kev txaj muag, thiab kev nyuaj siab uas muaj dhau los ntawm kev txhaum.

Kev hloov siab lees txim muaj tseeb tiag. Kev hloov siab lees txim tsis yog ib qho uas tib neeg tsim los sis qhov uas los ntawm “lub siab npau xwb.”17 Kev hloov siab lees txim muaj hwj chim tshem peb tej lub nra thiab muab kev cia siab rau peb. Kev hloov siab lees txim yuav coj peb mus kom muaj kev hloov siab loj heev ua rau peb “tsis muaj siab xav ua phem ntxiv lawm, tiam sis [xav] ua zoo kom tsis tu ncua mus li.”18 Kev hloov siab lees txim tsis yooj yim ua. Tej yam uas muaj nqi nyob mus ib txhis yeej tsis yooj yim. Tiam sis lub nqi zog muaj nqi tshaj plaws. Raws li Thawj Tswj Hwm Boyd K. Packer ua tim khawv nyob hauv nws zaj lus kawg rau cov Xya Caum ntawm lub Koom Txoos hais tias: “Qhov kev xav zoo li no: txoj Kev Theej Txhoj tsis tseg txoj lw dab tsi rau yus pom. Txoj Kev Theej Txhoj twb kho tag lawm. … Txoj Kev Theej Txhoj twb kho tag lawm. Tej yam uas nws kho los yeej yuav kho tas mus li.”19

Yog li ntawd, yog peb xav muaj kev cia siab rov qab nrog Leej Txiv nyob ces peb yuav tsum muaj Yexus Khetos txoj Kev Theej Txhoj, yuav tsum muaj ib tug uas tsis tau ua txhaum uas txaus siab ris tag nrho tib neeg tej kev txhaum, tsis hais tej kev txhaum ntawm Vajtswv ib co tub thiab ntxhais uas xaiv kev raug txom nyem lawv tus kheej.

Vim peb yog mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb qhia tias tus Cawm Seej txoj Kev Theej Txhoj muaj hwj chim dua li lwm tus neeg qhia vim peb paub tias yog peb ua kev khi lus, hloov siab lees txim tsis tu ncua, thiab nyiaj kom mus txog thaum kawg, Nws yuav koom nrog Nws txais peb qub txeeg qub teg20 thiab zoo ib yam li Nws peb yuav txais tag nrho tej yam uas Leej Txiv muaj.21 Qhov no yog ib cov lus qhuab qhia uas ua rau tib neeg xav tsis thoob, tiam sis qhov no muaj tseeb tiag. Vim muaj Yexus Khetos txoj Kev Theej Txhoj, peb ua tau raws li tus Cawm Seej tej lus caw kom peb “ua zoo tag nrho, ib yam li nej Leej Txiv uas nyob saum ntuj ceeb tsheej yog tus zoo tag nrho,”22 es tsis yog ib qho uas peb yeej yuav ua tsis taus.

Cov vaj lug kub qhia tias txhua tus neeg yuav tsum “raug txiav txim mus raws li Vajtswv txoj kev txiav txim dawb huv.”23 Thaum hnub ntawd peb yuav tsis muaj cib fim nkaum nyob hauv ib pawg loj los sis taw tes rau lwm tus kom zam txim rau peb tus kheej vim peb tsis huv. Zoo siab uas cov vaj lug kub kuj qhia tias Yexus Khetos, tus uas raug kev txom nyem rau peb tej kev txhaum, tus uas tuaj peb tog nrog Leej Txiv, tus uas hais tias peb yog Nws cov phooj ywg, tus uas hlub peb mus tas ib txhis, Nws yog tus uas yuav txiav txim rau peb. Qhov koob hmoov ntawm Yexus Khetos txoj Kev Theej Txhoj uas peb tsis tshua xav txog yog qhov uas “Leej Txiv … tsa Leej Tub ua tus txiav txim.”24

Cov kwv tij thiab cov muam, yog nej poob siab los yog tsis paub yog nej tawm tau lub qhov ntawm sab ntsuj plig uas nej tau khawb lawm, cia li nco txog tus uas sawv nrees “nruab nrab ntawm [peb] thiab txoj kev txim lij,” tus uas “muaj ntsoov kev hlub tshua rau noob neej puv npo,” thiab tus uas tau ris peb tej kev txhaum thiab “ua raws li txoj kev txim lij tej kev xav tau.”25 Hais ua lwm yam lus, ib yam li Nifais tua ua thaum nws tsis tso siab rau nws tus kheej, cia li nco txog “tus uas [nej] cia siab rau,”26 uas yog Yexus Khetos, ces cia li hloov siab lees txim kom rov qab muaj “ib txoj kev cia siab uas ci kawg nkaus.”27 Los ntawm Yexus Khetos lub npe, amees.