2010–2019
Manatua Le Ua Tatou Faalagolago I Ai
Oketopa 2015


Manatua Le Ua Tatou Faalagolago I Ai

O lo tatou faamoemoe e toe ola faatasi ma le Tama e faalagolago lea i le Togiola a Iesu Keriso.

Ina ua iva o’u tausaga, sa sau le tina o lo’u tina, lauulu sina, e fa-futu-sefulutasi-inisi (150 cm) ma matou nonofo mo ni nai vaiaso i lo matou aiga. I se tasi aoauli a o i ai o ia iina, sa tonu ia i matou ma o’u uso matutua e toalua o le a eli se lua agai i le isi itu o le auala mai lo matou fale. Ou te le iloa pe aisea na matou faia ai; o nisi taimi e fiafia lava tama e elieli pu. Sa fai si o matou taugapalapala, ae leai se mea tele matou te ono oo ai i se faalavelave. Sa iloa mai e isi tamaiti o lo matou pitonuu le manaia o le eli o se pu ma sa amata ona fesoasoani mai. Ona atili ai lava lea ona matou taufai taugaeleelea faatasi ai. Sa malo le palapala, o lea na matou toso mai ai se faagaau o le togalaau ma ki atu ai sina vai laitiiti i le ta’ele o le pu e faavaivai ai le palapala. Sa pipii ni palapala i o matou tino a o matou eliina, ae sa oo ina loloto atili le pu.

Sa filifili se tasi o le matou vaega e tatau ona fai le pu ma se vai taele, o lea na matou faatumuina ai i vai. Ona o a’u sa pito laitiiti ma manao ia talia au e le isi vaega, o lea sa faatauanau ai au e puna i totonu e faataitai. Ou te lei muai fuafua faapea e ufitia uma i le palapala, ae o le mea lena na ou iu i ai.

Ina ua amata ona malulu, sa ou kolosia le auala, ma le faamoemoe ou te savali atu i totonu o le matou fale. Sa faafeiloai au e lo’u tinamatua i le faitotoa ma sa musu e avatu au i totonu. Sa ia fai mai afai na te faatagaina au i totonu, o le a ou soli atua le palapala i totonu o le fale sa faatoa uma ona ia faamamaina. O lea sa ou faia ai le mea e faia e soo se iva tausaga i ia tulaga ma tamoe i le faitotoa i tua, ae sa sili atu ona vave o ia nai lo le mea sa ou mafaufauina. Sa ou ita ma tatū o’u vae, ma avaavau atu ou te alu atu i totonu o le fale, ae sa tapuni pea lava le faitotoa.

Sa ou susu, palapala, ma maalili, ma i o’u mafaufauga faatamaitiiti, ai a ou oti i lo’u lava tuafale. Na iu ina ou fesili atu ia te ia po o le a le mea e tatau ona ou faia ina ia ou alu atu ai i totonu o le fale. A o lei oo i ai so’u mafaufau, sa ou tūtū i tuafale a o faapasī mai e lo’u tinamatua le faagaau. Ina ua maea le mea sa foliga mai o le faavavau, sa tonu i lo’u tinamatua ua lava lo’u mama ma faataga ai au i totonu o le fale. Sa mafanafana totonu o le fale, ma sa mafai ona fai ou ofu mago ma mama.

Mafaufau i lenei faataoto moni o le olaga, faamolemole mafaufau i afioga nei a Iesu Keriso: “Ma e leai se mea le mama e mafai ona ulu atu i lona malo; o lea e leai se mea e ulu atu i lona malologa vagana ai i latou o e ua faamamaina o latou ofu i lou toto, ona o lo latou faatuatua, ma le salamo i a latou agasala uma, ma lo latou faamaoni e oo i le iuga.”1

O le tutu i fafo o lo’u fale a o faapasī mai e tinamatua le faagaau ia ou mama e le o se mea manaia ma sa lei lagolelei. O le le maua o le avanoa e toe foi atu ai ma mafuta ma lo tatou Tama i le Lagi ona sa tatou filifili e tumau ai pe faapalapala foi i se pu o le agasala, e matautia e faavavau. E le tatau ona tatou faaseseina i tatou lava e uiga i mea e tatau ona fai e toe foi atu ai ma mau i le afioaga o lo tatou Tama i le Lagi. E tatau ona tatou mama.

A e tatou te lei o mai i lenei lalolagi, sa tatou auai o ni atalii ma ni afafine agaga o le Atua i se fono tele.2 Sa tofu gauai atu i tatou taitoatasi, ma e leai se tasi o i tatou na tulemoe. I lena fono, sa tuuina mai ai e lo tatou Tama i le Lagi se fuafuaga. Talu ai o le fuafuaga sa faapolopolo ai lo tatou faitalia ma sa manaomia ai ia tatou aoao mai o tatou lava aafiaga ae le na o Ona aafiaga, sa Ia silafia ai o le a tatou faia le agasala. Sa Ia silafia foi o le agasala o le a mafua ai ona tatou le mama ma le mafai ai ona tatou toe foi atu i Lona afioaga aua o le mea e afio ai o Ia, e sili atu ona mama nai lo le fale na faamamaina e lo’u tinamatua.

Talu ai e alofa lo tatou Tama i le Lagi ia i tatou ma e i ai Lona faamoemoega “ia aumai [lo tatou] tino ola pea ma le ola e faavavau,”3 o Lana fuafuaga e aofia ai le matafaioi a se Faaola—o se tasi e mafai ona fesoasoani ia i tatou ia tatou mama tusa lava po o le a le palapala tatou te i ai. Ina ua fofogaina mai e le Tama i le Lagi le manaomia o se Faaola, ou te talitonu sa tatou faliu uma atu ma tilotilo atu ia Iesu Keriso, o le Ulumatua i le Agaga, o Le na agai i luma i le tulaga na avea ai e faapei o le Tama.4 Ou te talitonu sa iloa e i tatou uma e tatau ia te Ia, e leai se tasi o i tatou uma e mafai ona faia, ae Na te mafaia ma o le a Ia faia.

I le Faatoaga o Ketesemane, ma i luga o le satauro i Kolokota, sa mafatia ai Iesu Keriso i le tino ma le agaga, sa gatete ona o le tiga, sa tafetoto i pu afu uma, na aioi atu ai i Lona Tama ia aveese le ipu oona mai ia te Ia,5 ae peitai sa Ia inu lava i ai.6 Aisea na Ia faia ai? I ana upu, sa Ia manao e viia Lona Tama ma faaiu ai Ana “tapenapenaga mo le fanauga a tagata.”7 Sa finagalo o Ia e tausi Ana feagaiga na faia ma ia mafai ona tatou toe foi atu i le aiga. O le a la le mea ua Ia poloai mai ia tatou faia? Ua na ona Ia aioi mai ia i tatou ia ta’uta’u atu a tatou agasala ma ia salamo ina ia tatou le mafatia ai e pei ona sa Ia mafatia ai.8 Ua ia valaaulia i tatou ia mama ina ia tatou le tutu ai i fafo o le maota o lo tatou Tama o i le Lagi.

E ui o le aloese mai le agasala o le mamanu manaomia lea i le olaga, ae e tusa ai ma ‘auga o le Togiola a Iesu Keriso, e le afaina po o a agasala sa tatou faia pe o le a foi le loloto ua tatou goto atu ai i lena lua tautaua. E le afaina lo tatou mā pe maasiasi ona o agasala, e pei ona saunoa le perofeta o Nifae, “ua faigofie ona lavelavea ai” tatou.9 E le afaina pe sa i ai se taimi na tatou faatau atu ai lo tatou tofi o le ulumatua mo se atasema tunu.10

O le mea e afaina o Iesu Keriso, o le Alo o le Atua, na mafatia “i tiga ma mafatiaga ma faaosoosoga o soo se ituaiga” ina ia “mafai ai e ia ona silafia e tusa ai ma la le tino le ala e fesoasoani ai i ona tagata.”11 O le mea e afaina sa naunau o Ia e afio maualalo ifo,12 e afio mai i lenei lalolagi ma faamaulalo “i lalo ifo o mea uma”13 ma mafatia ai i “feteenaiga malolosi e leai se tagata” e mafaia.14 O le mea e afaina o Keriso o loo faatogaina la tatou mataupu i luma o le Tama, ma “faapea atu: Le Tama e, faauta i mafatiaga ma le oti o le na le faia e ia se agasala, o le na e fiafia tele i ai; … o le mea lea, le Tama e, ia faasaoina i latou nei o o’u uso o e ua talitonu i lo’u igoa ina ia mafai ona latou o mai ia te au ma maua le ola tumau faavavau.”15 O le mea tonu lena e afaina ma tatau ona aumaia ai ia i tatou uma o le faamoemoe toefaafouina, ma se naunautaiga e toe taumafai tasi lava, aua Na te lei faagaloina lava i tatou.16

Ou te molimau atu o le a le liliu ese lava le Faaola mai ia i tatou pe a tatou saili atu ma le lotomaulalo ia te Ia ina ia tatou salamo; o le a le manatu lava faapea ua leai so tatou faamoemoe e faaleleia atili ai; o le a le faapea mai lava, “Oi leai, lea foi ua e toe sau”; o le a le teena lava i tatou ona o so tatou le malamalama i le faigata ona aloese i le agasala. E malamalama lelei o Ia i mea uma, e aofia ai ma le lagona o le faanoanoa, maasiasi, ma le oi o le taunuuga le mataofia o le agasala.

O le salamo e moni ma e aoga. E le o se aafiaga fatu po o le fua “o se mafaufau fememeai.”17 O loo i ai le mana e sii ese ai avega ae sui atu i le faamoemoe. E mafai ona tau atu ai i se suiga tele lea e taunuu i le “le toe i ai se manao e faia le leaga, ae fai pea le lelei.”18 O le tatau ona salamo e le faigofie. E seasea faigofie mea taua e faavavau. Ae o le taunuuga e taua. E pei ona molimau mai Peresitene Boyd K. Packer i lana saunoaga talu ai i le Au Fitugafulu o le Ekalesia: “O le mafaufauga lenei: e le tuua e le Togiola ni ai, leai ni asaga. O le mea na te faaleleia e mausali. … E le tuua e le Togiola ni asaga, po o ni ai. E na ona faamalolo, ma o le mea na te faamalolo o le a tumau lona manuia.”19

Ma e faapena lo tatou faamoemoe e toe ola faatasi ma le Tama, e faalagolago i le Togiola a Iesu Keriso, i luga o le naunautai o le Tagata e toatasi e leai se agasala e tauaveina i Ona lava luga, i le faafeagai matautia i le tapa ai o le faamasinoga tonu, le mamafa o solitulafono a tagata uma, e aofia ai ma na agasala na filifilia ma le le tatau ai e nisi o ona atalii ma afafine o le Atua e mafatia ai mo i latou lava.

I le avea ai ma tagata o Le Ekalesia a Iesu Keriso o le Au Paia o Aso e Gata Ai, tatou te taulai atu i le mana e sili atu o le Togiola a le Faaola nai lo le toatele o isi tagata aua ua tatou iloa afai tatou te osia feagaiga, ma salamo pea lava pea, ma tumau seia oo i le iuga, o le a Ia faia i tatou ma suli faatasi ma Ia20 ma e faapei foi o Ia, o le a tatou maua mea uma o i ai i le Tama.21 O se aoaoga faavae taua tele lena, ae e moni. O le Togiola a Iesu Keriso ua mafai ai ona taunuu le valaaulia a le Faaola ia “atoatoa ona lelei o la outou amio, e pei o lo outou Tama o i le lagi e atoatoa ona lelei o ia”22 nai lo le atugalu faapea e le au i ai.

Ua aoao mai e tusitusiga paia faapea e tatau i tagata uma ona “faamasinoina e tusa ai ma le faamasinoga paia a le Atua.”23 I lena aso o le a leai se avanoa e lafilafi ai i ni vaega toatele pe tusi atu foi i isi e fai ma ‘alofaga o lo tatou le mama. Faafetai o loo aoao mai foi e tusitusiga paia faapea o Iesu Keriso, o Le na mafatia ona o a tatou agasala, o lo tatou Fautua i le Tama, o le ua ta’ua i tatou o Ana uo, o le e alofa ia i tatou e oo i le iuga, i le iuga o le a avea o Ia ma o tatou faamasino. O se tasi o faamanuiaga e tele ina tatou faagalogalo o le Togiola a Iesu Keriso “o le Tama … ua ia tuu mai i le Atalii le faamasinoga uma lava.”24

Uso e ma tuafafine, afai e te lagona le lotovaivai pe tau manatunatu foi pe mata e mafai ona e sao ese mai le pu faaleagaga na e eliina, faamolemole ia manatua le o loo tu “i lo [tatou] va ma le faamasinotonu,” o le “ua faatumuina i le agaalofa i le fanauga a tagata,” ma le na tauaveina i Ona lava luga a tatou amioleaga ma solitulafono ma “faamalie ai manaoga o le faamasinotonu.”25 I se isi faaupuga, e pei ona sa faia e Nifae i lona taimi o lona le mautonu, sa na ona ia manatua o “le ua [ia] faalagolago i ai,”26 o Iesu Keriso, ona salamo lea ma toe maua ai “se susulu atoatoa o le faamoemoe.”27 I le suafa o Iesu Keriso, amene.