Kakorakoraaki man Ana Mwakuri ni Kamaiu Iesu Kristo
Iroun Unimwaane Dallin H. Oaks
Man te Kooram n Abotoro n te Tengaun ma Uoman
Ibukin Ana Mwakuri ni kamaiu, iai mwaakan te Tia Kamaiu n ibuobuoki—ni buoki—maraki ao karawawataaki n te maiu aei.
Ni maiura aei ao iai kakoauan ae n te taina ti na mate ao ni karawawataaki n ara bure. Ana Mwakuri ni Kamaiu Iesu Kristo e kabebetei koauan bwaai aika uoua n te maiu aei. Ma irarikin te mate ao te bure, iai kakaewenako aika mwaiti riki ngkana ti kekeiaki rinanon te maiu aei. Ibukin te Mwakuri ni Kamaiu anne, e kona ara Tia Kamaiu n anganiira te korakora ae ti kainnanoia n tokanikai iaon kakaewenako ni maiura aei. Anne atuun au reirei n te bong aei.
I.
Angiin rongorongo man booki aika tabu iaon te Mwakuri ni Kamaiu e kaineti ma ana mwakuri te Tia Kamaiu n urua ana kabaebae te mate ao ni korakai ibukin ara bure. N ana kabwarabwara ae koreaki n Ana Boki Moomon, Aramwa e anga aan reirei aikai. Ma e katauraoa naba ara kakoaua ni booki aika tabu aika a rangi ni mataata ae e rinanon naba taian maraki ao aoraki ao mamaaraia Ana aomata.
Aramwa e kabwarabwara mwakoron Ana Mwakuri ni Kamaiu te Tia Kamaiu aei: “Ao e na waaki, n rinanon te kainnano ni maraki ma te karawawataaki ao te kaririaki n aekaia nako; ao aio bwa e na kakoroaki nanon te taeka are e taku bwa e na uota iaona marakiia ao aorakiia ana aomata” (Aramwa 7:11; taraa naba 2 Nibwaai 9:21).
Iangoa anne! N ana Mwakuri ni Kamaiu te Tia Kamaiu, E rinanon “maraki ma karawawataaki ao te kaririaki n aekaia nako.” Ngkai e kamataata Beretitenti Boyd K. Packer: “Akea baena ae e na kabwaraa. Akea te kairua ae E karaoia. Ma, ikotakin kairua ni kabane, te rawawata n nano ao te nanokawaki, te maraki ao te kamangoraki, aorakin te iango ni kabane, te namakin, nanokawaki, ao karawawataaki ae ataaki iroun te aomata—E a tia n rinanoi ni kabane.”1
Bukin tera e karawawataaki ma kakaewenako n te maiu aei “n aekaia nako”? E kabwarabwara Aramwa: “Ao e na uota iaona mamaaraia, bwa e na on nanoia ma te nanoanga ni kaineti ma te maiu n iriko, bwa e na ataia ni kaineti ma te maiu n iriko bwa e na kanga ni buokia ana aomata ni kaineti ma mamaaraia” (Aramwa 7:12).
Te katoto, te Abotoro ae Bauro e katanoata bwa ibukina bwa e a tia te Tia Kamaiu “ni maraki ngaia ngke E kaririaki, ao e boni kona ni buokia akana kaririaki” (Ebera 2:18). N ae ti te arona, e taku Beretitenti James E. Faust: “Ngkai e a tia te Tia Kamaiu ni karawawataaki ni bwai ni kabane aika ti tuai man namakinna ke n taneiai iai, E kona ni buokiia aika mamaara bwa a na riki ni korakora.”2
E a tia ara Tia Kamaiu n rinanoi ao ni karawawataaki ma bwaninin kakaewenako n te maiu n rabwata “ni kaineti ma te iriko” bwa E aonga n ataia “ni kaineti ma te iriko” bwa ko na kanga ni “buokia [are nanona bwa ko na anga te kamaiu ke te buoka nakoia] ana aomata ni kaineti ma mamaaraia.” Ngaia ae E atai ara kaangaanga, marakin nanora, kabwakara, ao karawawataakira, ibukina bwa E tauraoi n rinanoi ni kabane bwa mwakoron Ana Mwakuri ni Kamaiu ae kakawaki. Ao ibukin aei, Ana Mwakuri ni Kamaiu e Kakorakora ni buokiira—n anganiira te korakora bwa ti aonga ni kona ni karaoi ni kabane.
II.
Ngkai ana reirei Aramwa n te kaitiua ni mwakoro bon te kabanea ni mataata mai ibuakon booki aika tabu ni mwaakan te Mwakuri ni Kamaiu, e reiakinaki naba rinanon nako booki aika tabu.
Ni moan Ana mwakuri, e kamatata Iesu bwa E kanakomaiakaki “bwa e na kamaiuia aika uruaki nanoia” (Ruka 4:18). E teimatoa te Baibara n tuangira Ana kamaiu nakoia aomata “man aorakiia” (Ruka 5:15; 7:21). Ana Boki Moomon e koreaki inanona Ana kamaiu nakoia naake “a karawawataaki n aekaia nako” (3 Nibwaai 17:9). E kabwarabwaraki n ana Euangkerio Mataio ae e kamaiuia aomata Iesu “bwa a na kona ni korobukiia n aron are e taekinaki iroun Itaia te burabeti, are e kangai, E anai mamaarara, ao E uouoti aorakira” (Mataio 8:17).
“E reirei Itaia bwa e anai ‘rawawatara’ao e uouoti “nanokawakira” te Mesia(Itaia 53:4). E reirei naba Itaia Ana mwakuri ni kakorakoraira: ‘Tai maaku; I a buokiko Ngai: tai barannano; ibukina Ngai Atuami: N na kakorakorako; eng, N na buokiko” (Itaia 41:10).
Ibukin aei, ti anenea:
Tai maaku, Ngai raom; oo, tai bwarannano,
Bwa Ngai Atuam ao N na buokiko.
Ko na korakora man tei iaon waem, …
Bwa Ko na teimatoa n te raoiroi, ao baim a na korakora.3
N taekin tabeua ana kakaewenako n te maiu aei, e koroia te Abotoro Bauro, “I boni konai bwaai ni kabane ni karaoi iroun Teuare e kakorakoraai” (I-Biribi 4:13).
Ao ngaia ae ti noora anne ibukin Ana Mwakuri ni Kamaiu, iai mwaakan te Tia kamaiu ni buoka—ni buoki—maraki ao aoraki ni kabane n te maiu aei. N tabetai Mwaakana e kamaiua te aoraki, ma booki aika tabu ao ara taneiai e reirei anne n tabetai E buoka ke n ibuobuoki n anganira te korakora ke te taotaonaki n nano ni kakoroi nanon mamaarara.4
III.
Tera maraki ao karawawataaki ao mamaara n rabwata ake e a tia n rinanona ao ni karawawataaki iai te Tia Kamaiu?
A bane n iai marakira ao karawawataakira ao mamaarara n te tai teuana ke n te taina. Irarikin te bwai ae ti a tia n rinanona ibukin ara bure, te maiu ae mamate e kaonaki ma kaangaanga, maraki n nano, ao karawawata.
Ti kaitaraaki ngaira ao naake ti tangiriia n rootaki ma te aoraki. N tabetai ngaira n tatabemaniira nako ti rinanon naba te aoraki man te ikoaki ae kakaiaki man kaangaanga tabeua n te rabwata ke n te iango. Ngaira ni kabane ti karawawataaki ao n nanokawaki ma maten raora ae tangiraki. Ti bane ni kaitara ma kabwakara n oin tabera, ara reitaki ma ara utu, ke ara mwakuri.
Ngkana te buu ke te ataei e aki butimwaea te bwai ae ti ataia bwa e koaua ao ni kitana kawain te raoiroi, ti rinanon riki te maraki ae korakora, kanga ti tebo ma taman te nati ae bua n ana taetae ni kaikonaki Iesu ae ururingaki.(taraa Ruka 15:11–32).
N aron are e taekinna te Tia Korea te Areru: “A bati karawawatan te aomata ae raoiroi: ma Iehova E na kamaiua mani baikai ni kabane” (Taian Areru 34:19).
Ngaia, ara anene iai inanoia te koaua ae eti aei: “Akea nanokawakin te aonaaba are e aki kona n toki mai karawa.”5 Tera ae kamaiuiira bon ara Tia Kamaiu ao Ana Mwakuri ni Kamaiu.
Te roro ae man 13 nakon 19 te ririki a namakina te aki butimwaeaki ngkana raoraoia a kaaini reitaki ao waaki ni kakukurei ao ni katinanikuaki n iai bukina. Te kakaokoroaki ao te katei a karika kamarakin te aki butimwaeaki, ibukiia kairake ao ikawai. A mwaiti kakaewenako riki tabeua n te maiu, n aron akean te mwakuri ke kataaki tabeua n ara babaire.
I teimatoa n taetae iaon aorakin te rabwata aika aki riki man ara bure. Tabeman a bungiaki ma aki toamaun rabwataia ke aia iango are a karawawataki iai ao ni korakai naake a tangiriia ma n tabeakiniia. Ibukiia aika mwaiti, te aki konamaki man te karawawataki e bon kamaraki ke ni karika te aki toamau ae reitinako. Teuana ae ko na rootaki iai ae kamaraki bon te aki mare. Naake a rootaki n te kaangaanga aei a riai n uringnga bwa e a tia ara Tia Kamaiu n rinanon te aekaki ni maraki aei naba ao bwa, rinanon Ana Mwakuri ni Kamaiu, E anga te korakora bwa a na teimatoa ni kaitara.
Tabeua baika aki toamau a karika riki te aki konabwai nakon maiura n rabwata ke n tamnei nakon riki baike a kareke tangiraia. Tabeua mai ibuakon aikai, n aron tangirakin tamnei aika buakaka ke taian turaki, a kona n ae a riki man anua aika a rangi ni kairua. E ngae ngke e a tia n rairaki te nano man te anua anne, e teimatoa ni kareke tangirana. Te aki konabwai ni kamatoaakin anne e kona ni buokaki man te korakora ae tauraoi mairoun te Tia Kamaiu. Ngaia ae te kakaewenako ae korakora a rinanona naake a kabureaki ibukin bure ake a karaoi. Te reta ae e a tibwa koreaki e kaota te korakora are e kona n roko nakon temanna ae rinanon te kaangaanga anne: “I ataia bwa ara Tia Kamaiu e nakonako ni kawain auti aikai, ao I a tia n taainako n namakina ana tangira Kristo inanon oon karabuuti aikai”6
I tangira ana koaua ara tia kororongorongo ao raoraona ae Emma Lou Thayne. Ti a anenea ngkai taekan te anene, e koreia:
Enga te tabo ae N na kunea iai te rau?
Enga te tabo ae N na karekea iai te rau
Ngkana a toki bwaai n ibuobuoki ake tabeua ibukin kamarurungakiu?
Ngkana ma te nano ae ikoaki, te un, ke te kairiribai,
I kaokoroai mairouia aomata ake tabeman,
N ukoukora tamneiu?
E mena ia, ngkana e rikirake marakiu,
E mena ia, ngkana e reiti nako karawawatakiu,
E mena ia, ngkana I tangiria ni kan ataia, N na biri nakea?
E nga te korakora ae e na buoka rawawatau?
Antai, ae e kona n ataia?
Ngaia, tii te Tia Kamaiu. 7
IV.
Antai ae e kona ni buokaki ao ni kakorakoraaki rinanon Ana Mwakuri ni Kamaiu Iesu Kristo? E reirei Aramwa bwa Te Tia Kamaiu “e na uota iaona marakiia ao aorakiia ana aomata ” ao “ni buokiia ana aomata ” (Aramwa 7:11, 12; e kairaki ma katuruturuana). Antai “ana aomata” n te berita aei? Ni kabane aomata n te aonaaba aei—ni kabane ake a kimwareirei ni koauan te mangauti rinanon te Mwakuri ni Kamaiu? Ke ti tooro ake a tia n rineaki aika a tau rinanon otenanti ao berita aika tabu?
Te taeka ae aomata e mwaiti nanona inanon booki aika tabu. Nanona e riai ibukin te reirei bwa te Tia Kamaiu e na buokiia “ana aomata” bon nanona naba are e kamwakuria Amon ngke e taku bwa “te Atua e mwannanoia aomata nako, n aba ake a mena iai” (Aramwa 26:37). Anne naba ae a nanonna anera ngke a katanoata bungiakin te merimeri ae Kristo: “Te rongorongo ae raoiroi ae kakimareirei, ae aia bwai aomata ni kabaneia” (Ruka 2:10).
Ibukin Ana mwakuri ni kaboomwi are e rinanon n te maiu ae mamate, e kona ara Tia Kamaiu ni karaunano, katoki aoraki, ao ni kakorakoraia mwaane ao aine ni kabane n taabo nako, ma I kakoaua E na bon tii karaoia ibukiia naake a Ukoukoria ao ni bubutia ibukin Ana ibuobuoki. E reirei te Abotoro ae Iakobo: “Kam na nanorinano i matan te Uea, ao ane E na karietatai ngkami” (Iakobo 4:10). Ti tau ni karekea te kakabwaia anne ngkana ti kakoaua Irouna ao n tataro ibukin Ana ibuobuoki.
Iai aomata aika mirion mwaitiia aika a mamaaka-te Atua ake a tataro nakon te Atua bwa a na tabekaki nako man karawawatakiia. E a tia ara Tia Kamaiu ni kaotia bwa E “rinanon ae korakora riki ni bwaai ni kabane” (R&B 88:6). Ngkai e reirei Unimwaane Neal A. Maxwell, “N ‘rinanon ae korakora riki ni bwaai ni kabane,’ E ataia, n ae kororaoi ao ae onoti, bwaninin ma rinanin nako korakaia aomata.”8 Ti kona n taekinna bwa ibukin ae karinanoa n rinanon bwaai ni kabane, E na tabekiirarake ao n anganiira te korakora are ti kainnanoia bwa ti na teimatoa inanon karawawatakira. Ti na tii titiraki.
N te tai ae mwaiti inanon kaotioti aika ngkai, e taekinna te Uea, “Ngkana ko bubuti, ao ane kam na anganaki, ngkana ko karebwerebwe ao ane e na kaukaki nakoimi” (n aron te katooto, R&B 6:5; 11:5; taraa naba Mataio 7:7). Ni bon arona, ibukin Aia tangira ae tabangaki, Tamara are i Karawa ao Natina ae Ana Rikitemanna, Iesu Kristo, a ongo ao a kaekai aia tataro naake a ukoukoria n te onimaki. N aron are e koroia te Abotoro ae Bauro, “Ti onimakina te Atua ae maiu, ae aia Tia Kamaiu aomata ni kabaneia, ao bon aia Tia Kamaiu ni koaua aika onimaki” (1 Timoteo 4:10).
I ataia bwa a koaua bwaai aikai. Ana Mwakuri ni Kamaiu te Tia Kamaiu e mwaiti riki nakon kakoauaakin iroura te aki mamate man te mangauti ae tabangaki ao n anganiira ara tai ni kaitiakaki man ara bure man te rairannano ao te bwabetito. Ana Mwakuri ni Kamaiu e anganiira ara tai ni Weteia are E a atai kabwakara ni maiura n rabwata bwa e na kamaiura ao n anganiira te korakora ni kaitarai kaangaangan te maiu aei. E atai ara kaangaanga, ao E tauraoi ni buokiira. N aron te Itamaria ae Raoiroi, ngke E kuneira n ikoaki inanon te kawai, E kabaei ikoakira ao e kawakiniira (taraa Ruka 10:34). Te kamaiu ao mwaakan ma korakoran Ana Mwakuri ni Kamaiu Iesu Kristo bon ibukira ni kabane ake a na bubuti. I kakoaua anne ao I kakoaua naba ara Tia Kamaiu, are e kanakoraoi bwaai ni kabane.
N te bong teuana karawawata ni kabane n te rabwata a na bane n toki ao e nang akea te maraki (taraa Te Kaotioti 21:4). I tataro bwa ti na bane n oota n ana kantaninga ma korakoran ana Mwakuri ni Kamaiu ara Tia Kamaiu: koauan te aki mamate, te tai ibukin te maiu are akea tokina, ao kamatoaakin te korakora are ti kona ni karekea tii ngkana ti bubuti, n aran Iesu Kristo, amen.