Yexus Khetos txoj Kev Theej Txhoj Ua Kom Muaj Zog
Los ntawm Txwj Laug Dallin H. Oaks
Los ntawm Pawg Kaum Ob tug Thwj Tim
Vim muaj Nws txoj Kev Theej Txhoj, tus Cawm Seej muaj lub hwj chim pab txhua yam kev mob kev nkeeg thiab kev txom nyem ntawm lub ntiaj teb no.
Nyob hauv lub neej no peb paub tias peb yuav tuag thiab ris lub nra ntawm kev txhaum. Yexus Khetos txoj Kev Theej Txhoj kov yeej ob qho no uas peb paub peb yuav raug nyob hauv lub neej no. Tiam sis ntxiv rau kev tuag thiab kev txhaum, peb kuj muaj lwm yam teeb meem nyob hauv lub neej no. Dhau los ntawm tib txoj Kev Theej Txhoj ntawd, peb tus Cawm Seej yuav txhawb peb lub dag zog kom kov yeej tau tej teeb meem ntawm lub neej no. Kuv yuav hais txog qhov no hnub no.
I.
Tej nqe vaj lug kub uas hais txog txoj Kev Theej Txhoj feem ntau hais txog qhov uas tus Cawm Seej ua kom txoj kev tuag, tej txoj hluas tu thiab Nws raug txom nyem rau peb tej kev txhaum. Nyob hauv nws zaj lus hauv Phau Ntawv Maumoos, Amas qhia txog tej ntsiab cai no. Tiam sis nws kuj qhia meej hais tias tus Cawm Seej raug kev mob kev nkeeg thiab kev txom nyem ntawm Nws cov neeg thiab.
Amas piav txog tus Cawm Seej txoj Kev Theej Txhoj li no hais tias: “Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam; thiab ua li no xwv kom txoj lus thiaj yuav muaj puv npo li uas tau hais tias nws yuav ris nws cov neeg tej kev mob thiab tej kev nkeeg” (Amas 7:11; kuj saib 2 Nifais 9:21)
Cia li xav txog qhov no! Nyob hauv tus Cawm Seej txoj Kev Theej Txhoj, Nws raug tej kev mob thiab kev tsim txom thiab kev ntxias txhua yam. Raws li Thawj Tswj Hwm Boyd K. Packer piav hais tias: “Nws tsis tshuav nqi uas Nws yuav tsum them. Nws tsis tau ua txhaum. Txawm li ntawd los, tag nrho tej lub txim, kev nyuaj siab thiab tu siab, kev mob thiab kev tsim txom, tag nrho tej kev txom nyem ntawm lub siab lub ntsws thiab sab cev nqaij daim tawv uas tib neeg raug—Nws twb raug tag nrho tej ntawd.”1
Vim li cas nws tau raug “txhua yam” teeb meem no? Amas piav hais tias, “Thiab nws yuav ris … lawv tej kev qaug dag qaug zog, kom nws lub siab thiaj li yuav muaj puv nkaus kev hlub tshua, raws li cev nqaij daim tawv, xwv kom nws yuav paub pab nws cov neeg raws li lawv tej kev qaug dag qaug zog” (Amas 7:12).
Piv txwv hais tias, tus Thwj Tim Povlauj tshaj tawm tias vim tus Cawm Seej “paub pab cov neeg uas raug kev sim siab, rau qhov nws twb raug kev sim siab thiab kev tsim txom los lawm” (Henplais 2:18). Thawj Tswj Hwm James E. Faust qhia hais tias, “Vim tus Cawm Seej raug txhua yam uas peb yuav raug los sis xav, Nws pab tau cov uas qaug zog kom lawv muaj zog zuj zus tuaj.”2
Peb tus Cawm Seej raug tag nrho tib neeg tej teeb meem “raws li ntawm cev nqaij daim tawv” nws thiaj yuav paub “raws li ntawm cev nqaij daim tawv” kom “pab nws cov neeg raws li lawv tej kev qaug dag qaug zog.” Yog li ntawd nws paub peb tej kev nyuaj siab, peb tej kev tu siab, tej yam uas ntxias peb, thiab peb tej kev raug txom nyem, vim Nws twb txaus siab raug tej ntawd tag nrho thaum Nws theej peb lub txhoj. Thiab vim li no, Nws txoj Kev Theej Txhoj ua rau Nws muaj hwj chim pab peb—kom muab dag zog rau peb nyiaj tau tag nrho tej no.
II.
Txawm Amas txoj kev qhia txog lub hwj chim ntawm txoj Kev Theej Txhoj nyob hauv tshooj xya yeej yog zaj lus meej tshaj txhua nqe vaj lug kub, lwm tus kuj qhia txog txoj Kev Theej Txhoj nyob tag nrho hauv vaj lug kub.
Thaum Nws pib qhuab qhia, Yexus piav hais tias Vajtswv txib Nws kom kho cov neeg uas muaj lub siab mob (Lukas 4:18). Phau Npainpaum qhia peb txog Nws txoj kev kho neeg “tej mob” (Lukas 5:15; 7:21). Phau Ntawv Maumoos hais txog Nws txoj kev kho cov uas “raug txom nyem txhua yam” (3 Nifais 17:9). Phau Mathais piav hais tias Yexus tau kho cov neeg “kom muaj tiav raws li Yaxayas tus [yaj saub] tau qhia tseg lawm hais tias, Nws muab peb tej kev tsaus muag tshem thiab nws ris peb tej kev mob kev nkeeg mus lawm” (Mathais 8:17).
Yaxayas qhia hais tais tus Mexiyas yuav ris peb “tej kev txom nyem” thiab ris peb tej kev nyuaj siab (Yaxayas 53:4). Yaxayas kuj qhia txog Nws txoj kev txhawb peb lub dag zog hais tias: “Nej tsis txhob ntshai, rau qhov kuv nrog nraim nej, kuv yog nej tus Vajtswv, nej tsis txhob poob siab; Kuv yuav pab nej thiab txhawb kom nej muaj zog” (Yaxayas 41:10).
Yog li ntawd, peb hu nkauj.
Tsis txhob ntshai, kuv nrog nej nyob; tsis muaj kev nyuaj siab,
Rau qhov kuv yog nej tus Tswv thiab yuav saib xyuas tiag.
Kuv pab nej, kuv hlub nej thiab kom nej sawv ntseg, …
Kuv txhawb nqa kuv cov ntseeg kom nej muaj lub siab ntev.3
Tus Thwj Tim Povlauj sau ntawv txog nws tej teeb meem hais tias, “Vim Yexus Khetos txhawb kuv lub zog, kuv thiaj tiv taus txhua tsav yam huv tib si” (Filipis 4:13).
Yog li ntawd peb pom tias vim muaj Nws txoj Kev Theej Txhoj, tus Cawm Seej muaj lub hwj chim pab txhua yam kev mob kev nkeeg thiab kev txom nyem ntawm lub ntiaj teb no. Tej lub sij hawm Nws lub hwj chim pab kho mob, tiam sis vaj lug kub thiab tej yam uas tau muaj los nyob hauv peb lub neej qhia peb tias tej lub sij hawm Nws pab thaum Nws muab dag zog los sis ua rau peb ua siab ntev kom nyiaj tau peb tej kev txom nyem.4
III.
Tus Cawm Seej raug tej kev mob kev nkeeg thiab tej kev txom nyem twg nyob hauv lub neej no?
Peb txhua tus yeej muaj sij hawm thaum peb raug kev mob kev nkeeg thiab raug txom nyem. Ntxiv rau tej yam uas peb raug vim peb ua txhaum, lub neej no pheej muaj tej teeb meem, tej kev siab mob, thiab kev txom nyem.
Peb thiab cov uas peb hlub raug kev mob kev nkeeg. Tej lub sij hawm peb txhua tus kuj raug mob vim peb raug xwm txheej los sis muaj teeb meem ntawm sab cev nqaij daim tawv los sis lub hlwb. Peb txhua tus raug nyuaj siab thaum ib tug uas peb hlub tas sim neej. Peb txhua tus muaj tej lub sij hawm thaum muaj teeb meem hauv peb tsev neeg los sis peb txoj hauj lwm los yog peb tej kev lav ris.
Thaum ib tug khub los sis ib tug me nyuam xyeej tej yam uas peb paub tias muaj tseeb thiab ncaim txoj kev ua ncaj ncees, ua rau peb nyuaj siab ntxhov plawv, ib yam li leej txiv ntawm tus tub ua txhaum nyob hauv Yexus zaj lus piv txwv (saib Lukas 15:11–32).
Raws li tus sau Phau Ntawv Nkauj hais tias: “Tus neeg ncaj ncees tiv ntau yam kev nyuaj siab, tiam sis tus Tswv cawm nws dim tej kev ntxhov siab ntawd huv tib si” (Phau Ntawv Nkauj 34:19).
Yog li ntawd, peb cov nkauj qhuas Vajtswv muaj cov lus tseeb no hais tias: “Lub ntiaj teb tsis muaj kev tu siab uas Vajtswv tsis txawj kho.”5 Qhov uas kho tau peb kom zoo yog peb tus Cawm Seej thiab Nws txoj Kev Theej Txhoj.
Qhov uas ua rau cov tub hluas ntxhais hluas mob siab heev yog thaum lawv xav tias lwm tus xyeej lawv thaum cov phooj ywg zoo siab sib raug zoo thiab ua si nrog lwm tus es txhob txwm tso lawv tseg. Kev ntxub lwm tus vim lawv yog lwm haiv neeg kuj ua rau cov tub hluas ntxhais hluas thiab cov neeg laus mob siab ib yam thiab. Peb lub neej kuj muaj lwm yam teeb meem, xws li thaum peb tsis muaj hauj lwm ua los sis muaj lwm yam uas tsis zoo li peb tau npaj lawm.
Kuv tseem hais txog tej yam uas peb raug hauv lub neej no uas tsis yog los ntawm peb tej kev txhaum. Ib txhia yug los muaj teeb meem ntawm sab cev nqaij daim tawv los sis lub hlwb uas ua rau lawv raug txom nyem thiab ua nyuaj rau cov uas hlub thiab saib xyuas lawv. Rau ntau tus neeg, kev mob tu siab yog ib qho mob loj heev los sis ua rau lawv nyuaj ua neej tas mus li. Ib qho kev txom nyem ntxiv yog qhov uas yus tsis tau yuav txiv los sis yuav poj niam. Cov uas raug kev txom nyem no yuav tsum nco ntsoov tias peb tus Cawm Seej paub txoj kev mob no thiab, dhau ntawm Nws txoj Kev Theej Txhoj, Nws muab dag zog rau nej kom ris tau.
Tsis muaj tej teeb meem uas ua nyuaj rau peb lub neej ntawm sab cev nqaij daim tawv thiab sab ntsuj plig tshaj tej kev muaj yees. Ib txhia, xws li cov uas muaj yees saib duab liab qab los yog muaj yees noj tshuaj phem, los muaj vim lawv ua txhaum. Txawm yus twb hloov siab lees txim txog kev ua li ntawd lawm los, tej zaum tseem yuav muaj yees. Qhov teeb meem nyuaj no kuj yuav txais kev pab los ntawm tus Cawm Seej txoj kev muaj zog. Yuav pab tus uas raug kaw hauv tsev rau txim vim nws txhaum kev cai thiab. Ib tsab ntawv uas tsis ntev tas los kuv tau txais ua tim khawv txog qhov uas ib tug zoo li ntawd kuj txais tau lub dag zog: “Kuv paub tias peb tus Cawm Seej mus kev hauv lub tsev no, thiab muaj ntau zaus uas kuv tau hnov Khetos txoj kev hlub nyob hauv lub tsev rau txim no.”6
Kuv nyiam zaj lus tim khawv ntawm tus uas sau paj lug thiab kuv tus phooj ywg Emma Lou Thayne. Nws sau tej lus no uas tam sim no peb hu nkauj:
Kev kaj siab nyob qhov twg?
Chaw nplij siab nyob twg
Thaum tag nrho lwm txoj hau kev kho tsis tau kuv?
Thaum muaj kev mob lub siab, npau taws thiab ntxub luag,
Kuv nrug ntawm luag xav txog,
Tej hauv siab ntsws?
Thaum kuv mob loj zuj zus,
Thaum kuv txom nyem ntsuav,
Thaum kuv xav tau kev pab kuv khiav tau qhov twg?
Qhov twg muaj txhais tes los nplij kuv kev ntxhov siab?
Leej twg thiaj yuav to taub?
Nws tib leeg xwb. 7
IV.
Leej twg yuav txais tau kev pab thiab txais kev dag zog dhau ntawm Yexus Khetos txoj Kev Theej Txhoj? Amas qhia hais tias tus Cawm Seej yuav ris “nws cov neeg tej kev mob thiab tej kev nkeeg” thiab “pab nws cov neeg ” (Amas 7:11, 12; ntxiv qhov uas ntawv qaij). “Nws cov neeg” yog leej twg nyob hauv kev cog lus no? Puas yog tag nrho cov neeg hauv lub ntiaj teb no—tag nrho cov uas yuav sawv rov los dhau ntawm txoj Kev Theej Txhoj? Los sis puas yog cov tub qhe uas tsim nyog vim lawv txais kab ke thiab kev khi lus?
Lo lus cov neeg muaj ntau lub ntsiab nyob hauv vaj lug kub. Lub ntsiab uas tsim nyog siv rau tej lus qhia uas tus Cawm Seej yuav pab “nws cov neeg” yog lub ntsiab uas Amas siv thaum nws qhia tias “Vajtswv yeej nco ntsoov txog neeg txhua tus, txawm yog lawv yuav nyob hauv thaj av twg” (Amas 26:37). Cov tim tswv siv lub ntsiab no thaum lawv tshaj txog Yexus Khetos txoj kev yug los: “Txoj kev zoo siab kawg nkaus rau txhua haiv neeg los qhia rau nej paub” (Lukas 2:10).
Vim Nws theej peb lub txhoj nyob hauv lub neej no, peb tus Cawm Seej muaj peev xwm nplij, kho thiab txhawb nqa tag nrho cov txiv neej thiab cov poj niam nyob txhua qhov chaw, tiam sis kuv ntseeg tias Nws ua li ntawd rau cov uas nrhiav Nws thiab thov Nws pab lawv xwb. Tus Thwj Tim Yakaunpaus qhia hais tias: “Nej cia li txo nej lub hwj chim tab meeg Vajtswv, Vajtswv thiaj yuav tsa nej lub hwj chim” (Yakaunpaus 4:10). Peb tsim nyog txais txoj koob hmoov ntawd thaum peb ntseeg Nws thiab thov Nws pab peb.
Muaj ntau phlom tus neeg uas hwm Vajtswv es lawv thov Vajtswv kom lawv yuav tsis raug txom nyem. Peb tus Cawm Seej qhia hais tias Nws tau nqis qis tshaj txhua yam (saib Q&K 88:6). Raws li Txwj Laug Neal A. Maxwell qhia hais tias, “Vim Nws nqis qis tshaj txhua yam, Nws to taub tag nrho ntawm Nws tus kheej tias tib neeg raug txom nyem npaum li cas.”8 Tej zaum tsim nyog peb hais tias vim Nws nqis qis tshaj txhua yam, Nws thiaj li nyob ntawm ib qhov chaw zoo kom txhawb nqa peb thiab txhawb peb lub dag zog yog peb yuav tsum nyiaj peb tej kev txom nyem. Peb yuav tsum thov xwb.
Muaj ntau zaus nyob hauv kev tshwm sim ntawm lub caij nyoog no, tus Tswv hais tias, yog nej thov kuv ces nej yuav tau txais; yog nej khob ces yuav qhib rau nej (ua piv txwv, Q&K 6:5; 11:5; kuj saib Mathais 7:7) Vim Nkawd hlub peb tag nrho, peb Leej Txiv Saum Ntuj Ceeb Tsheej thiab Nws Leej Tub, Yexus Khetos, hnov thiab teb tej lus thov ntawm txhua tus uas muaj kev ntseeg nrhiav Nkawd. Raws li tus Thwj Tim Povlauj sau hais tias “rau qhov peb cia siab rau Vajtswv tus uas muaj sia nyob uas yog tus Cawm Seej, qhov tseeb nws yog cov ntseeg tus Cawm Seej” (1 Timautes 4:10).
Kuv paub tej no muaj tseeb. Tsis yog peb tus Cawm Seej txoj Kev Theej Txhoj ua rau peb paub tias peb yuav tsis txawj tuag vim txhua tus yuav sawv rov los thiab muab cib fim rau peb rais los ua neeg huv ntawm kev txhaum thaum peb hloov siab lees txim thiab ua kev cai raus dej xwb. Nws txoj Kev Theej Txhoj kuj muab cib fim rau peb hu tus uas tau raug tag nrho peb tej kev mob ntawm sab cev nqaij daim tawv los muab dag zog rau peb kom ris tau tej nra ntawm lub neej no. Nws paub peb txoj kev nyuaj siab ntxhov plawv, thiab Nws yeej pab peb. Zoo li tus neeg Xamalis zoo, thaum Nws pom peb raug mob ntawm ntug kev, Nws yuav muab ntaub qhwv peb tej qhov txhab thiab saib xyuas peb (saib Lukas 10:34). Txhua tus thov tau thiab txais tau lub hwj chim ntawm Yexus Khetos thiab Nws txoj Kev Theej Txhoj uas kho peb zoo thiab muab dag zog rau peb. Kuv ua tim khawv txog qhov no thiab ua tim khawv txog tus Cawm Seej, uas ua kom muaj tau tag nrho tej ntawd.
Yuav muaj ib hnub thaum tej lub nra nrawm sab cev nqaij daim tawv yuav ploj mus thiab yuav tsis muaj kev mob kev nkeeg ntxiv. (saib Tshwm Sim 21:4). Kuv thov kom peb yuav to taub kev cia siab thiab lub zog ntawm peb tus Cawm Seej txoj Kev Theej Txhoj: uas ua kom peb txais tau kev tsis txawj tuag, lub cib fim muaj txoj sia nyob mus ib txhis, thiab lub dag zog uas txhawb nqa peb yog peb yuav thov Vajtswv, los ntawm Yexus Khetos lub npe, amees.