2010–2019
Vakatovolei ka Temaki—ia Eda Vukei
Okotova 2015


Vakatovolei ka Temaki—ia Eda Vukei

Sa rawa meda veivukei vakai keda ni da sa Luvena na Tamada Vakalomalagi ni da vakatovolei ka temaki.

Ena noda gauna ni bula, eda na vakatovolei ka temaki. E tiko talega na noda veimadigi ni galala meda veivukei vakai keda. Na veika dina oqo sa tiki tiko ni ituvatuva totoka ka uasivi nei Tamada Vakalomalagi.

A vakavulica o Peresitedi John Taylor: “Ena dua na gauna au a rogoca kina na Parofita ni a vosa vei iratou na Le Tinikarua: ‘O ni na sotava na veimataqali veivakatovolei mo ni na takoso rawa kina. Sa qai ka dodonu sara mo ni vakatovolei me vakataki Eparaama kei ira tale e so na tamata ni Kalou, ka (kaya o koya) ni na tiko e lomamu na Kalou, ka na tauri iko o Koya ka na veimoiyaka na veiwa ni utomu.’”1

Ni da yacova na yabaki ni vakatulewa vakai keda, sa yaco raraba ga mai na veivakatovolei kei na veitemaki. Eso na gauna era na icolacola bibi, ia eda na vaqaqacotaki ka tubu talega kina ni da valuta rawa.

E ka ni marau, ni icolacola oqo eda sega ni colata duadua. A vakavulica o Alama, “Me vaka dou sa gadreva mo dou curu ki na lomanibai ni Kalou, ka vakatokai me nona tamata, ka sa lomamudou mo dou veivuketaka na nomudou icolacola me mamada kina.”2 Na malanivosa oqo e tukuna tiko ni sa noda ilesilesi meda veivukei vakai keda. Na ilesilesi oqo e rawa ni dua na veikacivi ena Lotu, e dua na itavi, na veitokani, se tiki ni noda ilesilesi vakalou vaka-itubutubu, veiwatini, se lewe ni matavuvale—se o tiki ni matavuvale ni Kalou.

Meu na vakaraitaka mada e va na sala ena vakamamadataki kina na noda icolacola ni da veivukei vakai keda.

1. A kaya na iVakabula, “Ia kevaka e dua sa vakasaurarataki iko mo drau lako vata kaya e dua na maile, lako vata kaya ena kena ikarua.”3 Kena ivakaraitaki, eda sa kerei meda tiko vakawasoma e valetabu ni sa rawa vei keda vakayadua. Na tiko e valetabu e ka ni solibula ni noda gauna kei na ivurevure, vakabibi vei ira era gole sara mai vakayawa. Ia, na solibula oqo sa na tiki tiko ni imatai ni maile.

Eda na tekivu lakova na ikarua ni maile ni da sa kila vinaka na malanivosa oqo “kunea, kauta, ka vakavulica,”4 ni da vakasaqara ka vakarautaka na yacadra na noda qase ki na cakacaka vakalotu ni valetabu, ni da veivuke ena tuva yaca, ni da cakacaka e valetabu, ka da vakasaqara na sala meda vukei ira eso mera vakila dina na ibalebale ni valetabu.

Niu a se veiqaravi tiko vaka-Vitusagavulu ni iWasewase, e dua na iteki lewe ni noqu matabose veivakacokotaki a vakaitavi ena dua na ilakolako levu ki na valetabu. E valetabu lailai sara era gole kina na lewenilotu, ka kalouca ni vica na lewenilotu, era vodo balavu mai me 12 na auwa, era a sega ni curu rawa ki valetabu baleta ni sa sivia na iwiliwili ni dua na siga.

Ni oti e vica na siga mai na lakolako oqo, au a gole ki na iteki oqo ka kerei peresitedi ni iteki meu vosa vei ira eso na lewenilotu era a sega ni curu rawa ki valetabu ena siga o ya. A kaya kina vei au e dua na baraca au a vosa vua: “Elder, kua ni leqa. Au a tiko ena vale ni Turaga. Au a laki dabe toka ena idabedabe ena veisenikau ka vakanananutaka na cakacaka vakalotu. Sa mani yaco mai na gauna meu curu kina, ia au a solia me sosomitaki au e dua tale na baraca a gole mai ki valetabu ena imatai ni gauna me vauci vei watina. Sa yaco kina na madigi me rau tiko ena rua na soqoni ena siga o ya. E kilai au tiko na Turaga, ka sa vakalougatataki au o Koya, ka keitou sa daumaka tiko.”

2. Matamamarau. Na itovo lailai oqo e rawa ni vukea eso era sa vakaogai ka lomaocaoca tu. Ena soqoni ni matabete ni koniferedi raraba ni Epereli sa oti, au a dabe toka e cake niu dua vei iratou na lima na Vakaitutu Raraba kacivi vou. Keimami a dabe tiko ena vanua era sa dabe tiko kina ena gauna oqo na marama mataveiliutaki ni mataisoqosoqo. Sa veiladeyaki toka na yaloqu ka luvuci sara ena noqu veikacivi vou.

Ni sa laga tiko na sere ni vakacegu, sa vakauqeti vakaukauwa na lomaqu ni dua e wanonovi au tiko. Au vakasamataka sara: “E sivia e 20,000 na tamata era tiko ena loma ni vale oqo, ka vuqa vei ira era vuki tiko mai e yasana qo. E dodonu ga me so era wanonovi iko tiko.”

Niu lagasere tiko, au sa baci vakauqeti tale ni dua e wanonovi au tiko mai. Niu rai yani ki na nodratou yatu dabedabe na iApositolo Le Tinikarua au raica ni sa vuki tu mai o Peresitedi Russell M. Nelson, ka rai tiko mai ki na vanua keitou dabe tiko kina. Keirau veisotari mata sara, ka matamamarau sara mai vakavinaka. Na matamamarau o ya a vakaceguya na luvuci ni lomaqu.

Ni sa Tucake Tale, a rairai o Jisu Karisito vei ira na Nona sipi tale eso. A kaciva ka tabaki iratou na tisaipeli le tinikarua, kei na lewa o ya, e ratou a laki qaravi ira kina na tamata. A tu ena kedratou maliwa na Turaga Vakaikoya o Jisu Karisito. A kerei iratou na Turaga me ratou tekiduru ka masu. Au sega mada ni vakadeitaka a luvuci na lomadratou na tinikarua na tisaipeli kacivi vou ka tabaki o ya, ia e tukuna na ivolanikalou, “A sa vakalougatataki iratou ko Jisu ni ratou sa masu tiko vua; a sa matamamarau vei iratou, ka serauni iratou na rarama ni matana.”5 Ena gauna ni koniferedi raraba sa oti, e dua na matamamarau a vakamamadataka na noqu icolacola ena sala totolo sara ka veivakurabuitaki.

3. Vakaraitaka na yalololoma vei ira tale eso. Ke o dua na lewe ni matabete, yalovinaka vakayagataka nomu kaukauwa ena vukudra na luve ni Kalou, mo vosa vakalougatataki ira. Cavuta na vosa ni loloma kei na veivakacegui vei ira na tamata era tiko rarawa se sotava tiko na leqa.

4. Na vatuivakadei ni ituvatuva ni Kalou sai koya na Veisorovaki ni Turaga o Jisu Karisito. Me vakadua ena lomanimacawa, meda vakasamataka vakatitobu me vaka a cakava o Peresitedi Joseph F. Smith ni sa “loloma uasivi ka veivakurabuitaki nei Tamada kei na Luvena me lako mai kina ki vuravura na iVakabula.”6 Na nodra sureti na tamata mera gole mai ki lotu ka mera kania na sakaramede ena bula kilikili ena yaco kina me vuqa na luvena na Tamada Vakalomalagi mera vakananuma kina na Veisorovaki. Ia, kevaka eda sa sega ni kilikili, sa rawa meda veivutuni. Meda nanuma tiko ni a siro sobu mai ra sara na Luvena sa Cecere Sara ka taura vei Koya na noda caka cala, ivalavala ca, vuki tani, tauvimate, mosi, rarawa, kei na galili. E vakavulici keda na ivolanikalou ni Karisito, “sai Koya sa lako cake, sai koya talega sa lako sobu mai ki ra sara; a sa kila na ka kecega.”7

Se vakacava sara na veika dredre eda dui sotava—se tauvimate beka se galili balavu se sotava tiko na veitemaki kei na veivakatovolei nei vu-ni-ca—sa tiko e kea na iVakatawa Vinaka. E kacivi keda ena yacada ka kaya, “Dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou.”8

Au gadreva meu vakabibitaka na tikina e va:

iMatai: goleva na ikarua ni maile.

iKarua: yalovinaka mo matamamarau. O na vukea kina eso.

iKatolu: vakaraitaka nomu yalololoma.

iKava: sureti ira eso tale mera gole mai ki lotu.

Au sa vakadinadinataka na iVakabula. Sa i Jisu na Karisito, na Luve ni Kalou sa bula tiko, ka sa bula tiko o Koya. Au kila ni tokona, ena Nona cecere kei na kaukauwa taucoko, na ituvatuva nei Tamana. Au kila ni o Peresitedi Thomas S. Monson sa parofita bula. Sa tu vua na idola taucoko me rawa ni vakayacora kina na cakacaka ni Kalou ena vuravura oqo. Au kila ni sa rawa meda veivukei vakai keda ni da sa Luvena na Tamada Vakalomalagi ni da vakatovolei ka temaki. Ena yaca i Jisu Karisito, emeni.