Raug Sim Siab thiab Raug Ntxias—Tiam Sis Kuj Tau Kev Pab

Nyob hauv peb lub neej, peb raug kev sim siab thiab raug ntxias. Peb kuj muaj cib fim siv peb txoj kev ywj siab xaiv thiab muaj cib fim kom ib leeg pab ib leeg. Tej qhov tseeb no yog ib feem ntawm peb Leej Txiv Saum Ntuj Ceeb Tsheej txoj hau kev uas zoo kawg nkaus.

Thawj Tswj Hwm John Taylor qhia hais tias: “Muaj ib zaug kuv hnov tus Yaj Saub Yauxej hais rau Pawg Kaum Ob tug Thwj Tim hais tias: ‘Nej yuav raug tej kev sim siab ntau yam.” Thiab nej yuav tsum raug sim siab ib yam li Anplaham thiab lwm tus neeg uas ntseeg Vajtswv raug, thiab (nws hais tias) Vajtswv yuav sim nej, thiab Nws yuav tuav nej thiab sim nej siab tiag tiag.’”¹

Thaum peb muaj hnub nyoog lav ris lawm, txhua tus yeej raug kev sim siab thiab raug ntxias. Tej lub sij hawm tej no rais los ua tej nra hnyav, tiam sis tej no kuj ua rau peb muaj zog thiab pab peb kawm thaum peb kov yeej tej yam nyuaj no.

Zoo siab uas peb tsis tas ris tej nra hnyav no peb tus kheej xwb. Amas qhia hais tias, “Nej xav los rau hauv Vajtswv pab, thiab raug hu ua nws cov neeg, thiab ib leeg txaus siab ris ib leeg tej nra, xwv kom [tej nra] thiaj li yuav sib.”² Tej lus no qhia peb hais tias peb ib leeg muaj kev lav ris pab ib leeg. Tej zaum kev lav ris ntawd yuav los ntawm ib txoj hauj lwm hauv lub Koom Txoos, ib qho kev txib, kev ua phooj ywg, los sis lub luag hauj lwm los ntawm kev ua ib tug niam tsev txiv tsev, ua khub, los yog ib tug hauv tsev neeg—los sis los ntawm qhov uas peb nyob hauv Vajtswv tsev neeg.

Kuv yuav qhia plaub yam uas ua rau peb tej nra sib thaum peb ib leeg pab ib leeg.

1. Tus Cawm Seej hais tias, “Yog leej twg yuam kom nej mus ib tawm kev, cia li nrog nws mus ob tawm kev.”³ Piv txwv hais tias, tau hais kom peb mus rau lub tuam tsev tsis tu tsis tseg, raws li peb tus kheej ua taus. Yuav tsum siv sij hawm thiab siv tej yam ntau kom mus rau lub tuam tsev, cov uas yuav tsum mus deb haj yam siv sij hawm ntau. Txawm li ntawd los, kev txi no yog ib feem ntawm tawm kev thib ib.

Peb pib taug tawm kev thib ob thaum peb to taub cov lus “nrhiav, coj, thiab qhia,”⁴ thaum peb nrhiav thiab npaj peb cov poj koob yawm txwv tej npe kom txais cov kab ke ntawm lub tuam tsev, thaum peb pab txheeb xyuas tej npe, thaum peb ua hauj lwm hauv lub tuam tsev, thiab thaum peb nrhiav kev pab kom lwm tus txais tau tej yam zoo nyob hauv lub tuam tsev.

Thaum kuv yog ib tug Xya Caum Coj Cheeb Tsam, ib ceg txheem ntseeg nyob hauv kuv pawg sab laj koom tes tau npaj thauj neeg coob mus rau lub tuam tsev. Lub tuam tsev uas lawv mus yog ib lub me heev, thiab ntshe muaj ob peb tug mej zeej uas mus tsis tau rau hauv lub tuam tsev vim muaj neeg coob dhau, txawm lawv twb mus kev deb li 12 teev lawm los.

Ob peb hnub tom qab ntawd, kuv tau mus xyuas ceg txheem ntseeg no thiab nug tus thawj tswj hwm seb nws puas kam kuv sib tham nrog ob peb tug mej zeej uas mus tsis tau rau hauv lub tuam tsev. Ib tug tij laug uas kuv mus xyuas hais tias: “Txwj Laug, tsis tas txhawj. Kuv twb nyob ntawm tus Tswv lub tsev. Kuv zaum nyob hauv lub vaj thiab xav txog tej kab ke. Ces kuv twb muaj cib fim nkag mus rau hauv, tiam sis kuv cia ib tug kwv tij pauv kuv chaw, vim yog thawj zaug nws tuaj rau lub tuam tsev kom sib khi nrog nws tus poj niam. Ces hnub ntawd nkawd thiaj muaj cib fim mus ob zaug. Tus Tswv paub kuv, thiab Nws tau foom koob hmoov rau kuv, thiab peb tsis ua li cas.”

2. Luag ntxhi. Qhov me me no pab tau cov uas nyuaj siab los sis ris nra hnyav. Nyob hauv tuas pov thawj hwj hauv lub tuam rooj sab laj thaum lub Plaub Hlis Ntuj dhau los, kuv zaum saum sam thiaj nrog tsib tug Tuam Thawj Coj tshiab. Peb zaum ntawm qhov chaw uas cov muam hauv tej koom haum pab pawg thawj tswj hwm zaum tam sim no. Kuv txoj hauj lwm tshiab ua rau kuv txhawj thiab nyuaj siab heev.

Thaum peb hu zaj nkauj nrab, kuv txais kev tshoov siab qhia kuv tias muaj leej twg ntsia kuv. Kuv xav hais tias: “Muaj 20,000 tawm tus neeg nyob hauv lub tsev no, thiab lawv feem ntau saib sab no. Yeej muaj leej twg uas ntsia kuv.”

Thaum kuv tseem hu nkauj, kuv rov qab txais kev tshoov siab uas muaj zog heev hais tias muaj leej twg ntsia kuv. Kuv saib rau txoj kab rooj zaum uas Pawg Kaum Ob tug Thwj Tim zaum thiab pom hais tias Thawj Tswj Hwm Russell M. Nelson twb tig hlo hauv nws lub rooj zaum, thiab saib qhov chaw uas peb zaum. Nws pom kuv, thiab nws luag rau kuv loj heev. Nws txoj kev luag ua rau kuv nyob kaj siab lug.

Tom qab Nws txoj Kev Sawv Rov Los, Yexus Khetos mus xyuas Nws lwm cov yaj. Nws hu thiab tsa kaum ob tug thwj tim, thiab lawv siv txoj cai ntawd mus qhuab qhia rau cov neeg. Tus Tswv Yexus Khetos kiag tau koom nrog lawv. Tus Tswv hais kom lawv txhos caug thiab thov Vajtswv. Kuv tsis paub Nws pawg kaum ob tug thwj tim tshiab uas nws hu thiab tsa puas nyuaj siab txog lawv txoj hauj lwm, tiam sis vaj lug kub hais tias, “Tau muaj tias Yexus tau foom koob hmoov rau lawv li lawv tau thov nws; thiab nws lub ntsej muag tau luag rau lawv, thiab qhov ci ntawm nws lub ntsej muag tau ci rau lawv.”⁵ Nyob hauv lub tuam rooj sab laj tas los, ib tug neeg txoj kev luag tau pab ua rau kuv lub nra sib tam sim ntawd.

3. Qhia lwm tus tias nej muaj kev khuv leej hlub lawv. Yog tias koj tuav lub pov thawj hwj, thov siv koj lub hwj chim kom pab Vajtswv cov me nyuam, foom koob hmoov rau lawv. Rau cov uas raug kev txom nyem los sis raug mob hais tej lus uas nplij lawv lub siab.

4. Lub hauv paus ntawm Vajtswv txoj hau kev yog tus Tswv Yexus Khetos txoj Kev Theej Txhoj. Txhua lub lim tiam, peb yuav tsum ua ib yam li Thawj Tswj Hwm Joseph F. Smith ua thiab xav txog “txoj kev hlub tseem ceeb thiab zoo kawg nkaus uas Leej Txiv thiab Leej Tub qhia rau peb thaum tus Txhiv Dim tau los rau hauv lub ntiaj teb.”⁶ Qhov uas peb caw lwm tus tuaj koom lub koom txoos thiab txais lub cim nco txog yam li tsim nyog yuav pab Leej Txiv Saum Ntuj Ceeb Tsheej cov me nyuam coob ntxiv xav txog txoj Kev Theej Txhoj. Thiab, yog peb tsis tsim nyog, peb hloov siab lees txim tau. Nco ntsoov tias tus Siab Tshaj Plaws Leej Tub nqis qis tshaj txhua yam thiab ris peb tej kev txog kev txhaum, kev ua phem, kev mob kev nkeeg, kev txom nyem, thiab kev kho siab. Nqe vaj lug kub qhia hais tias Yexus Khetos tau nce mus puag saum ntuj, thiab nws kuj tau nqis qis tshaj txhua yam, nws thiaj li thoob tsib to nrog txhua yam.⁷

Peb muaj kev nyuaj siab li cas los tsis ua li cas—txawm peb raug kab mob los sis kho siab kav ntev los yog raug kev ntxias thiab kev sim siab ntawm tus yeeb ncuab los—tus Tswv Yug Yaj Zoo yeej nyob nrog peb. Nws hu peb lub npe thiab hais tias, “Nej cov uas sab sab vim nej ris nra hnyav, nej cia li los cuag kuv, thiab kuv yuav cia nej so.”⁸

Kuv xav rov qab hais txog plaub qhov no:

Qhov thib ib—mus ob tawm kev.

Qhov thib ob—cia li luag. Nej txoj kev luag yuav pab lwm tus.

Qhov thib peb—muaj kev khuv leej.

Qhov thib plaub—caw lwm tus tuaj koom lub koom txoos.

Kuv ua tim khawv txog tus Cawm Seej. Yexus yog tus Khetos, Vajtswv Leej Tub, thiab Nws muaj txoj sia nyob. Kuv paub hais tias Nws txhawb nqa Leej Txiv txoj hau kev kawg Nws lub zog thiab lub hwj chim. Kuv paub hais tias Thawj Tswj Hwm Thomas S. Monson yog ib tug yaj saub. Nws muaj tag nrho cov yuam sij uas yuav tsum muaj kom ua tau Vajtswv txoj hauj lwm nyob hauv lub ntiaj teb no. Kuv paub hais tias peb cov uas yog peb Leej Txiv Saum Ntuj Ceeb Tsheej cov me nyuam muaj peev xwm sib pab thaum peb raug kev sim siab thiab kev ntxias. Los ntawm Yexus Khetos lub npe, amees.