Yalb’il rix ut aalenb’il—a’ut tenq’anb’il

Chiru li qayu’am, yalb’il qix ut aalenb’ilo. Naru ajwi’ taqak’anjela xtaql li qach’ool re xtenq’ankil qib’ chiqib’il qib’. Eb’ li yaal a’in neke’xk’am rib’ sa’ li k’uub’anb’il na’leb’ chaq’al ru ut tz’aqal re ru re li qaChoxahil Yuwa’.

Li Awa’b’ej John Taylor kixk’ut: “Xwab’i chixyeeb’aal li Profeet aj Jose, naq yoo chi aatinak rik’ineb’ li Kab’laju: ‘Talaje’wanq xyalb’al eerix li texnume’q wi’. Ut aajel ru naq yalb’ilaq eerix jo’ chanru aajel ru naq yalb’il chaq rix laj Abraham ut li jun ch’ol chik li winq re li Dios, ut (chan a’an) li Dios tixyal eerix, ut texxchap chi kaw ut tixyaal eerix toj nawulak sa’ xmaaril lee kuyb’al”.¹

Naq noko’tz’aqlok qachihab’ re tooruuq chi teneb’aak, chiqajunilo taayale’q qix ut too’aaleeq. Wan naq a’aneb’ li iiq q’axal aal, a’ut naru ajwi’ te’xk’e li qametz’ew ut qachaab’ilal a’ yaal jo’ chanru toonumtaaq sa’ xb’eeneb’.

K’a’jo’ rusilal naq ink’a’ teneb’anb’ilo chiriiqankileb’ qajunes qib’. Laj Alma kixk’ut, “Wan eerajom ok sa’ lix korral li Dios, ut xtenamit a’an texk’ab’a’iiq, ut wan eech’ool chixk’amb’al eeriiq cherib’il eerib’ re naq taaseeb’o’q”.² Li aatin a’in naxk’ut xyaalal naq teneb’anb’ilo chixtenq’ankil qib’ chiqib’il qib’. Li teneb’ank a’in naru nachal rik’in jun li b’oqb’al sa’ li Iglees, jun li k’anjel, jun li amiiw, malaj rik’in li qaloq’laj k’anjel jo’ na’b’ej yuwa’b’ej, ixaqilb’ej malaj b’eelomej, malaj jo’ komon sa’ li qajunkab’al—malaj ut yal rik’in li wank sa’ xjunkab’al li Dios.

Tin’aatinaq chirix kaahib’ li na’leb’ chirix chanru te’seeb’o’q li qiiq naq naqatenq’a qib’ chiqib’il qib’.

1. Li Kolonel kixye, “Ani tixmin aawu chixb’eeninkil jun hiil, chawochb’eeni wiib’aq hiil”.³ Jo’ reetalil a’an, napatz’man qe laa’o naq tooxik rajlal sa’ li santil ochoch, jo’ naru chiqu li junjunq. Li xik sa’ li santil ochoch naraj jun mayej re li qahoonal ut li k’a’ru nak’anjelak qe, ut q’axal wi’chik chiruheb’ li tento te’b’eeq chi najt re te’wulaq. A’b’anan, li mayej a’in, aan wan sa li xb’een hiil.

Noko’ok chixb’eeninkil li xkab’ hiil naq noko’ok chixtawb’aleb’ ru li aatin a’in “tawok, k’amok, k’utuk”,⁴ naq yooko chixsik’b’aleb’ ut chixkawresinkileb’ li k’ab’a’ej re li qaxe’ qatoon re te’xk’ul li k’ojob’anb’il k’anjel re li santil ochoch, naq yooko chi tenq’ank sa’ li k’anjel re Indexing, naq yooko chi k’anjelak jo’ aj tenq’ sa’ li santil ochoch, ut naq yooko chixsik’b’al chanru taqatenq’aheb’ jalaneb’ re te’xk’ul li aajel ru choq’ reheb’ sa’ li santil ochoch.

Naq yookin chaq chi k’anjelak jo’ jun li Setenta re Sutam, jun reheb’ li oqech sa’ insutam ke’tz’aqon sa’ jun nimla xikik sa’ li santil ochoch. Moko nim ta li santil ochoch neke’xik wi’ li komon a’an, ut ke’wan li komon li ke’b’eek 12 hoonal re te’wulaq, li ink’a’ ke’ru chi ok sa’ li santil ochoch xb’aan naq ak nujenaq rik’in li komon.

Junjunqeb’ li kutan chirix li k’anjel a’in, kinwula’ani li oqech a’in ut kinpatz’ re li awa’b’ej ma tinruuq chi aatinak rik’in junjunq reheb’ li komon li ink’a’ ke’ru chi ok sa’ li santil ochoch sa’ li kutan a’an. Jun reheb’ li winq li kinwaatina kixye we, “At Elder, matk’oxlak. Xinwan nach’ rik’in lix santil ochoch li Dios. Xinchunla sa’ jun li chunleb’aal sa’ rawimq li santil ochoch ut xintz’il rix sa’ ink’a’uxl li k’ojob’anb’il k’anjel. Toja’ ut naq k’eeb’il we inhoonal chi ok, a’ut xink’e li usilal a’in re jalan chik li winq, li yoo chi wulak sa’ li santil ochoch xb’een sut re taatz’ape’q sa’ junajil rik’in li rixaqil, ut a’an x’ok weeqaj. Toja’ ut naq xe’ru ajwi’ chi tz’aqonk sa’ wiib’ li k’anjel re li tiqib’aak. Li Qaawa’ naxnaw wu, ut a’an ak xinrosob’tesi, ut sa wanko”.

2. Se’ek. Li ch’ina na’leb’ a’in taaruuq tixtenq’aheb’ li tawasinb’ileb’ rik’in li riiq q’axal aal. Sa’ li ch’utam re li tijonelil sa’ li jolomil ch’utub’aj-ib’ re abril li toje’ xnume’, chunchuukin arin jo’ jun reheb’ li oob’ li Jolomil aj B’eresinel toje’ b’oqb’ileb’. Chunchuuko chaq sa’ li na’ajej chunchuukeb’ wi’ li komon ixq reheb’ li Awa’b’ejil re li K’anjenel Ch’uut anajwan. K’a’jo’ inxiw ut aal li wiiq rik’in lin ak’ b’oqb’al.

Naq yooko chixb’ichankil jun reheb’ li b’ich sa’ xyi li k’anjel, kinweek’a chi kaw naq wan ani yoo chinka’yankil. Xink’oxla sa’ ink’a’uxl: “Wan numenaq 20,000 chi kristiaan sa’ li kab’l a’in, ut lix k’ihaleb’ yookeb’ chiwilb’al. Tz’aqal naq wan ani yoo chinka’yankil”.

Ink’a’ xinkanab’ b’ichank, a’ut kinweek’a wi’chik naq anihaq yoo chinka’yankil. Xink’e wilob’aal b’ar wi’ chunchuukeb’ li Kab’laju chi Apostol ut kiwil naq li Awa’b’ej Russell M. Nelson sutq’isinb’il chi tz’aqal sa’ xchunleb’aal ut yoo chinka’yankil. Kiwil sa’ xnaq’ ru, ut a’an kixk’e jun li sahil xse’. Li se’ek a’an kixk’am xtuqtuukilal re lin tawasinb’il ch’ool.

Chirix lix Waklijik chi yo’yo, li Jesukristo kirula’aniheb’ xkarneer jalaneb’ xkorral. A’an kixb’oq ut kixk’ojob’ kab’laju chi tzolom, ut rik’in li wankilal a’an, ke’k’anjelak chiru li tenamit. Li Qaawa’ Jesukristo kixaqli sa’ xyanqeb’. Li Qaawa’ kixtz’aama chiruheb’ naq te’wiq’laq ut te’tijoq. Ink’a’ ninnaw ma iiqanb’ileb’ li kab’laju chi tzolom sa’ x’aq’il b’oqb’al, a’b’an naxye li loq’laj hu, “Ut kikʼulman naq li Jesus kirosobʼtesihebʼ naq yookebʼ chi tijok chiru; ut sa xseʼ li rilobʼaal naq kirilebʼ, ut lix saqenil li rilobʼaal kilemtzʼun chiruheb’ ”.⁵ Chiru chaq li jolomil ch’utub’aj-ib’ toje’ xnume’, jun li se’ kixseeb’ob’resi li wiiq sa’ junpaat ut rik’in xchaq’alil ru.

3. Xk’utb’al li eek’ahom re toq’ob’ank-u reheb’ li qas qiitz’in. Wi wan li tijonelil aawik’in, b’aanu usilal ut chawoksi laa wankil sa’ xk’ab’a’eb’ li ralaj xk’ajol li Dios, chixk’eeb’al li osob’tesink reheb’. Chaye li aatin li tixk’ojob’ xch’ool li ani yoo chixnumsinkil li rahilal malaj li ch’a’ajkilal.

4. Li xnimal ru pek re lix k’uub’anb’il na’leb’ li Dios a’an lix Tojb’al rix li Maak kixb’aanu li Qaawa’ Jesukristo. Tento naq rajlal xamaan taqak’oxla sa’ qak’a’uxl, jo’ kixb’aanu li Awa’b’ej Joseph F. Smith, “li xnimal ru ut sachb’a-ch’oolejil rahok k’eeb’il chaq chi k’utb’esimank xb’aan li Yuwa’b’ej ut li K’ajolb’ej sa’ lix k’ulunik laj Tojol-ix sa’ li ruchich’och’ ”.⁶ Li xb’oqb’aleb’ jalaneb’ chi chalk sa’ iglees ut chi tz’aqonk rik’in k’uleb’ejil sa’ li loq’laj wa’ak taatenq’anq reheb’ xkomon chik li ralal xk’ajol li Dios chixk’oxlankil lix Tojb’al rix li Maak. Ut wi moko k’ulub’ejo ta, naru taqajal qak’a’uxl. Chijultiko’q eere naq li Ralal li Taqenaqil Xwankil kikub’e rub’el chixjunil ut kixk’am sa’ xb’een chixjunil li qamaak, li q’etok aatin qab’aanuhom, li qayajel, li qarahilal, ut li qajunaatal. Li loq’laj hu naxk’ut naq li Kristo “kixtaqsi rib’ chi taqe’q, jo’ chanru ajwi’ kikub’e rub’el chixjunil li k’a’aq re ru, rik’in naq naxtaw ru chixjunil li k’a’aq re ru”.⁷

Maak’a’ na’ok wi’ k’a’ru li yooko chi ch’a’ajkilo’k wi’—ma yajel malaj li najtil junaatal malaj xnusminkil li rahilal sa’ xk’ab’a’ li aaleek ut yalok-ix re li xik’ na’ilok qe—li Chaab’il aj Ilol Karneer wan qik’in. A’an nokoxb’oq rik’in tz’aqal qak’ab’a’ ut naxye, “Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi”.⁸

Nawaj xnumsinkil li kaahib’ li na’leb’:

Xb’een—aalina li xkab’ hiil.

Xkab’—b’aanuhomaq usilal ut se’enkex. Li sa eese’ taatenq’ank reheb’ jalaneb’.

Rox—chextoq’ob’ank-u.

Xkaa—cheb’oq jalaneb’ chi chalk sa’ iglees.

Ninch’olob’ xyaalal li Kolonel. Li Jesus a’an li Kristo, li Ralal li yo’yookil Dios, ut yo’yo a’an. Ninnaw naq a’an naxk’ojob’ xwankil, chi anchal xmetz’ew ut xwankil, lix k’uub’anb’il na’leb’ li Dios. Ninnaw naq li Awa’b’ej Thomas S. Monson a’an jun yo’yookil profeet. Wan rik’in chixjunil li laaw re xb’aanunkil chi tz’aqal lix k’anjel li Dios sa’ ruchich’och’. Ninnaw naq jo’ ralal xk’ajolo li qaChoxahil Yuwa’, naru taqatenq’a qib’ chiqib’il qib’ sa’ xyalb’al qix ut li noko’aaleek wi’. Sa’ xk’ab’a’ li Jesukristo, amen.