Probá i Tentá---pero Yudá

Durante kurso di bida, nos ta wòrdu probá i tentá. Tambe nos tin e oportunidat pa ehersé albedrio i yuda un na otro. E berdatnan aki ta parti di e plan maravioso i perfekto di nos Tata Selestial.

Presidente John Taylor a siña: “Mi a skucha e Profeta Joseph bisa, papiando ku e Diesdos na un okashon: ‘Boso lo haña tur tipo di prueba pa pasa aden. I ta hopi nesesario pa boso pa wòrdu probá meskos ku Abraham i otro hòmbernan di Dios, i (el a bisa) Dios lo proba boso, i E lo tene boso i proba boso te na boso límite.’’’¹

Unabes ku nos yega e edat di responsabilidat, pruebanan i tentashonnan ta masha komun. Tin biaha nan por bira karganan pisá, pero nan ta duna nos forsa i kresementu tambe ora nos superá nan ku éksito.

Afortunadamente, e karganan aki no ta pa wòrdu kargá [nan] so. Alma a bisa ku e hende ku ke wòrdu boutisá i tin deseo pa bini den e rebaño di Dios, i pa wòrdu yamá Su pueblo, i ta dispuesto pa karga e peso di otronan, pa nan por ta suave.² E palabranan aki ta indiká ku nos tin e responsabilidat pa yuda otro. E responsabilidat ei por bini for di un yamamentu di Iglesia, un asignashon, òf un amistat, òf komo parti di nos deber dibino komo mayornan, kasánan, òf miembronan di famia—òf simplemente for di ta parti di Dios su famia.

Lo mi ilustrá kuater manera ku nos karganan ta wòrdu hasí lihé ora nos yuda otro.

1. E Salbador a bisa, “Si kualke hende fòrsa bo pa bai un mia, bai dos.”³ Por ehèmpel, ta wòrdu pidí na nos pa bai tèmpel regularmente, segun nos sirkunstansia individual ta pèrmití. Bishitá tèmpel ta eksigí sakrifisio di tempu i rekursonan, spesialmente pa esnan ku mester biaha distansianan grandi. Sinembargo, e sakrifisio aki por wòrdu konsiderá parti dje promé mia.

Nos ta kuminsá kana e di dos mia ora nos komprondé e palabranan “haña, tuma, siña,”⁴ ora nos buska i prepará e nòmbernan pa nos antepasadonan pa ordenansanan di tèmpel, ora nos yuda ku indeksashon, sirbi komo obreronan di tèmpel, i nos buska maneranan pa yuda otronan haña eksperensianan signifikativo di tèmpel.

Miéntras mi tabata sirbi komo un Setenta di Área, un di e stakanan den mi konseho di koordinashon a partisipá den un ekskurshon grandi pa bai tèmpel. E tèmpel ku e miembronan a bishitá ta chikitu, i desafortunadamente tabatin vários miembro ku, apesar di a hasi e biahe di 12[diesdos] ora, no por a drenta e tèmpel pasó el a pasa su kapasidat diario.

Algun dia despues di e biahe aki, mi a bishitá e staka aki i a puntra e presidente si mi por a papia ku algun di e miembronan ku no por a bishitá e tèmpel e dia ei. Un di e hermanonan ku mi a bishitá a bisa mi: “Elder, no prekupá. Mi tabata na kas di Señor. Mi a sinta riba un banki den e hardin i a meditá e ordenansanan den mi mente. Despues mi a haña e oportunidat pa drenta, pero enbes dje esei mi a permití un otro hermano, ku a bini tèmpel pa promé biaha pa wòrdu seyá na su esposa, pa tuma mi lugá. Despues nan tabatin e oportunidat pa tuma parti na dos seshon e dia ei. Señor konosé mi, i El a bendishoná mi, i nos ta bon.”

2. Hari. E akshon chikitu aki por yuda esnan ku ta abrumador i kargá. Durante di e seshon di saserdosio di e konferensia general di aprel pasá, mi tabata sintá riba estrado komo un di e sinku Outoridatnan General nobo resien yamá. Nos tabata sintando kaminda e hermananan di e presidensianan ousiliar ta sinta awor. Mi tabata sinti masha nervioso i abrumador ku mi yamamentu nobo.

Ora nos tabata kanta e himno intermedio, mi a sinti un impreshon fuerte ku un hende tabata wak mi. Den mi mes mi a pensa: “Tin mas di 20,000 hende den e edifisio aki, i mayoria di na ta ku kara pa e direkshon aki. Klaro, ku un hende ta mirando bo.”

Miéntras mi a sigui kanta, atrobe mi a sinti e impreshon fuerte ku un hende tabata mirando mi. Mi a wak over di e rei unda e Diesdos Apòstelnan tabata sinta i a mira ku Presidente Russell M. Nelson tabata kompletamente birá rònt den su stul, pa wak unda nos tabata sinta. Mi a kapta su bista, i el a duna mi un sonrisa grandi. E sonrisa ei a trese pas na mi kurason abrumador.

Despues di Su Resurekshon, Jesucristu a bishitá Su otro karnénan. El a yama i apartá diesdos disípulo, i ku outoridat ei, nan a ministrá na e pueblo. Señor Jesucristu Mes a para entre nan. Señor a puntra nan pa hinka rudia i hasi orashon. Mi no tin sigur si e diesdos disípulonan resien yamá i apartá tabata abrumá ku nan yamamentu, pero e skrituranan ta bisa,”I a sosedé ku Jesus a bendishoná nan miéntras nan tabata hasi orashon na dje; i e sonrisa di e ekspreshon di su kara a kai riba nan, i e lus di e ekspreshon di su kara a iluminá nan .”⁵ Durante e último konferensia general, un sonrisa a aliviá mi karga den un manera inmediato i ekstraordinario.

3. Ekspresá sentimentunan di kompashon na otronan. Si bo ta un poseedor di saserdosio, por fabor usa bo poder na benefisio di e yunan di Dios, dunando bendishon na nan. Ekspresá palabranan di konsuelo i komodidat na hende ku ta sufriendo òf ta eksperensiando aflikshon.

4. E piedra angular di Dios Su plan ta e Ekspiashon di Señor Jesucristu. Por lo ménos un biaha pa siman, nos mester meditá manera Presidente Joseph F. Smith a hasi tokante“e gran i maravioso amor manifestá pa e Tata i e Yu den binida di e Redentor na mundu.⁶ Invitando otronan pa bini Iglesia i partisipá dignamente di e santa sena lo permití mas di Tata Selestial Su yunan pa reflehá riba e Ekspiashon. I, si nos no ta digno, nos por arepentí. Kòrda ku e Yu di esun di mas Haltu a baha mas abou ku tur i a tuma riba Dje nos ofensanan, pikánan, transgreshonnan,enfermedatnan,dolónan,aflikshonnan, i soledat. E skritura ta siña nos ku Cristu a subi na shelu i a baha mas abou ku tur kos, pa E por komprondé tur kos.⁷

No ta importá kiko nos luchanan personal ta---sea nan ta malesa òf soledat prolongá òf sufrimentu di e tentashonnan i e pruebanan di e atversario---e Bon Wardadó tei. E ta yama nos na nos nòmber i ta bisa,”Bini serka mi, tur ku ta kansá i kargá, i Ami lo duna boso sosiegu.”⁸

Mi ke resumí e kuater puntonan:

Promé---bai e di dos mia.

Di Dos---por fabor hari. Boso sonrisa lo yuda otronan.

Di tres---ekspresá kompashon.

Di kuater---invitá otronan pa bini Iglesia.

Mi ta duna mi testimonio di e Salbador. Jesus ta e Cristu, e Yu di e Dios bibu, i E ta biba. Mi sa ku E ta sostené ku tur Su forsa i poder, e plan di e Tata. Mi sa ku Presidente Thomas S. Monson ta un profeta bibu. E ta poseé tur e yabinan pa ehekutá Dios Su plan na mundu. Mi sa ku nos por yuda otro komo yunan di nos Tata Selestial den nos pruebanan i tentashonnan. Den e nòmber di Jesucristu, amèn.