Kom Lawv Nco Ntsoov txog Nws

Kuv nyiam lub Koom Haum Me Nyuam Yaus ib zaj nkauj uas hais tias:

Kuv ntseeg hais tias kev tsim kab lig kev cai hais zaj dab neeg txog Yexus rau peb cov me nyuam thiab tsev neeg yog ib txoj kev tshwj xeeb hwm Hnub Caiv kom dawb huv nyob hauv peb tsev.

Ua li no yuav ua rau peb tsev neeg muaj tus ntsuj plig thiab qhia peb tsev neeg txog tus Cawm Seej tus yam ntxwv.

Kuv nyiam kawm thiab xav txog Nws lub neej, tus uas tau ua txhua yam rau kuv thiab rau peb txhua tus.

Kuv nyiam nyeem cov vaj lug kub txog Nws lub neej uas tsis muaj kev txhaum hlo li, thiab tom qab nyeem vaj lug kub uas qhia txog Nws lub neej, kuv qi qhov muag thiab sim xav seb tej lub sij hawm dawb huv no zoo li cas tej uas qhia kuv thiab ntxiv dag zog rau kuv sab ntsuj plig.

Tej lub sij hawm xws li:

• Thaum Nws txawm nto qaub ncaug rau hauv av thiab, nws muab do xyaw hmoov av, ces Yexus muab cov av nkos ntawd pleev tus txiv neej dig muag ob lub qhov muag thiab hais rau nws tias, “Koj cia li mus ntxuav muag ntawm lub pas dej Xilau-as.” Tus txiv neej dig muag ntawd thiaj mus ntxuav muag thiab rov qab los, ces nws txawm pom kev lawm.²

• Thaum Nws kho tus poj niam uas coj khaub ncaws tsis tu thiab kov Nws lub tw tsho, ntseeg tias yog nws cia li kov Yexus xwb ces nws tus mob yuav zoo lawm.³

• Thaum Nws tshwm sim rau nws cov thwj tim, thiab mus ko taw saum nplaim dej.⁴

• Thaum Nws taug kev nrog ob tug thwj tim ntawm txoj kev mus rau Ema-us thiab piav vaj lug kub rau nkawd.⁵

• Thaum nws tshwm sim rau cov neeg nyob hauv Amelikas no thiab hais kom lawv los cuag Nws thiab muab lawv tej tes xuas Nws sab tav thiab xuas tej qhov ntsia hlau nyob hauv Nws tes thiab Nws taw, xwv kom lawv yuav paub tias Nws yog “Ixayee tus Vajtswv, thiab tus Vajtswv ntawm tag nrho lub ntiaj teb, thiab tau raug tua rau tej kev txhaum ntawm lub ntiaj teb.”⁶

Kuv zoo siab vim kuv paub tias muaj cov niam tsev txiv tsev uas hais zaj dab neeg txog Khetos rau lawv cov me nyuam. Kuv kawm qhov no thaum kuv saib cov me nyuam nyob hauv lub Koom Txoos nyob hauv lub Koom Haum Me Nyuam Yaus thiab lwm lub sij hawm.

Kuv zoo siab ua kuv niam kuv txiv tsaug vim nkawd tau qhia kuv txog Yexus Khetos. Kuv zoo siab uas peb tus Cawm Seej tus yam ntxwv pab kuv tus poj niam thiab kuv thaum wb qhia wb cov me nyuam.

Kuv lub siab muaj kev xyiv fab puv npo thaum kuv pom kuv cov me nyuam hais zaj dab neeg txog Khetos rau kuv cov xeeb leej xeb ntxwv. Ua rau kuv nco txog ib nqe vaj lug kub uas kuv nyiam heev, nyob hauv 3 Yauhas, tshooj 1, nqe 4, uas hais tias, “Tsis muaj ib yam dab tsi ua rau kuv zoo siab tshaj qhov uas kuv hnov hais tias kuv cov me nyuam ua lawv lub neej raws li qhov tseeb.” Thiab peb cov xeeb leej xeeb ntxwv thiab.

Kuv zoo siab ua Vajtswv tsaug rau peb cov thawj coj uas qhia peb txog Khetos tsis tu ncua, txog kev hwm Hnub Caiv kom dawb huv, thiab txog kev txais lub cim nco txog txhua hnub Sunday kom hwm tus Cawm Seej.

Peb yuav nyiam Hnub Caiv thiab lub cim nco txog ntxiv thaum peb kawm tej zaj dab neeg txog Khetos. Thaum peb ua li ntawd, peb tsim tej kab lig kev cai uas txhawb nqa peb txoj kev ntseeg thiab zaj lus tim khawv thiab pov hwm peb tsev neeg.

Ob peb lim tiam tas los, thaum kuv rov qab kawm Thawj Tswj Hwm Russell M. Nelson zaj xov uas nws hais nyob hauv lub tuam rooj sab laj tas los, thiab thaum kuv xav txog Hnub Caiv, ua rau kuv xav ris Vajtswv txiaj rau qhov kuv muaj cib fim thiab tau koob hmoov thaum kuv txais lub cim nco txog. Lub sij hawm ntawd yog ib lub sij hawm dawb ceev uas muaj nqi ntawm sab ntsuj plig rau kuv. Kuv nyiam kev sib ntsib txais lub cim nco txog heev.

Thaum kuv xav ntsoov, kuv ua tib zoo kawm zaj lus foom koob hmoov rau cov mov mog thiab cov dej. Kuv nyeem thiab xav ntsoov txog ob zaj lus thov rau lub cim nco txog thiab txoj kab ke ua lub cim nco txog. Kuv pib xav txog qhov no thiab rov qab xav dua nyob hauv kuv lub siab lub ntsws txog tej lub sij hawm uas muaj feem nrog rau lub cim nco txog.

Kuv xav ntsoov txog hnub ntawd, pluas qav noj cov ncuav uas tsis xyaw keeb hnub thib ib, thaum Nws teb cov thwj tim tej lus nug txog qhov uas lawv yuav tsum npaj rau Kev Cai Hla Dhau, Nws hais rau lawv tias, “Nej cia li mus cuag ib tug txiv neej uas nyob hauv nroog thiab hais rau nws hais tias, Xib Hwb hais tias, kuv lub sij hawm los ze lawm; kuv thiab kuv cov thwj tim yuav los ua kev cai hla dhau hauv koj tsev.”⁷

Kuv sim xav seb nws zoo li cas thaum cov thwj tim yuav mov noj thiab ua tib zoo npaj rooj kom nrog Nws noj nyob rau hnub tshwj xeeb ntawd; muaj ib lub rooj rau 13 tus neeg, Nws thiab Nws kaum ob tug thwj tim, cov uas Nws hlub.

Kuv quaj thaum kuv xav txog qhov uas Khetos nrog lawv noj mov thiab Nws hais tias, “Kuv qhia rau nej hais tias, nej cov uas nyob ntawm no muaj ib tug yuav ntxeev siab rau kuv.”⁸

Kuv xav txog cov thwj tim uas tu siab nug Nws hais tias, “Tus Tswv, puas yog kuv?”⁹

Thiab thaum Yudas nug Nws zoo ib yam, Nws cia li teb hais tias, “Koj hais yog lawm.”¹⁰

Kuv xam pom nyob hauv kuv lub siab Nws txhais tes uas tau kho, nplij, txhawb pab, thiab foom koob hmoov rau lwm tus, thaum Yexus hais tias, “Nej cia li txais mus noj; lub ncuav no yog kuv lub cev.”¹¹

Ces nws txawm muab lub khob thiab ua Vajtswv tsaug thiab muab cev rau lawv thiab hais tias, “Nej cia li haus kom tag nrho; vim no yog kuv cov ntshav uas ua tim khawv rau Vajtswv txoj lus cog tseg, uas yuav ntws los ntxuav ntau leej tej kev txhaum.”¹²

Nyob hauv kuv lub siab kuv txawj pom cov thwj tim, ib tug dhau ib tug, thiab nyob hauv lawv tej qhov muag kuv pom lawv txhawj txog tus Xib Hwb, tus uas lawv hlub kawg li. Zoo nkaus li kuv tau nrog lawv zaum ua ke, saib txhua yam. Ua rau kuv lub siab mob heev, muaj kev nyuaj siab thiab tu siab rau tej uas tsis ntev Nws yuav raug kom theej kuv.

Ua rau kuv xav xav ua ib tug neeg zoo dua. Thaum kuv hloov siab lees txim thiab nyuaj siab li ntawd, kheev lam kuv yuav tau so thiab ua rau Nws cov ntshav kom tsis txhob nrog nyob hauv Khexemanes txawm yog ob peb tee ntshav los yog.

Ces kuv xav txog lub cim nco txog uas peb txais txhua lub lim tiam kom nco txog Nws. Thaum kuv ua li ntawd, kuv xav txog txhua lo lus ntawm zaj foom koob hmoov rau cov mov mog thiab cov dej. Kuv xav ntsoov txog tej lus no hais tias: “Thiab nco ntsoov txog nws” nyob hauv zaj foom koob hmoov rau cov mov mog thiab lo lus “Kom lawv nco ntsoov txog nws” nyob hauv zaj foom koob hmoov rau cov dej.¹³

Kuv xav txog lub ntsiab ntawm lo lus nco ntsoov txog Nws.

Rau kuv qhov no txhais hais tias:

• Yus nco txog Nws lub neej ua ntej lub neej no, thaum Nws tau tsim lub ntiaj teb zoo nkauj no.¹⁴

• Yus nco txog Nws txoj kev yug los nyob hauv ib lub dab nyuj, nyob hauv Npelehees hauv Yudais.¹⁵

• Thiab yus nco txog thaum, nws yog ib tug tub hluas uas muaj 12 xyoos xwb, Nws tau qhia cov xib hwb nyob hauv lub tuam tsev;¹⁶

• Yus nco txog thaum Nws mus Nws ib leeg rau hauv tiaj suab puam kom npaj rau Nws txoj kev qhuab qhia.¹⁷

• Thiab nco txog thaum Nws hloov hlo rau Nws cov thwj tim pom.¹⁸

• Yus nco txog thaum Nws pib ua lub cim nco txog thaum Nws nrog Nws cov thwj tim noj Pluas Mov Kawg.¹⁹

• Thiab yus nco txog thaum Nws mus rau hauv lub Vaj Khexemanes thiab raug txom nyem sab kawg nkaus rau peb tej kev txhaum, kev nyuaj siab, kev poob siab, thiab kev mob kev nkeeg, Nws thiaj li los ntshav ntawm txhua lub qhov hws.²⁰

• Yus nco txog thaum, tom qab nws raug txom nyem thiab raug mob kawg nkaus, thaum nws tseem nyob hauv Khexemanes, ib tug thwj tim, tus uas Nws hu ua phooj ywg, tau nwj Nws ntxeev siab rau Nws.²¹

• Yus nco txog thaum Nws raug coj mus rau Philaj thiab rau Helauj mus hais plaub;²²

• Thiab thaum Nws raug thuam, ntaus, raug nti qaub ncaug, thiab raug nplawm ua rau Nws cov nqaij ntuag.²³

• Thiab thaum lawv yuam muab hmab pos ua kauj looj Nws lub taub hau.²⁴

• Yus nco txog thaum Nws tau kwv Nws tus ntoo khaub lig mus rau Khaulakhauthas thiab Nws raug ntsia saum ntoo khaub lig, thiab raug txhua txoj kev mob ntawm sab nqaij daim tawv thiab sab ntsuj plig.²⁵

• Thiab thaum nws raug ntsia saum ntoo khaub lig, Nws tseem muaj siab hlub saib cov uas muab Nws ntsia thiab tsa muag saib saum ntuj, thov hais tias, “Txiv, thov koj zam txim rau lawv! Rau qhov lawv tsis paub hais tias lawv ua dab tsi.”²⁶

• Yus nco txog thaum Nws paub tias Nws tau ua Nws lub luag hauj lwm kom cawm tib neeg txhua tus dim, Nws tau tso Nws tus ntsuj plig mus rau Nws Leej Txiv, uas yog peb Leej Txiv, txhais tes.²⁷

• Yus nco txog Nws txoj Kev Sawv Rov Los, uas qhib kev rau peb sawv rov los thiab muaj cib fim ua neej nyob nrog Nws nyob mus ib txhis, nyob ntawm seb peb xaiv dab tsi.²⁸

Tsis tas li ntawd, yus xav txog zaj lus thov rau lub cim nco txog thiab tej lus ntawm zaj lus thov ntawd uas tshwj xeeb thiab muaj nqi heev, kom txais lo lus cog tseg, thaum foom koob hmoov rau lub cim nco txog, hais tias yog peb yuav nco ntsoov txog Nws, peb yeej yuav muaj Nws tus Ntsuj Plig nrog peb nyob.²⁹

Kuv ntseeg tias tus Tswv teem sij hawm thaum twg yuav zoo muab kev tshwm sim rau peb. Kuv to taub qhov no meej heev thaum kuv kawm Tej Lus Qhia 3:1, 6, uas hais tias:

“Txhua yam uas muaj nyob hauv lub qab ntuj no yeej tshwm sim raws li Vajtswv tau teem caij teem nyoog tseg cia lawm xwb: …

“Muaj sij hawm nrhiav tau los thiab muaj sij hawm ploj mus, muaj sij hawm muab los khaws cia thiab muaj sij hawm muab pov tseg.”

Kev txais lub cim nco txog yog ib lub sij hawm rau Leej Txiv Saum Ntuj Ceeb Tsheej kom qhia peb txog Nws Tib Leeg Tub txoj Kev Theej Txhoj—peb tus Cawm Seej, Yexus Khetos—thiab rau peb txais kev tshwm sim txog qhov ntawd. Yog ib lub sij hawm kom “khob, ces yuav qhib rau nej,”³⁰ kom thov thiab txais kev txawj ntse no. Yog ib lub sij hawm rau peb thov Vajtswv kom txais tau kev txawj ntse no. Thiab yog peb thov, kuv paub tseeb tias peb yuav txais tau kev txawj ntse no, uas yuav foom koob hmoov zoo kawg nkaus rau peb lub neej.

Kuv nyiam Hnub Caiv, lub cim nco txog, thiab lub ntsiab ntawm ob qho no. Kuv hlub tus Cawm Seej kawg siab kawg ntsws. Los ntawm Yexus Khetos lub npe, amees.