Ku Nan Semper Kòrda Riba DjE

Mi ta stima e kantika di Primaria ku ta bisa:

Mi ta kere ku kuminsando un tradishon di konta e storianan di Jesus na nos yunan i famianan ta un manera hopi speshal pa mantené e Dia di Reposo santu den nos hogar.

Esaki siguramente lo trese un spiritu speshal den nos hogar i proveé nos famia ku ehèmpelnan di e Salbador Sumes.

Mi ta stima studiá i meditá e bida di Esun kende a duna tur kos pa mi i pa tur di nos.

Mi ta stima lesa e pasahenan di skritura tokante Su bida sin piká, i despues di lesa e skrituranan kua ta konta nos di e eventonan eksperensiá p’E, mi ta sera mi wowonan i trata di visualisá e momentunan sagrado aki ku ta siña mi i fortalesé mi spiritualmente.

Momentunan manera:

• Ora El a skupi riba tera i, despues di a traha klei di e skupi, a ungi e wowonan di e hòmber siegu i a bis’é, “Bai laba bo kara den pisina di Siloam.” I e hòmber a obedesé, “i ora el a sali fo’i djei e por a mira.”²

• Ora El a kura e muhé kende tabata sufri di derame i a mishi ku un punta di Su paña, keriendo ku djis pa mishi E e por a wòrdu kurá.³

• Ora El a aparesé na Su disipelnan, kanando riba e laman.⁴

• Ora El a bai ku e disipelnan riba e kaminda di Emmaus i a habri e skrituranan na nan komprendementu na e skrituranan.⁵

• Ora El a aparesé na e hende na e kontinente Amerikano i a bisa nan pa bini serka djE i pone nan mannan den Su banda i sinti e impreshon di e klabunan den Su mannan i Su pianan pa asina nan por sa ku E tabata “e Dios di Israel, i e Dios di henter mundu, i a wòrdu matá pa e pikánan di mundu.”⁶

Mi ta regosihá sabiendo ku tin mayornan kende ta konta storianan di Cristu na nan yunan. Mi ta ripara esaki ora mi ta wak muchanan di Iglesia den e programanan di Primaria i riba otro okashonnan.

Mi ta gradisidu pa mi mayornan pa a siña ami tokante Cristu. Mi ta kontinuá pa mira kon e ehèmpel di e Salbador ta yuda mi kasa stimá i ami ora nos ta siña nos mesun yunan.

Mi kurason ta yen ku goso ora mi ta mira mi yunan konta storianan di Cristu na mi nietonan. E ta kòrda mi di un di mi skrituranan favorito, na 3 Juan, kapítulo 1, versíkulo 4, kua ta bisa, “Nada ta hasi mi mas kontentu ku tende ku mi yunan ta biba konforme bèrdat.” I dikon no nos nietonan tambe?

Mi ta gradisidu pa nos lidernan, kende konstantemente ta siña nos di Cristu, di mantené e Dia di Reposo santu, i tokante tumando di e santa sena kada Djadumingu den honor di nos Salbador.

E Dia di Reposo i e santa sena ta bira hopi mas agradabel ora nos ta studia e storianan di Cristu. Hasiendo esaki, nos ta kreá tradishonnan ku ta fomentá fe i testimonio i tambe protehé nos famia.

Un par di siman pasa, ora mi tabata studiando atrobe e mensahe ku Presidente Russell M. Nelson a duna den e último konferensha general, i ora di meditá riba e Dia di Reposo, mi a sinti un gratitut profundo pa e bendishon i privilegio di ta kapabel pa tuma di e santa sena. Pa mi e ta un momento hopi solemne, sagrado, i spiritual. Mi ta gosa hopi e reunion sakramental.

Ora mi tabata meditá, mi a studia kuidadosamente e bendishonnan riba e pan i e awa. Mi a lesa i profundamente a meditá riba e orashonnan i e ordenansanan di e santa sena. Mi a kuminsá pa repasá den mi mente i den mi kurason e eventonan ku ta konektá na dj’e.

Den un spiritu di meditashon, mi a reflehá riba e dia ei, e promé dia di e fiesta di e Pan sin Zürdeg, ora Jesus, kontestando na un pregunta di Su disipelnan tokante unda pa prepará pa e Pesag, a kontesta nan, bisando, “Drenta suidat, bai serka tal persona i bis’é: ‘Maestro ta bisa: Mi tempu a yega, serka bo mi ta tene sena di Pesag ku mi disipelnan.’”⁷

Mi a trata di visualisá den mi mente e disipelnan kumprando kuminda i kuidadosamente preparando e mesa pa kome kunÉ riba e dia speshal ei: un mesa pa 13 hende, E ku Su diesdos disipelnan, kende El a stima.

Mi a yora ora mi a visualisá Cristu komiendo ku nan i deklarando, “Mi ta sigurá boso: un di boso lo traishoná Mi.”⁸

Mi a pensa tokante e disipelnan tristu puntrando É, “N’ t’ami sí, no Señor[?]”⁹

I ora Hudas a puntr’É e mesun pregunta, El a kontesta trankilamente, “Manera bo di!”¹⁰

Mi por a visualisá mannan ku a kurá, konsolá, edifiká, i bendishoná, kibrando e pan ora Jesus a bisa, “Tuma kome, esaki ta mi kurpa.”¹¹

Anto El a kohe un kopa di biña, yama Dios danki pa e kopa i a pas’é pa nan, i bisa, “Boso tur bebe for di dje. Esaki ta mi sanger, ku ta konfirmá e aliansa, dramá pa hopi hende, pa pordon di piká.”¹²

Den mi mente mi a wak na e disipelnan un pa un i a wak den nan wowonan nan preokupashon tokante nan Maestro, kende nan a stima hopi. E tabata manera mi tabata sinta einan ku nan, wak tur kos. Mi a sinti un doló intenso den mi kurason, yen di ferdrit i tristesa pa loke E tabata di eksperensiá pa mi.

Mi alma tabata yená ku un deseo tumbá pa ta un mihó persona. Den arepentimentu i tristesa, mi a deseá fervientemente pa ta kapabel pa seká i evitá e dramamentu di sikiera algun di e gotanan di Su sanger na Getsémani.

Anto mi a meditá tokante e santa sena di kua nos ta tuma kada siman den memoria di djE. Ora nos ta hasi asina, mi ta meditá riba kada palabra di e bendishonnan riba e pan i e awa. Mi ta reflehá profundamente riba e palabranan “i semper kòrda riba djE” den e bendishon riba e pan i “ku nan semper kòrda riba djE” den e bendishon riba e awa.¹³

Mi a meditá riba kiko e ta nifiká pa semper kòrda riba dj’É.

Pa mi e ta nifiká:

• Pa kòrda Su bida premortal, ora e bunita planeta aki a wòrdu trahá di djE.¹⁴

• Pa kòrda Su nasementu humilde den un pesebre na Bètlehèm di Hudea.¹⁵

• Pa kòrda ora komo un mucha hòmber di 12 aña, El a siña i prediká na e dòktornan den e tempel.¹⁶

• Pa kòrda ora El a bai den priva den e desierto pa prepará pa Su ministerio mortal.¹⁷

• Pa kòrda ora El a wòrdu transfigurá dilanti Su disipelnan.¹⁸

• Pa kòrda ora El a instituí e santa sena den e Último Sena ku nan.¹⁹

• Pa kòrda ora El a bai na e hòfi di Getsémani i a sufri asina intensamente pa nos pikánan, dolónan, desapuntonan, malesanan ku El a sangrá di kada poro.²⁰

• Pa kòrda ora, despues di tantu sufrimentu i doló severo, asta ainda na Getsémani, El a wòrdu traishoná ku un sunchi di un di su disipelnan kende El a yama un amigu.²¹

• Pa kòrda ora El a wòrdu tumá serka Pilato i Heródes pa huisio.²²

• Pa kòrda ora El a wòrdu humiliá, bòftá, skupí, dal, i sutá ku un zuip ku a kibra Su karni.²³

• Pa kòrda ora un korona di sumpiña a wòrdu poné brutalmente riba Su kabes.²⁴

• Pa kòrda ku E mester a karga Su mes krus na Gólgota i ku El a wòrdu klabá na e krus einan, sufriendo kada doló fisiko i spiritual.²⁵

• Pa kòrda ku na e krus, ku Su barika yen di karidat, El a mira esnan kende a krusifik’É i a hisa Su wowonan na shelu, i pidi, “Tata, pordoná nan, pasobra nan no sa kiko nan ta hasi.”²⁶

• Pa kòrda ora E, sabiendo E a kumplí Su mishon di salba tur hende humano, a entregá Su spiritu den e mannan di Su Tata, nos Tata.²⁷

• Pa kòrda Su Resurekshon, kua ta sigurá nos mes resurekshon i e posibilidat pa biba banda di dj’É pa henter eternidat, dependé riba nos skohensianan.²⁸

Ademas, meditando riba e orashonnan sakramental i e palabranan hopi speshal i ku nifikashon di e orashonnan ta kòrda mi kon maravioso e ta pa risibí e promesa, durante e bendishon di e santa sena, ku ora nos semper kòrda riba djE, nos lo semper tin Su Spiritu ku nos.²⁹

Mi ta kere Señor tin Su mes tempu pa ki ora pa duna revelashon na nos. Mi ta komprondé esaki hopi klaramente studiando Predikador 3:1, 6, kua ta bisa:

“Tur kos tin su ora i su tempu, tur kos aki na mundu: …

“[O]ra pa buska i ora pa resigná; ora pa warda los i ora pa tira kos afó.”

E santa sena tambe ta un tempu pa Tata Selestial siña nos tokante e Ekspiashon di Su Yu Stimá—nos Salbador, JesuCristu—i pa nos risibí revelashon tokante esaki. E ta e tempu pa bati i e lo wòrdu habrí na nos,³⁰ pa pidi i pa risibí e konosementu aki. E ta un tempu pa nos pidi Dios reverentemente pa e konosementu aki. I si nos ta hasi esei, mi no tin niun duda ku nos lo risibí e konosementu aki, kua lo bendishoná nos bidanan mas ayá ku por wòrdu midí.

Mi ta stima e Dia di Reposo, e santa sena, i loke nan ta nifiká. Mi ta stima e Salbador ku henter mi alma. Den e nòmber di JesuCristu, amèn.