2010–2019
Na Yalo Tabu me Nomu iTokani
Okotova 2015


Na Yalo Tabu me Nomu iTokani

E rawa vei keda, kevaka eda bula kilikili kaya, me tiko vata kei keda na veivakalougatataki ni Yalotabu, sega walega ena gauna oqo kei na gauna ko ya ia ena gauna kecega.

Kemuni na taciqu kei na ganequ, au vakavinavinaka niu tiko vata kei kemuni ena Siga ni Vakacecegu oqo ena koniferedi raraba ni nona Lotu na Turaga. Au sa vakila, me vakataki kemuni, na Yalotabu ni vakadinadinataka na dina ni veimalanivosa eda rogoca ni cavuti ka lagati.

Na noqu inaki nikua meu vakalevutaka na nomuni gagadre kei na igu mo ni taura me nomuni na isolisoli sa yalataki vei keda yadua ni oti noda papitaiso. Ena gauna eda vakadeitaki kina eda a rogoca na vosa oqo: “Ciqoma na Yalo Tabu.”1 Mai na gauna ko ya sa veisau vakadua na noda bula.

E rawa vei keda, kevaka eda bula kilikili kaya, me tiko vata kei keda na veivakalougatataki ni Yalotabu, sega walega ena gauna oqo kei na gauna ko ya, se ena veigauna vakasakiti me vaka nikua, ia ena gauna kecega. Eda kila mai na masu ni sakaramede na ivakarau e vakavotukanataki kina na yalayala ko ya: “Oi kemuni na Kalou na Tamai keimami Tawamudu, keimami sa kerei kemuni ena yaca ni Luvemuni ko Jisu Karisito, mo ni vakalougatataka ka vakatabuya na madrai oqo me yaga vei ira era sa kania, ia era sa kania me ra vakananuma kina na lewe ni Luvemuni, ka vakadinadinataka vei kemuni na Kalou na Tamai keimami Tawamudu, ni ra sa yalataka me ra taura na yaca ni Luvemuni, ka daunanumi Koya ka muria na ivunau sa solia vei ira.”

Sa qai yaco mai na yalayala lagilagi: “ka me tikoga kei ira na nona Yalo Tabu” (V&V 20:77; vakaikuritaki).

Me tikoga kei keda na Yalotabu sai koya me tiko vata kei keda na veituberi kei na veidusimaki ni Yalo Tabu ena noda bula e veisiga. E rawa, taura mada, me vakasalataki keda na Yalotabu me da vorata na veitemaki ni cakava na ca.

Ena vuku ni vakasama oqori, ena rawarawa kina ni da raica na vuna era tovolea kina na italai ni Turaga me ra vakalevutaka na noda gagadre ni qarava na Kalou ena noda soqoni ni sakaramede. Kevaka eda vakayagataka na sakaramede ena vakabauta, ena qai rawa kina vua na Yalo Tabu me taqomaki keda kei ira eda lomana mai na veivakatovolei sa kaukauwa ka veitaravi cake tikoga na kena yaco mai.

Na veitokani ni Yalo Tabu e vakarairaivinakataka cake na vinaka ka vakalailaitaka sobu na veivakayarayarataki ni veitemaki. Oqori mada ga sa rauta me da guta kina me da kilikili kaya na veitokani ni Yalotabu.

Me vaka na nona vaqaqacotaki keda na Yalo Tabu me da vorata na ca, sa solia talega vei keda o Koya na kaukauwa me da kila na duidui ni dina kei na lasu. Na dina bibi duadua ena vakaduiduitaki rawa ga ena ivakatakila mai vua na Kalou. Na noda nanuma vakatamata kei na vakayagataki ni wakilakila e yagoda ena sega ni rauta. Eda bula tiko ena dua na gauna o ira sara mada ga na yalomatua ena dredre me ra vakaduiduitaka na dina mai na ivadi qaseqase.

Na Turaga e vakavuvulitaka vua na Nona iApositolo o Tomasi, ka a vinakata na ivakadinadina e rawa ni tara sara ga ni nona Tucaketale na iVakabula ena nona tara na Nona mavoa, ni ivakadinadina taqomaki vinaka cake na ivakatakila: “Sa kaya vua ko Jisu, Ni ko sa raici au Tomasi, ko sa vakadinata: sa kalougata ko ira era sa sega ni raica, era sa vakadinata” (Joni 20:29).

Na dina e vakaraitaka na sala ki vale vua na Kalou ena vakatakila ga na Yalo Tabu. E sega ni rawa ni da lako ki na veikau tabu ka raica na Tamada kei na Luvena ni rau vosa vua na gonetagane ko Josefa Simici. E sega ni dua na ivakatakilakila vakayago se vakasama vinaka me yavutaki kina ni sa lako oti mai ko Ilaija me vaka a yalataki me mai solia na idola ni matabete sa taura ka vakayagataka tiko e dua na parofita bula, Thomas S. Monson ena gauna oqo.

Na vakadeitaki ni dina ena yaco vua e dua na luvena tagane se luvena yalewa na Kalou sa rawa ni kaya ni nona na dodonu me ciqoma na Yalo Tabu. Me vaka ni rawa ni yaco mai vei keda ena dua ga na gauna e rawa na lasu kei na sega ni dina, eda gadreva na veivakauqeti tudei ni Yalotabu ni Ka Dina me tarova ni yaco mai na lomalomarua.

Ni lewena voli na Kuoramu ni iApositolo Le Tinikarua, a vakauqeti keda o George Q. Cannon me da dau segata tikoga e veigauna me tiko vata kei keda na Yalotabu. A yalataka o koya, kau sa yalataka talega o au, kevaka eda segata na sasaga oya, ena “sega ni lailai na kilaka” ni ka dina vei keda, eda na “sega ni lomalomarua se tu ena butobuto,” ka na “tudei noda vakabauta, ka sinai … na [noda] reki.”2

Eda gadreva talega na veitokani tudei ni Yalo Tabu ena dua tale na inaki. Ena sega beka ni namaki na nona takali e dua eda lomana. Ena kauta mai vei keda na inuinui kei na vakacegu ni yali e dua eda lomana na ivakadinadina ni Yalo Tabu ni tiko dina e dua na Tamada Vakalomalagi dauloloma kei na iVakabula sa vakaturi cake mai na mate. Me bulabula tiko na ivakadinadina oqo ni yaco na mate.

Sa levu sara na vuna, eda na gadreva kina na veitokani tudei ni Yalo Tabu. Eda gadreva, ia eda kila ena veika sa yaco oti ni sega ni rawarawa na kena dau maroroi tiko. O keda yadua, eda dau vakasama, tukuna, ka cakava eso na ka ena bula ni veisiga e rawa ni vakacudruya na Yalotabu. E vakavuvulitaka vei keda na Turaga ni na mai noda itokani tudei na Yalo Tabu ni sa “uasivi sara na [noda] loloma” ka da “qarauna me savasava tikoga na [noda] vakanananu” (V&V 121:45).

Vei kemuni e dredre tiko mo rawata na ivakatagedegede cecere me ganiti keda kina na isolisoli ni veitokani ni Yalotabu, au via vakayaloqaqataki kemuni. O sa dau vakila na veivakauqeti ni Yalo Tabu. Sa yaco beka nikua.

E rawa ni o raica na gauna ni veivakauqeti oqori me vaka na sore ni vakabauta a vakamacalataka o Alama (raica na Alama 32:28). Tea yadua. Ena rawa oqo ena nomu cakacakataka na veivakauqeti o sa vakila. Na veivakauqeti vinaka duadua mo kila na ka e vinakata na Kalou mo vakayacora. Kevaka e baleta na saumi ikatini se me sikovi e dua na itokani e lolosi tiko, e dodonu mo cakava sara. Se cava ga, kitaka. Ka kitaka tikoga. Ni o sa vakaraitaka nomu lomasoli mo talairawarawa, na Yalotabu ena vakavurea ki yalomu e vuqa na ka e vinakata na Kalou mo cakava Vua.

Ni o sa talairawarawa kina, sa na dau yaco wasoma mai na veivakauqeti ni Yalotabu, sa na voleka cake tikoga yani ki na veitokani tudei. Ena levu cake na nomu kaukauwa mo digitaka na dodonu.

E rawa ni o kila ni vu mai vua na Yalotabu na veivakauqeti mo cakacaka ena Vukuna ka sega mai na nomu gagadre ga. Ni sota donu na veivakauqeti kei na veika era tukuna na iVakabula kei ira na Nona parofita kei na iapositolo bula, e rawa ni o digitaka mo talairawarawa kina ena yalodei. Ena qai tala mai na Turaga na Yalona me tokoni iko.

Me ivakaraitaki, kevaka o ciqoma e dua na veivakauqeti vakayalo mo vakarokorokotaka na Siga ni Vakacecegu, vakauasivi ni vaka me dredre toka, ena tala mai na Yalona na Kalou me veivuke.

A yaco mai vei tamaqu na veivuke oqori ena nona lako vakacakacaka ki Ositerelia ena vica vata na yabaki sa oti. A tiko duadua voli ena dua na Sigatabu, ka vinakata me vakayagataka na sakaramede. A sega ni kunea rawa e dua na itukutuku me baleta na gauna ni soqoni ni Yalododonu Edaidai. Sa mani taubale tu. A masu ena ilesu ni sala yadua me kila na mua me gole kina. Ni oti e dua na auwa nona taubale ka veigoleyaki, a tu vakadua me masu tale. A vakauqeti me gole sobu ena dua na gaunisala. Sega ni dede sa tekivu rogoca na lagasere mai na itabavale e ra ni dua na vale levu voleka. A rai yani ena dua na katubaleka ka raica e vica na tamata ni ra dabe volekata e dua na teveli ubi ena isulu vulavula kei na terea ni sakaramede.

E sega beka ni dua na ka levu vei kemuni oya, ia e dua na ka vakasakiti vua. A kila ni sa vakataucokotaki na yalayala ena masu ni sakaramede: “Ka dau nanumi Koya ka muria na vunau sa solia vei ira ka me tiko ga kei ira na nona Yalo Tabu” (V&V 20:77).

Oqori e dua ga na ivakaraitaki ni oti nona masu ka cakava na ka e tukuna vua na Yalotabu ni vinakata na Kalou me cakava. A cakava tikoga ena veiyabaki, me vaka e daru na cakava. A sega ni tukuna na nona bula vakayalo. E dau cakava tikoga na veika lalai vua na Turaga me vaka e vakauqeti kina.

Ena veigauna ni ra kerei koya e dua na ilawalawa Yalododonu Edaidai me vosa vei ira, e dau vakayacora vakakina. E sega soti ni dua na ka se ra lewe 10 se 50 se vakacava tu na nona oca. Dau wasea na nona ivakadinadina me baleta na Tamana, na Luvena, na Yalo Tabu, kei ira na parofita ena veigauna e vakauqeti koya kina na Yalotabu me kitaka vakakina.

Na nona ilesilesi cecere duadua ena Lotu na lewe ni matabose e cake ena iTeki o Bonneville, ka dau wereca tiko na iteitei ni iteki, ka vakavulica e dua na kalasi ni Wilivola ni Sigatabu. Ena veiyabaki, ni gadreva, sa dau tu na Yalo Tabu me nona itokani.

Au tu e yasai tamaqu ena dua na rumu ni valenibula. Davo koto ena idavodavo na tinaqu, na watina ena 41 na yabaki. Keirau sa vakaraici koya toka ena vicavata na auwa. Sa tekivu me keirau raica na seyavu yani ni laini ni mosi mai matana. Na iqaqalo ni ligana, ka qumi vacu tu, sa tasere. Sa savu na ligana ruarua e yasana.

Sa mai cava na mosi ni vica na yabaki ni kenisa. Au raica e matana na vakacegu. A vica tale na nona icegu leleka, qai kaburaka mai, ka mai koto malua yani. Keirau duri ka wawa tu de na lako tale mai e dua na icegu.

Oti, qai kaya malua mai o Ta, “Sa lesu i vale e dua na goneyalewa lailai.”

E sega ni turu na wainimatana. Na vuna ni sa vakaraitaka makawa vua na Yalo Tabu e dua na iyaloyalo matata se o cei o Na, a lako mai vei, na ituvaki sa mai rawata, kei na vanua sa lako yani kina. Sa vakadinadinataka vakalevu vua na Yalotabu e dua na Tamada Vakalomalagi dauloloma, e dua na iVakabula sa voroka na kaukauwa ni mate, kei na dina ni veivauci ni valetabu e wasea vata kei na watina kei na matavuvale.

Sa vakadeitaka makawa vua na Yalotabu ni sa vakadonui koya me lesu tale ki na itikotiko vakalomalagi na nona vinaka kei na vakabauta, na vanua ena dau kilai kina ni dua na gone vakasakiti ni yalayala ka kidavaki yani ki vale ena vakarokoroko.

Vei tamaqu, sa levu cake oqori mai na inuinui. Na Yalo Tabu sa vakayacora me ka dina vua.

Eso beka era na kaya ni nona vosa kei na iyaloyalo ena nona vakasama me baleta e dua na itikotiko vakalomalagi e wainidiva ga, na vakanananu kabukabu ni dua na tagane vakawati sa takali na watina. Ia o koya e kila na dina tawamudu ena sala duadua ga o rawa ni kila kina o iko.

O koya e dauvakadidike ka dau vakasaqara na dina me baleta na vuravura vakayago ena nona gauna taucoko vakauabula. E maqosa nona dau vakayagataka na iyaya ni cakacaka ni vakadikedike ka ra dokai koya kina na nona itokani vakacakacaka e vuravura raraba. E vuqa na ka e cakava ena kemesiteri e yaco mai ena nona raica ena mata ni nona vakasama nodra veitosoyaki na molikiuli qai vakadeitaka na veika e raica na vakatovotovo ena volau ni vakadidike.

Ia e duatani na sala a muria me kila na dina eso ka bibi duadua vua kei keda yadua. Ena Yalo Tabu duadua ga eda rawa ni raica kina na tamata kei na ka e yaco me vaka e raica na Kalou.

A tomani na isolisoli oqori mai valenibula ni sa mate oti na watina. Keirau kumuna na iyaya nei tinaqu me kau i vale. A tuvakadua o Ta me vakavinavinakataki ira na nasi kei na vuniwai yadua keirau sotava ena ilakolako ki na motoka e tuba. Au nanuma niu a vakila ni dodonu me keirau lako ka laki tiko taurua kei na neirau yaluma.

Au sa qai kila oqo ni a raica o koya na veika ka rawa duadua ga vua na Yalo Tabu me vakaraitaka vua. A raici ira na tamata oya me vaka ni ra agilosi ka talai ira mai na Kalou me ra mai vakatawana tiko na nona daulomani. Era a raici ira beka ni ra kenadau ena qaravi bula, ia o Ta e vakavinavinaka tiko vei ira ena vukuna na iVakabula.

A tomani tiko vua na cakacaka yaco ni Yalo Tabu ni keirau yaco yani ki na nodrau vale na noqu itubutubu. Keirau a laki veitalanoa ena vica na miniti ena rumu ni gade. A tatau o Ta me lako ki na nona rumunimoce ka toka voleka ga.

Ni oti e vica na miniti, a lesu tale mai ki na rumu ni gade. E totoka nona matadredredre. A lako mai vei keitou ka kaya mai vakamalua, “Au a lomaleqa ni na yaco duadua yani o Mildred ki na vuravura ni yalo. Au nanuma de na galili ena kedra maliwa na lewelevu.”

Oti qai kaya mai ena marau, “Au se qai masu oti ga mai. Au kila ni sega ni dua na leqa nei Mildred. A tavaki koya mai kea o tinaqu.”

Au vakananuma niu a matadredredre ena nona tukuna oqori, kau raitayaloyalotaki buqu, e veitarataravi na ikalawa ni yavana leleka, ni vakusakusa yani ena kedra maliwa na lewelevu me sotava ka mokota na vugona ni yaco yani.

Ia, e dua na vuna a kerea kina ka ciqoma o tamaqu na vakacegu oya baleta ni a dau masu ena vakabauta me tekivu mai na nona gauna ni gone. Sa matau vua na isaunimasu dau yaco mai ki yalona me veivakacegui ka veidusimaki. Me ikuri ni nona vakaitovotaki ena masu, e kila o koya na ivolanikalou kei na nodra vosa na parofita bula. O koya a rogoca ka kila kina na vakasolokakana ni Yalotabu, me vaka o sa vakila beka nikua.

Na veitokani ni Yalotabu e sega walega ni vakacegui koya ka tuberi koya. A veisautaki koya mai na Veisorovaki nei Jisu Karisito. Ni da ciqoma na yalayala oya me tikoga kei keda na Yalotabu, sa rawa ni solia vei keda na iVakabula na veivakasavasavataki e gadrevi me baleta na bula tawamudu, na isolisoli cecere duadua mai na isolisoli kecega (raica na V&V 14:7).

O nanuma tiko nona vosa na iVakabula: “Ia oqo na noqu ivakaro: Dou veivutuni koi kemudou kecega na kai vuravura, Dou lako mai vei au ka paitaisotaki ena yacaqu, io mo dou vakasavasavataki ena isolisoli ni Yalo Tabu mo dou savasava kina e mataqu ena siga mai muri” (3 Nifai 27:20).

Na ivakaro oqori e lako vata mai kei na yalayala oqo mai vua na Turaga:

“E dina, e dina, au sa kaya vei iko mo vakarorogo vua na Yalo Tabu ni na tuberi iko ena sala dodonu—io ena vukei iko mo kitaka na veika vinaka, mo yalomalumalumu ka lewa vakadodonu; raica oqori na noqu Yalo Tabu.

“E dina, e dina, au sa kaya vei iko; au sa solia vei iko na noqu Yalo Tabu; ia ena vakavukui iko ko koya ka vakasinaiti iko ena marau” (V&V 11:12–13).

Au wasea vei kemuni na noqu ivakadinadina ni bula tiko na Kalou na Tamada, ni liutaka tiko na Nona Lotu o Jisu Karisito sa tucaketale mai na mate, ni taura tu o Peresitedi Thomas S. Monson na idola kece sara ni matabete, ka dau tuberi ira ka tokoni ira na Lotu i Jisu Karisito ni Yalododonu Edaidai kei ira na lewena yalomalumalumu na ivakatakila ni Yalo Tabu.

Au vakadinadinataka talega vei kemuni ni o iratou na turaga vakasakiti eratou a vosa vei keda nikua me vaka ni ratou ivakadinadina ni Turaga o Jisu Karisito, ni ratou lewena na Kuoramu ni iApositolo Le Tinikarua, eratou kacivi mai vua na Kalou. Au kila ni a tuberi Peresitedi Monson na Yalotabu me kacivi iratou. Ni da vakarorogo vei iratou kei na nodratou ivakadinadina, sa vakadeitaka vei kemuni na Yalo Tabu na veika au tukuna tiko vei kemuni oqo. Era sa kacivi mai vua na Kalou. Au tokoni iratou ka lomani iratou ka kila ni lomani iratou na Turaga ka na tokoni iratou ena nodratou veiqaravi. Kau vakayacora vakakina ena yaca ni Turaga o Jisu Karisito, emeni.

iDusidusi

  1. iVoladusidusi 2: Veiliutaki ena Lotu (2010), 20.3.10.

  2. Raica na George Q. Cannon, ena “Minutes of a Conference,” Millennial Star, 2 ni Me, 1863, 275–76.