Tus Vaj Ntsuj Plig Dawb Huv Ua Koj tus Khub

Kuv cov kwv tij thiab cov muam, kuv muaj kev ris txiaj vim kuv tuaj nrog nej sib koom ua ke Hnub Caiv no hauv tus Tswv lub Koom Txoos lub tuam rooj sab laj no. Kuv tau hnov tus Ntsuj Plig, tus Vaj Ntsuj Plig Dawb Huv, ib yam li nej tau hnov, los ua tim khawv txog qhov tseeb rau tej lus thiab tej nkauj uas peb tau hnov lawm.

Hnub no kuv lub hom phiaj yog pab kom nej haj yam muaj lub siab xav thiab kom nej txais tau qhov khoom plig uas cog lus tseg rau peb txhua tus tom qab peb ua kev cai raus dej. Hauv txoj kev pom zoo peb tau hnov cov lus no dua: “Txais yuav tus Vaj Ntsuj Plig Dawb Huv.”¹ Txij lub sij hawm ntawd los, peb lub neej raug hloov hlo tas mus ib txhis.

Yog tias peb ua neej tsim nyog txais, peb yuav muaj cuab kav, tau txoj koob hmoov muaj tus Ntsuj Plig nrog peb nyob, tsis yog tas sim thiab tom ntej xwb, ib yam li hauv tej yam tshwj xeeb li peb muaj hnub no, tiam sis txhua lub sij hawm. Nej paub cov lus ntawm zaj lus thov Vajtswv rau lub cim nco txog yuav ua li cas thiaj ua tau raws li lo lus cog tseg no: “Au Vajtswv, Leej Txiv tus uas Nyob Mus Ib Txhis, peb thov koj ntawm koj Leej Tub, Yexus Khetos lub npe, kom koj foom koob hmoov thiab tshwj cov mov mog no tseg cia kom dawb huv rau lawv sawv daws cov tau noj; kom lawv cov uas tau noj kom nco txog koj Leej Tub lub cev, thiab ua tim khawv rau koj, Au Vajtswv, Leej Txiv tus uas Nyob Mus Ib Txhis, kom lawv txaus siab txais koj Leej Tub lub npe, thiab nco ntsoov txog nws, thiab coj raws li nws tej lus txib uas nws tau muab rau lawv.”

Ces tau lo lus cog tseg zoo kawg no: “Kom lawv thiaj li yuav muaj nws Leej Ntsuj Plig niaj hnub nrog lawv nyob” (Q&K 20:77; tau ntxiv cov ntawv qaij).

Qhov uas niaj hnub muaj tus Ntsuj Plig nrog lawv nyob txhais tau hais tias tau tus Ntsuj Plig txoj kev coj qhia hauv peb lub neej. Piv xam hais tias, tej zaum tus Ntsuj Plig yuav ceeb toom peb kom tiv tau kev haub ntxias los ua tej yam phem.

Vim yog lub ntsiab ntawd xwb, peb thiaj to taub yog vim li cas tus Tswv cov tub qhe tau xav pab peb haj yam muaj siab xav pe hawm Vajtswv hauv peb tej kev sib ntsib noj lub cim nco txog. Yog tias peb muaj kev ntseeg thaum peb noj lub cim nco txog, ces tus Vaj Ntsuj Plig Dawb Huv yuav muaj cuab kav pov hwm peb thiab cov uas peb hlub kom txhob raug tej kev haub ntxias uas haj yam muaj zog tawm tsam peb.

Thaum muaj tus Vaj Ntsuj Plig Dawb Huv ua peb tus khub ces peb haj yam nyiam qhov zoo thiab tsis xav ua raws li tej kev ntxias. Qhov ntawd nkaus xwb yuav tsum txaus los pab peb muaj lub siab xav ua neeg tsim nyog tau tus Ntsuj Plig niaj hnub nrog peb nyob.

Ib yam li tus Vaj Ntsuj Plig Dawb Huv ntxiv zog rau peb txoj kev tiv taus kev phem, Nws kuj pab peb muaj hwj chim saib pom qhov tseeb thiab qhov cuav sib txawv li cas. Peb tsuas paub qhov tseeb uas tseem ceeb tshaj plaws thaum peb tau kev tshwm sim los ntawm Vajtswv. Tib neeg lub tswv yim thiab tej yam uas peb to taub yuav tsis txaus. Peb nyob hauv ib lub caij nyoog uas ua rau cov neeg txawj ntse tshaj plaws yuav tsis tshua pom tau qhov tseeb vim muaj kev dag ntau kawg nkaus li.

Tus Tswv tau qhia Nws tus Thwj Tim Thaumas, uas xav tau puav pheej txog tus Cawm Seej txoj Kev Sawv Rov Los thaum nws kov tau Nws tej qhov caws pliav, hais tias kev tshwm sim yeej tseem ceeb dua: “Yexus hais rau Thaumas hais tias, “Koj pom kuv, koj thiaj ntseeg xwb los? Tus uas tsis tau pom kuv tiam sis nws ntseeg, tus ntawd tau koob hmoov” (Yauhas 20:29).

Tus Vaj Ntsuj Plig Dawb Huv pom zoo rau tej kev tseeb uas ua cim rau txoj kev uas coj peb rov mus rau Vajtswv lub tsev. Peb tsis muaj cuab kav mus hauv koog ntoo thiab pom Leej Txiv thiab Leej Tub hais lus rau tus tub hluas Yauxej Xamiv. Tsis muaj ib yam puav pheej los sis lub tswv yim uas qhia tau tseeb tias Eliyas tau los ib yam li tau cog tseg lawm los muab cov yuam sij rau lub pov thawj hwj uas yog cov uas tus yaj saub uas tseem muaj sia nyob, Thawj Tswj Hwm Thomas S. Monson, tseem tuav thiab siv.

Vajtswv ib tug tub los sis ntxhais yuav paub qhov tseeb thaum nws muaj cai txais yuav tus Vaj Ntsuj Plig Dawb Huv. Vim peb hnov tau tej yam cuav thiab kev dag thaum twg los tau, peb yuav tsum muaj tus Ntsuj Plig ntawm Kev Tseeb txhua lub caij kom peb thiaj tsis txhob poob siab.

Thaum tseem ua ib tug mej zeej hauv Pawg Kaum Ob tug Thwj Tim, George Q. Cannon yaum kom peb yuav tsum nrhiav kom tau tus Ntsuj Plig uas peb tus khub tsis tu tsis tseg. Nws cog lus, thiab kuv kuj cog lus tib yam hais tias, yog peb yuav ua li ntawd, peb “yeej yuav paub” qhov tseeb, “yuav tsis poob siab los sis nyob hauv kev tsaus ntuj ib zaug,” thiab peb “txoj kev ntseeg yuav muaj zog, [peb] yuav muaj kev zoo siab … puv npo.”²

Peb xav tau kev pab tsis tu tsis tseg uas yog tus Vaj Ntsuj Plig Dawb Huv txoj kev ua khub rau lwm lub ntsiab. Tej zaum ib tug neeg uas peb hlub yuav tso lub neej no tseg. Twb yog tus Vaj Ntsuj Plig Dawb Huv txoj kev ua tim khawv txog ib Leej Txiv Saum Ntuj Ceeb Tsheej uas hlub peb thiab tus Cawm Seej uas sawv rov qab los uas ua rau peb muaj chaw cia siab thiab kev nplij siab thaum peb xiam ib tug uas peb hlub. Yuav tsum muaj zaj lus tim khawv ntawd thaum muaj kev ploj kev tuag.

Yeej muaj ntau lub ntsiab, uas qhia seb yog vim li cas peb pheej xav tau tus Vaj Ntsuj Plig Dawb Huv txoj kev ua peb tus khub. Peb xav tau, tab sis mas peb yeej paub tias nws tsis yooj yim ua neej tas mus li kom muaj li no. Peb txhua tus niaj hnub xav, hais, thiab ua tej yam uas ua rau tus Ntsuj plig tu siab. Tus Tswv qhia peb tias tus Vaj Ntsuj Plig Dawb Huv yuav pheej ua peb tus khub thaum peb lub siab muaj kev siab hlub puv npo thiab thaum kev tsim txiaj coj kav peb tej kev xav tsis tu tsis tseg (saib Q&K 121:45).

Rau nej cov uas muaj teeb meem ua raws li tej kev cai uas teem tseg kom yus thiaj tsim nyog tau qhov khoom plig uas yog tus Ntsuj Plig txoj kev ua yus tus khub, kuv xav muab cov lus no los txhawb nqa nej. Nej twb muaj tej lub sij hawm thaum nej tau hnov tus Vaj Ntsuj Plig Dawb Huv txoj kev tshoov siab. Tej zaum hnub no nej twb hnov li ntawd.

Nej saib tau tej lub sij hawm uas nej tau kev tshoov siab ntawd ib yam li lub noob txog kev ntseeg uas Amas piav txog (saib Amas 32:28). Muab txhua lub cog cia. Nej ua tau li ntawd thaum nej ua raws li txoj kev tshoov siab uas nej tau hnov. Txoj kev tshwm sim tseem ceeb tshaj plaws yuav yog kom koj paub seb Vajtswv xav kom koj ua dab tsi. Yog hais tias yog kom them ib feem kaum los sis mus xyuas ib tug phooj ywg uas nyuaj siab, ces koj yuav tsum ua li ntawd. Txawm yog yam dab tsi los, cia li ua kiag. Thaum nej qhia tias nej kam mloog lus, tus Ntsuj Plig yuav tshoov nej siab ntxiv seb Vajtswv xav kom nej ua dab tsi pab Nws.

Thaum nej mloog lus, tus Ntsuj Plig tej kev tshoov siab yuav ib sij los, yuav haj yam muaj nws ua yus tus khub. Nej haj yam yuav muaj hwj chim xaiv ua qhov yog.

Nej yuav muaj cuab kav paub thaum twg tej kev tshoov siab no los ntawm tus Ntsuj Plig los es tsis yog li nej lub siab xav xwb. Thaum tej kev tshoov siab haum nrog tus Cawm Seej thiab Nws cov yaj saub thiab cov thwj tim uas muaj sia nyob cov lus qhia ces, nej yuav ua siab loj xaiv los mloog lus. Ces tus Tswv yuav xa Nws tus Ntsuj Plig los nrog nej nyob.

Piv xam hais tias, yog tias nej tau ib txoj kev tshoov siab kom hawm Hnub Caiv, tab txawm ua li ntawd nyuaj los, Vajtswv yeej yuav xa Nws tus Ntsuj Plig los pab nej.

Kuv txiv tau txoj kev pab ntawd ntau xyoo tas los lawm thaum nws mus ua hauj lwm tim Australia teb. Nws nyob nws ib leeg xwb thaum Hnub Caiv, thiab nws xav noj lub cim nco txog. Nws nrhiav tsis tau tej xov xwm txog ib Tsoom Haiv Neeg Ntseeg hauv Hnub Nyoog Kawg tej kev sib ntsib. Ces nws tau pib taug kev. Nws thov Vajtswv pab nws paub seb yuav lem es taug txoj kev twg. Tom qab taug kev thiab lem li ub li no tau ib xuab moos lawm, nws tau nres thiab thov Vajtswv dua. Nws tau kev tshoov siab kom lem es taug ib txoj kev ntawd. Tsis ntev ces nws hnov leej twg hu nkauj hauv ib lub tsev kem ua nyob ze ze ntawd. Nws ntsia hauv qhov rais thiab pom ob peb tug neeg zaum ze ib lub rooj uas muaj ib daim ntaub dawb uas npog cov tais yais lub cim nco txog.

Nim no, tej zaum nej yuav xav tias qhov ntawd yog ib yam me me xwb, tiam sis yog ib yam tseem ceeb rau nws. Nws paub tias txoj kev cog lus ntawm zaj thov Vajtswv rau lub cim nco txog muaj tiav los: “Nco ntsoov txog nws, thiab coj raws li nws tej lus txib uas nws tau muab rau lawv; kom lawv thiaj li yuav muaj nws Leej Ntsuj Plig niaj hnub nrog lawv nyob” (Q&K 20:77).

Qhov ntawd tsuas yog ib qho piv txwv txog lub sij hawm thaum nws thov Vajtswv thiab ua raws li tus Ntsuj Plig qhia tias Vajtswv xav kom nws ua dab tsi. Nws twb ua li no ntau ntau xyoo, ib yam li kuv thiab nej yuav ua. Nws ib txwm tsis tshua tham txog nws sab ntsuj plig. Nws tsuas pheej ua tej yam me me pab tus Tswv uas nws raug txhib kom ua xwb.

Thaum twg ib pawg neeg hauv Ib Tsoom Haiv Neeg Ntseeg hauv Hnub Nyoog Kawg thov nws los hais lus, nws tau ua li ntawd. Nws tsis khe puas yog 10 leej los sis 50 leej los sis nws nkees npaum li cas. Nws tau ua tim khawv txog Leej Txiv, Leej Tub, thiab tus Vaj Ntsuj Plig Dawb Huv, thiab cov yaj saub thaum twg tus Ntsuj Plig tshoov nws siab kom ua li ntawd.

Nws txoj hauj lwm siab tshaj plaws hauv lub Koom Tsoos yog rau Bonneville Ceg Txheem Ntseeg pawg sab laj hlob, es nyob ntawd nws tau mus dob nroj hauv ceg txheem ntseeg thaj teb, thiab nws qhia Hnub Caiv Kev Kawm Vaj Lug Kub ib chav kawm. Tau ntau xyoos, thaum twg nws xav tau ces, tus Vaj Ntsuj Plig Dawb Huv yeej nyob ntawd ua nws tus khub.

Kuv tau sawv ntawm kuv txiv ib sab hauv ib chav tsev hauv lub tsev kho mob. Kuv niam, nws tus poj niam rau 41 xyoos, tau pw hauv lub txaj. Wb twb saib xyuas nws tau ntau teev lawm. Wb pib pom qhov kev hnov mob ntawm nws ntsej muag ploj mus. Nws ob txhais tes uas nws muab ua nrig khov kho txawm xoob lawm. Nws ob txhais caj npab txawm nyob twj ywm ntawm nws ob sab tav.

Tej kev mob vim nws mob khaxawj tau ntau ntau xyoo lawm pib ploj mus. Kuv tau pom kev kaj siab lug ntawm nws lub ntsej muag. Nws tau ua ob peb pa hlob hlob, ces tau huas pa, ces tau pw ntsiag tos. Wb sawv ntawd sim saib seb nws puas yuav ua pa ntxiv li.

Thaum kawg, kuv Txiv hais twj ywm hais tias, “Ib tug ntxhais hluas twb mus tsev lawm.”

Nws tsis poob kua muag li. Yog vim hais tias tus Vaj Ntsuj Plig Dawb Huv twb qhia nws meej meej hais tias nws yog leej twg, nws tuaj qhov twg tuaj, nws tau rais los mus ua tus neeg zoo li cas, thiab nws tab tom mus qhov twg. Tus Ntsuj Plig twb ua tim khawv ntau zaus rau nws txog Leej Txiv Saum Ntuj Ceeb Tsheej uas hlub nws, txog ib tug Cawm Seej uas tau kov yeej txoj kev tuag, thiab qhia tseeb hais tias txoj kev muab nws tus poj niam thiab tsev neeg khi ua ke yeej muaj tseeb.

Tus Ntsuj Plig twb qhia rau nws tias nws tus poj niam muaj lub siab zoo thiab kev ntseeg txaus nws thiaj yuav tsim nyog rov qab mus saum ntuj ceeb tsheej vim nws yog ib tug me nyuam ntawm txoj kev cog lus thiab yuav tau koob meej thaum nws los tsev.

Rau kuv txiv mas, qhov ntawd yeej ntau tshaj txoj kev cia siab. Tus Vaj Ntsuj Plig Dawb Huv tau qhia nws tias qhov no muaj tseeb tiag.

Nim no, ib txhia yuav xav tias nws cov lus los sis tej kev xav hauv nws paj hlwb txog lub tsev saum ntuj ceeb tsheej yog ib qho tswv yim zoo, ib yam uas lam txhawb nqa ib tug txiv vim nws xiam tus uas nws hlub xwb. Tiam sis nws twb paub qhov tseeb uas kav mus ib txhis vim yog tib yam uas yus thiaj paub tau li ntawd.

Nws yog ib tug kws ua txuj ci uas tau nrhiav tej qhov tseeb hauv lub ntiaj teb hauv tag nrho nws lub neej. Nws tau siv cov cuab yeej ua txuj ci tom hauj lwm ua li cov neeg thoob plaws ntiaj teb no qhuas nws tej hauj lwm. Ntau yam ntawm txoj kev ua txuj ci yog qhov uas nws pom tej yam me me hauv ntiaj teb no ces nws xyaum ua tej ntawd tom tsev hauj lwm seb tej yam khoom puas khiav li nws xav.

Tiam sis nws ua lwm yam thaum nws xav nrhiav qhov tseeb uas tseem ceeb tshaj plaws rau nws thiab peb txhua tus. Tsuas yog dhau ntawm tus Vaj Ntsuj Plig Dawb Huv xwb peb thiaj pom tau tib neeg thiab tej yam xwm ib yam nkaus li Vajtswv pom.

Tseem muaj tib qho khoom plig ntawd hauv lub tsev kho mob tom qab nws tus poj niam tuag. Peb tau khaws kuv niam tej khoom yuav nqa mus tsev. Txiv tau nres hais ua tsaug rau txhua tus nais maum thiab kws kho mob uas wb ntsib thaum mus rau lub tsheb. Kuv nco qab tias kuv, ib nyuag chim, vim xav tias wb yuav tsum mus nyob wb ob leeg muaj kev tu siab xwb.

Tsam no kuv thiaj paub tias nws pom tau tej uas tus Vaj Ntsuj Plig Dawb Huv tau muab rau nws saib lawm. Nws pom hais tias cov neeg ntawd yog cov tim tswv uas Vajtswv tau txib los saib xyuas nws tus me poj niam. Tej zaum lawv tsuas xav hais tias lawv yog cov neeg kho mob xwb, tiam sis Txiv tab tom ua lawv tsaug rau lawv tej hauj lwm sawv tus Cawm Seej cev.

Tus Vaj Ntsuj Plig Dawb Huv txoj kev tshoov siab nrog wb nyob thaum wb txog tom kuv niam txiv lub tsev. Wb tau tham ob peb feeb hauv hoob nyob. Txiv khiav mus tom nws txaj pw.

Tom qab ob peb feeb, nws rov qab los rau hauv hoob nyob. Nws luag nyav. Nws los ntsib peb thiab hais tias, “Kuv txhawj tsam Mildred yuav los txog lub ntuj ntsuj plig nyob nws ib leeg xwb. Kuv xav tias nws yuav kho siab hauv pab neeg coob coob.”

Ces nws zoo siab hais tias, “Kuv nyuam qhuav thov Vajtswv. Kuv paub hais tias Mildred nyob zoo. Kuv niam twb nyob ntawd tos txais nws.”

Kuv nco qab tias kuv tau luag nyav thaum nws hais li ntawd, kuv tau xav txog kuv pog, nws yog neeg qis taub, kuv xam pom nws khiav mus phoom cov neeg coob coob mus ntsib thiab puag nws tus nyab thaum nws txog ntawd.

Nim no, ib lub ntsiab ntawm qhov uas kuv txiv thov kom tau thiab yeej txais tau kev nplij siab yog txij li nws ua me nyuam yaus nws tau muaj kev ntseeg thov Vajtswv. Nws ib txwm tau lus teb los rau hauv nws lub siab kom nws tau kev nplij siab thiab kev coj qhia. Tsis yog nws ib txwm thov Vajtswv xwb, tab sis mas nws paub cov vaj lug kub thiab cov yaj saub uas muaj sia nyob cov lus thiab. Ces nws thiaj paub tus Ntsuj Plig tej kev ntxhi lus, uas tej zaum nej tau hnov hnub no thiab.

Tus Ntsuj Plig txoj kev ua khub yeej ntau tshaj txoj kev nplij siab thiab kev coj nws kev. Twb tau hloov nws lub siab dhau ntawm Yexus Khetos txoj Kev Theej Txhoj. Thaum peb txais kev cog lug kom muaj tus Ntsuj Plig niaj hnub nrog peb nyob, tus Cawm Seej yuav ua kom peb ua neeg dawb huv peb thiaj yuav tau txoj sia nyob mus ib txhis, uas yog qhov khoom plig tseem ceeb tshaj plaws (saib Q&K 14:7).

Nej nco qab tus Cawm Seej cov lus uas hais tias: “Nim no qhov no yog txoj lus txib: Cia li hloov siab lees txim, nej sawv daws tag nrho hauv qab ntuj kawg, thiab los cuag kuv thiab ua kev cai raus dej nyob ntawm kuv lub npe, xwv kom nej yuav raug ua kom dawb huv los ntawm txoj kev txais ntawm tus Vaj Ntsuj Plig Dawb Huv, xwv kom nej yuav sawv tsis muaj qhov ceb rau ntawm kuv xub ntiag nyob rau hnub kawg” (3 Nifais 27:20).

Cov lus txib no yeej muaj tus Tswv lo lus cog tseg hais tias:

Nws hais kom peb tso siab rau tus Ntsuj Plig uas coj peb ua zoo—ua ncaj ncees, txo hwj chim, thiab txiav txim raws li kev ncaj ncees; Nws tus Ntsuj Plig yeej zoo li no.

Nws hais rau nej tias, Nws yuav muab kuv tus Ntsuj Plig rau nej, uas yuav qhib nej lub paj hlwb, uas yuav ua rau nej tus ntsuj plig muaj kev zoo siab (saib Q&K 11:12–13).

Kuv hais lus pov thawj rau nej tias Vajtswv muaj txoj sia nyob, tias Yexus Khetos uas sawv rov los coj Nws lub Koom Txoos, tias Thomas S. Monson tuav tag nrho cov yuam sij hauv lub pov thawj hwj, thiab tias tej kev tshwm sim los ntawm tus Vaj Ntsuj Plig Dawb Huv coj kav thiab thiab txhawb nqa Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg thiab nws cov mej zeej uas txo hwj chim.

Kuv kuj hais lus tim khawv tias cov txiv neej uas nej hnov hais lus hnub no tau ua cov neeg tim khawv txog tus Tswv Yexus Khetos, ua cov neeg hauv Pawg Kaum Ob tug Thwj Tim, yeej raug hu los ntawm Vajtswv los ua txoj hauj lwm no. Kuv paub hais tias tus Ntsuj Plig tau coj Thawj Tswj Hwm Monson kev kom hu lawv. Thaum nej mloog lawv hais lus thiab hnov lawv zaj lus tim khawv, tus Vaj Ntsuj Plig Dawb Huv tau qhia tseeb rau nej ib yam li kuv hais rau nej tas sim no. Vajtswv yog tus uas hu lawv. Kuv txhawb nqa lawv thiab hlub lawv thiab paub tias tus Tswv hlub lawv thiab yuav txhawb pab lawv hauv lawv txoj hauj lwm. Kuv ua tim khawv li no los ntawm Yexus Khetos lub npe, amees.