O Le Agaga Paia e fai ma Au Soa

Ou uso e ma tuafafine pele, ou te faafetai lava i le faatasi ai ma outou i lenei aso Sapati i le konafesi aoao a le Ekalesia a le Alii. Ua ou lagonaina e pei foi o outou, le Agaga, o le Agaga Paia, o molimau mai i le moni o upu ua tatou faalogo o tautalagiaina ma lagiina.

O lo’u faamoemoega i le asō o le faateleina lea o lou manao ma lou naunautaiga ia maua le meaalofa na folafolaina mai ia i tatou ina ua uma ona papatisoina i tatou. I le taimi na faamau ai i tatou na tatou faalogo atu ai i upu nei: “Talia le Agaga Paia.”¹ Mai lena taimi, na suia ai o tatou olaga e faavavau.

E mafai ona tatou maua faamanuiaga a le Agaga e faatasi ma i tatou, pe afai tatou te ola agavaa, e le gata mai lea taimi i lea taimi, ae o taimi uma. E te iloaina mai upu o le tatalo o le faamanatuga le auala e faataunuuina ai lena folafolaga: “Le Atua e, le Tama Faavavau, matou te ole atu ia te oe i le suafa o lou Alo o Iesu Keriso, ia e faamanuiaina ma faapaiaina lenei areto i agaga o i latou uma o e e fetagofi i ai, ina ia latou taumamafa i le faamanatuina o le tino o lou Alo, ma molimau atu ia te oe, Le Atua e, le Tama Faavavau, latou te loto ina ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou.”

Ona oo mai lea o le folafolaga: “Ina ia latou maua pea lona Agaga e faatasi ma i latou” (MF&F 20:77; faaopoopo le faamamafa).

O le i ai pea o le Agaga e faatasi ma i tatou, o le i ai lea o le taiala ma le taitaiga a le Agaga Paia i o tatou olaga i aso taitasi. Mo se faataitaiga, e mafai ona lapataiina e le Agaga i tatou ia tetee atu i faaosoosoga o le faia o le leaga.

Mo lena mafuaaga e tasi, e faigofie lava le vaaia o auauna a le Alii o taumafai e faateleina lo tatou manao e tapuai atu i le Atua i a tatou sauniga faamanatuga. Afai tatou te taumamafa i le faamanatuga i le faatuatua, o le a mafai la e le Agaga Paia ona puipuia i tatou ma i latou tatou te alolofa i ai mai faaosoosoga e oo mai ma le malolosi tele ma le faisoo.

O le mafutaga a le Agaga Paia e faia mea lelei ia sili ona faatosina ae faaitiitia le faatauanau o faaosoosoga. E tatau ona lava lea mafuaaga ia tatou naunau ai e agavaa mo le Agaga ina ia faatasi pea ma i tatou.

E pei lava ona faamalosia i tatou e le Agaga e tetee atu i le leaga, Na te aumaia foi ia i tatou le mana e iloatino ai le mea moni mai le mea sese. O le upumoni e sili ona taua ua na o faaaliga mai le Atua e faamaonia ai. O a tatou mafuaaga faaletagata ma le faaaogaina o o tatou lagona faaletino o le a le lava lea. Ua tatou ola i se taimi e oo lava foi i tagata sili ona atamamai e matua faigata lava ona iloa le eseesega i le va o le mea moni mai togafiti poto.

Sa aoao e le Alii Lana Aposetolo o Toma, sa manao i se faamaoniga faaletino o le Toetu o le Faaola e ala i le tagotago i Ona manua, o lena faaaliga o se faamaoniga saogalemu atu: “Ua fetalai atu Iesu ia te ia, Toma e, ua e talitonu, aua ua e vaai mai ia te au. Amuia o e le vaai mai, a e talitonu mai pea” (Ioane 20:29).

O upumoni o loo faailoga ai le ala i le aiga i le Atua ua faamaonia e le Agaga Paia. E le mafai ona tatou o i le togavao ma vaai ai i le Tama ma le Alo o fetalai atu i le taulealea o Iosefa Samita. E leai se faamaoniga faaletino po o se finauga talafeauga e mafai ona faamautu ai na sau Elia e pei ona folafolaina e faaee mai ki o le perisitua ia ua umia nei ma faaaogaina e se perofeta soifua, o Thomas S. Monson.

O le faamaoniga o le upumoni e oo mai i se atalii po o se afafine o le Atua o le ua mauaina le aia tatau e maua ai le Agaga Paia. Talu ai atonu e ono tuu mai ia i tatou mea sese ma pepelo i soo se taimi, tatou te manaomia ai se faatosinaga tumau a le Agaga o le Upumoni e faasāo ai tatou mai le masalosalo.

A o avea ma se uso o le Korama a Aposetolo e Toasefululua, sa uunaia ai i tatou e George Q. Cannon ina ia tatou tauivi pea mo le Agaga ia faatasi ma i tatou. Sa ia folafola mai, ma ou te folafola atu foi, afai tatou te tauivi i le ala lena, “o le a le papa’u lava lo [tatou] iloa” o le upumoni, “o le a le masalosalo lava pe faapogisaina,” ma o lo tatou “faatuatua o le a malosi, [o lo tatou] olioli e … tumu.”²

Tatou te manaomiaina lena fesoasoani faifai pea mai le mafutaga a le Agaga Paia mo se isi foi mafuaaga. O le maliu o sē pele atonu e lei faamoemoeina. O le molimau mai le Agaga Paia e uiga i le moni o se Tama Faalelagi alofa ma se Faaola toetu lea tatou te maua ai le faamoemoe ma le mafanafana i le maliu ai o sē pele. O lena molimau e tatau ona ia i tatou pe a tupu mai se maliu.

O lea la mo le tele o mafuaaga, tatou te manaomia le mafutaga a le Agaga Paia. Tatou te mananao i ai, ae ua tatou iloa mai aafiaga e le faigofie ona faatumauina. Tatou te taufai mafaufau, tautatala, ma faia mea i o tatou olaga i aso taitasi e mafai ona faatiga ai i le Agaga. Sa aoao i tatou e le Alii o le Agaga Paia o le a avea ma a tatou soa tumau pe afai o o tatou loto e tumu i le alofa mama ma pe a leoleoina o tatou mafaufauga i le mama e le aunoa (tagai MF&F 121:45).

Mo i latou o loo tauivi ma tulaga faatonuina maualuluga e manaomia ona agavaa mo le meaalofa o le mafutaga a le Agaga, ou te ofo atua lenei faamalosiauga. Sa i ai ni ou taimi na e lagonaina ai le faatosinaga a le Agaga Paia? Atonu e ono tupu i le asō.

E mafai ona e taulimaina na taimi o musumusuga e pei o le fatu o le faatuatua na faamatalaina e Alema (tagai Alema 32:28). Toto fatu taitasi. E mafai ona e faia lena mea e ala i le faatinoina o uunaiga e te lagonaina. O le musumusuga sili ona taua o lou silafia lea o le finagalo o le Atua mo oe. Afai o le totogiina o le sefuluai po o le asiasi atu i se uo mafatia, e tatau ona e faia. Po o le a lava le mea e fai, ia fai. A e faaalia lou naunautaiga ia usiusitai, o le a auina mai e le Agaga nisi uunaiga tele atu ia te oe o mea e finagalo le Atua e te faia mo Ia.

A e usitai, o le a atili ona aumai soo ia uunaiga mai le Agaga, ma saga latalata atu ai pea i le mafutaga faifai pea. O le a faateleina lou mana e filifili ai le mea sa’o.

E mafai ona e iloaina pe o na uunaiga e faatino mo Ia e sau mai le Agaga ae le mai i ou lava manaoga. A paleni lelei uunaiga ma mea ua fetalaia e le Faaola ma Ana perofeta soifua ma aposetolo, e mafai ona e filifili e usitai ma le talitonuga maumaututu. Ona auina atu lea e le Alii Lona Agaga e au faatasi ma oe.

Mo se faataitaiga, afai e te mauaina se uunaiga faaleagaga e faamamalu le aso Sapati, aemaise lava pe a foliga mai e faigata, o le a auina atu e le Atua Lona Agaga e fesoasoani atu.

Na oo mai lena fesoasoani i lo’u tama i tausaga ua mavae ina ua malaga i Ausetalia mo lana galuega. Sa tuua na o ia i se Aso Sa, ma sa ia manao e ai ma inu i le faamanatuga. Sa le mafai ona ia maua se faamatalaga e uiga i sauniga a le Au Paia o Aso e Gata Ai. O lea sa amata ai ona ia savali. Sa ia tatalo i magaala uma ia iloa po o fea le itu e liliu i ai. I le mavae ai o se savaliga ma afega mo se itula, sa ia tu ma toe tatalo. Sa ia lagonaina se uunaiga ia liliu atu i se aualatele patino. Sa lei pine ae ia faalogoina ni pesega o sau mai le fogafale a lalo o se fale mautotogi lata ane. Sa ia autilo atu i le faamalama ma vaaia ni nai tagata o nonofo latalata i se laulau o ufitai i se ie paepae ma ni fata faamanatuga.

Ia, atonu e le o se mea tele lena ia te oe, ae o se mea ofoofogia ia te ia. Sa ia iloaina ua faataunuuina le folafolaga o le tatalo o le faamanatuga: “Ia manatua pea o ia ma tausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou” (MF&F 20:77).

Ua na o se faataitaiga lena e tasi o se taimi na ia tatalo ai ma faia le mea na tau atu e le Agaga ia te ia na finagalo le Atua ia ona faia. Sa ia faia pea lena mea i le aluga o tausaga, e pei ona tatou faia foi. Na te lei talanoa lava e uiga i lona tulaga faaleagaga. E na o lona faia pea o mea iti mo le Alii na uunaia ai o ia ia faia.

Soo se taimi lava e fesiligia ai o ia e ni vaega o le Au Paia o Aso e Gata Ai e lauga atu ia i latou, sa ia faia lava. Sa le afaina pe 10 tagata pe 50 pe sa lē lavā foi o ia. Sa ia tuu atu lana molimau e uiga i le Tama, le Alo, ma le Agaga Paia, atoa ai ma perofeta i soo se taimi lava na uunaia ai o ia e le Agaga e fai.

O ona tofiga maualuluga i le Ekalesia o le fautua maualuga i le Siteki a Bonneville, lea sa ia velevao ai i le faatoaga a le siteki, ma sa faiaoga i se vasega o le Aoga Sa. I le aluga o tausaga, pe a ia manaomiaina, sa i ai lava le Agaga Paia iina e fai ma ana soa.

Sa ou tu i talaane o lo’u tama i se potu o le falemai. O lo’u tina, lana ava mo le 41 tausaga, sa taoto i luga o le moega. Sa ma vaavaai atu ia te ia mo le tele o itula. Sa amata ona ma vaaia foliga o le tiga ua mou atu mai ona foliga. O tamatamailima o ona lima, ia sa uu ai moto, ua matala. O ona ogalima ua malolo ifo i ona itu.

O tiga o le fia tausaga o le kanesa ua faamutaina. Sa ou vaaia i ona foliga se vaaiga o le filemu. Sa faia nai ana manava pupuu, ona to ai lea o lana manava, ona taoto filemu loa lea. Sa ma tutu iina ma faatalitali e fia vaai pe toe i ai se isi manava.

Mulimuli ane, sa fai mai filemu Tama, “Ua foi i le aiga se teineitiiti.”

Sa lei tagi o ia. Na mafua ona ua leva ona tuu atu e le Agaga Paia ia te ia se ata manino o le tagata e i ai [lo’u tina], le mea na sau ai, le tagata ua avea ai o ia, ma le mea ua alu atu i ai. Sa molimau atu i ai le Agaga ia te ia i le tele o taimi e uiga i se Tama Faalelagi alofa, e uiga i se Faaola na motusiaina noataga o le oti, atoa ai ma le moni o faamauga i le malumalu na ia faatinoina ma lana ava ma le aiga.

Ua leva ona faamautinoa atu e le Agaga ia te ia o lona lelei ma le faatuatua ua agavaa ai o ia mo le toefoi atu i se aiga faalelagi i le mea o le a manatuaina ai o ia o se teineitiiti lelei tele o le folafolaga ma taliaina ai i le aiga ma le mamalu.

Mo lo’u tama, o lena mea sa sili atu nai lo o se faamoemoe. Sa faatino moni lava e le Agaga Paia mo ia.

Ia, atonu e fai mai nisi o ana upu ma ata i lona mafaufau e uiga i se aiga faalelagi ua na o se miti malie, ma le faaiuga atuatuvale a se tane i le taimi o ona faanoanoaga. Ae sa ia iloaina le upumoni e faavavau i le ala e tasi e mafai foi ona e iloaina ai.

O ia o se saienitisi sa saili mo le upumoni e uiga i le lalolagi faaletino i lona olaga matua atoa. Sa matuā lava lona faaaogaina o meafaigaluega faasaienisi ina ia faamamaluina ai e ana uo i le lalolagi atoa. O le tele o mea na ia faia i le kemisi sa sau mai lana vaai faalemafaufau i fasi mea ninii feminoiai ona faamautuina lea o lana vaaiga faalemafaufau e ala i faataitaiga i totonu o le potusuesue.

Ae sa ese se auala sa ia mulimuli ai ina ia maua ai upumoni sa sili ona taua ia te ia ma i tatou taitoatasi. Ua na o le Agaga Paia lava e mafai ona tatou iloa ai tagata ma mea e tutupu e pei ona silafia e le Atua.

O lena meaalofa na faaauau atu i le falemai ina ua maliu lona toalua. Sa ma aoina mai meatotino a lo’u tina e ave i le fale. Sa tu tama e faafetai i tausimai ma fomai uma na matou fetaui a o ma savavali atu i fafo i le taavale. Ou te manatua sa ou lagonaina e tatau ona ma o ese atu ina ia tuua na o ma’ua i le lotofaavauvau.

Ua ou iloa nei sa ia iloaina mea e na o le Agaga Paia na mafai ona faaali atu ia te ia. Sa ia vaaia na tagata o ni agelu na auina mai e le Atua e leoleo i lana manamea. Atonu latou te vaai ifo ia i latou lava o ni tausisoifua faapolofesa, ae sa faafetai atu Tama ia i latou e fai ma sui o le Faaola.

Sa faaauau pea le faatosinaga a le Agaga Paia ia te ia ina ua ma taunuu i le fale o o’u matua. Sa ma talanoa mo ni nai minute i le potu malolo. Sa aluese atu Tama i lona potu na lata ane.

Ina ua mavae ni nai minute, sa ia toe savali mai i le potu malolo. Sa ataata fiafia o ia. Sa ia savali mai ia i matou ma le filemu, “Sa ou popole ona o le a taunuu atu Mildred na o ia i le lalolagi o agaga. Ou te manatu ina ne’i ona lagonaina le feseta’i i le tumutumu o tagata.”

Ona ia faapea mai lea ma le fiafia, “Sa ou tatalo nei lava. Ou te iloa o loo lelei mea uma ia Mildred. Sa i ai lo’u tina iina e faafeiloai ia te ia.”

Ou te manatua lana ataata a o ia fai mai lena tala, ma le mafaufau i lo’u tinamatua, le taufetuli mai o ona vae pupuu, telea’i mai i se tumutumu o tagata ia mautinoa o loo i ai o ia iina e faafeiloai ma fusimau lana tama teine faaletulafono a o ia taunuu atu.

Ia, o se tasi o mafuaaga na fesili ai lo’u tama ma mauaina lena mafanafana ona sa ia tatalo i taimi uma i le faatuatua talu mai lava lona tamaitiiti. Sa masani o ia i le mauaina o tali na oo mai i lona loto e avatu ai le mafanafana ma le taitaiga. Ma le isi o le mauaina o se mausa o le tatalo, sa ia iloaina tusitusiga paia ma upu a perofeta soifua. O lea sa ia iloaina ai musumusuga masani a le Agaga.

O le mafutaga a le Agaga na sili atu nai lo le mafanafana ma le taialaina o ia. Sa suia ai o ia e ala i le Togiola a Iesu Keriso. A tatou taliaina lena folafolaga o le mauaina pea o le Agaga e faatasi ma i tatou, e mafai e le Faaola ona faamatuu mai ia i tatou le faamamaina lea e manaomia mo le ola e faavavau, le meaalofa sili o meaalofa uma (tagai MF&F 14:7).

E te manatuaina le fetalaiga a le Faaola: “O lenei o le poloaiga lenei: Ia salamo, outou tuluiga uma o le lalolagi, ma o mai ia te au ma ia papatiso i lou igoa, ina ia faapaiaina outou i le taliaina o le Agaga Paia, ina ia outou tutu ma le le pona i ou luma i le aso gataaga” (3 Nifae 27:20).

O na poloaiga e o mai faatasi ma lenei folafolaga mai le Alii:

“Ma o lenei, e moni, e moni, Ou te fai atu ia te oe, ia tuu atu lou faalagolago i le Agaga lena lea na te taitai ia fai mea lelei—ioe, ia fai mea sao, ia savali ma le lotomaualalo, ia faamasino ma le amiotonu; ma o lo’u Agaga lea.

“E moni, e moni, Ou te fai atu ia te oe, o le a Ou faaali atu ia te oe ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli” (MF&F 11:12–13).

Ou te tuuina atu ia te outou lau molimau o loo soifua le Atua le Tama, o Iesu Keriso toetu o loo taitaia Lana Ekalesia, o Peresitene Thomas S. Monson o loo umiaina ki uma o le perisitua, ma o faaaliga e auala mai le Agaga Paia o loo taialaina ma lagolagoina ai Le Ekalesia a Iesu Keriso o le Au Paia o Aso e Gata Ai, atoa ai ma ona tagata lotomaualalalo.

Ou te molimau atu foi ia te outou o nei tamalii matagofie na saunoa mai ia i tatou i lenei aso o ni molimau a le Alii o Iesu Keriso, o ni uso o le Korama a Aposetolo e Toasefululua, ua valaauina e le Atua. Ou te iloa na taialaina Peresitene Monson e le Agaga e valaauina i latou. Ma ao outou faafofoga atu ia i latou ma a latou molimau, ua faamautinoa atu e le Agaga Paia ia te outou mea ua latou saunoa atu ai. Ua valaauina i latou e le Atua. Ou te lagolagoina ma alofa ia i latou ma ou te iloa e alofa ma lagolagoina i latou e le Atua i la latou auaunaga. Ou te faia ai lenei molimau i le suafa o le Alii o Iesu Keriso, amene.