Kev Xyiv Fab Thaum Ua Neej Raws Nraim Li Khetos
Los ntawm Txwj Laug Richard J. Maynes
Los ntawm Cov Xya Caum Pawg Thawj Tswj Hwm
Peb yuav tsum ua neej raws nraim li Yexus Khetos yog peb xav nrhiav tau kev xyiv fab thiab kev kaj siab lug nyob hauv lub neej no.
Peb ua neej nyob hauv ib lub ntiaj teb uas xav ntxias tib neeg zoo kom lawv muab lawv tej kev cai ua neeg ncaj ncees tso tseg. Tiam sis, txawm muaj kev phem thiab kev ntxias nyob ib puag ncig peb txhua hnub los, peb muaj peev xwm thiab yuav muaj kev xyiv fab thaum peb ua neej raws nraim li Yexus Khetos.
Kev ua neej raws nraim li Yexus Khetos thiab Nws txoj moo zoo yuav pab nej muaj lub neej zoo siab thiab khov kho, zoo li tej zaj no yuav qhia peb.
Muaj neeg thov Txwj Laug Taiichi Aoba ntawm Pawg Xya Caum, uas nyob hauv ib lub zos pem roob me me nyob hauv Shikoku, Nyijpooj Teb, qhia ib hoob nyob hauv ib lub rooj sab laj rau cov tub hluas ntxhais hluas. Lub ntsiab rau lub rooj sab laj yog “Sawv hauv tej Qhov Chaw Dawb Huv.” Tom qab nws tau xav txog lub ntsiab thiab tej yam nws yuav qhia, Txwj Laug Aoba txiav txim siab siv nws txoj hauj lwm qhia lawv. Nws txoj hauj lwm yog kev muab av puab ua hub.
Txwj Laug Aoba qhia hais tias nws cov tub hluas ntxhais hluas zoo siab heev thaum lawv pom tias nws txawj xuas tes muab av nplaum puab ua tej twj tais thiab khob. Tom qab nws ua rau lawv saib, nws nug seb lawv puas xav sim ua. Lawv txhua tus tsa tes.
Txwj Laug Aoba hais kom ob peb tug tub hluas ntxhais hluas los sim seb lawv puas ua tau. Lawv puav leej xav tias, tom qab lawv saib nws tas, ua li no yuav yooj yim heev. Tiam sis, tsis muaj leej twg uas txawj ua ib lub tais uas yooj yim ua hlo li. Lawv hais tias: “Kuv tsis txawj ua!” “Vim li cas nyuaj ua luaj?” “Ua li no mas nyuaj kawg.” Lawv hais tej yam zoo li no thaum cov av nplaum txawm dhia rau txhua qhov chaw.
Nws nug cov tub hluas ntxhais hluas vim li cas nyuaj rau lawv ua tej twj tais. Lawv teb hais tias: “Tsis tau ua dua,” “Tsis muaj leej twg qhia kuv,” los sis “Kuv tsis muaj txuj ci ua.” Tej yam lawv hais muaj tseeb thiab; tiam sis, qhov tseem ceeb vim li cas lawv thiaj tsis txawj ua yog vim cov av nplaum tsis nyob kiag nruab nrab ntawm lub log. Cov tub hluas ntxhais hluas xav tias lawv twb tso cov av nplaum nruab nrab ntawm lub log, tiam sis raws li ib tug kws txawj ua hub pom, lawv tsis tau tso kiag ntawm qhov nruab nrab. Ces nws qhia lawv tias, “Cia li sim ib zaug ntxiv tso.”
Lub sij hawm no, Txwj Laug Aoba muab cov av tso kiag ntawm lub log nruab nrab ces pib muab lub log kiv, to ib lub qhov nruab nrab ntawm cov av nplaum. Ob peb tug tub hluas ntxhais hluas rov qab sim ua ntxiv. Lub sij hawm no txhua tus pib npuaj tes thaum lawv hais tias: “Zoo heev, nws tsis co,” “Kuv txawj ua,” los sis “Kuv ua tau lawm!” Lawv ua tsis tau zoo tag nrho, tiam sis zaum no lawv ua tau zoo dua li lawv ua thaum xub thawj. Lawv ua tau vim cov av nplaum nyob kiag nruab nrab ntawm lub log.
Lub ntiaj teb no yeej zoo li tus kws ua hub lub log uas kiv mus, thiab lub log ntawd kiv sai dua li qub. Ib yam li cov av nyob ntawm tus kws ua hub lub log, peb yuav tsum nyob ntawm qhov nruab nrab thiab. Peb lub hauv paus ntawm peb lub neej yuav tsum yog Yexus Khetos thiab Nws txoj moo zoo. Kev ua neej raws nraim li Yexus Khetos txhais hais tias peb kawm txog Yexus Khetos thiab Nws txoj moo zoo ces peb coj raws li Nws tus yam ntxwv thiab ua raws nraim li Nws tej lus txib.
Tus yaj saub thaum ub Yaxayas hais tias, “Tiam sis tus Tswv, koj yeej yog peb leej txiv. Peb zoo li cov av nplaum, thiab koj yog tus puab peb.”1
Yog peb ua neej raws nraim li Yexus Khetos, Nws yuav puab peb kom rais los ua neeg zoo kom rov qab mus rau Nws thiab Leej Txiv Saum Ntuj Ceeb Tsheej lub xub ntiag nyob hauv lub nceeg vaj xilethi-aus. Peb yuav muaj kev xyiv fab hauv lub neej no npaum li peb ua peb lub neej raws nraim li Yexus Khetos tej lus qhia, tus yam ntxwv, thiab txoj kev txi theej txhoj.
Cov kwv tij thiab cov muam, kuv yug los rau hauv ib tsev neeg uas yog Haiv Neeg Ntseeg hauv Hnub Nyoog Kawg tau ntev lawm, yog li ntawd cov koob hmoov thiab kev xyiv fab los ntawm Yexus Khetos txoj moo zoo yeej yog lub hauv paus ntawm peb tsev neeg txhua hnub. Tiam sis twb mus txog thaum kuv mus ua tub txib tso kuv thiaj li paub hais tias cov uas tsis tau muaj Yexus Khetos txoj moo zoo tag nrho nyob hauv lawv lub neej ua ntej yuav txais tau qhov zoo npaum li cas thaum lawv txais tau cov koob hmoov ntawd. Nqe vaj lug kub no nyob hauv phau Mathais qhia txog tus txheej txheem rau cov neeg uas hloov siab los ntseeg Yexus Khetos txoj moo zoo: “Ntuj ceeb tsheej piv ib yam li hub nyiaj uas luag muab faus cia rau hauv ib daim teb. Muaj ib tug mus pom ces nws txawm muab av npoog rau, nws zoo siab kawg li. Nws rov mus muab nws lub cuab tam muag huv tib si, thiab muab cov nyiaj mus yuav daim teb ntawd.”2
Cia kuv qhia nej txog ib tug neeg nyob hauv Phau Ntawv Maumoos uas qhia tias ib tug neeg hloov siab los ntseeg txaus siab muab tej yam ntau npaum li cas tso tseg kom nrhiav tau lub hub nyiaj uas Yexus hais txog nyob hauv zaj lus piv txwv ntawm lub hub nyiaj uas luag muab faus cia rau hauv daim teb.
Cia li nco qab tias nyob hauv phau Amas tshooj 20, Amoos thiab Laumaunais tab tom mus rau lub nroog Midaunais kom nrhiav thiab muab Amoos tus kwv Aloos tso tawm ntawm lub nkuaj. Thaum lawv tab tom mus lawv ntsib Lamaunais txiv, tus uas yog tag nrho cov Neeg Lamas tus vaj ntxwv.
Tus vaj ntxwv npau taws heev vim nws tus tub Lamaunais nrog Amoos mus, tus uas yog cov Neeg Nifais ib tug tub txib, uas nws xav tias yog ib tug yeeb ncuab. Nws xav tias tsim nyog uas nws tus tub tim tuaj rooj qav uas nws tau ua rau nws cov tub thiab nws cov neeg. Tus vaj ntxwv Lamas npau taws heev nws thiaj li txib nws tus tub Lamaunais muab rab ntaj tua Amoos. Thaum Lamaunais tsis kam, ces tus vaj ntxwv rho nws rab ntaj muab nws tus tub tua vim nws tsis mloog lus; tiam sis Amoos pab tiv thaiv Lamaunais cawm nws txoj sia. Nws kov yeej tus vaj ntxwv thiab muaj cib fim tua nws.
Thaum tus vaj ntxwv pom tias Amoos muaj hwj chim muab nws tua nws hais li no hais tias: “Yog koj yuav tso kuv kuv yuav muab rau koj txhua yam uas koj thov, txawm yuav muab ib nrab ntawm lub teb chaws los tau.”3
Yog li ntawd tus vaj ntxwv txaus siab muab ib nrab ntawm nws lub teb chaws kom cawm nws txoj sia. Ntshe tus vaj ntxwv xav tsis thoob thaum Amoos xav kom nws tso nws tus kwv Aloos thiab nws cov kwv tij dim qhov taub thiab cia tus vaj ntxwv tus tub Lamaunais ceev nws lub nceeg vaj xwb.
Tom qab ntawd, vim tau muaj xwm txheej zoo li no, lawv muab Amoos tus kwv Aloos dim qhov taub nyob hauv Midaunais. Tom qab nws tawm nws txais kev tshoov siab mus rau thaj av uas tus vaj ntxwv Lamas kav lub teb chaws. Aloos ntsib tus vaj ntxwv thiab qhia nws txog tej ntsiab cai ntawm Yexus Khetos txoj moo zoo, tsis hais txoj kev txhiv dim los yog. Aloos tej lus qhia tshoov tus vaj ntxwv lub siab.
Qhov uas tus vaj ntxwv hais txog Aloos tej lus qhia los muaj nyob hauv nqe 15 ntawm phau Amas tshooj 22 : “Thiab tau muaj tias tom qab uas Aloos tau piav meej tej yam no rau nws tas lawm, vaj ntxwv tau hais tias: Kuv yuav ua dab tsi es kuv thiaj yuav muaj txoj sia nyob mus ib txhis uas koj tau hais no? Muaj tseeb tiag, kuv yuav ua dab tsi es kuv thiaj li yuav raug yug los ntawm Vajtswv, muab tus ntsuj plig phem no rho tawm ntawm kuv lub cev mus, thiab txais yuav nws tus Ntsuj Plig, xwv kom kuv yuav muaj kev xyiv fab puv npo, xwv kom kuv yuav tsis raug ntiab tawm nyob rau hauv hnub kawg? Nws tau hais tias, saib seb, kuv yuav muab ib puas yam tsav uas kuv muaj tso pov tseg, muaj tseeb tiag, kuv yuav tso kuv txoj kev kav teb chaws, xwv kom kuv yuav tau txais txoj kev xyiv fab heev no.”
Piv rau thawj zaug thaum nws txaus siab muab ib nrab ntawm nws lub teb chaws tso tseg kom cawm nws txoj sia, zaum thib ob tus vaj ntxwv Lamas txaus siab tso tag nrho nws lub nceeg vaj tseg kom nws yuav txais tau kev xyiv fab uas los ntawm kev to taub, kev lees yuav, thiab kev ua neej raws li Yexus Khetos txoj moo zoo.
Kuv tus poj niam, Nancy, kuj hloov siab los ntseeg lub Koom Txoos. Nws tau hais rau kuv ntau zaus txog kev xyiv fab nws muaj nyob hauv nws lub neej txij thaum nws nrhiav tau, lees yuav, thiab ua neej raws li Yexus Khetos txoj moo zoo los. Kuv yuav nyeem ib zaj los ntawm Muam Maynes tej lus hais txog nws lub neej:
“Thaum kuv yog ib tug ntxhais hluas uas muaj 20 xyoo tawm, kuv paub tias kuv yuav tsum hloov ib yam dab tsi kom kuv thiaj yuav muaj kev zoo siab nyob hauv kuv lub neej. Kuv xav tias kuv tsis muaj lub hom phiaj thiab tsis muaj kev coj, thiab kuv tsis tau paub kuv yuav tsum mus qhov twg kom nrhiav tau tej ntawd. Kuv ib txwm paub tias muaj Leej Txiv Saum Ntuj Ceeb Tsheej thiab tej lub sij hawm nyob hauv kuv lub neej kuv tau thov Vajtswv, thiab xav tias Nws mloog kuv tej lus thov.
“Thaum kuv tab tom pib nrhiav, kuv tau mus saib ob peb lub koom txoos, tiam sis kuv pheej rov qab xav li qub thiab poob siab. Kuv xav tias kuv tau koob hmoov vim thaum kawg Vajtswv teb kuv tej lus thov kom coj kuv lub neej thiab muab lub hom phiaj rau kuv, thiab kuv txais tau Yexus Khetos txoj moo zoo uas muaj txhij txhua. Yog thawj zaug uas kuv xav tias kuv muaj ib lub hom phiaj, thiab txoj hau kev zoo siab ua rau kuv muaj kev xyiv fab tiag tiag nyob hauv kuv lub neej.”
Ib zaj ntxiv los ntawm Phau Ntawv Maumoos qhia meej tias kev ua neej raws nraim li Yexus Khetos yuav pab peb muaj kev zoo siab txawm peb raug kev txom nyem nyuaj kawg nkaus.
Tom qab tus yaj saub Lihais thiab nws tsev neeg khiav ntawm Yeluaxalees mus thaum xyoo 600 ua ntej Yexus yug los, lawv mus rau ub rau no nyob hauv roob moj sab qhua tau yim xyoo mus txog thaum lawv thiaj li tuaj rau ib thaj av hu ua Huaj Vam, uas nyob ze ntug dej hiav txwv. Nifais piav lawv lub neej txom nyem nyob hauv roob moj sab qhua li no hais tias: “Peb tseem tau raug ntau yam kev kub ntxhov thiab ntau yam kev nyuaj siab, … twb muaj ntau yam kawg nkaus uas peb tsis muaj peev xwm sau tau tas.”4
Thaum lawv nyob hauv Huaj Vam, tus Tswv txib Nifais kom nws lav ris kev ua ib lub nkoj kom hla hiav txwv mus rau thaj av uas tau cog lus cia. Tom qab lawv tuaj txog thaj av uas tau cog lus cia, muaj kev kub ntxov ntau ntawm cov uas ua neej raws nraim li Khetos thiab cov uas tsis ntseeg uas ua raws li Lamas thiab Lemu-ees. Twb txog ib lub sij hawm thaum ntshe ob pawg ntawd yuav sib ntaus sib tua ces Nifais thiab cov uas koom nrog nws ua raws li tus Tswv tej lus qhia ncaim cov neeg Lamas mus thiab khiav mus rau hauv hav zoov. Thaum lub sij hawm ntawd, 30 xyoo tom qab Lihais thiab nws tsev neeg tawm Yeluxalees mus, Nifais sau ib zaj lus uas ua rau yus xav tsis thoob; ua rau yus haj yam xav tsis thoob vim nws twb sau ntau yam txog tej kev txom nyem thiab tej kev tsim txom uas lawv raug tau ntev lawm. Nws sau li no hais tias: “Thiab tau muaj tias peb tau ua neej nyob zoo siab kaj siab lug.”5 Txawm lawv raug txom nyem los, lawv tseem tau ua neej nyob zoo siab kaj siab lug vim lawv ua raws nraim li Yexus Khetos thiab Nws txoj moo zoo.
Cov kwv tij thiab cov muam, zoo ib yam li cov av nplaum nyob saum tus kws ua hub lub log, peb yuav tsum ua neej raws nraim li Yexus Khetos yog peb yuav muaj kev xyiv fab thiab kev kaj siab lug nyob hauv lub neej no. Tus yam ntxwv ntawm tus vaj ntxwv Lamas; kuv tus poj niam, Nancy; thiab cov neeg Nifais puav leej txhawb nqa lub ntsiab cai tseeb no.
Kuv ua tim khawv rau nej hais tias peb yuav muaj kev kaj siab lug, kev zoo siab, thiab kev xyiv fab zoo li ntawd yog peb ua neej raws li Khetos, los ntawm Yexus Khetos lub npe, amees.