Engan ke Moul sie Ohiyacn Moul luhn Kraist
Sel Elder Richard J. Maynes
Ke Prestuhnsi luhn Itngucul
Moul lasr enenuh in sesseslah ke suwohswohs luhn Kraist kuht fin ke konwacack engan ac mihslac pwacye ke moul se inge.
Facluh se an ma kuht moul kac oruh in kai mwet wo acn nuh kwewa in ahksrihkye kuh lahfwekihn sulwaclah lalos in moul suwohswohs. Tuhsruhktuh, finne ma koluk ac mwe sruhf ma oasr infulwac kuht lwen nuh kwewa, kuht kuh ac kuht fah konwacack engan pwacye mihsenge ke moul sie moul luhn Kraist.
In oruh moul lasr infulwacn ke Jisus Kraist ac wosasuc Lal ac fah use kuh ac engan nuh ke moul lasr, oacna srihkasrak inge ahkkahlwemye.
Elder Taiichi Aoba ke Itngucul, suc muhta ke mura srihk oasr ke finohl fin acn Shikoku, Japan, el siyuck in luti kuhlahs se ke toeni luhn mwet fuhsr. “Kowos Tu ke Acn Muhtahl” pa sulwaclah ke sifacn toeni an. Tukun motkoeyacn sifac ac ma in luti, Elder Aoba sulwaclah in orekmakihn orekma lal ke kuhfa in luti. Orekma lal pa ahkohnkohn ahluh kuh pottery.
Elder Aoba el fahk lah kuhlahs lal ke mwet fuhsr lihksreni na okakyak ke elos liye lah fuhkah ohiyacn el kuh in usrnguckiyac iklac luhn clay lun pahol nuh ke puhlwet, pol, ac kuhp. Tukun el ahksahfye srihkasrak, el siyuck selos fin oasr kuhtwena selos luhngse in srihke. Mwet nuh kwewa sruhkwack paholos. Elder Aoba el orek ahluh yot wi mwet fuhsr
Elder Aoba el lwelah mwet fuhsr puhspuhs tuhkuh nuh met in srihke ma luhngse sasuc lalos. Elos pahngon muh, tukun liyacl, tuh ma inge fihsracsr na. Tuhsruhktuh, wacngihn selos kuh in oruh ke pacl srihke lal in oraclah finne ma fihsracsr oacna pol uh. Elos fahkwack: “Nga tiac kuh in oruh ma se inge!” “Efuh upac oreyac?” “Ma se inge upac.” Kahs inge sikyak ke clay uh sohkwot sohkma ke infuckihl sac uh an.
El siyuck mwet fuhsr uh lah kuh efuh elos tiac kuh in oraclah pottery. Elos topuk ke kain in top puhs: “Nga tiac oruh met,” “Nga soenna lutiyuck, ” kuh “wacngihn talan luhk.” Kom fin liye ke ma sikyak uh, ma elos fahk uh pwacye; tuhsruhktuh, srihpac ma yohk emet ma elos kuf kac uh pa lalos pa clay tiac infulwacn wheel. Mwet fuhsr uh nuhnkuh muh elos fihliyac clay ke infulwac uh, tuhsruhktuh ke liyeyac luhn mwet kuhtaklah, el tiac oasr infulwac uh. El fahk nuh selos, “Lwelah kuht in sulpac srihke.”
Ke pacl se inge, Elder Aoba el fihliyac clay uh infulwac na fal ke wil na muhtwacack in for wil, ac oraclah pat se infulwacn clay. Mwet fuhsr puhspuhs sulpac srihke. Ke pacl se inge mwet nuh kwewa pahspahslah ke elos fahk: “Wes, tiac rarrar,” “Nga kuh in oruh,” kuh “Nga oruh!” Pwacye, luhma tiac suwohswohs, tuhsruhktuh ma sikyak sienna liki srihke met. Srihpac luhn wo ohiyac lalos mweyen clay oan suwohs ke infulwacn wil uh.
Facluh suckuht muhta kac oacna nuh ke wheel luhn potter ma forlah, ac muhiyacn wil kalweni in lihksreni. Oacna clay ke wheel luhn potter, kuht enenuh muhta infulwac pac. Ma infulwac, infulwacn moul lasr, enenuh in Jisus Kraist ac wosasuc Lal. Moulkihn Kraist kalmac pa kuht lotwelah Jisus Kraist ac wosasuc lal na kuht ukwe srihkasrak Lal ac karihngihn masap Lal ke ohiyac suwohs.
Mwet pahluh mahtuh Isaiah el fahkwack lah, “Tuhsruhktuh, Leum God, kom pahpah tuhmasr. Kuht oacna fohk kle, ac kom pa luhmwekuhtlac; ac.kuht nuhkwewa koanom poum.”1
Moul lasr ke Jisus Kraist, El kuh in orwekuhtlac nuh ke mwet se suc el enenuh kuht in muh kuh in fohlohk nuh yorohl ac luhn Pahpah Lucng ke tohkohsrah celestial. Engan ma kuht puhla ke moul se inge oacna sie nuh ke ohiyac fuhkah kuht moulkihn ke mwe luti, srihkasrak, ac kihsac iwaclah luhn Jisus Kraist.
Tamuhlwel ac tahmtahel, nga isuslac ke sucu ma wi Alu LDS ke fihl puhspuhs, pwacnwacng mwe insewowo ac engan ma tuhkuh ke wosasuc luhn Jisus Kraist ke pwelucng in facsin luhn sucu lasr ac oasr infulwacn moul lasr kais sie lwen. Tiac ke misin pacl nuh kwewa luhk ke nga mukul fuhsr lah nga akihlen ma wo yohk ma tuhkuh ke wosasuc fohnlah luhn Jisus Kraist nuh sin mwet suc soenna eis mwe insewowo inge ke moul lalos. Fuhs se inge ke Matthew el sramsram ke ohiyac ma mwet suc eklac ke wosasuc luhn Jisus Kraist fah sikyak: “Tohkohsrahi luhn kuhsrao ohinge: Sie mwet el kohnacack sie ma sacohk okanlah in imac se. El sifilpac afinyac, ac som ac kuhkakuhnla ma lal nuhkwewa, na el fohlohklac ac molwelah imac sac.”2
Lwelah nga in akacsruhi sie srihkasrak ke Puk luhn Mormon ma ahkkahlwemye ma se sie mwet eklac el sulwaclah in oruh in eis engan ma wi ke konwacack ma sacohk sruhmuhnyuck sin Jisus ke puhpuhlyuck luhn ma sacohk wihkihnyucklac in imac se.
Esam ke puk luhn Alma, sapta 20, Ammon ac Lamoni elos fuhfahsryucsr nuh ke siti luhn Middoni ke srihpac in konwacack ac fuhlwellah ma wiyacl Ammon, Aaron, ke kaclpous an. Ke fuhfahsryucsr lalos elos ohsun nuh sel pahpah tuhmwacl Lamoni, suc pa tohkohsrah luhn mwet Lamanite ke acn nohfohn uh.
Tohkohsrah sac el arlac toasr sin mukul nahtuhl Lamoni ke el fuhfahsryucsr yohrohl Ammon, misineri se ke Mwet Nephite, suc el nuhnkuh mwet lokoalok uh. El puhla mukul nahtuhl enenuh wi kuhfa luhlahp ma el oraclah ke mukul nahtuhl ac mwet lal. Tohkohsrah luhn Mwet Lamanite el fohlohyak sap kihn mukul se nahtuhl Lamoni uh in unilyac Ammon ke katlas nahtuhl ah . Ke Lamoni el tiac oruh, tohkohsrah eslah katlas nahtuhl uh sifacna in unilyac mukul nahtuhl uh ke srihpen seahkostwen lal; tuhsruhktuh, Ammon el tuyak ac loangwellah Lamoni. El kuhtanglah tohkohsrah se suc luhkuhn na unilyac uh.
Pa inge ma tohkohsrah el fahk nuh sel Ammon ke el konwaclwack ke ohiyac na sensen se el oasr kac uh: “Kom fin fihliyuclac nga fah acsot nuh sum oacna sie ma kom siyuck, finne nuh ke tahfuhn tohkohsrah.”3
Na tohkohsrah el lwelah in moli ke tahfuhn tohkohsrahi lal in tiac unilyac ke moul lal sifacna. Nga muh tohkohsrah sac lut ke Ammon el siyuck na sifacna in fuhlwellah ke mukul wiyacl Aaron ac mwet weluhl uh ke kaclpous ac lwelah mukul nahtuhl Lamoni in srackna kol tohkohsrahi lal.
Tukun pacl ekahsr, ke srihpen ma sikyak, mukul wiyacl Ammon, Aaron, el fuhlwelah ke kaclpous ke acn Middoni. Tukun fuhlwelah lal el moklweyuck in som ke acn ma tohkohsrah Mwet Lamanite kol ke acn uh. Aaron el ohsun nuh sel tohkohsrah ac eis pacl mwesahs in lotwel ke ip yohk luhn wosasuc luhn Jisus Kraist, wi pac plwacn wolacna luhn molwelah. Mwe luti lal Aaron uh mokle na upac tohkohsrah se.
Top lal tohkohsrah nuh ke mwe luti luhn Aaron oasr ke fuhs 15 ke sapta 22: luhn Alma: “Ac tukun ma inge tukun Aaron el ahkuhtweyac ma inge nuh sel, tohkohsrah el fahk: Meac nga enenuh in oruh tuh nga in kuh in eis moul ma pahtpaht ma kom sramsramkihn inge? Ahok, meac nga enenuh in oruh tuh nga in kuh in isuslac ke God, tuh nguhn koluk se inge in eisyucklac liki yuc, ac eis Nguhn Lal, tuh nga in kuh in sesseslah ke engan, tuh nga in kuh in tiac lihsyucklac ke lwen sahflah? Liye, el fahk, nga fah fuhlweack nohfohn ma luhk, ahok, nga fah fuhlweack tohkohsrahi luhk, tuh nga in kuh in eis engan luhlahp se inge.”
Ma wo uh, in tiac enenuh sang tahfuhn tohkohsrahi lal in sefiyac moul lal, tohkohsrah luhn Mwet Lamanite ac lwelah in sang tohkohsrahi nohfohn lal el in muh kuh in eis engan ma tuhkuh ke kahlwem, insese, ac moulkihn wosasuc luhn Jisus Kraist.
Muhtwacn kiyuck, Nancy, el sie mwet suc srowacng welah Alu uh. El sruhmuhn nuh sihk pacl puhspuhs ke yac somlah ke engan el puhlakihn tukun pacl se el konwacack, insese, ac moulkihn wosasuc luhn Jisus Kraist. Ma nga ac fahkwack sel Tahmtahel Maynes el ahkkahlwemye ma inge ke mukwikwi lal:
“Ke nga sun yac longoul muh, nga oasr ke acn in moul luhk lah nga etuh nga enenuh eklac ma se in lwelah nga in mwet engan se yohk likina met ah. Nga puhla muh oacna nga in oacna sie mwet wacngihn srihpac ac wacngihn kolyuck la, ac nga nihkihn lah oyac yen ma e loh uh. Nga nuh etuh tari lah Pahpah Lucng El oasr ac kais kuhtuh pacl ke moul luhk nga siyuck pruhe, ac puhlakihn tuh El lohng.
“Ke nga muhtwacack suk uh, nga som muhtwacta ke kain alu sienna puhspuhs tuhsruhktuh pacl nuh kwewa fohlohk nuh ke puhla oacna sie ac ahsorlac kuhtuh. Nga puhla insewowo yohk ke srihpen pruhe luhk ke kolyuck ac srihpac ke moul ac toplac, ac ma fohnlah ke wosasuc luhn Jisus Kraist utuhkuh nuh ke moul luhk. Pacl se emet nga puhla muh oacna in oasr srihpac luhn moul luhk, ac plwacn in molwelah use engan pwacye nuh ke moul luhk.”
Sie pac srihkasrak ke Puk luhn Mormon ma ahkkahlwemye suwohs fuhkah moulkihn yacn sie moul ke Kraist kuh in nwek kuhtlac ke engan yohk finne ke kuht oasr ke ma upac yohk.
Tukun mwet pahluh Lehi el ac sucu lal som liki acn Jerusalem ke yac 600 b.c., elos fuhfahsryucsr ke apkuhran yac alngucul ke acn mwesahs nuh ke elos sun acn se elos pahngohn Bountiful, ma sisken meoa. Nephi el ahkuhtweyac mwe upac ke moul lalos fin acn mwesahs ke ohiyac se inge: “kuht sun mwe kweok pucspucs ac ma upac pucspucs, … yohk pwacnwacng kuht tiac kuh in suhmuhslah ma inge nuhkwewa.”4
Ke moul fin acn Bountiful, Nephi el siyuckyuck sin Leum ke kunohkohn in muhsahi soko oak ma ac fah us sucu lal ahluhkwelah meoa nuh ke acn olweyucklac. Tukun sun acn olweyucklac, mwe lain yohk kalweni in sikyak inmahsrlon mwet suc fihliyac moul lalos ke Kraist ac mwet suhlahlahlfongi suc ukwe srihkasrak lal Laman ac Lemuel. Sahflahiyac, apkuhran in mweun inmahsrlon u luo oruh Nephi ac elos suc ukwe mwe luti luhn Leum in fahsrelihk ac som nuh ke acn mwesahs in sef. Ke pacl se inge, ke yac 30 muh tukun Lehi ac sucu lal som liki acn Jerusalem. Nephi el oraclah sie pwepuh suwohs ac fahkwack ma lut kuhtuh, yohk mweyen el sihm ke ma suhmuhslah mwe upac ac ongaiyac puhs elos ohsun nuh kac ke yac loes. Pa inge kahs lal: “Ac tukun ma inge kuht moulkihn engan.”5 Finne ma upac lalos, elos kuh in moul ke ohiyacn engan ke srihpen elos moul ke Kraist ac wosasuc Lal.
Tamuhlwel ac tahmtahel, oacna clay ke mwet tuhfal kewil, moul lasr enenuh in sesseslah ke suwohswohs luhn Kraist kuht fin ke konwacack engan ac mislac pwacye ke moul se inge. Srihkasrak ke tohkohsrah Lamanite; muhtwacn kiyuck, Nancy; ac Mwet Nephi nohfohn ahkkweye ip pwacye inge.
Nga fahkwack nuh suwos mihsenge lah kuht kuh pac in konwacack mislac sacn, engan sacn, engan pwacye sacn kuht fin sulwaclah in moulkihn sie moul oacna Kraist, ke inen Jisus Kraist, amen.