2010–2019
Kaperen pen Momourki Mour me Poahsoankihda Krais
October 2015


Kaperen pen Momourki Mour me Poahsoankihda Krais

Atail mour anahne poahsoankihda Krais ni pwung ma kitail pahn diar peren oh meleilei nan mour wet.

Sampah wet me kitail koukousoan loale wie idihding aramas mwahu kan wasa koaros en kihdi de kesehla arail kosonned en momour mwahu. Ahpw, mendahte suwed kan oh kasongosong kan me kapil kitail ehu ehu rahn, kitail kak oh pahn diar peren mehlel ni atail momourki mour me poahsoankihda Krais.

Poahsoankihda atail mour rehn Sises Krais oh Sapwelime rongamwahuo pahn kihdo tengeteng oh peren nan atail mour nin duwen karasaras wet ah kasalehda.

Elder Taiichi Aoba sang Pwihn en Isiakan, me kin kousoan nan kisin kousoan tikitik en pohn dohl nan Shikoku, Japan, alehdi pekipek ehu pwe en padakih pwihn ehu ni kapokon lap en pwihn pwulopwul. “Stand Ye in Holy Places” pilipildahr pwehn wia oaralap en kapokon lap wet. Mwurin madamadau laud ohng oaralapo oh dahme e kak padahngki, Elder Aoba medewedahr en doadoahngki ah doadoahk pwehn wia mehn kaskuhl. Ah doadoahk iei wiahda poahderi.

Kilel
Elder Aoba oh youth kan kin wiahda pottery

Elder Aoba koasoaiahda me nah pwihn en me pwulopwul koa inenen pirkihda ansou me re kilang ah kak kerenieng ni manaman wekidala klehi me mih nan pehkoa ohng dahl, pwohl, oh kep. Mwurin ah kasansalo, e idek rehrail ma mie nan pwungarail me men song. Irail koaros kauwada pehrail koa.

Elder Aoba mweidehng ekei pwihn pwulopwul koa en kohla sohngada dahme kapw me re perenkidahro. Irail lemehieng, mwurin arail kasawih ih, me e pahn udahn mengei. Ahpw, sohte emen irail pweida ni arail songen wiahda pwohl ehu. Irail indahier: “I sohte kak wia met!” “Dahme e nohn apwalki?” “Udahn e apwal.” Lokaia pwukat wiawiher ni klehi ah pihrseli nan perehu.

E peidek rehn me pwulopwul koa dahme re ahnekihki kahpwal lauden wiahda poahderi. Irail sapengki pasapeng kei: “I saikinte song,” “I saikinte kaskuhlki,” de “Sohte ahi koahiek.” Sang ni dahme pwerdahu, dahme irail indahkoa koaros mehlel: ahpw, kahrepe keioun kesemwpwal ohng arail sohte pweida iei pwehki klehio sohte mih nan werengen wihlo. Me pwulopwul koa lemehieng me irail kihdieng klehio nan werengehu, ahpw sang ni kesoun semen men, e sohte mih nan werenge. E indahng irail, “Kitail pilehu song wia met.”

Kilel
}Elder Aoba kin wiahda pottery

Ansou wet, Elder Aoba pwilikihdieng klehio nan werengen wihlo oh eri tepida kapir wihlo, wiahda ehu pwoahr nan werengen klehio. Ekei me pwulopwul koa pwurehng song. Ansou wet koaros tepida lopwolopw ni arail inda: “ikik, e sohte rerer,” “I kak wia met,” de “I wiadahr!” Ni mehlel, mwohmw koa sohte udahn kaselel, ahpw dahme pweidahro udahn wekisang ni arail keioun sohngadahu. Kahrepen arail pweida iei pwehki klehio udahn mih nan werengen wihlo.

Sampah wet me kitail kousoan loale duwehte nein soun wie poahderio nah wihl piripiro, oh marahrahn wihlo wukila. Duwehte klehi me mih pohn nein soun wie poahderio nah wihlo, kitail anahne pil mih nan werenge. Atail poahsoan, werengen atail mour, anahne Sises Krais oh Sapwelime rongamwahuo. Momourki mour me poahsoankihda Krais wehwehki kitail esehla duwen Sises Krais oh Sapwelime rongamwahuo oh kitail eri idawehn Ah karasaras oh kolokol Ah kosonned kan ni pwung.

Soukohp en kawahu Aiseia koasoaia, “Ahpw met, komwi aht pahpa; kiht me klehi, oh komwi aht soun doadoahngki klehi; oh kiht koaros wia mengin pehmw.”1

Ma atail mour pahn poahsoankihda Sises Krais, E kak pweida ni Ah pahn doadoahngkin kitail en wiahla isime kitail anahne wiahla pwe kitail en iang pwurala wasa me Ih oh Sahm Nanleng ketiket ie nan Wein Celestial. Peren me kitail kin pehm nan mour wet pahn pahsan mwahuen atail mour ah poahsoankihda padahk kan, karasaras, oh tomw en Sises Krais.

Riei ohl oh lih akan, I ipwidieng nan peneinei ehu me dih tohto iang towehda mwomwohdiso wet, eri kapai tohto oh peren en ahneki rongamwahu en Sises Krais me wia poahsoan en tiahk en peneinei. E sohte kin wiawi oh lau ngehi wia misineri men ni ahi pwulopwul me I diarada lipwalipw mwahu me rongamwahu en Sises Krais ahneki ohng irail me sohte ehu ansou kehn kapai kan nan arail mour. Ire tikitik wet nan Madiu kasalehda mwomwen irail kan me weliakapwala oh iangala rongamwahu en Sises Krais kin kehn: “Wein nanleng duwehte pai me ekiekla nan mohs, me ohl emen diar oh pwaindi; eri nan ah peren e kohla netkihla soahng koaros me ah oh pwainda mohso.”2

Mweidehng ie ien ehukiheng kumwail ehu karasaras sang nan Pwuken Mormon me kasalehda dahme emen me weliakapwala insenkihda en pwain pwe en kak ale peren pwehki ah diarada pai me Sises koasoaiahier nan karasaras en pai me ekiekila nan mohs ehu.

Taman nan pwuken Alma, iralaud 20 [rieisek], Ammon oh Lamoni seiseiloaklahng kahnihmw en Middoni pwe ira en rapahkihda oh kapitasang rien Ammon pwutak Aaron nan imweteng. Erein ara seiloak ira ahpw tuhwengedi en Lamoni ah pahpa, me nahnmwarki en mehn Laman ohng sahpw koaros.

Nahnmwarkio engiengkihda nah pwutak Lamoni ah ieiangih Ammon, misineri en Nephi men, me e wiahki ah imwintihti. E pehm me nah pwutako anahne iang towehda kamadipw laud ehu me e wiahiengehr nah pwutak kan oh aramas akan. Wen nahnmwarki en mehn Laman koa ah engieng, e ruwese nah pwutak Lamoni en kemehkihlaAmmon nah naipo. Ansou me Lamoni sohte peikieng, nahnmwarkio kihda pein nah naipo pwehn kemehla nah pwutako pwehki e sohte rong; ahpw Ammon supukedi pwe en doarehla en Lamoni mour. E ahpw powehdi nahnmwarkio mwurin ansou ieu oh kakete kihsang ah mour.

Iet me nahnmwarkio indahng Ammon ni ah diarada me ah mour mih nan kahpwal: “Ma ke pahn mweidiehla I pahn kihwei soahng koaros ke mwahuki, menda ma elepin ahi wehi.”3

Eri nahnmwarkio ahpw insenkihda en pwainki elepin ah wehi pwehn doarehla ah mour. Nahnmwarkio inenen pwuriamweikihla Ammon ah pekihte en mweidala rie pwutak Aaron oh iengehkoa sang nan imweteng oh me nah pwutak Lamoni en kolokolete ah wehi.

Mwurihsang, pwehki irair sohkesikpehu, rien Ammon pwutak Aaron ahpw lapwada sangehr nan imweteng en Middoni. Mwurin ah lapwadahr kamarain ehu lelehng en seiloaklahng wasa me nahnmwarki en mehn Laman koa mih ie oh kakaun pohn sahpwo. Aaron ahpw tuhwengehr nahnmwarkio oh ahneki ansou mwahu en padahkiheng kosonned kan en rongamwahu en Sises Krais, iangahki pilahn lap en doarehla.

En nahnmwarkio pasapeng ohng en Aaron ah padahk koa kak dierek nan ire tikitik 15 en Alma, iralaud 22: “Oh e wiawiher me mwurin Aaron ah kawehwedahr soahng koaros ohng ih, nahnmwarkio inda: Dahme I pahn wia pwe I en iang ahneki mour soutik me komw koasoaiahier? Ei, dahme I pahn wia pwe I en weliakapwala, kihsang ngehn sakanakan nan ahi mohngiong, oh alehda sapwelime Ngehn, pwe I en audaudkihda peren, pwe I en dehr lekidekla ni imwin rahno? Kilang, e inda, I pahn kihla soahng koaros ahi, ei, I pahn soikala ahi wehi, pwe I en kak alehdi peren laud wet.”

Me kapwuriamwei, nanmwarki en Lamanite me pahn tohnmeteikihla elepen ah weio pwe en mourla, uhd inangih tohnmeteikihla ah weio pwon pwe en kak alehdi peren me kin kohsang marainkihla, alehda, oh momouriki rongamwahu en Sises Krais.

Ahi pwoud, Nancy, iei emen me weliakapw ohng mwomwohdiso wet. Pak tohto e kin indahng ie nan pahr samwalahrkoa peren me e kin pehm nan eh mour sang ni ah diarada, alehda, oh momourki rongamwahu en Sises Krais wet. Sister Maynes ehukihda dahme e lelehngehr.

“Ni ahi pwulopwul mih nan sounpar 20 samwa, I lel ansou ieu nan ahi mour me I ese me I anahne wekidala mehkot pwe I en wiahla aramas peren men. I pehm me duwehte I wie peipeiseli oh sohte kahrepe mehlel oh ahi mehn kaweid, oh I sehse iawasa I pahn kohla pwe I en diar. Udahn I kin ese me mie Sahm Nanleng oh ekei ansou nan ahi mour kin kapakap, pepehm me E kin karonge.”

“Ni ahi tapihada ahi ropirop, I towehda mwomwohdiso tohto ahpw kin kalap pwurehng ahnekihda pepehm koahte oh insensued. I pehm me I inenen kapaida pwehki ahi kapakap ohng kaweid oh kahrepen ahi mour pasapengila, oh I alehdier rongamwahu en Sises Krais ni unsek. Ehdin ahi pehm me mie kahrepen ahi mour, oh pilahn en peren kihengehr peren mehlel nan ahi mour.”

Ehu irair sang nan Pwuken Mormon ni sansal kasalehda ia mwomwen momourki mour me poahsoankihda Krais kak audehkin kitail peren laud mendahte kahpwal laud akan me kapil kitail.

Mwurin Soukohp Lehi oh ah peneinei kohkohsangehr Serusalem nan pahr 600 mwohn Krais,irail kohkohkiseli erein sounpar 8 nan sapwtehno lau irail lela nan sahpw ehu me re kahdaniki Bountiful, me karanih oaroahr ehu. Nephi koasoaiahda mour en kasongosong nan sapwtehno ni duwe met: “Se ahneki lokolok laud oh kahpwal laud,… wen laud se sohte kak intingihedi koaros.”4

Ni arail koukousoan nan Bountiful, Kauno kapwukoahki Nephi en wiahda ehu sohp me pahn wa irail kote sehdo ohng ni sapwen inouo. Mwurin arail lelehr nan sapwen inouo, pingiping laud pwurehngehr tepida nan pwungen irail koa me poahsoanki ahr mour ohng Krais oh me sohte kamehlele ahpw kin idawehn karasaras en Laman oh Lemuel. Ni imwio, keperpen pei nan pwungen pwihn riau wet udahn laud mehlel me Nephi oh irail koa me kin idawehn padahk en Kauno tohrohrlahr oh tangehr kolahng nan sapwtehno pwe irail en kak doarehla arail mour. Ni ansouwet, sounpar 30 mwurin Lehi oh ahi peneinei kohkohsang Serusalem, Nephi wiahier koasoai kaselel oh kopwuriamwei ehu, mehlel mwurin ah intingihdier nan pwuhk sarawi kan duwen tohtohn kahpwal oh kasongosng me irail lelehng ni ansou reirei. Iet ah koasoai kan: “Oh e wiawiher me se [momourki] mour me kaperen.”5 Mendahte arail kahpwal akan, irail kak mourki mour kaperen pwehki arail poahsoankihda Krais oh Sapwelime rongamwahuo.

Riei ohl akan oh lih akan, duwehte klehi me mih pohn nein soun doadoahk en poahderio nah wihlo, atail mour anahne poahsoankihda pwung rehn Krais ma kitail pahn diar peren mehlel oh meleilei nan mour wet. Karasaras kan me nahnmwarki en mehn Laman kan; ahi pwoud, Nancy; oh mehn Nephi koa koaros utungada kosonned mehlel wet.

I kadehdehieng kumwail rahnwet me kitail kak iang diar meleileio, pereno, peren mehlelo ma kitail pilada momourki mour me poahsoankihda Krais, ni mwaren Sises Krais, amen.