Toktok blong God we I Mekem Man I Hapi

Plante long yumi we i stap mit long konfrens ia, i kam blong “harem toktok blong God we i mekem olgeta oli hapi, yes, toktok ia we i mekem sol we i gat soa i kam oraet bakegen” (Jekob 2:8). Toktok ia oli faenem long ol skripja mo long ol mesej blong ol lida blong yumi, i givim yumi hop mo gud filing i kam long medel blong tudak blong hadtaem.

Tru long eksperiens blong laef, yumi lanem se glad long wol ia i no fulwan, be long Jisas Kraes, glad blong yumi i fulwan (luk long D&C 101:36). Bae Hem i givim yumi paoa blong yumi no gotru long eni kaen hadtaem sapos glad blong Hem i kavremap yumi (luk long Alma 31:38).

Hat blong yumi i save fulap long trabol tingting taem yumi luk wan yumi lavem i safa long soa blong nogud sik.

Ded blong wan yumi lavem i save livim emti spes long sol blong yumi.

Taem sam long ol pikinini blong yumi oli kamaot long rod blong gospel, yumi filim se yumi rong mo no save se bae oli kasem ples we i no save finis o no.

Hop blong kasem wan selestial mared mo stanemap wan famli long laef ia i stat blong lus taem we taem i stap go.

Abius we i kam long olgeta we oli sapos blong lavem yumi i livim strong mak long sol blong yumi.

Taem hasban o waef i no fetful, i prapa spolem wan rilesensip we yumi bin hop se bae i no save finis.

Olgeta hadtaem ia mo sam moa, we oli pat blong taem ia long wol, samtaem oli mekem yumi askem yumiwan semfala kwestin ia we Profet Josef Smit i bin askem: “O God, ?yu yu stap wea?” (luk longD&C 121:1).

Long ol hadtaem ia long laef blong yumi, toktok blong God we i mekem man i hapi mo i hilim soa we i no oraet, i tekem mesej ia blong gud filing long hat mo maen blong yumi:

“Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo;

“Mo afta, sapos yu mekem gud blong stap strong, God bae i leftemap nem blong yu long heven; mo bae yu win ova long evri enemi blong yu” (luk long D&C 121:7–8).

Toktok blong God we i mekem man i hapi i fulumap yumi wetem hop, from yumi save se olgeta we oli stap fetful long taem blong hadtaem bae oli gat wan praes we i moa bigwan insaed long kingdom blong heven, from se “afta plante hadtaem, ol blesing oli kam” (luk long D&C 58:3–4).

Toktok blong God we i mekem man i hapi, olsem we i kamaot tru long ol profet, i givim yumi sekiuriti se siling blong yumi we i no save finis, wetem sapot blong stap fetful long ol tabu promes we Lod i givim long yumi blong yumi wok strong long wok blong trutok, bae i blesem yumi mo laen blong yumi (luk long Orson F. Whitney, in Conference Report, Epril 1929, 110).

Ol toktok ia i givim sekiuriti tu se, afta we yumi laef long wan fetful laef, bae yumi no lusum eni blesing from se yumi no mekem sam samting sapos yumi neva gat janis blong mekem olgeta samting ia. Sapos yumi bin laef fetful kasem taem yumi ded, bae “yumi gat evri blesing, laef olsem wan god, mo glori semmak olsem eni man o woman we i bin gat janis ia.” (Luk long The Teachings of Lorenzo Snow, ed. Clyde J. Williams [1984], 138.)

Nao. Hem i impoten blong andastanem se fasin blong safa mo gat hadtaem i save kam tu insaed long laef blong yumi sapos yumi no sakem sin wetem tru tingting. Presiden Marion G. Romni i tijim hemia wetem ol toktok ia: “Plante long ol safaring mo hadtaem we ol pipol blong wol ia oli gotru long olgeta, oli from sin we oli no sakem mo Lod i no fogivim. …Semmak olsem we safaring mo harem nogud i risal blong sin, hapines mo glad i risal blong fogivnes from sin” (insaed long Conference Report, Epril 1959, 11).

?From wanem nao taem yumi no sakem sin, i mekem yumi safa mo harem nogud?

Wan long ansa i we: “oli putum wan panismen i stap, mo oli givim wan stret loa, we i mekem se man i harem se hem i rong long tingting blong hem” (Alma 42:18; luk tu long ves 16). Profet Josef Smit i tijim se, yumi nao, yumi panisim yumiwan, mo trabol blong harem nogud long tingting blong yumi, i mekem se i bigwan i olsem wan lek blong faea mo salfa (luk long Teachings of Presidents of the Church: Joseph Smith [2007], 224).

Sapos yumi traem blong mekem tingting blong yumi i go daon taem yumi “traem blong mekem eskius long eni kaen wei from ol sin blong yumi,” (Alma 42:30) o taem yumi traem blong haedem ol sin ia, wan samting ia nomo bae yumi winim, i we bae yumi mekem Spirit i harem nogud (luk long D&C 121:37), mo stap pusumbak taem blong sakem sin. Kaen harem nogud ia, i blong smol taem, bae i tekem moa soa mo harem nogud long laef blong yumi, mo bae i daonem janis blong kam klin aot long sin.

Long ol kaen safaring ia, toktok blong God we i mekem man i hapi i tekem gud filing mo hop i kam; i stap talem long yumi se i gat spel long soa we sin i mekem. Spel ia i kam tru long sakrifaes blong Jisas Kraes blong pemaot man, mo i wok sapos yumi praktisim fet long Hem, sapos yumi sakem sin, mo stap obei long ol komanmen blong Hem.

Hem i impoten blong yumi luksave se, semmak olsem fasin blong kam klin aot long sin, fasin blong sakem sin i wan rod, mo i no wan samting we i hapen long wan taem nomo. Hem i nidim blong mekem oltaem, long wanwan step.

Eksampol. Taem yumi tekem sakramen, yumi soem Lod se bae yumi tingbaot Hem oltaem mo stap obei long ol komanmen blong Hem. Hemia i wei blong soem tru tingting blong yumi.

Long tetaem ia we yumi stat blong tingbaot Hem mo obei long ol komanmen blong Hem evri dei—mo i no long Sabat dei nomo—hem i taem ia we fasin blong kam klin aot long sin i stat blong wok mo promes blong Hem blong gat Spirit blong Hem wetem yumi i stat blong hapen.

Sapos yumi no obei stret semmak olsem we yumi tingting long hem, bae fasin blong kam klin aot long sin i lus afta smol taem, mo Spirit i stat blong kamaot long yumi. Bae yumi stap tekem janis blong stap givim ona long Hem wetem maot blong yumi, be yumi stap putum hat blong yumi longwe long Hem (luk long Seken Nifae 27:25)..

Antap long gud filing, toktok blong God we i mekem man i hapi i wonem yumi se rod ia, blong kasem fasin blong kam klin aot long sin, i save stop taem yumi go fas wetem “ol samting nating blong wol ia,” mo i save kambak, tru long fet, sapos yumi sakem sin wetem tru tingting mo putum tingting i stap daon (luk long D&C 20:5–6)..

?Wanem nao sam long olgeta samting nating blong wol ia we i save stopem yumi blong kam klin aot long sin mo i go wetem fasin blong kipim Sabat dei i tabu?

Sam eksampol i olsem: kam let long sakramen miting mo no gat gud risen from; yumi kam be yumi no luklukbak long yumiwan mo kakae bred mo dring long kap ia we yumi no klin inaf (luk long Fas Korin 11:28); yumi kam be yumi no konfes long ol sin blong yumi fastaem, o yumi no askem God blong fogivim ol sin ia.

Ol nara eksampol: yumi no gat respek mo stap sendem ol mesej long lektronik tul blong yumi, yumi aot long miting afta we yumi tekem sakramen, o yumi tekpat long ol aktiviti insaed long hom blong yumi we i no stret long tabu dei ia.

?Wanem nao i wan long ol risen we, yumi, we yumi save evri samting ia, i stap mestem blong holem Sabat dei i tabu?

Long buk blong Aesea, yumi save faenem ansa long hemia, we nomata i tokbaot Sabat, i stret tu long ol narafala komanmen we yumi mas obei: “Yufala i mas mekem Sabat dei i tabu. Yufala i no mekem bisnis blong yufala long dei ia” (Aesea 58:13).

Ol ki toktok oli “mekem bisnis blong yufala,” o long nara toktok, mekem tingting blong God. Plante taem, tingting blong yumi—we ol tingting, ol wantem blong man we i folem fasin blong wol—i go agensem tingting blong God. Profet Brigham Yang i tijim se “ taem tingting, ol wantem, mo ol filing blong wan oli folem tingting blong God mo wanem Hem i askem, bae hem ia, God i mekem hem i tabu. From tingting blong God i kavremap tingting blong mi, fasin ia bae i lidim mi long evri gud samting, mo bae mi kasem hat blong king mo nomo save ded long ol laef we oli no save finis” (Deseret News, 7 Sept. 1854, 1).

Toktok blong God we i mekem man i hapi i stap invaetem yumi blong yusum paoa blong Atonmen, blong yumi yusum long yumiwan, mo blong kam stret wetem tingting blong Hem—mo i no tingting blong devel mo bodi—blong mekem se tru long gladhat blong Hem, bae Hem i save sevem yumi (luk long Seken Nifae 10:24–25)..

Toktok blong God we i mekem man i hapi, we yumi stap serem tedei, i soem yumi nid blong stap gohed blong sakem sin long laef blong yumi blong paoa blong Tabu Spirit i stap wetem yumi longtaem.

Taem yumi gat Spirit, bae i mekem yumi ol moa gud pipol. Bae i “toktok pis mo glad long sol blong yumi; bae i tekemaot nogud tingting, strong fasin, fasin blong wantem samting, mo evri ivel fasin aot long hat blong yumi; mo ful tingting blong yumi i blong mekem gud, tekem stret mo gud fasin i kam, mo bildimap kingdom blong God” (luk long Teachings: Joseph Smith, 98).

Wetem paoa blong Tabu Spirit, bae yumi no harem nogud long toktok o fasin, bae yumi no mekem nogud long narawan; bae yumi moa hapi, mo maen bae i moa klia. Lav blong yumi long ol narawan i kam antap. Bae yumi wantem moa blong fogiv mo serem hapines raon long yumi.

Bae yumi talem tangkyu blong luk hao ol narawan oli kam antap, mo bae yumi lukluk long gud saed blong ol nara man.

Hem i prea blong mi, se bae yumi gotru long glad ia we i kam taem yumi stap traehad blong laef long stret mo gud fasin, mo se bae yumi holemtaet Tabu Spirit i kompanion long laef blong yumi tru long tru fasin blong sakem sin we i gogohed. Bae yumi kam ol pipol we i gud moa, mo famli bae i gat blesing. Long olgeta prinsipol ia, mi testifae olsem long tabu nem blong Jisas Kraes, amen.