Sa’ xnaq’ ru li Dios

Ex was wiitz’in raarookex inb’aan, b’antiox eere lee xaqab’ankil inwankil ewer choq’ komon sa’ lix Molameb’ li Kab’laju chi Apostol. Ch’a’aj chiwu xyeeb’al k’a’jo’ xnimal ru a’an choq’ we. Tz’aqal ninb’antioxi re lix xaqab’ankil inwankil li wiib’ chi chaab’il ixq sa’ inyu’am, li wixaqil, li xRuth, ut li qarab’in q’axal raaro qab’aan, li xAshley.

Lin b’oqb’al naxk’ut chi yaal lix yaalalil li raatin li Qaawa’ sa’ xtiklajik li k’ojlajik a’in: “Re naq lix tzʼaqalil lin evangelio taaruuq taajultikaaq xbʼaanebʼ li qʼunebʼ xmetzʼew ut li moko nim ta xnaʼlebʼebʼ toj saʼ xmaril li ruchichʼochʼ ”.¹ Laa’in jun reheb’ li q’uneb’ xmetz’ew ut moko nim ta xna’leb’eb’. Junxil chaq, naq kinb’oqe’ choq’ obiisp re jun teep sa’ releb’aal saq’e re li Estados Unidos, li was, tiix b’ayaq ut nim wi’chik xna’leb’ chiwu, kinixb’oq sa’ xukub’ ch’iich’. A’an kixye, “Laa’at tento taanaw naq moko b’oqb’ilat ta xb’aan li Qaawa’ xb’aan li k’a’ru aab’aanuhom sa’ laa yu’am. Choq’ aawe, maare b’oqb’ilat us ta li k’a’ru aab’aanuhom. Li Qaawa’ xb’oq’ok aawe choq’ re li naraj xb’aanunkil aawik’in, ut a’an taak’ulmanq ka’ajwi’ wi taab’aanu jo’ naraj A’an”. Nink’e reetal naq lix chaab’il na’leb’ li was q’axal wi’chik wan xwankil anajwan.

Wan li k’a’ru q’axal chaab’il li na’uxman sa’ xk’anjel jun aj k’amol aatin naq a’an na’ok chixk’eeb’al reetal naq lix b’oqb’al moko choq’ re ta a’an; a’an b’an choq’ re li Qaawa’, lix k’anjel, ut li ralal xk’ajol li qaChoxahil Yuwa’. Naweek’a naq juntaq’eet nak’ulman rik’in jun li apostol. Li b’oqb’al a’in, moko choq’ we ta. A’an choq’ re li Qaawa’, lix k’anjel, ut li ralal xk’ajol li qaChoxahil Yuwa’. Maak’a’ naxye k’a’ru li qak’anjel malaj qab’oqb’al sa’ li Iglees, re k’anjelak chi chaab’il, tento took’anjelaq rik’in li nawom naq chixjunjunqaleb’ li noko’k’anjelak chiru a’an jun “[raab’il] musiq’ejil alalb’ej malaj rab’inb’ej chiru choxahil na’b’ej yuwa’b’ej, ut xb’aan a’an … wan xchoxahilal li ak xk’am chaq, ut li toj taareechani”.²

Sa’ li trab’aaj xinwan wi’, laa’in jun aj b’anonel re li ch’oolej ut xinb’aanu li operacion chirisinkil ch’oolej ut chixk’eeb’al reeqaj chi ak’il. Rik’in naq q’axal yajeb’ naab’aleb’ reheb’ li ke’chal wik’in, li wixaqil kixye jo’ jun se’ek naq moko chaab’il ta chiru anihaq naq taa’ok choq’ jun reheb’ li wula’. Chi maak’a’ li se’ek, kiwil naab’aleb’ chi kamk, ut kinnajtob’resi wib’ rik’ineb’ rik’in li week’ahom naq ink’a’ us taa’elq choq’ reheb’. Chi jo’kan, kotz’b’il li eek’ahom re rahil ch’oolejil ut sachok ajom.

Sa’ 1986, jun ch’ajom winq, laj Chad xk’ab’a’, kixk’ul xch’a’ajkilal rik’in xch’ool ut kixk’ul jun ak’ ch’oolej. Chiru 15 tana’ chihab’, chaab’il xyu’am. Laj Chad kixb’aanu chixjunil li na’ajman re naq taawanq xkawail li roq ruq’ ut taaruuq tixyu’ami xyu’am jo’ li jun ch’ol chik. Xko’o sa’ mision jo’ aj k’amol aatin, kitraab’ajik, ut a’an chaq chaab’il alalb’ej chiru xna’ xyuwa’. A’b’anan, eb’ li roso’jik chihab’ re xyu’am, ch’a’ajeb’, ut rajlal yoo chi xik sa’ li b’anleb’aal.

Sa’ jun q’ojyin, kik’ame’ chaq sa’ li b’anleb’aal rik’in li nimla ch’a’ajkilal re lix ch’ool. Eb’ li wech aj k’anjel ut laa’in kook’anjelak chi kaw re xk’irtesinkil. Sa’ xraqik, kink’e reetal naq ink’a’ chik naru taqatenq’a. Kiqakanab’ li k’a’ru yooko, ut kinyaab’asi naq kamenaq chik. Us ta ra inch’ool ut xsach wajom, toj kink’am wib’ jo’ jun aj b’aanonel. Kink’oxla sa’ ink’a’uxl, “Chaab’il li tenq’ kixk’ul laj Chad. Naab’al chik xchihab’ kixk’ul sa’ xyu’am chiru naq maak’a’ raj li tenq’ a’an”. Li najtob’resink-ib’ yookin chixb’aanunkil sa’ ink’a’uxl kisachman sa’ junpaat naq ke’ok xna’ xyuwa’ sa’ li na’ajej wankin wi’ ut naq ke’ril chi jiljo aran li ralal kamenaq. Sa’ li hoonal a’an, kiwil laj Chad jo’ ilb’il sa’ xnaq’ ruheb’ xna’ xyuwa’. Kiwil li nimla yo’onihom ut li k’a’ru ke’royb’eni choq’ re, li rajom xch’ooleb’ naq taawanq b’ayaq chik xyu’am ut naq taa’usaaq. Naq kink’e reetal a’in, kin’ok chi yaab’ak. Chanchan naq jalb’il li qak’anjel ut rik’in jun usilal maajo’q’e taasachq sa’ inch’ool, lix na’ xyuwa’ laj Chad ke’xk’ojob’ inch’ool laa’in.

Anajwan nink’e reetal naq sa’ li Iglees, re took’anjelaq chi chaab’il chiru li qas qiitz’in tento naq taqileb’ jo’ ilb’ileb’ sa’ xnaq’ ruheb’ li na’b’ej yuwa’b’ej, sa’ xnaq’ ru li qaChoxahil Yuwa’. Ka’ajwi’ chi jo’kan tooruuq too’ok chixtawb’al ru lix tz’aqal xtz’aq jun li aamej. Ka’ajwi’ chi jo’kan tooruuq chixk’eeb’al reetal li rahok li nareek’a li qaChoxahil Yuwa’ choq’ reheb’ chixjunil li ralal xk’ajol. Ka’ajwi’ chi jo’kan tooruuq chixk’eeb’al reetal lix k’oxlahom li Kolonel chirixeb’. Ink’a’ naru taqatz’aqob’resi chi tz’aqal li qateneb’ankil li nachal rik’in li qasumwank, a’an li yaab’ak rik’ineb’ li neke’yaab’ak ut li xk’ojob’ankileb’ xch’ool li neke’ajok k’ojb’aak xch’ool, wi ink’a’ naqileb’ jo’ ilb’ile’b sa’ xnaq’ ru li Dios.³ Li xnimal ru na’leb’ a’in tixte li qach’ool re rilb’al lix ch’a’ajkilal, li xiw, ut xrahilal xch’ool li qas qiitz’in. A’ut li qaChoxahil Yuwa’ toxtenq’a ut tixk’ojob’ qach’ool, jo’ chanru ke’xk’ojob’ inch’ool xna’ xyuwa’ laj Chad junxil. Tento naq wankeb’ xnaq’ qu li neke’ilok, li qaxik li neke’ab’in, ut li qach’ool li neke’xnawok ut neke’eek’ank wi taqaj xtz’aqob’resinkil li k’anjel re kolok jo’ rajlal elajinb’ilo chixb’aanunkil xb’aan li Awa’b’ej Thomas S. Monson.⁴

Ka’ajwi’ naq noko’ilok rik’in xnaq’ ru li qaChoxahil Yuwa’ taaruuq toonujob’resiiq rik’in “li saq ruhil rahok narahok wi’ li Kristo”.⁵ Wulaj wulaj tento taqatz’aama chiru li Dios li rahok a’in. Laj Mormon kixye: “Joʼkan ut, ex was wiitzʼin raarookex inbʼaan, tijonqex chiru li Yuwaʼbʼej chi anchal xmetzʼew eechʼool, re texnujaq rikʼin li rahok aʼin, li naxkʼe saʼ xbʼeenebʼ chixjunil li tzʼaqal nekeʼtaaqenk re li Jesukristo, li Ralal”.⁶

Chi anchal inch’ool nawaj wank jo’ jun tz’aqal aj taaqenel re li Jesukristo.⁷ Ninra A’an. Nin’oxloq’ink re a’an. Ninch’olob’ xyaalal naq yo’yo. Ninch’olob’ xyaalal naq a’an li Yulb’il, li Mesias. Laa’in jun aj yehol nawom li ruxtaan, lix toqob’ank-u, ut lix rahom q’axal xninqaleb’ ru. Nink’e ajwi’ xnawom inch’ool rik’ineb’ li apostol li, sa’ li chihab’ 2000, ke’xye naq “li Jesus a’an li Yo’yookil Kristo, li Ralal li Dios, maak’a’ xkamik. … A’an lix saqen, lix yu’am, ut lix yo’onihom li ruchich’och’ ”.⁸

Ninch’olob’ xyaalal naq sa’ jun kutan sa’ li chihab’ 1820 sa’ jun li k’iche’ sa’ xweent Nueva York, li Qaawa’ waklijenaq chi yo’yo kixk’ut rib’, rochb’een ajwi’ li Dios, li qaChoxahil Yuwa’, chiru li Profeet aj Jose Smith, tz’aqal jo’ chanru yeeb’il resil xb’aan laj Jose Smith. Wankeb’ lix lawil li tijonelil sa’ xb’een li ruchich’och’ anajwan re xk’eeb’al xwankil li k’ojob’ankil k’anjel re li kolb’a-ib’. Ninnaw a’an. Sa’ xk’ab’a’ li Jesukristo, amen.