Na roto i te mata o te Atua

E a’u mau taea’e e a’u mau tuahine here, mauruuru no to outou patururaa mai ia’u i nanahi ra ei melo no te Pupu no te Tino Ahuru Ma Piti Aposetolo. E mea fifi roa ia faaite atu i te faufaa rahi o te reira no’u. Ua mauruuru taa’e au i te patururaa a na vahine faahiahia e piti i roto i to’u oraraa: ta’u vahine, o Ruth, e ta maua tamahine here, here, here, o Ashley.

Te faaite papû nei teie piiraa to’u i te parau mau o te faahitiraa a te Fatu i te omuaraa o teie tau tuuraa : « Ia porohia’tu te îraa o ta’u evanelia e te feia paruparu e te mea ite ore hoi i te mau hopea o te ao nei ».¹ O vau te hoê o te reira feia paruparu e te mea ite ore hoi. Ahuru matahiti i teie nei, i te taime a piihia ai au ei episekopo no te hoê paroisa i te pae hitia o te râ o te mau Hau Amui no Marite, niuniu mai nei to’u tuaana paari rii a’e e te maramarama rii a’e ia’u. Na ô mai nei e, « e mea ti’a ia oe ia ite e, aita te Atua i pii ia oe no te hoê a’e ohipa aore oe i rave. No oe, e mea papû e, ua piihia oe ma te hi’o-ore-hia te ohipa ta oe i rave. Ua pii te Fatu ia oe no te ohipa Ta’na e hinaaro ia rave na roto ia oe, e o te tupu mai te mea e, e rave oe na roto ana’e i Ta’na raveraa ». Te ite nei au e, teie ite paari no roto mai i te hoê tuaana, ua rahi roa’tu te tanoraa i teie mahana.

E tupu te hoê ohipa faahiahia i roto i te taviniraa a te hoê misionare mai te mea e, e ite oia e, te piiraa, e ere ïa no ni’a ia’na ; no ni’a râ i te Fatu, Ta’na ohipa, e no ni’a i te mau tamarii a te Metua i te ao ra. Te mana’o nei au e, hoê â huru te reira no te hoê Aposetolo. Teie piiraa, e ere no ni’a ia’u. No ni’a râ i te Fatu, Ta’na ohipa e no ni’a i te mau tamarii a te Metua i te ao ra. Noa’tu te huru o te ohipa e aore ra, te piiraa i roto i te Ekalesia, no te tavini ma te maitai, e ti’a i te hoê taata ia tavini ma te ite e, te mau taata ato’a ta tatou e tavini « e tamaiti e aore ra, e tamahine varua here ïa na te mau metua no te ra’i ra, e, i roto i te reira ti’araa … e huru, e e haere’a hanahana ïa to’na ».²

I roto i to’u toro’a i mutaa iho ra, e taote aravihi au no te mafatu paruparu e te tauiraa mafatu. No te rahi o te feia ma’i teimaha roa, ua ite au e rave rahi taata tei pohe. E parau hoata ta’u vahine e, e mea fifi roa ia riro ei taata ma’i na’u. I te mau faaooraa atoa na piha’i iho, ua roaa ia’u te ite no te arai i to’u mau mana’o pe’ape’a ia ore ana’e te ohipa e afaro. Na roto i te reira, ua ti’a ia’u ia tamarû i te mau mana’o oto e te pe’ape’a.

I te matahiti 1986, ua roohia te hoê tamaiti, o Chad to’na i’oa, i te ma’i mafatu paruparu, e ua farii te tauiraa i to’na mafatu. E rave rahi matahiti to’na ora maitairaa. Ua rave o Chad i te mau mea atoa i ti’a ia’na ia rave ia maitai noa to’na ea e ia ora i te hoê oraraa matarohia. Ua tavini oia i te hoê misioni, ua rave i te ohipa, e ua riro oia ei tamaiti faaroo i to’na na metua. Tera râ, i te mau matahiti hopea o to’na oraraa, ua fifi roa oia, e e mea pinepine oia i te haere i te fare ma’i.

I te hoê ahiahi, ua hopoihia oia i te piha ati rû o te fare ma’i no te ma’i mafatu tei tupu. Ua rave maoro maua o to’u hoa ohipa no te faaho’i mai i to’na ohuraa toto. I te pae hopea, ua papû a’era e, eita o Chad e ora. Ua faaea maua i te ohipa, e ua faaoti a’era vau e, ua pohe oia. Noa’tu e, te vai ra te mana’o oto e te pe’ape’a, ua tape’a vau i te huru o te taata toro’a. Ua feruri au i roto ia’u iho e, « ua farii Chad i te aupururaa maitai. Ua ti’a ia’na ia ora maoro atu â ». Ua mutu râ taua mau mana’o pe’ape’a no’u ra i te taime a tomo mai ai to’na na metua i roto i te piha ati rû, e a ite ai i ta raua tamaiti te tarava noa ra i ni’a i te amuraa maa tapuraa. I taua taime ra, ua hi’o vau ia Chad na roto i te mata o to’na metua vahine e to’na metua tane. Ua ite a’era vau i to raua ti’aturiraa rahi no’na, to raua hinaaro rahi ia ora oia maa vahi iti a’e i te maoro, e maa vahi iti a’e i te maitai. Na roto i taua iteraa ra, ua haamata ihora vau i te ta’i. Ua taui te ohipa i taua taime ra, e na roto i te here, eita e mo’ehia ia’u, ua tamahanahana mai na metua o Chad ia’u.

Te ite nei au i teie nei e, i roto i te Ekalesia, no te tavini maitai ia vetahi ê ra, titauhia ia tatou ia hi’o ia ratou na roto i te mata o te metua, na roto i te mata o te Metua i te ao ra. I reira ana’e e nehenehe ai ia tatou ia haamata i te haroaroa i te faufaa mau o te hoê varua. I reira ana’e e ti’a ai ia tatou ia ite i te here o te Metua i te ao ra no Ta’na mau tamarii paato’a. I reira ana’e e nenehehe ai tatou e ite i te mana’o aupuru o te Faaora no ratou. Eita e hope roa ia tatou ia faaoti i ta tatou hopoi’a fafauhia ia oto e te feia e oto ra, e ia tamahanahana i te feia e hinaaro i te tamahanahana, maoti râ, e hi’o tatou ia ratou na roto i te mata o te Atua.³ Na teie hi’oraa e iriti i to tatou aau i mua i te pe’ape’a, te mata’u e te mafatu oto o vetahi ê. Tera râ, e tauturu mai e e tamahanahana mai te Metua i te ao ra ia tatou, mai na metua o Chad i tamahanahana mai ia’u tau matahiti i ma’iri a’e nei. Ei mata ite to tatou e ti’a ai, ei taria faaroo, e ei aau ite e, te rave ra anei tatou i te ohipa faaoraraa tei faaitoito-pinepine-hia mai e te Peresideni Thomas S. Monson.⁴

Mai te mea e, e hi’o tatou na roto ana’e i te mata o te Metua i te ao ra, ei reira tatou e faaîhia ai « i te hinaaro mau i te Mesia ».⁵ E ti’a ia tatou i te mau mahana ato’a, ia taparu i te Atua i teie here. Ua a’o mai o Moromona e : « No reira, e au mau taea’e here, e pure atu i te Metua ma te puai hope o te aau ia î outou i teie nei aroha, o ta’na i ho mai i te taata ato’a e pee mau i ta’na tamaiti ia Iesu Mesia ».⁶

Ma to’u aau ato’a, te hinaaro nei au ia riro ei pipi mau na Iesu Mesia.⁷ Te here nei au Ia’na. Te haamori nei au Ia’na. Te faaite nei au e, te vai mau nei Oia. Te faaite nei au e, o Oia tei Faatahinuhia, te Mesia. Ua riro vau ei ite no to’na maitai, To’na aroha e To’na here faito ore. Te amui nei au i to’u iteraa papû i to te mau Aposetolo tei faaite papû, i te matahiti 2000 ra e, « O Iesu te Mesia ora, te Tamaiti pohe ore a te Atua … O Oia te maramarama, te ora e te ti’aturiraa a to te ao nei ».⁸

Te faaite papû nei au e, I te hoê mahana i te matahiti 1820 i te tuhaa fenua no New York, ua fâ mai te Fatu tei ti’a faahou, e te Atua, to tatou Metua i te ao ra, i te peropheta Iosepha Semita, mai ta Iosepha Semita i parau ra. Ua na reira Raua. Tei ni’a i te fenua nei te mau taviri autahu’araa i teie mahana, o te tatara i te mau oro’a faaoraraa e te faateiteiraa. Ua ite au i te reira. Na roto i te i’oa o Iesu Mesia ra, amene.